ସ୍କୁଲ ଶିକ୍ଷା କ୍ଷେତ୍ରରେ ରାଜ୍ୟର ନୈରାଶ୍ୟଜନକ ପ୍ରଦର୍ଶନ। ୧୦ରୁ ୨୪କୁ ଖସିଲା ରାଜ୍ୟର ରାଙ୍କି। କେନ୍ଦ୍ର ଶିକ୍ଷା ମନ୍ତ୍ରାଳୟର ସ୍କୁଲ ଶିକ୍ଷା ବିଭାଗ ପକ୍ଷରୁ ପ୍ରକାଶିତ ପର୍ଫର୍ମାନ୍ସ ଗ୍ରେଡିଂ ଇଣ୍ଡେକ୍ସରୁ ସାମ୍ନାକୁ ଆସିଲା ତଥ୍ୟ। ୨୦୨୦-୨୧ ଶିକ୍ଷାବର୍ଷରେ ଓଡ଼ିଶାର ସ୍ଥାନ ଥିଲା ୧୦।
ଦେଶବ୍ୟାପୀ ଶିକ୍ଷାର ଗୁଣବତ୍ତା, ବିଦ୍ୟାଳୟକୁ ପ୍ରବେଶ ସୁବିଧା, ଭିତ୍ତିଭୂମି, ଶିକ୍ଷକ ଶିକ୍ଷା ଓ ତାଲିମ ନେଇ ସାରା ଦେଶରେ ହୋଇଥିବା ସର୍ଭେରେ ଓଡ଼ିଶା ପଛରେ ପଡିଯାଇଛି। ଦୁଇ ବର୍ଷ ଭିତରେ ସ୍କୁଲ ଶିକ୍ଷାରେ ଓଡ଼ିଶାର ଏପରି ବିପର୍ଯ୍ୟୟକୁ ନେଇ ଚିନ୍ତା ପ୍ରକଟ କଲେଣି ଶିକ୍ଷାବିତ। ରାଜ୍ୟର ମୋଟ ୩୦ ଜିଲ୍ଲା ଭିତରୁ ୮ ଜିଲ୍ଲାର ପ୍ରଦର୍ଶନ ଅତ୍ୟନ୍ତ ନୈରାଶ୍ୟପୂର୍ଣ୍ଣ ରହିଥିବା ପିଜିଇ ରିପୋର୍ଟରୁ ସ୍ପଷ୍ଟ ହୋଇଛି।
ପିଜିଇ ତାଲିକାରେ ଗତ ଶିକ୍ଷା ବର୍ଷରେ ରାଜ୍ୟ ଦଶମ ସ୍ଥାନରୁ ଖସି ୨୪ସ୍ଥାନରେ ପହଞ୍ଚିଛି। ଏଥିରେ ଜଗତସିଂହପୁର, କଟକ, ଭଦ୍ରକ, ଗଂଜାମ, ପୁରୀ ଓ ଖୋର୍ଦ୍ଧାର ପ୍ରଦର୍ଶନ ସନ୍ତୋଷଜନକ ଥିବା ବେଳେ ୨୨ଟି ଜିଲ୍ଲାର ଗ୍ରେଡ୍ ଉତ୍ତମ ରହିଛି। ଏହି ତାଲିକାର ରାଜ୍ୟର ରାୟଗଡ଼ା ଓ କୋରାପୁଟର ଜିଲ୍ଳାର ଗ୍ରେଡ୍ ସବୁଠାରୁ ଖରାପ ରହିଛି। ରାଜ୍ୟ ସରକାର ୫ଟି ଅନ୍ତର୍ଗତ ରାଜ୍ୟର ସ୍କୁଲ ଗୁଡିକୁ ବିକଶିତ କରିଥିବା ଓ ସ୍କୁଲ ଶିକ୍ଷା କ୍ଷେତ୍ରରେ ସ୍ୱଚ୍ଛତା ଆଣିବା ନେଇ ଡିଣ୍ଡିମ ପିଟୁଥିବା ବେଳେ କେନ୍ଦ୍ର ଶିକ୍ଷା ମନ୍ତ୍ରଣାଳୟର ରିପୋର୍ଟ ସରକାର ପାଇଁ ଅଡୁଆ ହୋଇଛି। ଏହାକୁ ନେଇ ବିରୋଧୀ ସରକାରକୁ ଘେରିବାକୁ ଅଣ୍ଟାଭିଡିଲେଣି।
ରାଜ୍ୟ ବିଜେପି ସାଧାରଣ ସମ୍ପାଦକ ଲେଖାଶ୍ରୀ ସାମନ୍ତସିଂହାର ଏହି ରିପୋର୍ଟକୁ ନେଇ ସରକାରକୁ ଆକ୍ରମଣ କରିଛନ୍ତି। ସାମନ୍ତସିଂହାର କହିଛନ୍ତି କି, ଏହା ରାଜ୍ୟ ସରକାରଙ୍କ ପାଇଁ ଆଇନା। ଏହି ସରକାର ଶାସନ ନୁହେଁ, କ୍ଷମତା ଲୋଭରେ ରହୁଛି। ୫ଟି ଟ୍ରାନ୍ସଫରମେସନ୍ କେବଳ ଜଣେ ବ୍ୟକ୍ତିଗତ ସହାୟକଙ୍କୁ ନେତା କରିବା ପାଇଁ କରାଯାଇଛି। ସ୍କୁଲର ଭିତ୍ତିଭୂମି ଠିକ୍ ନାହିଁ । ଶିକ୍ଷକ ନାହାନ୍ତି। ପାଇଖାନା ନାହିଁ । କେବଳ ସବୁଜ ରଙ୍ଗ ଦେଇ ୫ଟି ବ୍ୟବସ୍ଥା ଆଣି ସଚିବଙ୍କୁ ନେତା କରିବାକୁ ଖାଲି ନିଆଯାଉଛି ପଦକ୍ଷେପ ବୋଲି ଅଭିଯୋଗ ଆଣିଛନ୍ତି ସାମନ୍ତସିଂହାର।
ଅନ୍ୟପକ୍ଷରେ ବିଜେଡି ବିଧାୟକ ଦେବୀ ପ୍ରସାଦ ମିଶ୍ର କହିଛନ୍ତି, ରାଜ୍ୟରେ ଶିକ୍ଷାର ମାନ କମି ନାହିଁ। ସ୍କୁଲ ଶିକ୍ଷା ଲାଗି କେନ୍ଦ୍ର ସରକାର ଏବଂ ତାଙ୍କର ଅନୁଶୀଳନ ସଂସ୍ଥା ପ୍ରଶଂସା କରିଛନ୍ତି। ଫାଇଭ ଟି’ ଅଧୀନରେ ରାଜ୍ୟରେ ସ୍କୁଲରେ ଡିଜିଟାଲ ପ୍ରୟୋଗ ଏବଂ ଭିତ୍ତିଭୂମି ବିକାଶ ପାଇଁ ପଦକ୍ଷେପ ନିଆଯାଉଛି। କେଉଁ ଦିଗକୁ ନେଇ ସେମାନେ ମୂଲ୍ୟାୟନ କରିଛନ୍ତି, ତାହାକୁ ଦେଖିବାକୁ ପଡ଼ିବ। ସେ ଆଗକୁ ଆହୁରି କହିଛନ୍ତି, ରାଜ୍ୟରେ ଶିକ୍ଷାର ମାନ କମିବା କଥା ଗାଁ ଗହଳି ଲୋକଙ୍କୁ ପଚାରନ୍ତୁ। ସ୍କୁଲ କମିଟିକୁ ପଚାରନ୍ତୁ। ଶିକ୍ଷକ ସମାଜ, ଅଭଭାବକ ଏବଂ ଛାତ୍ରଛାତ୍ରୀଙ୍କୁ ପଚାରିଲେ ଉତ୍ତର ପାଇଯିବେ। ସମସ୍ତେ ଖୁସି ଗାଁ ସ୍କୁଲରେ ସହରୀ ସୁବିଧା ଉପଲବ୍ଧ ହେଉଛି।
