ପ୍ରଶାସନିକ ଚାକିରି ଛାଡି ରାଜନୀତିରେ ପାଦ ଥାପିଥିଲେ। ପ୍ରଥମ ନିର୍ବାଚନରେ ମଧ୍ୟ ବିଜୟୀ ହେଲେ। ଲୋକଙ୍କ ଭରସା ସହ ବିରୋଧୀଙ୍କ ସମ୍ମାନ ତ ପାଇଲେ ହେଲେ ଦଳୀୟ କର୍ମୀଙ୍କ ଦ୍ବାରା ହୋଇପାରିଲେ ନାହିଁ ଗ୍ରହଣୀୟ। ଦଳରେ କଣଠେଁସ ହୋଇ ରହିଯାଇଛନ୍ତି। ତଥାପି ହରାଇ ନାହାନ୍ତି ଧୈର୍ଯ୍ୟ କି ସାହସ। ଏକଲା ଚଲୋ ନୀତିରେ ଲୋକଙ୍କ ସହ ମିଶୁଛନ୍ତି। ସେମାନଙ୍କ ସୁବିଧା ଅସୁବିଧାରେ ଠିଆ ହେଉଛନ୍ତି ଓ ଯଥା ସମ୍ଭବ ଲୋକଙ୍କ ସମସ୍ୟାର ସମାଧାନ କରୁଛନ୍ତି। ସେ ଯେଉଁଠିକୁ ଯାଉଛନ୍ତି, ଲୋକେ ସ୍ବତପ୍ରବୃତ୍ତ ଭାବେ ତାଙ୍କୁ ଭେଟିବାକୁ ଧାଉଁଛନ୍ତି। ବିଭିନ୍ନ ଜିଲ୍ଲାରେ ତାଙ୍କ ପାଇଁ ହେଉଥିବା ଜନସମାଗମ ଦେଖି ସେ ହିଁ ରାଜ୍ୟର ପରବର୍ତ୍ତୀ ମୁଖ୍ୟମନ୍ତ୍ରୀ ପ୍ରାର୍ଥୀ ପାଇଁ ଯୋଗ୍ୟ ବୋଲି ଲୋକେ ଚର୍ଚ୍ଚା କରୁଥିଲେ।
ଆଉ ସବୁ ଚର୍ଚ୍ଚା ଏବେ ଚର୍ଚ୍ଚାରେ ରହିଯିବ ବୋଲି ନୂଆ ଚର୍ଚ୍ଚା ହେଲାଣି। ଏତେ ସବୁ କହିବା ପରେ ଆପଣମାନେ ନିଶ୍ଚିତ ଜାଣିସାରିଥିବେ ଆମେ କାହା ବିଷୟରେ କହୁଛୁ। ହଁ ଭୁବନେଶ୍ବର ସାଂସଦ ତଥା ଡେୟାରିଂ ଲେଡି ଅପରାଜିତା ଷଡଙ୍ଗୀ। ରାଜ୍ୟ ଦଳୀୟ କର୍ମୀଙ୍କ ସହ ତାଙ୍କର ଯତିପାତ ପଡେନି। ରାଜ୍ୟ ବିଜେପିର ସବୁ ବଡ ନେତା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମର୍ଥକ ବୋଲି ରାଜନୀତିରେ ରୁଚି ରଖୁଥିବା ଲୋକେ କୁହନ୍ତି। ତେଣୁ ରାଜ୍ୟ ବିଜେପି ତାଙ୍କୁ କୌଣସି କାର୍ଯ୍ୟକ୍ରମକୁ ଡାକେନି କି ସେ କୌଣସି କାର୍ଯ୍ୟକ୍ରମର ଆୟୋଜନ କଲେ ସେଠିକୁ ଦଳୀୟ କର୍ମୀ ଯାଆନ୍ତିନି। ୪ ବର୍ଷ ଧରି ସେ ଏକାକୀ ଜନସମର୍ଥନ ଜୁଟାଇଚାଲିଛନ୍ତି ନିଜ ପାଇଁ ତଥା ରାଜ୍ୟ ବିଜେପି ପାଇଁ।
ତାଙ୍କ ବ୍ୟକ୍ତିତ୍ବ, ଦକ୍ଷତା, କାର୍ଯ୍ୟ ପାଇଁ ଲୋକେ ମଧ୍ୟ ତାଙ୍କୁ ଆଦର କରୁଛନ୍ତି। ଅନେକ କହୁଛନ୍ତି ଅପରାଜିତା ହିଁ ହେବେ ୫ ପାଳିର ମୁଖ୍ୟମନ୍ତ୍ରୀ ନବୀନଙ୍କ ବିକଳ୍ପ। ହେଲେ ଧର୍ମେନ୍ଦ୍ର ଓଡିଶାରୁ ନିର୍ବାଚନ ଲଢିବା ଘୋଷଣା କରିବା ପରେ ଏହି ଚର୍ଚ୍ଚାରେ ଭଟ୍ଟା ପଡିଗଲାଣି ଯେମିତି। ଏବେ ଜନରବ ଶୁଣିବାକୁ ମିଳୁଛି କି, ମାଡମ ଅପରାଜିତାଙ୍କ ପଥରେ କଣ୍ଟା ହୋଇ ଉଭା ହୋଇଛନ୍ତି ଧର୍ମେନ୍ଦ୍ର ସାର। ଅପରାଜିତାଙ୍କ ଜନପ୍ରିୟତାକୁ ଦେଖି କାଳେ ଦଳ ତାଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରିଦେବ ସେଥିପାଇଁ ୧୫ ବର୍ଷର ପରାଜୟକୁ ପାସୋରି ଓଡିଶାରୁ ଲଢିବାକୁ ଚାହୁଁଛନ୍ତି। ହାରିଲେ ବି ପରବାୟ ନାହିଁ। ଅନ୍ୟ କୌଣସି ରାଜ୍ୟରୁ କେନ୍ଦ୍ରୀୟ ନେତୃତ୍ବ ତାଙ୍କୁ ସଂସଦକୁ ନେବା ବ୍ୟବସ୍ଥା କରିବେ। କେନ୍ଦ୍ରୀୟ ନେତୃତ୍ବଙ୍କ ସୁନା ପୁଅ ତ ସେ।
ତାଙ୍କ ମୁଣ୍ଡରେ ରହିଛି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ଅଭୟ ହାତ। ହେଲେ ବର୍ତ୍ତମାନ ମାଡମଙ୍କ ପ୍ରତି ଥିବା ଜନସମର୍ଥନକୁ ଦେଖି, ସେ ମୁଖ୍ୟମନ୍ତ୍ରୀ ପ୍ରାର୍ଥୀ ହେଲେ ହୁଏତ ଜିତି ଯାଇ ପାରନ୍ତି। ଏପରି ହେଲେ ତ କଥା ସରିଲା। ଧର୍ମେନ୍ଦ୍ରଙ୍କର ଦୀର୍ଘ ବର୍ଷରୁ ନବୀନଙ୍କ ସ୍ଥାନ ନେବାକୁ ଯେଉଁ ସ୍ବପ୍ନ ଅଛି ସେ ସବୁ ସ୍ବପ୍ନରେ ହିଁ ରହିଯିବ କାଳେ ବୋଲି କିଛି ଲୋକଙ୍କ ଭିତରେ ଚର୍ଚ୍ଚା। ଖାଲି ଅପରାଜିତାଙ୍କ ପତ୍ତା କାଟିବାକୁ ଏମନ୍ତ କାର୍ଯ୍ୟ। ଆହୁରି ଶୁଣିବାକୁ ମିଳୁଛି, ମୁକୁ ଭାଇଙ୍କର ଶଙ୍ଖ ମୁଖିଆଙ୍କ ସହ ରହିଛି ଭିତିରି ସମ୍ପର୍କ। ଉପରେ ସରକାରକୁ ଆକ୍ରମଣ କରୁଥିଲେ ମଧ୍ୟ ଭିତରେ ନବୀନଙ୍କ ବଡ ଫ୍ୟାନ। ଅପରାଜିତା ମୁଖ୍ୟମନ୍ତ୍ରୀ ଭାବେ ନ ଜିତିଲେ ବି ଶଙ୍ଖଦଳ ପାଇଁ ଚ୍ୟାଲେଞ୍ଜ ହୋଇପାରନ୍ତି।
ସେମିତି ବି ରାଜ୍ୟରେ ବିଜେଡି ଓ ବିଜେଡି ମୁଖିଆଙ୍କ ପ୍ରତି ଜନସମର୍ଥନ ହ୍ରାସ ପାଇଲାଣି। ବିଭିନ୍ନ ସ୍ଥାନରେ ଦଳରେ ଦେଖାଦେଲାଣି ଅନ୍ତର୍କନ୍ଦଳ। ଗୋଟିଏ ସ୍ଥାନରୁ ଶଙ୍ଖ ଦଳରେ ବହୁ ଆଶାୟୀ। ଯିଏ ଟିକେଟରୁ ବାଦ ପଡିବ ସେ ଗୃହଭେଦୀ ବିଭୀଷଣ ନ ହେଲେ ବି ଭୋଟ ଡାଇଭର୍ଟରେ ନ ଲାଗିବ ଏକଥାକୁ କିଏ ଏଡାଇବ । ଆଗାମୀ ନିର୍ବାଚନରେ କଣ ହେବ ତାକୁ ନେଇ ନିଜେ ଦଳ ମୁଖିଆ ମଧ୍ୟ ସନ୍ଦିହାନ। ଏପରି ସ୍ଥିତିରେ ଅପରାଜିତା ପ୍ରାର୍ଥୀ ହେଲେ ବିଜେଡି ହୋଇଯିବ ଘାଇଲା।
ସେଥିପାଇଁ ମୁକୁ ଭାଇଙ୍କ ଏଣ୍ଟ୍ରୀ ଏକ ସିକ୍ରେଟ ଷ୍ଟ୍ରାଟେଜି ବୋଲି ଲୋକେ କୁହାକୁହି ହେଉଛନ୍ତି। ତେବେ ଏହି ଚର୍ଚ୍ଚାରେ କେତେ ସତ୍ୟତା ଅଛି କିଏ ଜାଣେ? ହେଲେ ଯଦି ଏହି ଚର୍ଚ୍ଚା ସତ ହୋଇଥାଏ ଅପରାଜିତା କରିବେ କଣ?
