ଭି କେ ପାଣ୍ଡିଆନ! ୨୦୦୦ ବ୍ୟାଚର ଏହି ତାମିଲ ପୂର୍ବତନ ଆଇଏଏସଙ୍କ ସ୍ବେଚ୍ଛାକୃତ ଅବସର ରାଜ୍ୟ ରାଜନୀତିକୁ କରିଛି ସରଗରମ। ଆଗାମୀ ଦିନରେ ସେ ସକ୍ରୀୟ ରାଜନୀତିରେ ପାଦ ଥାପିବା ନେଇ ଚର୍ଚ୍ଚା ଯୋର ଧରିଥିବା ବେଳେ ଅନେକ କହୁଛନ୍ତି କି, ସେ ହିଁ ପରବର୍ତ୍ତି ସମୟରେ ଧରିବେ ରାଜ୍ୟର ଶାସନ ଡୋରି । ଏଥିପାଇଁ ବେଶ ଚତୁରତାର ସହ ଗତ ୨୦୧୯ରୁ ମୁଖ୍ୟମନ୍ତ୍ରୀ ନବୀନ ପଟ୍ଟାନୟକ ପ୍ରସ୍ତୁତ କରିଥିଲେ ପ୍ଲଟ ।
ଆହୁରି କୁହାଯାଉଛି, ମୁଖ୍ୟମନ୍ତ୍ରୀ ସେମିତି ନିଜ ଦଳର ନେତା ତଥା ମନ୍ତ୍ରୀଙ୍କୁ ବିଶ୍ବାସ କରି ପାରନ୍ତି ନାହିଁ। କିନ୍ତୁ ନିଜ ଭଦ୍ର, ମାର୍ଜିତ ବ୍ୟବହାର ଓ କର୍ମ ଦକ୍ଷତା ପାଇଁ ଅତି ସହଜରେ ଭି କେ ପାଣ୍ଡିଆନ ହୋଇପାରିଥିଲେ ମୁଖ୍ୟମନ୍ତ୍ରୀଙ୍କ ବିଶ୍ବାସ ଭାଜନ । ନିଜର ସମସ୍ତ ରଣନୀତି ବିଷୟରେ ପାଣ୍ଡିଆନଙ୍କୁ ହିଁ କେବଳ ଜଣାଉଥିଲା ମୁଖ୍ୟମନ୍ତ୍ରୀ। ଏମିତି କି ଏକଦା ଦଳର କ୍ଷମତା କେନ୍ଦ୍ର କୁହାଯାଉଥିବା ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ବା ବବି ଦାସଙ୍କୁ ମଧ୍ୟ ବିଶ୍ବାସ କରି ପାରିଲେ ନାହିଁ ନବୀନ। ବବିଙ୍କ ମାତ୍ରାଧିକ ଦଳୀୟ କାମରେ ହସ୍ତକ୍ଷେପ, ଅନ୍ୟ ନେତୃତ୍ବଙ୍କୁ ଅସମ୍ମାନ ଦଳ ପାଇଁ ଘାତକ ହେବ ବୋଲି ହୁଏତ ଠଉରାଇ ନେଇଥିଲେ ମୁଖ୍ୟମନ୍ତ୍ରୀ। ତେଣୁ ତାଙ୍କ ପକ୍ଷ ଛେଦନ କଲେ ସବୁ କ୍ଷମତା ଛଡାଇ ନେଇ।
ଏହା ବ୍ୟତୀତ ନିଜ ଦଳୀୟ ନେତୃତ୍ବଙ୍କ ହାବଭାବରୁ ସେ ବେଶ ଅବଗତ ଥିଲେ କି ତାଙ୍କ ଦ୍ବାରା ପ୍ରତିଷ୍ଠିତ ବିଜେଡି ନିଜ ଅସ୍ତିତ୍ବ ହରାଇବ ତାଙ୍କ ଅନ୍ତେ। ତେଣୁ ନିଜ ଉତ୍ତରାଧିକାରୀ ଭାବେ ସେ ଭି କେ ପାଣ୍ଡିଆନଙ୍କୁ ବାଛିଛନ୍ତି ବୋଲି ଅନେକ କହୁଛନ୍ତି। ହେଲେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ଫାଇପ ଟି ସଚିବ ଭି କେ ପାଣ୍ଡିଆନଙ୍କୁ ସାଧାରଣ ଓଡିଶାବାସୀ ବା କିଏ ଜାଣିଛି? ପାଣ୍ଡିଆନଙ୍କୁ ନିକଟତର କରେଇବାକୁ ମୁଖ୍ୟମନ୍ତ୍ରୀ ପ୍ରଥମେ ଫାଇପ ଟିର ଭିଜନ ନେଇ ସେଥିରେ କଲେ ସଚିବ। ଏହା ପରେ ମୋ ସରକାର ମାଧ୍ୟମରେ ପାଣ୍ଡିଆନଙ୍କୁ କଲେ ପ୍ରମୋଟ । କିନ୍ତୁ ଏହା ଶିକ୍ଷିତ ଓଡିଆ ତଥା ରାଜନେତାଙ୍କ ମଧ୍ୟରେ ସୀମିତ ରହିଯାଇଥିଲା। ସାଧାରଣ ଗାଁ ଗହଳି ଲୋକଙ୍କ ନିକଟରେ ପହଞ୍ଚି ପାରିନଥିଲେ ମୁଖ୍ୟମନ୍ତ୍ରୀଙ୍କ ପ୍ରଥମ ପସନ୍ଦ। ତେଣୁ ଗତ ଜାନୁଆରୀରୁ ଆରମ୍ଭ କଲେ ରାଜ୍ୟବ୍ୟାପୀ ଅଭିଯୋଗ ଶୁଣାଣି ଅଭିଯାନ। ରାଜ୍ୟବ୍ୟାପୀ ବିଭିନ୍ନ ବ୍ଲକକୁ ପଠାଇଲେ। ସ୍କୁଲ କଲେଜର ଛାତ୍ରଛାତ୍ରୀଙ୍କ ନିକଟତର କଲେ।
ସେମାନଙ୍କଠାରୁ ଅଭିଯୋଗ ସଂଗ୍ରହ କରି କଲେ ସେମାନଙ୍କ ନିକଟତର। ଗାଁ ଗହଳିରେ ଭି କେ ପାଣ୍ଡିଆନଙ୍କୁ ନେଇ ହେଲା ଚର୍ଚ୍ଚା। କିନ୍ତୁ ମୁଖ୍ୟମନ୍ତ୍ରୀଙ୍କ ଚାଲ ବୁଝି ନ ପାରି ବିରୋଧୀ ପାଣ୍ଡିଆନଙ୍କୁ ଘନ ଘନ ଟାର୍ଗେଟ କଲେ। ତାଙ୍କୁ ନେଇ ବିଭିନ୍ନ ଭାବେ କରାଗଲା ସମାଲୋଚନା । ତାଙ୍କ ନାଁକୁ ନେଇ ଟିକଟକ ତିଆରି ହେଲା। ବିରୋଧୀ ଯେତିକି ବିରୋଧ କଲେ ପାଣ୍ଡିଆନଙ୍କୁ ସେତିକି ମାଗଣା ପବ୍ଲିସିଟି ମିଳିଲା। ଯେତେବେଳେ ନବୀନ ଦେଖିଲେ ଛୁଆଠୁ ବଡ ସବୁରି ମୁହଁରେ ପାଣ୍ଡିଆନଙ୍କ ନାଁ, ସେତେବେଳେ ଭିଆରଏସ ପାଇଁ କହିଲେ। ଏବେ ଆଉ କେହି ପାଣ୍ଡିଆନଙ୍କ କାମକୁ ନେଇ କିଛି କହି ପରିବେନି। ସେ ଦଳଠୁ ଆରମ୍ଭ କରି ପ୍ରଶାସନ ସବୁକୁ ପରିଚାଳନା କରିବେ। ନବୀନ ଗୋଟିଏ ତୀରରେ ଦୁଇଟି ନିସାନା ସାଧି ବିରୋଧୀଙ୍କ ଅକଲ କରିଦେଲେ ଗୁଡୁମ।
