ଶେଷରେ ବୁଡ଼ାଜାହାଜ ‘ଟାଇଟନ’ରେ ଯାତ୍ରା କରିଥିବା ୫ ଜଣଙ୍କ ମୃତ୍ୟୁ ଘଟିଛି । ୫ ଜଣଙ୍କ ମୃତ୍ୟୁ ହୋଇଥିବା ସ୍ପଷ୍ଟ କରିଛି ଆମେରିକା ତଟରକ୍ଷୀ ବାହିନୀ ।
ଓସେନ୍ ଗେଟ୍ ଏକ୍ସପିଡିସନ୍ ଦ୍ବାରା ପରିଚାଳିତ ବୁଡ଼ାଜାହାଜ ଟାଇଟନ୍ ଆଟ୍ଲାଣ୍ଟିକ୍ ମହାସାଗରରେ ଭିତର ଆଡ଼କୁ ସଙ୍କୁଚିତ ହୋଇ ନଷ୍ଟ ହୋଇଯାଇଛି । ସେଥିରେ ଥିବା ସମସ୍ତ ବ୍ୟକ୍ତିଙ୍କ ମୃତ୍ୟୁ ହୋଇଥିବା ରିପୋର୍ଟ ଦେଇଛି ଆମେରିକା ତଟରକ୍ଷୀ ବାହିନୀ ।
ଗତକାଲି ରିମୋଟ୍ ନିୟନ୍ତ୍ରିତ ଯାନରେ ପାଣି ଭିତରେ ଠାବ କରାଯାଇଥିବା ଉକ୍ତ ବୁଡ଼ାଜାହାଜର ଭଗ୍ନାବଶେଷକୁ ପରୀକ୍ଷା କରିବା ପରେ ଆମେରିକା ତଟରକ୍ଷୀ ପକ୍ଷରୁ ଏ ନେଇ ସ୍ପଷ୍ଟ କରାଯାଇଛି । ଗତକାଲି ସମସ୍ତଙ୍କ ପରିବାରବର୍ଗଙ୍କୁ ସୂଚନା ଦିଆଯାଇଛି ।
୧୯୧୨ରେ ଆଟଲାଣ୍ଟିକ୍ ମହାସାଗରେ ଦୁର୍ଘଟଣାଗ୍ରସ୍ତ ହୋଇ ବୁଡ଼ିଯାଇଥିଲା ‘ଟାଇଟାନିକ୍’ ଜାହାଜ । ଏହାର ଅବଶେଷ ଦେଖିବା ପାଇଁ କ୍ଷୁଦ୍ର ବୁଡ଼ାଜାହାଜ ‘ଟାଇଟନ୍’ରେ ଯାଇଥିଲେ ୫ ଜଣ ।
ସେମାନଙ୍କ ମଧ୍ୟରେ ଥିଲେ ଇଂଲଣ୍ଡର ୫୮ ବର୍ଷିୟ ହାମିସ୍ ହାର୍ଡିଂ, ଫ୍ରାନ୍ସର ୭୭ ବର୍ଷିୟ ପଲ୍-ହେନ୍ରି ନାର୍ଜିଓଲେଟ୍ । ଓସେନ୍ଗେଟ୍ ମାଲିକାନାରେ ଥିବା ଇଭ୍ରେଟ୍’ର ମୁଖ୍ୟ ୬୧ ବର୍ଷିୟ ଏକ୍ଜିକ୍ୟୁଟିଭ୍ ଅଫିସର ଷ୍ଟକ୍ଟନ୍ ରସ୍ ଏବଂ ପାକିସ୍ତାନର ୪୮ ବର୍ଷିୟ ଶାହଜାଦ୍ ଦାଉଦ୍ ଓ ତାଙ୍କର ୧୯ ବର୍ଷିୟ ପୁଅ ସୁଲେମାନ୍ ।
ଜୁନ୍ ୧୮ରେ ଯାତ୍ରା ଆରମ୍ଭ କରିଥିଲା ଟାଇଟନ୍ । କାର୍ବନ୍ ଫାଇବର୍ ଓ ଟାଇଟନିୟମ୍ରେ ନିର୍ମିତ ୬.୭ ମିଟର୍ ଲମ୍ବ କ୍ଷୁଦ୍ର ବୁଡ଼ାଜାହାଜ ଟାଇଟନ୍ରେ ଜଣେ ଚାଳକଙ୍କ ସମେତ ୪ ଜଣ ଯାତ୍ରୀ ଯିବା ଭଳି ବ୍ୟବସ୍ଥା ଥିଲା ।
ଏହି ବୁଡ଼ାଜାହାଜ ସମୁଦ୍ର ଗର୍ଭର ସର୍ବାଧିକ ୧୩ ହଜାର ୧୨୦ ଫୁଟ୍ ତଳକୁ ଯାଇପାରିବାର କ୍ଷମତା ରଖିଥିଲା । ୫ ଜଣଙ୍କ ପାଇଁ ଥିଲା ୪ ଦିନର ଅକ୍ସିଜେନ୍ । ଯାତ୍ରା ଆରମ୍ଭ କରିବାର ପ୍ରାୟ ୧ ଘଣ୍ଟା ୪୫ ମିନିଟ୍ ପରେ ଟାଇଟନ୍ ସହ ସମସ୍ତ ଯୋଗାଯୋଗ ବିଚ୍ଛିନ୍ନ ହୋଇଥିଲା ।
