କ୍ରିକେଟ ଆଉ ବିରାଟ, ପଡିଆରେ ଏ ଦୁଇଟି ଶବ୍ଦ ଅତି ପରିଚିତ । ଗୋଟିଏ ପରେ ଗୋଟିଏ ରେକର୍ଡ ଭାଙ୍ଗିଚାଲିଥିବା ବିରାଟ ଏବେ ଆଉ ଏକ ବିରଳ ରେକର୍ଡର ସମକକ୍ଷ ହୋଇଛନ୍ତି । ବ୍ଲାଷ୍ଟରମାଷ୍ଟର ସଚିନ ତେନ୍ଦୁଲକରଙ୍କ ବିଶ୍ବରେକର୍ଡର ସମକକ୍ଷ ହୋଇପାରିଛନ୍ତି ବିରାଟ । ଆଜି କୋହଲି ତାଙ୍କ କ୍ରିକେଟ କ୍ୟାରିୟରରେ ତିଆରି କରିଛନ୍ତି ଏକ ବଡ ମାଇଲଷ୍ଟୋନ । ଆଜି ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ କୋହଲି ୪୯ ତମ ଶତକ ହାସଲ କରିଛନ୍ତି । ଯାହା ଆନ୍ତର୍ଜାତିକ କ୍ରିକେଟରେ ଅଭେଦ୍ୟ ପରି ମନେହୁଏ ।
ରନ ମେସିନ…ରେକର୍ଡ ବ୍ରେକର…ଚେଜିଂ ମାଷ୍ଟର…ଟିମ୍ ଓ୍ବିନର…କ୍ରିକେଟ୍ ଗୋଟ ଏବଂ କିଙ୍ଗ କୋହଲ୍, ଏମିତି ଅନେକ ନାଁର ଅଧିକାରୀ ବିରାଟ କୋହଲି । ନାଁ ଯେମିତି କାମ ବି ସେମିତି । ଫିଟନେସକୁ ନିଜର କ୍ଷମତା ବନାଇ ଚଢିଚାଲିଛନ୍ତି କ୍ରିକେଟର ଗୋଟିଏ ପରେ ଗୋଟିଏ ଶିଢି । କ୍ରିଜରେ ଥିବା ପର୍ଯ୍ୟନ୍ତ ବିପକ୍ଷ ଦଳର ବୋଲରଙ୍କ ନିଦ ହଜିଯାଏ । ସେଥିପାଇଁ ସେ କିଙ୍ଗ କୋହଲି ।
କ୍ରିକେଟ ଦୁନିଆରେ ବିରାଟ ହେଉଛନ୍ତି ଏପରି ନାଁ ଯିଏ ଖୁବ ଶିଘ୍ର ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ଦିନିକିଆରେ ସଚିନ ଏବଂ ବିରାଟ ଦୁହେଁ ୪୯..୪୯ ଶତକ ହାସଲ କରିଥିବା ବେଳେ ଦ୍ରୁତ ତମ ଶତକ ହାସଲ କରିବାରେ ବିରାଟ ବିଶ୍ବର ପ୍ରଥମ । ତେବେ ଉଭୟ ଫର୍ମାଟରେ ତେନ୍ଦୁଲକରଙ୍କ ବହୁତ ପଛରେ ରହିଛନ୍ତି ବିରାଟ କୋହଲି । ସଚିନ ଦିନିକିଆ ଓ ଟେଷ୍ଟରେ ମୋଟ ୧୦୦ ଶତକ ହାସଲ କରିଥିବା ବେଳେ ବିରାଟ ୭୮ଟି ଶତକ ହାସଲ କରିଛନ୍ତି । ତାଙ୍କ ପଛକୁ ରହିଛନ୍ତି ଅଷ୍ଟ୍ରେଲିଆର ରିକି ପଣ୍ଟିଂ । ରିକି ମୋଟ ୭୧ଟି ଶତକ ହାସଲ କରି ତୃତୀୟ ସ୍ଥାନରେ ରହିଛନ୍ତି । ତେନ୍ଦୁଲକର ୪୬୩ଟି ଦିନିକିଆ ଖେଳି ୪୯ ଶତକ ହାସଲ କରିଥିବା ବେଳେ ୨୮୯ଟି ଦିନିକିଆ ମ୍ୟାଚରୁ କୋହଲି ଏହି ରେକର୍ଡ କରିଛନ୍ତି ।
