ଦିଲ୍ଲୀ ୟୁନିଭରସିଟି ରାଜନୀତି ବିଜ୍ଞାନ ଅନର୍ସରୁ ଉଠିଲା ଜାତିର ପିତା ମହାତ୍ମା ଗାନ୍ଧୀଙ୍କ ଚାପ୍ଟର। ଗାନ୍ଧୀଙ୍କ ବଦଳରେ ହିନ୍ଦୁବାଦୀ ନେତା ବିନାୟକ ସବରକରଙ୍କ ସମ୍ପର୍କିତ ବିଷୟବସ୍ତୁକୁ ଇତିହାସ ବହିରେ ଯୋଡା ଯାଇଛି। ଚଳିତ ଶିକ୍ଷା ବର୍ଷରୁ ଛାତ୍ରଛାତ୍ରୀ ଏହି ବିଷୟରେ ପଢ଼ିବେ।
୨୦୨୩-୨୦୨୪ ଶିକ୍ଷା ବର୍ଷରୁ ଯୁକ୍ତ ୩ ପଞ୍ଚମ ସେମିଷ୍ଟାରରେ ଜାତିର ପିତାଙ୍କ ବିଷୟରେ ଥିବା ଚାପ୍ଟରକୁ ବାଦ ଦେଇ ସବରକରଙ୍କୁ ସ୍ଥାନ ଦେଇ ଗାନ୍ଧୀଙ୍କୁ ସପ୍ତମ ସେମିଷ୍ଟାରରେ ରଖା ଯାଇଛି। ଶିକ୍ଷା ବିଭାଗର ଏପରି ପଦକ୍ଷେପକୁ ବହୁ ଶିକ୍ଷାବିତ ସମାଲୋଚନା କରିଛନ୍ତି।
ନୂଆ ସିଲାବସ୍ ଅନୁଯାୟୀ, ଚଳିତ ଶିକ୍ଷା ବର୍ଷରୁ ଯୁକ୍ତ ୩ରେ ରାଜନୀତି ବିଜ୍ଞାନ ଅନର୍ସ ରଖିଥିବା ୫ମ ସେମିଷ୍ଟାରରେ ସବରକରଙ୍କ ଉପରେ ଏକ ବହି ପଢ଼ିବେ। ଉକ୍ତ ସିଲାବସ୍ରେ କେବଳ ସବରକରଙ୍କ ସମ୍ପର୍କରେ ପାଠ୍ୟକ୍ରମରେ ରହିଛି। ଏପରି ଅଦଳବଦଳକୁ ନେଇ ଆରମ୍ଭ ହୋଇଛି ରାଜନୀତି ଓ ବୟାନବାଜି।
ଶିକ୍ଷାବିତ ଆଲୋକ ରଞ୍ଜନ ପାଣ୍ଡେ କହିଛନ୍ତି କି, ଗାନ୍ଧିଜୀଙ୍କୁ ସପ୍ତମ ସେମିଷ୍ଟାରକୁ ଠେଲି ଦିଆଗଲା। ସବରକରଙ୍କ ବିଷୟରେ ଶିକ୍ଷାଦାନକୁ କେହି ବିରୋଧ କରୁ ନାହାନ୍ତି, କିନ୍ତୁ ଯେଉଁଭଳି ଭାବେ ଗାନ୍ଧୀଙ୍କ ଚାପ୍ଟରକୁ ଦୁଇଟି ସେମିଷ୍ଟର ପଛକୁ ଘୁଞ୍ଚାଇ ଦିଆ ଯାଇଛି, ଏହା ଗାନ୍ଧୀଙ୍କ ପ୍ରତି ଅପମାନ ପରି। ଏହାକୁ ଆମେ ଘୋର ବିରୋଧ କରୁଛୁ। ଜାତିର ପିତା ମହାତ୍ମା ଗାନ୍ଧୀ ଉଭୟ ସବରକର ଓ ଆମ୍ବେଦକରଙ୍କ ପୂର୍ବରୁ ଆସିଥିବାରୁ ପିଲାମାନେ ପ୍ରଥମେ ତାଙ୍କ ବିଷୟରେ ଜାଣିବା ଦରକାର ବୋଲି ପାଣ୍ଡେ ଯୁକ୍ତି ବାଢିଛନ୍ତି।
ଭାରତର ସ୍ୱାଧୀନତା ସଂଗ୍ରାମ ସହ ଗାନ୍ଧୀଙ୍କ ଅହିଂସା ଆନ୍ଦୋଳନ ଇଂରେଜ ଶାସକଙ୍କୁ ଦେଶରୁ ତଡ଼ି ଦେଇଥିଲା। ଖାଲି ଦେଶ ସ୍ୱାଧୀନତା ପାଇଁ ସଂଗ୍ରାମ ନୁହେଁ ଅଛୁଆଁ ଭେଦଭାବ ଉଠାଇବାକୁ ତାଙ୍କ ପଦକ୍ଷେପ, ସ୍ୱଦେଶୀ ଭାବନା ପରି ଆନ୍ଦୋଳନ ଓ ଦେଶ ପ୍ରତି ତାଙ୍କ ଅବଦାନର ତୁଳନା ନାହିଁ। ଆଜି ବି ଲୋକେ ତାଙ୍କ ଅବଦାନକୁ ମନେ ପକାଉଛନ୍ତି। ଦେଶବାସୀଙ୍କ ପାଇଁ ସେ ପୂଜ୍ୟ। ଦେଶବାସୀଙ୍କ ଭାବାବେଗ ସହ ଜଡିତ ଜାତିର ପିତାଙ୍କୁ ପିଲାଙ୍କ ପାଠ୍ୟ ପ୍ରସଙ୍ଗରେ ଏପରି କୋଣଠେଁସା କଦାପି ଗ୍ରହଣଯୋଗ୍ୟ ନୁହେଁ। ତେଣୁ ଆସନ୍ତା ୯ ତାରିଖରେ ହେବାକୁ ଥିବା ଜିଏନ୍ଟି କାଉନସିଲ ମିଟିଂରେ ଏହାକୁ ଉଠାଇବୁ ବୋଲି ପାଣ୍ଡେ କହିଛନ୍ତି ।
ଜାତୀୟ ଶିକ୍ଷା ନୀତି ଅନୁଯାୟୀ ଡିୟୁ ୟୁନିଭରସିଟି ଏକ ୪ ବର୍ଷିଆ କାର୍ଯ୍ୟକ୍ରମ ଗ୍ରହଣ କରିଛି। ଏଥିରେ ଛାତ୍ରଛାତ୍ରୀଙ୍କୁ ୩ ବର୍ଷୀୟା ଅଣ୍ଡର ଗ୍ରାଜୁଏଟ ଡିଗ୍ରୀ ନଚେତ ୪ ବର୍ଷୀୟା ଅଣ୍ଡର ଗ୍ରାଜୁଏଟ ପ୍ରୋଗ୍ରାମ କରିବାକୁ ଅନୁମତି ମିଳିବ । ଫଳରେ ଯେଉଁମାନେ ୩ ବର୍ଷୀୟା କୋର୍ସ ଚୟନ କରିବେ ସେମାନେ ସପ୍ତମ ସେମିଷ୍ଟାରରେ ଥିବା ଗାନ୍ଧିଜୀଙ୍କ ବିଷୟରେ ଜାଣିବାରୁ ବଞ୍ଚିତ ହେବେ।
