Category: ସୁନ୍ଦରଗଡ଼

ସୁନ୍ଦରଗଡ଼ ଜିଲ୍ଲା ସର୍ଗିପାଲିରେ ପ୍ରବେଶ ଉତ୍ସବ ଓ ଖଡ଼ି ଛୁଆଁ ଶୁଭାରମ୍ଭ

ସୁନ୍ଦରଗଡ଼ ଜିଲ୍ଲା ସ୍ଥିତ ଲେଫ୍ରିପଡା ବ୍ଲକ ଅନ୍ତର୍ଗତ ସରକାରୀ ଉଚ୍ଚ ବିଦ୍ୟାଳୟ ସର୍ଗିପାଲିରେ ଖଡ଼ିଛୁଆଁ ଓ ପ୍ରବେଶ ଉତ୍ସବ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସୁନ୍ଦରଗଡ ସଦର ବିଧାୟକ ଯୋଗେଶ କୁମାର ସିଂ ଯୋଗଦାନ କରିଥିବା ବେଳେ ସମ୍ମାନୀତ ଅତିଥି ଭାବେ ଲେଫ୍ରିପଡା ଗୋଷ୍ଠୀ ଉନ୍ନୟନ ଅଧିକାରୀ ଆତଶି ପରିଡ଼ା, ବ୍ଲକ ଶିକ୍ଷା ଅଧିକାରୀ ଅଶୋକ ଲାକ୍ରା, ଜିଲ୍ଲା ପରିଷଦ ସଭ୍ୟା ଅଞ୍ଜଳି ଘୋଷ, ସର୍ଗିପାଲି ଜମିଦାର ପ୍ରତାପ ନାରାୟଣ ସିଂ ଯୋଗଦାନ କରିଥିଲେ। ୬ ଜଣ ଶିଶୁ ଖଡ଼ିଛୁଆଁ କରିବା ପରେ ଅତିଥି ମାନଙ୍କ ଦ୍ଵାରା ସମସ୍ତ ଶିଶୁ ମାନଙ୍କୁ ଗୋଟିଏ ଲେଖାଏଁ ସ୍କୁଲ ବ୍ୟାଗ କିଟ୍ ପ୍ରଦାନ କରାଯାଇଥିଲା। ବିଧାୟକ ସିଂ ପ୍ରବେଶ ଉତ୍ସବ ଓ ଖଡ଼ି ଛୁଆଁ କାର୍ଯ୍ୟକ୍ରମ ଉଦଘାଟନ କରିଥିଲେ । ଉକ୍ତ କାର୍ଯ୍ୟକ୍ରମରେ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ, କର୍ମଚାରୀ ଓ ଅଭିଭାବକ ସହଯୋଗ କରିଥିଲେ ।
ପାହାଡ ଉପର ଗଛରେ ଝୁଲୁଛନ୍ତି ଯୁବକ

ସୁନ୍ଦରଗଡ଼ ଜିଲ୍ଲା ସ୍ଥିତ ରାଜଗାଙ୍ଗପୁର ଅଞ୍ଚଳରେ ଘଟିଯାଇଛି ଏକ ଅଭାବନୀୟ ଘଟଣା । ଜନୈକ ଯୁବକ ବେକରେ ଦଉଡି ବାନ୍ଧି ଗଛରେ ଝୁଲୁଥିବା ପରିଲକ୍ଷିତ ହୋଇଛି । ମୃତକ ରାଜଗାଙ୍ଗପୁର ପୈ।ରାଞ୍ଚଳ ସଂଲଗ୍ନ ଟ୍ରାକ୍ସନ କଲୋନୀର ବାସିନ୍ଦା ଗୈାତମ ଯାଦବ ( ୩୫ ) ବୋଲି ଜଣାପଡ଼ିଛି । ତେବେ କେଉଁ କାରଣରୁ ଏକ ନିଛାଟିଆ ଜଙ୍ଗଲ ଭିତରେ ପ୍ରବେଶ କରି ଗଛରେ ରସି ବାନ୍ଧି ଆତ୍ମହତ୍ୟା ଭଳି ଏତେବଡ଼ ପଦକ୍ଷେପ ନେଲେ କାହିଁକି ? କେହି କୈାଣସି କାରଣରୁ ତାଙ୍କୁ ଅନ୍ୟତ୍ର ହତ୍ୟାକରି ଏଠାରେ ଆଣି ଝୁଲାଇ ଦେଇଥିବା ଆଶଙ୍କା କରାଯାଉଛି । ତେବେ ଘଟଣାସ୍ଥଳରୁ ସ୍ଥାନୀୟ ବାସିନ୍ଦା ପୋଲିଶକୁ ଅବଗତ କରାଇଥିଲେ ହେଁ ବହୁ ବିଳମ୍ବ ପର୍ଯ୍ୟନ୍ତ ପୋଲିଶ ପହଞ୍ଚି ନ ଥିବା ନେଇ ଜନମଞ୍ଚ ଅଭିଯୋଗ କରିଥିବା ଜଣାପଡିଛି । ତେବେ ଯାଞ୍ଚ କରିବା ସହ ଶବ ବ୍ୟବଚ୍ଛେଦ ପରେ ସମସ୍ତ ସତ୍ୟାସତ୍ୟ ପଦାକୁ ଆସିବ ବୋଲି ଜଣାପଡ଼ିଛି । ତେବେ ଘଟଣା ବିଷୟରେ ପରିବାର ଲୋକଙ୍କୁ ଅବଗତ କରାଯାଇଛି । ମୃତକ ଝାରବେଡା ଅଞ୍ଚଳରେ ଥିବା ଏକ ଘରୋଇ କାରଖାନାରେ ଶ୍ରମିକ ଭାବେ କାର୍ଯ୍ୟ କରୁଥିଲେ । ତାଙ୍କର ତିନୋଟି ନାବାଳକ ସନ୍ତାନ ଥିବା ଜଣାପଡିଛି । ଏହାର ସଠିକ ତଦନ୍ତ କରି ପରିବାର ବର୍ଗଙ୍କୁ ଉଚିତ ନ୍ୟାୟ ଦେବାକୁ ବୁଦ୍ଧିଜୀବୀ ମହଲ ଦାବି କରିଛି । ସକାଳୁ ଜଙ୍ଗଲକୁ କାଠ ଗୋଟାଇ ବାକୁ ଯାଇଥିବା ଲୋକେ ଝୁଲନ୍ତା ଅବସ୍ଥାରେ ଯୁବକଙ୍କୁ ଦେଖି ଗ୍ରାମବାସୀଙ୍କୁ ସୂଚିତ କରିଥିଲେ ।
ଭିଜିଲାନ୍ସ ଜାଲରେ କୁତ୍ରା ତହସିଲ କାର୍ଯ୍ୟାଳୟ ଅମିନ

ଭିଜିଲାନ୍ସ ଜାଲରେ ଅମିନ ବାବୁ । ଲାଞ୍ଚ ନେଉଥିବା ବେଳେ ଧରିଲା ଭିଜିଲାନ୍ସ । ସୁନ୍ଦରଗଡ଼ ଜିଲ୍ଲା କୁତ୍ରା ତହସିଲ କାର୍ଯ୍ୟାଳୟର ଜଣେ ଅମିନ ଶିଶିର କୁମାର ନାଏକ ୬ହଜାର ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନ୍ସ ହାତରେ ଧରାପଡିଛନ୍ତି । ଭିଜିଲାନ୍ସ ବିଭାଗ ଏହି ଲାଞ୍ଚ ଟଙ୍କା ଜବତ କରିବା ସହ ଅଫିସ ଓ ବନ୍ଧବାହାଲସ୍ଥିତ ବାସଭବନରେ ଚଢ଼ାଉ କରିଛି । ଭିଜିଲାନ୍ସ ବିଭାଗ ତାଙ୍କୁ ଗିରଫ କରି ପଚରାଉଚରା କରି କୋର୍ଟକୁ ଚାଲାଣ କରିଛି ।

ସୂଚନାନୁଯାୟୀ, ଅଭିଯୁକ୍ତ ଅମିନ ଜଣେ ବ୍ୟକ୍ତିଙ୍କ ଜମି ଭାଗ ପାଇଁ ଜମିପଟ୍ଟାର ସ୍କେଚ୍‌ ମ୍ୟାପ ତିଆରି ପାଇଁ ୬ହଜାର ଟଙ୍କା ଲାଞ୍ଚ ଦାବି କରିଥିଲେ । ଅଭିଯୋଗକାରୀ ଟଙ୍କା ନ ଦେବାରୁ ଅମିନ ଜଣକ ତାଙ୍କୁ ହଇରାଣ କରୁଥିଲେ । ଯାହାଫଳରେ ଅଭିଯୋଗକାରୀ ଏ ସମ୍ପର୍କରେ ଭିଜିଲାନ୍ସ ବିଭାଗକୁ ଜଣାଇଥିଲେ । ପରେ ରାଉରକେଲା ଭିଜିଲାନ୍ସ ଥାନାରେ ଅମିନଙ୍କ ନାଁରେ ଏକ ମାମଲା ରୁଜୁ ହୋଇଥିଲା । ଯୋଜନା ମୁତାବକ ଅଭିଯୋଗକାରୀଙ୍କ ଠାରୁ ଲାଞ୍ଚଟଙ୍କା ନେବା ସମୟରେ ମାଜିଷ୍ଟ୍ରେଟ୍‌ଙ୍କ ଉପସ୍ଥିତିରେ ଛକି ରହିଥିବା ଭିଜିଲାନ୍ସ ବିଭାଗ ଅମିନଙ୍କୁ କାବୁ କରି ତାଙ୍କ ଠାରୁ ଟଙ୍କା ଜବତ କରିଥିବା ଜଣାପଡିଛି ।
ପଞ୍ଚଭୂତରେ ଲୀନ ହେଲେ ଓଡିଆ ଘରୋଇ ଚ୍ୟାନେଲର ମୁଖ୍ୟ ସମ୍ପାଦକ

ସୁନ୍ଦରଗଡ଼ର ସାମ୍ବାଦିକ ପରିବାରରେ ଘଟିଯାଇଛି ଏକ ଦୁଃଖଦ ଘଟଣା । ସୁନ୍ଦରଗଡ଼ ଜିଲ୍ଲା ସ୍ଥିତ ବାଲିଶଙ୍କରା ବ୍ଲକ ଅନ୍ତର୍ଗତ ତିଲଡେଗା ଗ୍ରାମର ବାସିନ୍ଦା ତଥା ଜଣେ ଯୁବ ସାମ୍ବାଦିକ ସମେତ ଓଡ଼ିଆ ଘରୋଇ ନ୍ୟୁଜ୍ ଚ୍ଯାନେଲର ମୁଖ୍ୟ ସମ୍ପାଦକ ଅଶୋକ କୁମାର ଦାଶଙ୍କ ପରଲୋକ ହୋଇଛି । ଶୁକ୍ରବାର ତାଙ୍କର ଦେହ ଅସୁସ୍ଥ ହେବାରୁ ତାଙ୍କୁ ପ୍ରଥମେ ଜିଲ୍ଲା ଚିକିତ୍ସାଳୟ ପରେ ରାଉରକେଲା ସ୍ଥିତ ଏକ ଘରୋଇ ହସ୍ପିଟାଲରେ ସେ ଚିକିତ୍ସାଧୀନ ଥିଲେ । ଚିକିତ୍ସାଧୀନ ଅବସ୍ଥାରେ ହିଁ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ମୃତ୍ୟ ବେଳକୁ ତାଙ୍କୁ ୩୩ ବର୍ଷ ହୋଇଥିଲା ।

ତାଙ୍କର ବଳିଷ୍ଠ ସାମ୍ବାଦିକତା ଯୋଗୁଁ ସେ ବାଲିଶଙ୍କରରେ ବେଶ ଲୋକପ୍ରିୟ ହୋଇପାରିଥିଲେ । ସେ ସାମ୍ବାଦିକତା କରିବା ସହ ସମାଜସେବା ମଧ୍ୟ କରୁଥିଲେ । ଶ୍ରୀ ଦାସଙ୍କ ମୃତ୍ୟୁ ବାଲିଶଙ୍କରା ଅଞ୍ଚଳରେ ଶୋକର ଛାୟା ଖେଳାଇ ଦେଇଛି । ଶୋକାକୁଳ ପରିବେଶରେ ତିଲଡ଼େଗା ଗ୍ରାମସ୍ଥିତ ପୈତୃକ ବାସଭବନ ନିକଟରେ ଥିବା ନଦୀରେ ତାଙ୍କର ଅନ୍ତେଷ୍ଟି କ୍ରିୟା ଶେଷ ହୋଇଛି । ସ୍ବର୍ଗତ ଅଶୋକ ଦାସଙ୍କ ପୁତୁରା ମୁଖାଗ୍ନି ଦେଇଛନ୍ତି । ତାଙ୍କର ଏହି ଅକାଳ ବିୟୋଗରେ ପରିବାର ସମେତ ଗ୍ରାମବାସୀ ଓ ସାମ୍ବାଦିକ ପରିବାରରେ ଶୋକର ଛାୟା ଖେଳିଯାଇଥିଲା ।
ସ୍କାନ ଷ୍ଟିଲ ପକ୍ଷରୁ ରକ୍ତଦାନ ଶିବିର

ରାଜଗାଙ୍ଗପୁର ବ୍ଲକ ଅନ୍ତର୍ଗତ ବରପାଲି ସ୍ଥିତ ସ୍କାନ ଷ୍ଟିଲ କାରଖାନା ପକ୍ଷରୁ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି। ରକ୍ତଦାନ ମହତ୍ତ୍ୱ ପୁର୍ଣ୍ଣ୍ୟ ସେହି ଉଦେଶ୍ୟରେ ପ୍ରତିବର୍ଷ ପରି ଏହିବର୍ଷ ସ୍କାନ ଷ୍ଟିଲ ପକ୍ଷରୁ କାରଖାନା ପରିସରରେ ଅନୁଷ୍ଠିତ କରାଯାଇଥିଲା। ଏହି ରକ୍ତଦାନ କାର୍ଯ୍ୟକ୍ରମକୁ କାରଖାନାର ପରିଚାଳନା ନିର୍ଦେଶକ ରାଜେଶ କୁମାର ଗଡ଼ୋଡ଼ିଆ ଫେକ୍ଟ୍ରି ପରିଚାଳକ ବିନୀତ କୁମାର ଗଡ଼ୋଡ଼ିଆଙ୍କ ଉପସ୍ଥିତିରେ ରାଜଗାଙ୍ଗପୁର ଏସଡିପିଓ ବିଭୁତି ଭୂଷଣ ଭୋଇ ମୂଖ୍ୟ ଅତିଥି ଭାବେ ଯୋଗଦେଇ ଅନୁଷ୍ଟନିକ ଭାବେ ଉଦଘାଟନ କରିଥିଲେ।

ଏହି ରକ୍ତଦାନ ଶିବିରକୁ ରାଉରକେଲା ସରକାରୀ ସ୍ୱାସ୍ଥ୍ୟକେନ୍ଦ୍ରର ଡାକ୍ତର ଏମ. ସୋରେନଙ୍କ ନେତୃତ୍ୱରେ ପବିତ୍ର କୁମାର ପଳାଇ, ସୂବେନ୍ଧୁ କୁମାର ସାହୁ, ଦିଲ୍ଲୀପ କୁମାର ପୁଥାଳ, ଓ ବିରେନ କୁମାର ସିଂଙ୍କ ସହଯୋଗରେ କାରଖାନା ର କାର୍ଯ୍ୟନିର୍ବାହୀ ଶ୍ରମିକ ମାନଙ୍କ ଠାରୁ ରିପୋର୍ଟ ଲେଖିବା ମଧ୍ୟରେ ୭୦ ୟୁନିଟ ସଂଗ୍ରହ କରିଥିବା ଜାଣିବାକୁ ମିଳିଥିଲା ଓ ସମସ୍ତ ରକ୍ତଦାତା ମାନଙ୍କୁ ପ୍ରଶଂସା ପ୍ରମାଣପତ୍ର ମଧ୍ୟ ପ୍ରଦାନ କରାଯାଇଥିଲା । ଉକ୍ତ ରକ୍ତଦାନ ଶିବିର ରେ କାରଖାନାର ଆର. ଆଇ. ସୁବ୍ରତ କୁମାର ନାୟକ, ହେଚଆର ମୂଖ୍ୟ ହରିଓମ ମିଶ୍ର, ଅତିରିକ୍ତ ହେଚ.ଆର ଶ୍ରୀବତ୍ସ ନାଥ ନାୟକ, ଶ୍ରୁତି ରଞ୍ଜନ ନାୟକ, ଯଜ୍ଞବ୍ରତ ଦାସ, ସରୋଜ କୁମାର ଗୋପ, ଭଦ୍ର ପ୍ରସାଦ ଜେନା ପ୍ରମୁଖ ଉପସ୍ଥିତ ରହି ଏହି ରକ୍ତଦାନ ଶିବିରକୁ ପରିଚାଳନା କରିଥିଲେ।
ଚନ୍ଦ୍ରା ଇଞ୍ଜିନିୟରିଂ ଦୁର୍ଘଟଣାରେ ଜଣେ ଶ୍ରମିକଙ୍କ ମୃତ୍ୟୁ

ରାଜଗାଙ୍ଗପୁର ତାଲକିପଡା ଚନ୍ଦ୍ରା ଇଞ୍ଜିନିୟରଙ୍ଗ ୱାର୍କ କାରଖାନାରେ ଜଣେ ଶ୍ରମିକଙ୍କ ମୃତ୍ୟୁ ହୋଇଥିବା ଜଣାପଡିଛି | ଗତକାଲି ସକାଳ ୬ ଟା ସମୟରେ ରାଜଗାଙ୍ଗପୁର ବ୍ଲକ କୁଟୀନିଆ ପଞ୍ଚାୟତର ଫକୀରପଡା ନିବାସୀ ଫଗୁ ମାଝୀ(51)ଚନ୍ଦ୍ରା ଇଞ୍ଜିନିୟରଙ୍ଗିରେ କାମ କରୁଥିବାବେଳେ ସୁରକ୍ଷା ଉପକରଣର ଅଭାବ ଯୋଗୁଁ ହଠାତ ତାଙ୍କ ମୁଁହରେ ଆଘାତ ଲାଗିଥିଲା, ଫଳରେ ତାଙ୍କର ଘଟଣାସ୍ଥଳରେ ହିଁ ମୃତ୍ଯୁ ଘଟିଥିଲା | କାରଖାନା କର୍ତ୍ତୃପକ୍ଷଙ୍କ ଅସାବଧାନତା ଯୋଗୁଁ ବହୁ ବିଳମ୍ବରେ ସରକାରୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇ ଥିଲେ, ସେଠାରୁ ଅଧିକ ଚିକିତ୍ସା ପାଇଁ ତାଙ୍କୁ ରାଉରକେଲାକୁ ପଠା ଯାଇଥିଲା |

ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଆମକୁ ବହୁତ ବିଳମ୍ବରେ ଖବର ଦେଇଥିଲେ | ତୁମ ବାପାଙ୍କର ଦୁର୍ଘଟଣା ହୋଇଯାଇଛି, ତାଙ୍କୁ ଆମେ ଘରୋଇ ଚିକିତ୍ସାଳୟ ଶାନ୍ତି ସଦନକୁ ନେଇଛୁ, ଆମେ ଆସି ଶାନ୍ତି ସଦନ ଚିକିତ୍ସାଳୟରେ ଦେଖି ସେଠାରେ ନପାଇବାରୁ କାରଖାନା କର୍ତ୍ତୃପକ୍ଷଙ୍କୁ ସମ୍ପର୍କ କରିବା ପରେ ତାଙ୍କୁ ରାଉରକେଲା ମଡେଲ ହସ୍ପିଟାଲକୁ ନେଉଛୁ ବୋଲି କହିଥିଲେ | ସେଠାରେ ଯାଇ ପହଁଚିଲା ପରେ ପୁଣି କହିଥିଲେ ଯେ, ତାଙ୍କୁ ରାଉରକେଲା ଇସ୍ପାତ ହସ୍ପିଟାଲକୁ ନେଉଛୁ ବୋଲି | ସେଠାରେ ତାଙ୍କର ମୃତ୍ୟୁ ଘୋଷଣା ହୋଇଥିବା ଶୁଣିବାକୁ ପାଇଥିଲୁ | ପରିବାର ଲୋକେ କାରଖାନା କର୍ତ୍ତୃପକ୍ଷଙ୍କୁ ଦାୟୀ କରିବା ସହ ୨୦ ଲକ୍ଷ ଟଙ୍କା କ୍ଷତିପୂରଣ ଦାବିରେ ଶତାଧିକ ଗ୍ରାମବାସୀଙ୍କ ସହ ଥାନା ପରିସରରେ ଭିଡ଼ ଜମାଇଥିବା ଜଣାଯାଇଛି |

ପ୍ରକାଶ ଥାଉକି, ରାଜଗାଙ୍ଗପୁର ଅଞ୍ଚଳରେ ବହୁତ କଳ କାରଖାନା ସ୍ଥାପନ ହୋଇଛି, ଯେଉଁଠି ଶ୍ରମିକ ମାନେ ଅସୁରକ୍ଷିତ ଭାବେ କାର୍ଯ କରୁଛନ୍ତି, ଶ୍ରମିକଙ୍କୁ ସୁରକ୍ଷା ଉପକରଣ ଦିଆଯାଉନଥିବା ଜଣାପଡିଛି | ପ୍ରାୟ ବହୁ ସମୟରେ ଛୋଟ ମୋଟ ଦୁର୍ଘଟଣା ହେବା ସହ ଶ୍ରମିକଙ୍କ ମୃତ୍ୟୁ ହୋଇ ଯାଉଛି | ଶ୍ରମିକଙ୍କୁ ଉପଯୁକ୍ତ ନ୍ୟାୟ ଦେବାପାଇଁ ଉଚ୍ଚପ୍ରଶାସନଙ୍କୁ ଧ୍ୟାନ ଦେବାକୁ ବୁଦ୍ଧିଜୀବୀ ମତବ୍ୟକ୍ତି କରିଛନ୍ତି |
ଫସର ଫାଟିଲା ଡକାୟତି ଯୋଜନା ; ପୋଲିସ ଜାଲରେ ପଡ଼ିଲେ ଆଠ

ଗତକାଲି ରାତିରେ ବିଭିନ୍ନ ସ୍ଥାନରେ ଡକାୟତି ଯୋଜନା କରୁଥିବା ବେଳେ ପୋଲିସ ହାତରେ ଧରାପଡିଛନ୍ତି କିଛି ଡକାୟତ | ସେମାନଙ୍କ ଠାରୁ ବିଭିନ୍ନ ମାରଣାସ୍ତ୍ର ଜବତ କରି କରିବାରେ ସଫଳତା ହୋଇଛି ପୋଲିସ | ଗତକାଲି ବିଳମ୍ବିତ ରାତିରେ ସ୍ଥାନୀୟ ମିଶନ ସ୍କୁଲ ହତାରେ ୮ ଜଣ ଯୁବକ ବସି କୌଣସି ଯୋଜନା କରୁଥିବା ନେଇ ବିଶ୍ବସ୍ତ ସୂତ୍ରରୁ ପୋଲିସ ଖବର ପାଇ ମିଶନ ହତାରେ ପହଞ୍ଚି ଚାରିପଟୁ ଘେରି ଅତର୍କିତ ଭାବେ ଚଢ଼ାଉ କରିବା ସମୟରେ ସେମାନଙ୍କ ମଧ୍ୟରୁ କେତେ ଜଣ ଦୌଡି ପଳାଇବାକୁ ଚେଷ୍ଟା କରୁଥିବା ବେଳେ ପୋଲିସ ୮ ଜଣଙ୍କୁ କାବୁ କାରିବାରେ ସଫଳ ହୋଇଥିଲା |

ସେମାନଙ୍କ ମଧ୍ୟରେ ଲେଖୁଆ ପଡାର ଶିବ କଂସାରୀଙ୍କ ପୁଅ ବିଶାଲ କଂସାରୀ (୨୩)ସରୋଜ ଲହରୀଙ୍କ ପୁଅ ମୁକେଶ ଲହରୀ (୨୨) ମିଶନ ହତାର ମହମ୍ମଦ ନଉସାଦଙ୍କ ପୁଅ ମହମ୍ମଦ ଗୋଲଡ଼ାନ (୨୬) ଇସଲାମ ଛକର ସରୱାରଙ୍କ ପୁଅ ଏମ ଡି ରୋହନ (୨୬) ଇଦିଗା ମହାଲାର ଏମଡି ଇମ୍ରାନ ଅନସାରୀଙ୍କ ପୁଅ ଏମ ଡି ରୁସ୍ତମ (୨୩) ବଗିଚାପଡ଼ାର ଜୀବନ ଶାହାଙ୍କ ପୁଅ ବିଶାଲ ଶାହା(୨୨) ମଦନ ସାହୁଙ୍କ ପୁଅ ଶୁଭମ ସାହୁ (୨୬) ତାଲକି ପଡାର ବସନ୍ତ ସିଂଙ୍କ ପୁଅ ରଘୁବୀର ସିଂ(୨୩) ପ୍ରମୁଖଙ୍କ ଠାରୁ ପୋଲିଶ ୪ ଟି ଗାମୁଛା, ୪ ଟି ମାସ୍କ, ୨ ଟି ଛୋଟ ଚାକୁ, ଗୋଟିଏ ଭୁଜାଲି, ଦୁଇଟି ମରିଚଗୁଣ୍ଡ ପ୍ୟାକେଟ, ଗୋଟିଏ ସୋଲାର ଟେପ୍ ଜବତ କରିଥିବା ଜଣାପଡିଛି |

ସେମାନଙ୍କୁ ଥାନାକୁ ଆଣି ପ୍ରାଥମିକ ତଦନ୍ତ କରିବା ପରେ ସେମାନେ ସୁନା ଦୋକାନ ଏବଂ ବଡ଼ ବଡ ବ୍ୟବସାୟୀଙ୍କ ଘରେ ପଶି ଡକାୟତି କରିବା ପାଇଁ ଏକାଠି ହୋଇ ଯୋଜନା କରୁଥିବା ସ୍ୱୀକାର କରିଥିଲେ | ପୋଲିସ ଆଜି ସମସ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି |
ମହାବୀର ପ୍ଲାଣ୍ଟର ବ୍ଲାଷ୍ଟ ଫର୍ନେସରେ ଦୁର୍ଘଟଣା: ୬ ଆହତ, ୨ ଗୁରୁତର

ସୁନ୍ଦରଗଡ଼ ଜିଲ୍ଲା ବ୍ରାହ୍ମଣୀତରଙ୍ଗ ଥାନା କଲୁଙ୍ଗା ସଂଲଗ୍ନ ବଲଣ୍ଡା ଅଞ୍ଚଳରେ ଥିବା ମହାବୀର ଫେରୋ ଆଲଏଜ୍ ପ୍ଲାଣ୍ଟରେ ଏକ ବଡ଼ ଧରଣର ବିସ୍ଫୋରଣ ହୋଇଥିବା ଜଣାପଡିଛି । ବିସ୍ଫୋରଣରେ ୬ ଜଣ ଗୁରୁତର ହୋଇଥିବା ବେଳେ ୨ ଜଣଙ୍କର ଅବସ୍ଥା ସଂକଟାପନ୍ନ ଥିବା ଜଣାଯାଇଛି । ସମସ୍ତଙ୍କୁ ଦଣ୍ଡିଆପାଲିସ୍ଥିତ ଜେପି ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।

ତେବେ ବ୍ଲାଷ୍ଟ ଫର୍ନେସର ଏକ ନୂତନ ଭାଟି ଚଳାଇବା ସମୟରେ ଅଚାନକ ଏକ ବଡ଼ ଧରଣର ବିସ୍ଫୋରଣ ହୋଇଥିବା ଜଣାପଡିଛି । ସ୍ଥାନୀୟ ଲୋକଙ୍କ ମତରେ ବିସ୍ଫୋରଣଟି ଏତେ ଭୟଙ୍କର ଥିଲା ଯେ ଏହାର ଶବ୍ଦ ଆଖପାଖରେ ଥିବା କିଛି କାରଖାନାକୁ ଶୁଣାଯାଇଥିଲା । ତେବେ ଏହି ଘଟଣାର ଭିଡିଓ ଗଣମାଧ୍ୟମରେ ପ୍ରସାରିତ ହେବାପରେ ପ୍ରଶାସନ ଖବର ପାଇ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।

ବରିଷ୍ଠ ଅଧିକାରୀଙ୍କ ଢିଲାପଣ ସହ ସେଫଟି ଅଧିକାରୀଙ୍କ ଦାୟିତ୍ବହୀନତା ଯୋଗୁଁ ଏପରି ଦୁର୍ଘଟଣା ଘଟିଥିବା ଶ୍ରମିକ ସଙ୍ଗଠନ ପ୍ରକାଶ କରିଛି । ଦୋଷୀଙ୍କ ପ୍ରତି ଦୃଢ଼ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ଦାବି କରିଛି ଶ୍ରମିକ ସଙ୍ଗଠନ । ଉକ୍ତ ଦୁର୍ଘଟଣାରେ ପ୍ଲାଣ୍ଟ ଭିତରେ ଏକ ପ୍ରକାର କୋକୁଆ ଭୟର ବାତାବରଣ ସୃଷ୍ଟି ହେବା ସହ ଶ୍ରମିକ ଗଣ ଏଣେତେଣେ ଦୌଡିବାକୁ ଲାଗିଥିଲେ ।

ତେବେ ଶ୍ରମିକଙ୍କ ପରିବାର ପରିଜନ ସ୍ଥାନୀୟ ପ୍ରଶାସନ ଓ ଫ୍ୟାକ୍ଟ୍ରି ଅଧିକାରୀଙ୍କୁ ଜବାବ ମାଗିଛନ୍ତି । ତେବେ ପ୍ରଶାସନ କହିଛି ଯେ ତଦନ୍ତ ହେବାପରେ ସୁନିଶ୍ଚିତ ଭାବେ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଦୁର୍ଘଟଣା ପ୍ରକୃତ ତଥ୍ୟ ଲୁଚାଉଥିବା ଅନୁମାନ କରାଯାଉଛି । ଦେଖିବାକୁ ବାକି ରହିଲା ପ୍ରଶାସନ କେତେଶୀଘ୍ର ପଦକ୍ଷେପ ନେଉଛି ।
ଆଇଟିଡିଏ ପ୍ରଶାସକ ଅଧିକାରୀଙ୍କ ସରକାରୀ ବାସଭବନରେ ଭିଜିଲାନ୍ସ ଚଢାଉ

ସୁନ୍ଦରଗଡ଼ ଜିଲ୍ଲା ସ୍ଥିତ ବଣାଇ ଉପଖଣ୍ଡର ବଣାଇ ଆଦିବାସୀ ଉନ୍ନୟନ ପ୍ରକଳ୍ପ ପ୍ରଶାସକ ଅଧିକାରୀ ବିଶ୍ଵଦର୍ଶୀ ସାହୁଙ୍କ ସରକାରୀ ବାସଭବନ ସମେତ ୭ଟି ସ୍ଥାନରେ ଆଜି ସକାଳେ ଭିଜିଲାନ୍ସ ଚଢାଉ ହୋଇଥିବା ଜଣାପଡିଛି। ସୁନ୍ଦରଗଡ ଭିଜିଲାନ୍ସ କୋର୍ଟ ନିର୍ଦ୍ଦେଶ କ୍ରମେ ଏହି ତଦନ୍ତ ଚଲାଇଥିବା ଜଣାପଡ଼ିଛି।

ତେବେ ଆୟ ବହିର୍ଭୂତ ସମ୍ପତ୍ତି ଠୁଳ ହୋଇଥିବା ନେଇ ଚଢାଉ ହୋଇଛି | ଏହି ଚଢାଉରେ ବଣାଇଗଡ ପିଏ ଆଇଟିଡିଏ ସରକାରୀ ବାସଭବନର ସହ ଭୁବନେଶ୍ବର ସମେତ ସାତୋଟି ସ୍ଥାନରେ ଭିଜିଲାନ୍ସ ଚଢାଉ ଚାଲିଛି । ଏହି ଚଢାଉ ବଣାଇ ଆଇଟିଡିଏ ପ୍ରକଳ୍ପ ପ୍ରଶାସକ ବାସଭବନରେ, ଭୁବନେଶ୍ବର, ବାଲେଶ୍ବର, ଯାଜପୁର ସମ୍ପର୍କୀୟଙ୍କ ଘର, ଭୁବନେଶ୍ବର ଶ୍ରୀରାମ ନଗର ନିକଟରେ ଥିବା ଦୁଇ ମହଲା ବିଶିଷ୍ଟ କୋଠାଘରେ, ଭୁବନେଶ୍ବର ଲକ୍ଷ୍ମୀସାଗର ସ୍ଥାନରେ ଚଢାଉ ଜାରି ଚାଲିଥିବା ଜଣାପଡ଼ିଛି।

ସେହିପରି ସୁନ୍ଦରଗଡ ଜିଲ୍ଲାର ଆଦିବାସୀ ଉନ୍ନୟନ କାର୍ଯ୍ୟାଳୟରେ ମଧ୍ୟ ଚଢାଉ ହୋଇଥିବା ଜଣାପଡିଛି। ଏହି ଭିଜିଲାନ୍ସ ଚଢାଉ ଜାରି ଚାଲିଥିବା ବେଳେ ଜଣେ ଅତିରିକ୍ତ ଏସପି, ୩ ଜଣ ଡିଏସପି, ଆଇଆଇସି ମଧ୍ୟ ତତ୍କାଳୀନ ଚଢାଉରେ ଜାରି ରଖିଛନ୍ତି। ବହୁ ମାତ୍ରାରେ ନଗଦ ଟଙ୍କା ଓ ସୁନା ଗହଣା ସହିତ ଗାଡି ଓ ଅନ୍ୟାନ୍ୟ ସାମଗ୍ରୀ ଜବତ ହୋଇଥିବାର ଜଣାପଡିଛି ।
ରାଉରକେଲା ସେକ୍ଟର-୪ ରେ ପିସ୍ତଲ ସହ କାର ଜବତ, ଯୁବକ ଅଟକ

ସ୍ମାର୍ଟସିଟି ରାଉରକେଲାରେ ଦିନକୁ ଦିନ ବଢ଼ିଚାଲିଛି ଅପରାଧ । ଏବେ ସହରର ବିଭିନ୍ନ ସ୍ଥାନରେ ବନ୍ଧୁକ କାରବାର ମଧ୍ୟ ବଢ଼ିଲାଣି । ବିଶ୍ଵସ୍ତ ସୂତ୍ରରୁ ଖବର ପାଇ ଡିଏସପିଙ୍କ ନିର୍ଦ୍ଦେଶରେ ଏସ ଆଇ ରବିନ୍ଦ୍ର ଭୁଏ ଏକ ଟିମ ସହିତ ସେକ୍ଟର – ୪ ସ୍ଥିତ ହନୁମାନ ମନ୍ଦିର ନିକଟରେ ଛିଡ଼ା ହୋଇଥିବା ଏକ ଗାଡିକୁ ଯାଞ୍ଚ କରିଥିଲେ । ଗାଡି ଭିତରୁ ମିଳିଥିବା ଗୁଳି ଭର୍ତ୍ତି ପିସ୍ତଲ ସହ ଦୁଇ ଯୁବକଙ୍କୁ ଗିରଫ କରିବା ସହ କାରକୁ ମଧ୍ୟ ଜବତ କରିଥିଲେ ଭୁଏ । ଗିରଫ ଅଭିଯୁକ୍ତମାନେ ବିକି ଚୌଧୁରୀ ଏବଂ ସୁମିତ ରଞ୍ଜନ ରାଉତ ବୋଲି ଜଣାପଡିଛି । ଏ ନେଇ ସେକ୍ଟର-୩ ଥାନାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଡିଏସ୍‌ପି ପୁଷ୍ପାଞ୍ଜଳି ନିଙ୍ଗୀ ଏବଂ ଥାନା ଅଧିକାରୀ ପ୍ରତିଭା ମଞ୍ଜରୀ ସାହୁ ସୂଚନା ଦେଇଛନ୍ତି। ପୋଲିଶ ସେମାନଙ୍କୁ ପଚାରିବାରୁ ସଠିକ ଉତ୍ତର ଦେଇ ନ ପାରିବାରୁ ଉଭୟଙ୍କ ପ୍ରାଥମିକ ଯାଞ୍ଚ ପରେ ସେମାନଙ୍କୁ ଜେଲକୁ ପଠାଇ ଦିଆଯାଇଛି | ଏହି ଘଟଣାକୁ ନେଇ ସହରରେ କଡାକଡି ଯାଞ୍ଚ ଚାଲିଛି । କେହି ବି ସନ୍ଦିଗ୍ଧ ଧରାପଡିଲେ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଏସପି କହିଛନ୍ତି ।