ସମସ୍ୟାରେ ଯୁଝି ହେଉଛନ୍ତି ବିକାଶଠାରୁ ବହୁ ଦୂରରେ ଥିବା ପାଣ୍ଡିଆ ବସ୍ତିବାସୀନ୍ଦା । ପ୍ରଶାସନିକ ଅବହେଳା ଓ ରାଜନୈତିକ ଇଚ୍ଛାଶକ୍ତିର ଅଭାବ ପାଇଁ ବିକାଶ ଏଠି ବାଟବଣା, ଲୋକଙ୍କ ପାଖରେ ପହଞ୍ଚି ପାରୁନି ସରକାରୀ ଯୋଜନା । ରାଜ୍ୟ ସରକାର ବିକାଶର କଥା କହୁଛନ୍ତି, ହେଲେ ଏଠି ବିକାଶ କାଗଜ କଲମରେ ସିମୀତହୋଇ ଟେବୁଲ ତଳେ ଚାପି ହୋଇଯାଇଛି । ଫେଲମାରିଛି ସରକାରୀ ଯୋଜନା । ଆଜିବି ରାସ୍ତା, ପାନୀୟ ଜଳ ଭଳି ମୌଳିକ ସୁବିଧା ପାଇ ପାରୁନାହାନ୍ତି ଅଞ୍ଚଳବାସୀ । ଆସନ୍ତୁ ଦେଖିବା କେନ୍ଦୁଝର ଜିଲ୍ଲା ଯୋଡ଼ା ବ୍ଳକ ଜଜାଙ୍ଗ ପଞ୍ଚାୟତର ପାଣ୍ଡିଆ ଗାଁର ଗ୍ରାଉଣ୍ଡ ଜିରୋରୁ ଏହି ରିପୋର୍ଟ । ବିକାଶର ବାସ୍ତବ ଚିତ୍ର ଆପଣଙ୍କ ସାମ୍ନାରେ।
ଦୀର୍ଘ ବର୍ଷର ସ୍ଵାଧୀନତା ପରେ ଆଜି ବି ନିଜ ମୌଳିକ ସମସ୍ୟାରେ ଜୁଝୀ ହେଉଛନ୍ତି ପାଣ୍ଡିଆ ଗ୍ରାମବାସୀ । ଆମ ରାଜ୍ୟରେ ଦୀର୍ଘ ୨୩ ବର୍ଷର ସ୍ଥିର ସରକାର, ତଥାପି ବିକାଶ ଏଠି ବାଟବଣା । ଥରେ ଆଖି ପୁରାଇ ଦେଖି ନିଅନ୍ତୁ ରାଜ୍ୟ ସରକାରଙ୍କ ବିକାଶର ବାସ୍ତବ ଚିତ୍ରକୁ । ଗାଁ ରେ ରାସ୍ତା, ପାନୀୟ ଜଳ ଭଳି ମୌଳିକ ସମସ୍ୟା ଲୋକଙ୍କୁ କଲବଲ କରୁଛି ।ଅଭିଯୋଗ ପରେବି ସମସ୍ୟାର ସମାଧାନ ହେଉନାହିଁ । ଆମେ କହୁଛୁ ରାଜ୍ୟ ରାଜ କୋଷକୁ ସମୃଦ୍ଧ କରୁଥିବା କେନ୍ଦୁଝର ଜିଲ୍ଲାର କଥା ।
ଯୋଡା ବ୍ଳକ ଠାରୁ ମାତ୍ର ୧୦ କିଲୋମିଟର ଦୂରରେ ଅବସ୍ଥିତ ଏହି ଗାଁ । ରାଜ୍ୟ ସରକାରଙ୍କ ରେକର୍ଡ ଅନୁସାରେ ୫୦ ଟି ପରିବାରର ୨୦୦ ରୁ ଅଧିକ ଲୋକ ବସବାସ କରନ୍ତି ଏହି ଗାଁରେ । ଦୀର୍ଘ ଦିନ ହେଲା ମୁନ୍ଦାଏ ପାଣି ପାଇଁ ସଂଘର୍ଷ କରି ଆସୁଛନ୍ତି ସ୍ଥାନୀୟ ଜନ ସାଧାରଣ । ବସ୍ତିର ମୁଣ୍ଡରେ ଥିବା ଏକମାତ୍ର ନଳକୂଅ ଲୋକଙ୍କର ସାହାରା କିନ୍ତୁ ସେଥିରୁ ଗୋଳିଆ ପାଣି ବାହାରୁଥିବାରୁ ବାଧ୍ୟ ହୋଇ ଚୂଆ ପାଣି ଉପରେ ଭରସା କରୁଛନ୍ତି ବସ୍ତି ବାସିନ୍ଦା ।
କ୍ରମାଗତ ଭାବରେ ବସ୍ତି ବାସିନ୍ଦାଙ୍କ ପାନୀୟ ଜଳ ଅଭାବ ବିଷୟରେ ଅଭିଯୋଗ କରାଯିବାପରେ ପଞ୍ଚାୟତ ପକ୍ଷରୁ ଦିଆଯାଇଛି ଗୋଟିଏ ସୋଲାର ଟାଙ୍କି । କିନ୍ତୁ, ବର୍ଷାଦିନ କିମ୍ବା ମେଘୁଆ ପାଗରେ ସୋଲାର ଟାଙ୍କି ଅଚଳ ହୋଇ ପଡୁଥିବାରୁ ଚୁଆ ପାଣି ଉପରେ ନିର୍ଭରଶୀଳ ହୁଅନ୍ତି ବସ୍ତି ବାସିନ୍ଦା । ଚୁଆ ପାଣି ବ୍ୟବହାର କରିବା ଦ୍ୱାରା ବିଭିନ୍ନ ରୋଗରେ ବିଭିନ୍ନ ରୋଗରେ ଆକ୍ରାନ୍ତ ହୋଉଛନ୍ତି ଲୋକେ । ଉତ୍ତମ ପାନୀୟ ଜଳର ଅଭାବ ସହିତ ଗମନା ଗମନ କ୍ଷେତ୍ରରେ ମଧ୍ୟ ଅସୁବିଧା ଭୋଗ କରୁଛନ୍ତି ଲୋକେ ।
ଖରାପ ରାସ୍ତା ଯୋଗୁଁ ସାହି ମଧ୍ୟକୁ ଆମ୍ବୁଲାନ୍ସଟିଏ ମଧ୍ୟ ଆସି ପାରୁ ନାହିଁ । ଅନ୍ୟପଟେ, ପୂର୍ବରୁ ଖଣିରେ କାର୍ଯ୍ୟକରି ପରିବାର ପ୍ରତି ପୋଷଣ କରି ଆସୁଥିବା ସ୍ଥାନୀୟ ଅଧିବାସୀ, ନିକଟରେ ଥିବା ଖଣି ବନ୍ଦ ହେବା ପରେ ରୋଜଗାର ହରାଇ ବସି ରହିଛନ୍ତି । ତେବେ ସ୍ଥାନୀୟ ପ୍ରଶାସନ ଏବଂ ସରକାରଙ୍କ କୁମ୍ଭକର୍ଣ୍ଣ ନିଦ୍ରା କେବେ ଭାଙ୍ଗିବ ଆଉ ଏହି ବସ୍ତି ବାସିନ୍ଦାଙ୍କ ସମସ୍ୟା କେବେ ଲାଘବ ହେବ ତାହା ଦେଖିବାକୁ ବାକି ରହିଲା।
