ଯାଜପୁର ଜିଲ୍ଲାପାଳ ଅଫିସ ସମ୍ମୁଖରେ ବିକ୍ଷୋଭ ପ୍ରଦର୍ଶନ । ଦୁର୍ନୀତିକୁ ବିରୋଧ କରୁଥିବା ସୂଚନା ଅଧିକାର କର୍ମୀଙ୍କ ଉପରେ ଆକ୍ରମଣ ପରେ ଜୋରଦାର ବିରୋଧ ହୋଇଛି । ପୋଲିସ ଜାଣିଶୁଣି ରାଜନୈତିକ ଚାପରେ ସୂଚନା ଅଧିକାର କର୍ମୀଙ୍କୁ ଗିରଫ କରି କୋର୍ଟ ଚାଲାଣ କରୁଥିବା ଅଭିଯୋଗ ହୋଇଛି ।
ପୋଲିସ ଉପରେ ରାଜନୈତିକ ଚାପ ରହୁଛି । ଦୁର୍ନୀତି ବିରୋଧରେ ଆନ୍ଦୋଳନ କଲେ କି ପ୍ରତିବାଦ କଲେ ଆକ୍ସନ ନେଉଛି ପୋଲିସ । ବିନା କାରଣରେ ଲୋକଙ୍କୁ ଗିରଫ କରି କୋର୍ଟ ଚାଲାଣ କରୁଛି । ପୂର୍ବରୁ ଦୁର୍ନୀତି ବିରୋଧରେ ଲଢ଼େଇ କରୁଥିବା ଆରଟିଆଇ କର୍ମୀ ସୀମାନ୍ତ ପାତ୍ରଙ୍କ ସମେତ ବହୁ କର୍ମୀଙ୍କ ଉପରେ ଆକ୍ରମଣ ମଧ୍ୟ ହୋଇଛି । ଏବେ ଧର୍ମଶାଳାର ସୂଚନା ଅଧିକାର କର୍ମୀ ସର୍ବେଶ୍ୱର ବେହୁରାଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି ।
ଏହାର ପ୍ରତିବାଦରେ ଓଡ଼ିଶା ସୂଚନା ଅଧିକାର ଅଭିଯାନ ପକ୍ଷରୁ ଯାଜପୁର ଜିଲ୍ଲାପାଳ ଅଫିସ ସମ୍ମୁଖରେ ବିକ୍ଷୋଭ କରାଯାଇଛି । ସୂଚନା ଅଧିକାର ଅଭିଯାନ ଆବାହକ ପ୍ରଦୀପ ପ୍ରଧାନଙ୍କ ନେତୃତ୍ୱରେ ବାହାରିଥିଲା ପ୍ରତିବାଦ ଶୋଭାଯାତ୍ରା । କିଆନାଳୀ ଛକରୁ ଜିଲ୍ଲାପାଳ ଅଫିସ ଯାଏ ଶୋଭାଯାତ୍ରାରେ ସାମିଲ ହୋଇଥିଲେ ଶତାଧିକ ଆରଟିଆଇ କର୍ମୀ । ବିନା କାରଣରେ ଏଭଳି ପଦକ୍ଷେପକୁ ନିନ୍ଦା କରାଯାଇଛି । ପୋଲିସର ଏଭଳି ଉଦ୍ୟମ ବନ୍ଦ ହେବା ଆବଶ୍ୟକ ବୋଲି ବିକ୍ଷୋଭକାରୀ କହିଛନ୍ତି । ଏ ନେଇ ସେମାନେ ଏକ ଦାବିପତ୍ର ମଧ୍ୟ ପ୍ରଦାନ କରିଛନ୍ତି ।
