ବାଜିଲା ଯୋଡ଼ି ମହୁରୀ, ବାଜିଲା ଶେହନାଇ । ଭୋଜିଭାତ ସହ ସମସ୍ତଙ୍କ ମନରେ ଥିଲା ଉତ୍ସାହ । ସ୍ୱଧାର ଗୃହ ପାଲଟିଲା ବିବାହ ମଣ୍ଡପ । ଆୟୋଜିତ ହୋଇଥିଲା ପୂଜାରାଣୀଙ୍କ ବିବାହ ଉତ୍ସବ । ୨୦୧୮ରେ ଏହି ସ୍ୱଧାର ଗୃହକୁ ଆସିଥିଲେ ପୂଜାରାଣୀ । ତାଙ୍କୁ ନିଜର କରିଥିଲେ ଅପରିଚିତ ଚେହେରା । ଏହାକୁ ନିଜର ଶେଷ ଆଶ୍ରୟସ୍ଥଳୀ ଭାବି ନେଇଥିଲେ ପୂଜା । ଶେଷରେ ତାଙ୍କୁ ବିବାହ କରାଇଛନ୍ତି ସ୍ୱଧାର ଗୃହ ସମ୍ପାଦକ ପରେଶ ମଲ୍ଲିକ ।
ପୂଜାରାଣୀଙ୍କୁ ବିବାହ କରିଛନ୍ତି ଦଶରଥପୁର ବ୍ଲକ୍ ସିନ୍ଦୁରାଇମୁହଁ ଅଞ୍ଚଳର ବିଜୟ ଓଝା । ଏହି ମାଙ୍ଗଳିକ କାର୍ଯ୍ୟରେ ସାମିଲ ହୋଇଥିଲା ପୁରା ଜିଲ୍ଲା ପ୍ରଶାସନ । ସାଧାରଣ ବିବାହ ପରି ଏଥିରେ ଥିଲେ ବରଯାତ୍ରୀ । ପଡ଼ୋଶୀମାନେ ମଧ୍ୟ ସାମିଲ ହୋଇ ଭୋଜିଭାତ ଖାଇବା ସହ ନବ ଦମ୍ପତିଙ୍କୁ ଆଶୀର୍ବାଦ କରିଥିଲେ । ଏଥିସହ ଏଭଳି ଏକ ନିଆରା ପଦକ୍ଷେପ ପାଇଁ ସ୍ୱଧାର ଗୃହ କର୍ମକର୍ତ୍ତାଙ୍କୁ ଧନ୍ୟବାଦ ଦେଇଥିଲେ । ଏହା ଅନ୍ୟମାନଙ୍କ ପାଇଁ ଏକ ପ୍ରେରଣା ସାଜିବ ବୋଲି ଅତିଥିମାନେ କହିଛନ୍ତି ।
ଯାଜପୁର ବାହବଳପୁରସ୍ଥିତ ଲକ୍ଷ୍ମୀ ନାରାୟଣ ସ୍ୱଧାର ଗୃହରେ ସମ୍ପୂର୍ଣ୍ଣ ବୈଦିକ ରୀତିନୀତିରେ, ଧୁମଧାମରେ ସମ୍ପନ୍ନ ହୋଇଛି ପୂଜାଙ୍କ ବିବାହ କାର୍ଯ୍ୟ । ସ୍ୱଧାର ଗୃହ କର୍ମକର୍ତ୍ତାଙ୍କ ସମେତ ରୋଟାରୀ କ୍ଲବ୍ ଏବଂ ଅନ୍ୟାନ୍ୟ ଅନୁଷ୍ଠାନ ସାହାଯ୍ୟ ଓ ସହଯୋଗର ହାତ ବଢ଼ାଇଥିଲେ ।
