କେନ୍ଦୁଝର ଜିଲ୍ଲାରେ ଦିନକୁ ଦିନ ଅପରାଧ ବଢ଼ିବାରେ ଲାଗିଛି । ଦିନ ହେଉ ଅବା ରାତି ଅପରାଧୀମାନେ ଅପରାଧ ଘଟାଇବାରେ ଲାଗିଛନ୍ତି । କେତେବେଳେ ପୋଲିସ ସେମାନଙ୍କୁ ଧରିବାରେ ସଫଳ ହେଉଛି ତ ଆଉ କେତେବେଳେ ଫେଲ୍ ମାରିଛି । ଏବେ ଏକ ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଦୁଇ ସାଙ୍ଗଙ୍କ ମଧ୍ୟରେ ବଚସା ହୋଇ ଗୁଳିମାଡ଼ ପରେ ଜଣେ ସାଙ୍ଗ ଗୁରୁତର ହୋଇଛି ।
କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଅନ୍ତର୍ଗତ ସିମ୍ବିଲା ଗାଁ । ନିକଟରେ ଥିବା ପୋଖରୀ କୂଳରେ ଦୁଇ ସାଙ୍ଗଙ୍କ ମଧ୍ୟରେ ଆରମ୍ଭ ହୋଇଥିଲା ବଚସା । ଏହି କଳି ଶେଷ ସୀମାରେ ପହଞ୍ଚିଥିଲା । ଶେଷରେ ଜଣେ ସାଙ୍ଗ, ଅନ୍ୟ ଜଣେ ସାଙ୍ଗଙ୍କୁ ଗୁଳିମାଡ଼ କରିଥିଲା । ଅଭିଯୁକ୍ତ ବିନୋଦ ପାତ୍ରର ଗୁଳିମାଡ଼ରେ ପୂର୍ଣ୍ଣଚନ୍ଦ୍ର ଦାଶ ଗୁରୁତର ହୋଇଛନ୍ତି । ଗୁଳିମାଡ଼ ପରେ ଗୁରୁତର ଥିବା ପୂର୍ଣ୍ଣଚନ୍ଦ୍ରଙ୍କୁ ଉଦ୍ଧାର କରିଥିଲେ ଗାଁ ଲୋକେ ।
ଚିକିତ୍ସା ପାଇଁ ପୂର୍ଣ୍ଣଚନ୍ଦ୍ରଙ୍କୁ ହରିଚନ୍ଦନପୁର ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ କିନ୍ତୁ ସ୍ଵାସ୍ଥ୍ୟାବସ୍ଥାରେ ଉନ୍ନତି ଘଟିଲା ନାହିଁ । ଅବସ୍ଥା ସଙ୍କଟାପୂର୍ଣ୍ଣ ହେବାରୁ ତାଙ୍କୁ କଟକ ବଡ ମେଡିକାଲ ସ୍ଥାନାନ୍ତର କରାଯାଇଛି । ଖବର ପାଇ ଘଟଣାସ୍ଥଳରେ ପହଞ୍ଚିଥିଲା ପୋଲିସ । ସ୍ଥାନୀୟ ଲୋକଙ୍କୁ ପଚରାଉଚୁରା କରିବା ସହ ଘଟଣାର ତଦନ୍ତ ଜାରି ରଖିଛି ପୋଲିସ ।
ଆଜିକାଲି ଜିଲ୍ଲାର ଅଧିକାଂଶ ସ୍ଥାନରେ ପ୍ରାୟତଃ ଏଭଳି ଅପରାଧ ଘଟି ଚାଲିଛି । ଚୋରି, ଡକାୟତି, ମରଣାନ୍ତକ ଆକ୍ରମଣ, ଗୁଳିକାଣ୍ଡ ପରି ଘଟଣା ଲୋକଙ୍କୁ ଟେନସନରେ ପକାଇଛି । ପୋଲିସ ପ୍ରଶାସନ ତତ୍ପରତା ଦେଖାଇ ଏ ଦିଗରେ ତୁରନ୍ତ ପଦକ୍ଷେପ ନେବାକୁ ଲୋକେ ଦାବି କରିଛନ୍ତି ।
