କେନ୍ଦୁଝର ସଦର ଥାନା ୪୯ ନମ୍ବର ଜାତୀୟ ରାଜପଥର ମହୁଲଡିହା ଗାଁ ନିକଟରେ ଗୋଟିଏ ଟ୍ରକ କୁ ପଛରୁ ପିଟିଲା ଟ୍ରକ୍ । ଡ୍ରାଇଭର ଜୀବନ୍ତ ଦଗ୍ୱ । ପୋଲିସ ଓ ଅଗ୍ନୀଶମ ବାହୀନି ଘଟଣାସ୍ଥଳରେ ପହଞ୍ଚି ଜୀବନ୍ତ ଦଗ୍ଧ ଡ୍ରାଇଭର କୁ କଲେ ଉଦ୍ଧାର । ଘଟଣାଟି ଆଜି ଭୋର ୪ଟା ରେ ହୋଇଥିବା ଜଣା ପଡିଛି । ଦୁଇଟି ଟ୍ରକ କଲିକତା ଅଭିମୁଖେ ଯାଉଥିବା ବେଳେ ହୋଇଥିଲା ଦୁର୍ଘଟଣା । ଲୁହା ଚାଦର ବୋଝେଇ ଟ୍ରକକୁ ପଛରୁ ଧକ୍କା ଦେବା ଫଳରେ ଅନ୍ୟ ଟ୍ରକର ଡ୍ରାଇଭର ପଟ ଟି ପୁରା ନଷ୍ଟ ହୋଇଯାଇଥିଲା । କୌଣସି କାରଣରୁ ଗାଡ଼ିରେ ନିଆଁ ଲାଗି ଯାଇଥିଲା । ଡ୍ରାଇଭର ଜଣଙ୍କ ନ ବାହାରି ପାରି ଜୀବନ୍ତ ପୋଡ଼ି ଯାଇଥିଲେ ।
କେନ୍ଦୁଝର ଜିଲ୍ଲାର ବିଭିନ୍ନ ଅଞ୍ଚଳରେ ପ୍ରବଳରୁ ଅତି ପ୍ରବଳ ବର୍ଷା ହେବାର ଲାଗିଛି । ତେଲକୋଇ ବ୍ଲକ ରେ ଥିବା ସମାକୋଇ ନଦୀ ଉପରେ ୧୦ଫୁଟର ପାଣି ଯାଉଛି, ଯାହାଫଳରେ ତେଲକୋଇରୁ ଭୁବନେଶ୍ୱର, ଯାଜପୁର, ତାଳଚେର, ଅନଗୁଳ, ସମ୍ବଲପୁର ଏହିପରି ପ୍ରାୟ ଜାଗାକୁ ଯୋଗାଯୋଗ ବିଚ୍ଛିନ୍ନ ହୋଇପଡିଛି ।ଏଥିସହିତ ଜିଲ୍ଲାର ପାଟଣା ବ୍ଲକ, ଚମ୍ପୁଆ ବ୍ଲକ, ହରିଚନ୍ଦନପୁର ଭଳି ବ୍ଲକ ଗୁଡିକରେ ଛୋଟ ଛୋଟ ନଦୀ ନାଳ ଥିବା ପୋଲ ଉପରେ ପାଣି ଚାଲୁ ଥିବାରୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି । ପ୍ରବଳ ବର୍ଷାକୁ ନଜରରେ ରଖି ଜିଲ୍ଲାର ସମସ୍ତ ବିଦ୍ୟାଳୟ ଓ ଅଙ୍ଗନବାଡି କୁ ଛୁଟି ଘୋଷଣା କରିଛନ୍ତି ଜିଲ୍ଲା ପ୍ରଶାସନ ।
ଅତିପ୍ରବଳ ବର୍ଷା ସମ୍ଭାବନା ନେଇ ୪ ଜିଲ୍ଲାକୁ ରେଡ୍ ଓ୍ବାର୍ଣ୍ଣିଂ ଜାରି କଲା ଆଞ୍ଚଳିକ ପାଣିପାଗ ବିଭାଗ। ବଙ୍ଗୋପସାଗରରେ ସୃଷ୍ଟ ଅବପାତ ଗଭୀର ଅବପାତରେ ପରିଣତ ହୋଇଛି। ଗଭୀର ଅବପାତଟି ଖେପୁପଡ଼ାରୁ ୧୬୦, ଦୀଘାରୁ ୪୨୦ କିମି ଦୂରରେ ରହିଛି। କ୍ରମେ ଏହା ଉତ୍ତର ପଶ୍ଚିମ ଦିଗକୁ ଗତି କରି ଉପକୂଳ ମୁହାଁ ହେବ । ଆଜି ସନ୍ଧ୍ୟା ସୁଦ୍ଧା ବାଂଲାଦେଶ ଖେପୁପଡ଼ା ପାଖାପାଖି ଉପକୂଳ ଛୁଇଁବ । ପରେ ଏହା ପଶ୍ଚିମ-ଉତ୍ତରପଶ୍ଚିମ ମୁହାଁ ହୋଇ ଗାଙ୍ଗେୟ ଉପତ୍ୟକା ଆଡ଼କୁ ଯିବ । ଏହା ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ଲାଗି ରହିଛି ପ୍ରବଳ ବର୍ଷା ।
ଏହାବାଦ ଅନ୍ୟ ୧୩ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି । ଅନୁଗୁଳ, ଢେଙ୍କାନାଳ, କେନ୍ଦୁଝର, ମୟୂରଭଂଜ ଜିଲ୍ଲାକୁ ୱାର୍ଣ୍ଣିଂ ଜାରି କରାଯାଇଛି । ସଂପୃକ୍ତ ଜିଲ୍ଲାର କିଛି ସ୍ଥାନରେ ୭ରୁ ୨୦ ସେଣ୍ଟିମିଟର ପର୍ଯ୍ୟନ୍ତ ବର୍ଷା ହେବାର ସମ୍ଭାବନା ରହିଛି । ଗତକାଲିଠୁ ଲାଗି ରହିଥିବା ଲଗାଣ ବର୍ଷା ହେତୁ ଗତକାଲି ଟୁଇନ ସିଟି ଅବସ୍ଥା ବେହାଲ ହୋଇ ପଡ଼ିଛି । ଲୋକଙ୍କ ଆସବାବ ପତ୍ରଠୁ ଆରମ୍ଭ କରି ଦୋକାନରେ ଥିବା ସାମଗ୍ରୀ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ବର୍ଷା ପାଣିର ବିପର୍ଯ୍ୟୟ ଭିତରୁ ଏବେ ଲୋକେ ନିଜ ନିଜର ସାମଗ୍ରୀ ଖୋଜୁଛନ୍ତି । କେମିତି ପୁଣି ସ୍ୱାଭାବିକ ହେବ ସ୍ଥିତି ସେନେଇ ସ୍ଥାନୀୟ ଅଞ୍ଚଳର ଲୋକେ ଚିନ୍ତାରେ ।
ଏହାବାଦ ଯାଜପୁର, ଭଦ୍ରକ, ଦେବଗଡ଼, ସମ୍ବଲପୁର, ସୋନପୁର, ବୌଦ୍ଧ, ସୁନ୍ଦରଗଡ଼, ଜଗତସିଂହପୁର, କେନ୍ଦ୍ରାପଡ଼ା, କଟକ, ଖୋର୍ଦ୍ଧା, ପୁରୀ, ବାଲେଶ୍ୱର ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ତେଣୁ ଏସବୁ ଅଞ୍ଚଳବାସୀଙ୍କୁ ଆଗୁଆ ସତର୍କ କରାଇଛି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର।
ଆଧାରକାର୍ଡ ପାଲଟିଲା ମିଳନର ମାଧ୍ୟମ । ତେଣେ ପୁଅକୁ ହରାଇ ମାନସିକ ଦୁଶ୍ଚିନ୍ତାରେ କାଳ କାଟୁଥିବା ପରିବାର ଏତେ ବର୍ଷ ପରେ ହଜିଲା ପୁଅକୁ ପାଇ ଖୁସିରେ ବିଭୋର। ଆଧାର କାର୍ଡ ପାଇଁ ଭିନ୍ନକ୍ଷମ ପୁଅ ୬ ବର୍ଷ ପରେ ନିଜ ପରିବାରକୁ ଫେରିବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି।
୨୦୧୭ ଜୁନ୨ ତାରିଖରେ ୧୨ ବର୍ଷର ଏହି ଭିନ୍ନକ୍ଷମ (ମୂକ,ବଧିର) ନାବାଳକ ପୁଅଟି କେନ୍ଦୁଝର ବଜାରରେ କାନ୍ଦିକାନ୍ଦି ବୁଲୁଥିଲେ । ଖବର ପାଇ କେନ୍ଦୁଝର ଶିଶୁ ମଙ୍ଗଳ ସମିତି କର୍ମକର୍ତ୍ତାମାନେ ତାଙ୍କୁ ଉଦ୍ଧାର କାରିଥିଲେ। ନାବାଳକ ଜଣକ ମୂକ, ବଧିର ହୋଇଥିବାରୁ ସେ ନିଜ ପରିଚୟ ଦେଇପାରି ନଥିଲେ । ତେଣୁ ନାବାଳକ ପରିବାରକୁ ଖୋଜି ବାହାର କରିବା ସଂସ୍ଥା ପାଇଁ ଅସମ୍ଭବ ହୋଇପଡିଥିଲା। ତେଣୁ ନାବାଳକକୁ ତେଲକୋଇସ୍ଥିତ ଭିନ୍ନକ୍ଷମ ଥଇଥାନ ସଂସ୍ଥାକୁ ପଠାଇ ଦିଆଯାଇଥିଲା । ଏହାରି ଭିତରେ ଛଅ ବର୍ଷ ବିତିଗଲାଣି। ସେ ପରିବାରଠାରୁ ଦୂରରେ ସେହି ଥଇଥାନ କେନ୍ଦ୍ରରେ ରହୁଆସୁଥିଲେ। କିଛିଦିନ ତଳେ କେନ୍ଦ୍ର ପକ୍ଷରୁ ସେଠାକାର ଅନ୍ତେବାସୀଙ୍କ ଆଧାରକାର୍ଡ କରାଯାଇଥିଲା। । ଯେତେବେଳେ ସେହି ବାଳକର ଟିପଚିହ୍ନ ନିଆଗଲା ସେଥିରୁ ତାଙ୍କର ପୂର୍ବରୁ ଆଧାରକାର୍ଡ଼ ଥିବା ଜଣା ପଡିଥିଲା ।
ଏହା ପରେ ସେହି ଆଧାରକର୍ଡ ବାହାର କରି ଭିନ୍ନକ୍ଷମ ବାଳକଙ୍କ ଘର ବିହାରି ଥିଲା। ତାଙ୍କ ଘର ବିହାରର ଦରଭଙ୍ଗା ଜିଲ୍ଲା ଅନ୍ତର୍ଗତ ସାହାପୁର ଗ୍ରାମରେ ବୋଲି ଜଣା ପଡିଥିଲା । ତାଙ୍କ ପିତାଙ୍କ ନାମ ରାମକିଶୋର ଯାଦବ ଓ ତାଙ୍କ ନାମ ମିଣ୍ଟୁ କୁମାର । ଏହା ପରେ ପ୍ରଶାସନ ପକ୍ଷରୁ ରାମକିଶୋର ଯାଦବଙ୍କ ସହ ଯୋଗାଯୋଗ କରାଯାଇଥିଲା।
ରାମକିଶୋର ଯାଦବ ଗତକାଲି କେନ୍ଦୁଝର ଆସିବା ପରେ ନିଜ ହଜିଲା ପୁଅକୁ ପାଇ ଖୁସିରେ ଅଧୀର ହୋଇଯାଇଛନ୍ତି। ବାପପୁଅଙ୍କ ମିଳନ ହେବା ପରେ ଉଭୟ ଆଜି ନିଜ ଗାଁକୁ ଫେରିଯାଇଛନ୍ତି I
ସକାଳେ ଅଙ୍ଗନୱାଡି ଦିଦି, ଅଙ୍ଗନବାଡି ସରିଲେ ଅଟୋ ଚାଳିକା । ପୁଣି ରାତି ହେଲେ ନିଜର ପାଠପଢ଼ା । କେନ୍ଦୁଝର ସହର ବଡ଼ଡେରା ଗ୍ରାମର ଦମୟନ୍ତୀ ନାଏକଙ୍କ ସଂଘର୍ଷମୟ କାହାଣୀ ନାରୀ ସମାଜ ପାଇଁ ଜ୍ବଳନ୍ତ ଉଦାହରଣ ।
ସାହରପଡା ବ୍ଲକ କଟୁପଡ଼ା ଗାଁରେ ଜନ୍ମିତ ଦମୟନ୍ତୀଙ୍କୁ ଯେତେବେଳେ ମାତ୍ର ୧୫ ବର୍ଷ ହୋଇଥିଲା ସେତେବେଳେ ବଡ଼ଡେରା ଗାଁର ପଦ୍ମଲୋଚନ ନାଏକଙ୍କ ସହିତ ତାଙ୍କର ବିବାହ ହୋଇଥିଲ । ସ୍ବାମୀ ଜଣେ ଟେଲର ମିସ୍ତ୍ରୀ ହୋଇଥିବାରୁ ସ୍ୱାମୀଙ୍କୁ ଟେଲର କାମରେ ସହାୟତା କରୁଥିଲେ ଦମୟନ୍ତୀ । କିନ୍ତୁ ଆଜିକାଲି ଟେଲରର ଚାହିଦା କମି ଯିବାରୁ ଘର ଚଳିବା କଷ୍ଟକର ହେଲା । ତେଣୁ, ୨୦୦୯ ମସିହାରେ ଦମୟନ୍ତୀ ଗାଁ ଅଙ୍ଗନବାଡିରେ ଅଙ୍ଗନବାଡି କର୍ମୀ ଭାବେ ନିଯୁକ୍ତି ପାଇଲେ । ନିଯୁକ୍ତି ପାଇବା ପରେ ଦମୟନ୍ତୀଙ୍କର ପାଠ ପଢ଼ିବାକୁ ଇଚ୍ଛା ହେଲା । ତେଣୁ ସେ ୨୦୧୧ ମସିହାରେ ମାଛଗଡ ମହାବିଦ୍ୟାଳୟରୁ ଯୁକ୍ତ ଦୁଇରେ ଉତ୍ତୀର୍ଣ୍ଣ ହେଲେ । ଏହାପରେ ପୁଣି ତାଙ୍କର ପାଠ ପଢ଼ାରେ ଡୋରୀ ଲାଗିଥିଲା । କିନ୍ତୁ, ଅଙ୍ଗନବାଡି ଦିଦି ଭାବେ ଯେତିକି ଦରମା ମିଳୁଥିଲା ସେତିକିରେ ପିଲାଙ୍କୁ ପାଠ ପଢ଼ାଇ ଘର ଚଳିବା କଷ୍ଟକର ଥିଲା । ତେଣୁ ଦମୟନ୍ତୀ ଏକ ଅଟୋ କିଣି ନିଜେ ଚଲାଇବା ପାଇଁ ନିଷ୍ପତ୍ତି ନେଲେ, ଆଉ ଫାଇନାନ୍ସ କରି ଅଟୋ କିଣିଲେ । ପ୍ରଥମେ ଜଣେ ଡ୍ରାରଇଭର ରଖିଥିଲେ ହେଲେ ନିଜେ ଅଟୋ ଚଲାଇବା ଶିଖିଯିବା ପରେ ଏବେ ନିଜେ ସହର ସାରା ଅଟୋ ଚଳାଇ ରୋଜଗାର କରୁଛନ୍ତି । ଦମୟନ୍ତୀ କୁହନ୍ତି, ପାଠ ପଢ଼ିବା ବୟସରେ ବିବାହ ହୋଇ ଯାଇଥିଲା । ଏହାପରେ ପରିବାର ଚଳାଇବା ପାଇଁ ଅଙ୍ଗନବାଡି ଦିଦି ଚାକରି କରିଥିଲି। କିନ୍ତୁ ସେଥିରୁ ମିଳୁଥିବା ଦରମାରେ ଘର ଚଳିପାରୁ ନଥିଲା । ଯେଉଁଥିପାଇଁ ଅଟୋଟିଏ କିଣି ଚଲାଉଛି ।
ସକାଳ ୯ଟାରୁ ଗୋଟାଏ ପର୍ଯ୍ୟନ୍ତ ଅଙ୍ଗନବାଡି କେନ୍ଦ୍ରରେ ଛୋଟଛୋଟ ପିଲାଙ୍କ ପାଠପଢ଼ା କଥା ବୁଝିବା ପରେ ଗୋଟାଏରୁ ୨ଟା ପର୍ଯ୍ୟନ୍ତ ପ୍ରତ୍ୟେକ ଘର ବୁଲି ସରକାରଙ୍କ ବିଭିନ୍ନ ଯୋଜନାର ଦାୟିତ୍ୱ ତୁଲାଇଥାନ୍ତି । ଏହାପରେ ଘରକୁ ଫେରି ପରିବାର କଥା ବୁଝିବା ପରେ ପୁଣ ଅପରାହ୍ନ ୪ଟାରୁ ଅଟୋ ଧରି କେନ୍ଦୁଝର ସହରକୁ ବାହାରି ଆସନ୍ତି । ସହରରେ ବିଭିନ୍ନ ଛକରେ ଯେଉଁ ଗ୍ରାହକ ମିଳିଥାନ୍ତି, ତାଙ୍କୁ ଗନ୍ତବ୍ୟ ସ୍ଥଳରେ ପହଞ୍ଚାନ୍ତି । ପ୍ରତ୍ୟେକ ଦିନ ଦମୟନ୍ତୀ ଅଟୋ ଚଲାଇ ୧୦୦୦ ଟଙ୍କା ଭଳି ରୋଜଗାର କରନ୍ତି । ଅଙ୍ଗନବାଡି ଦିଦି ଭାବେ ଯେତିକି ଦରମା ପାଆନ୍ତି, ତା’ର ଚାରି ଗୁଣା ଏବେ ଅଟୋରୁ ରୋଜଗାର କରିବା ପରେ ପରିବାର ଆର୍ଥିକ ସ୍ଥିତି ବଦଳିଛି ଏବଂ ଭଲରେ ଚଳୁଛନ୍ତି ଦମୟନ୍ତୀ । ତେବେ ଆର୍ଥିକ ସ୍ଥିତି ବଦଳିବା ପରେ ଦମୟନ୍ତୀ ପୁଣି ପାଠ ପଢ଼ିବାକୁ ମନ ବଳାଇଲେ । ପୁଅ ବିଏସି ପଢ଼ୁଥିବା ବେଳେ ସେ ନିଜେ ବିଏ ପଢ଼ିବା ପାଇଁ ମନ କଲେ । ତେଣୁ ଦୁଇ ବର୍ଷ ତଳେ ସେ ପିପିଳିଆର ଲକ୍ଷ୍ମୀ ନାରାୟଣ ମହାବିଦ୍ୟାଳୟରେ ଯୁକ୍ତି ତିନି ରାଜନୀତି ବିଜ୍ଞାନ ସମ୍ମାନରେ ନାମ ଲେଖାଇଛନ୍ତି । ଚଳିତ ବର୍ଷ ଦମୟନ୍ତୀଙ୍କର ଶେଷ ବର୍ଷ ପାଠପଢ଼ା । ଏପରି ସାହସିକତା ପାଇଁ ତାଙ୍କୁ ସ୍ଥାନୀୟ ଅଞ୍ଚଳରେ ପ୍ରଶଂସା ମଧ୍ୟ ମିଳିଥାଏ ।
ପରିବାର ବୋଝ ମୁଣ୍ଡାଇବାକୁ ଯାଇ ଆଜି ଦମୟନ୍ତୀ ଯାହା କରୁଛନ୍ତି ତାହା ଅନ୍ୟମାନଙ୍କ ପାଇଁ ପ୍ରେରଣା ନିଶ୍ଚୟ । ସମାଜରେ ଲୋକ କଣ କହିବେ ଭାବି ପଛରେ ରହିଯାଉଥିବା ମହିଳାଙ୍କ ପାଇଁ ଦମୟନ୍ତୀ ହେଉଛନ୍ତି ଉଦାହରଣ ।
କେନ୍ଦୁଝର ଜିଲ୍ଲା ଆନନ୍ଦପୁରରେ ଅଘଟଣ । ଭାଲୁ ଆକ୍ରମଣରେ ରାମଚନ୍ଦ୍ରପୁର ଥାନା ବରାଙ୍ଗ ଗାଁର ଜଣେ ବୃଦ୍ଧ ଗୁରୁତର ହୋଇଛନ୍ତି । ଚିକିତ୍ସା ପାଇଁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଛି ।
ସୂଚନା ଅନୁସାରେ ଗୁରୁତର ବୃଦ୍ଧଙ୍କ ନାଁ ନିତ୍ୟାନନ୍ଦ ମହାନ୍ତ । ଆଜି ଭୋରରୁ ଗାଁର ୩-୪ ଜଣ ଲୋକଙ୍କ ସହ ମିଶି ସେ ଛତୁ ତୋଳିବାକୁ ବରାଙ୍ଗ ଗାଁ ନିକଟ ଜଙ୍ଗଲକୁ ଯାଇଥିଲେ । ଠିକ୍ ଏତିକିବେଳେ ଏକ ଭାଲୁ ତାର ଦୁଇ ଛୁଆଙ୍କୁ ଧରି ଫେରୁଥିଲା । ଲୋକଙ୍କ ସହ ସାମ୍ନାସାମ୍ନି ହୋଇଥିବା ବେଳେ ଅନ୍ୟାମାନେ ଭାଲୁକୁ ଦେଖି ଦୌଡ଼ି ପଳାଇଥିଲେ । ହେଲେ ନିତ୍ୟାନନ୍ଦ ଦୌଡିନପାରି ଭାଲୁ ଆକ୍ରମଣର ଶିକାର ହୋଇଥିଲେ ।
ଭାଲୁ ଆକ୍ରମଣରେ ନିତ୍ୟାନନ୍ଦ ଗୁରୁତର ଆହତ ହୋଇଛନ୍ତି । ତାଙ୍କୁ ପ୍ରଥମେ ସାଇଁକୁଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ପରେ ଆନନ୍ଦପୁର ଉପଖଣ୍ଡ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
କେମିତି ଲାଗିବ ବନ୍ୟଜନ୍ତୁ, ହିଂସ୍ରଜନ୍ତୁଙ୍କ ସମ୍ପର୍କରେ ଆଲୋଚନା କଲେ । ମନରେ, ହୃଦୟରେ ସୃଷ୍ଟି ହେବ କମ୍ପନ । ଭୟର ବାତାବରଣ ସୃଷ୍ଟି ହେବ । ଲୋକେ ଭୟଭୀତ ହେବେ । କିନ୍ତୁ ବେଳେ ବେଳେ ଏମିତି ଚିତ୍ର ଆସେ ଯାହା ମଣିଷକୁ ଚିନ୍ତାରେ ପକାଏ । ମଣିଷ ଓ ହିଂସ୍ରଜନ୍ତୁଙ୍କ ମଧ୍ୟରେ ସମ୍ପର୍କର ଡୋରି ଯାହା ଆମର ମାନସିକତାରେ ପରିବର୍ତ୍ତନ ଆଣେ । କେଉଁଠି ହାତୀ-ମଣିଷର ସମ୍ପର୍କ ତ କେଉଁଠି ମଣିଷ-ବାଘର ସମ୍ପର୍କ ଦେଖିବାକୁ ମିଳେ । ମଣିଷ-ଭାଲୁ ସମ୍ପର୍କ ଆଉ ଟିକେ ମଜାଦାର ହୋଇଥାଏ । ପାହାଡ଼, ଜଙ୍ଗଲ ଭଳି ପରିବେଶକୁ ଭଲ ପାଇ, ପଶୁପକ୍ଷୀଙ୍କ ଗହଣରେ ଜୀବନ ବିତାଇବା ଟିକେ ନିଆରା । ଆଜି କେନ୍ଦୁଝର ଜିଲ୍ଲା ନେଲୁଙ୍ଗ ଗାଁ ନିକଟରେ ଥିବା ନେଲୁଙ୍ଗ ହୁଡ଼ି ପାହାଡ଼କୁ ଯିବା, ଆଉ ଦେଖିବା ଭିନ୍ନ ଏକ ମଣିଷର ଚିତ୍ର ।
ନେଲୁଙ୍ଗର ମୋଗଲି । ବାବୁ ଓରଫ ସାଗର । କେନ୍ଦୁଝର ଜିଲ୍ଲା ନେଲୁଙ୍ଗ ଗାଁର ବାବୁ ନାଏକ । ବାପାଙ୍କ ମୃତ୍ୟୁ ପରେ ଗାଁ ମୋହ ତୁଟାଇ ନିକଟସ୍ଥ ପାହାଡ଼ରେ କଟୁଛି ଜୀବନ । ବନ୍ୟଜନ୍ତୁଙ୍କ ଗହଣରେ ନେଲୁଙ୍ଗ ହୁଡ଼ିରେ ଦୁଇ ବର୍ଷରୁ ଅଧିକ ସମୟ ହେଲା ଜୀବନ ବିତାଉଛନ୍ତି ବାବୁ । ପାହାଡ଼ର ଏକ ଗୁମ୍ପା ମଧ୍ୟରେ ସେ ରୁହନ୍ତି ଯାହାର ଅତି ନିକଟରେ ରହିଛି ଭାଲୁଙ୍କ ଗୁମ୍ପା । ଭାଲୁଙ୍କ ଯାଆସ ଲାଗି ରହେ ହେଲେ ବାବୁଙ୍କୁ ଆକ୍ରମଣ କରନ୍ତି ନାହିଁ । ଗାଁ ଭିତରକୁ ଅନେକ ଥର ଭାଲୁ ପଲ ପଶିଛନ୍ତି । ଗାଁ ଲୋକେ ଗୋଡ଼ାଇବାରୁ ପୁଣି ନିଜ ଗୁମ୍ପାକୁ ଫେରି ଆସିଛନ୍ତି । ହେଲେ ପାହାଡ଼ିଆ ମଣିଷ ବାବୁକୁ କେବେ ବି ଆକ୍ରମଣ କରିନାହାଁନ୍ତି ।
ହିଂସ୍ର ଜନ୍ତୁଙ୍କ ଭୟରେ ଲୋକେ ନେଲୁଙ୍ଗ ହୁଡ଼ିକୁ ଯାଆନ୍ତି ନାହଁ । ଭାଲୁଙ୍କ ଚଳପ୍ରଚଳ ଅଧିକ ଥିଲେ ହେଁ ସେଠାରେ ଜୀବନ ବିତାଇ ଚାଲିଛନ୍ତି ବାବୁ । ୩ ବର୍ଷ ପୂର୍ବେ ବାପାଙ୍କ ମୃତ୍ୟୁ ପରେ ତାଙ୍କୁ ସାଂସାରିକ ଜୀବନ ଭଲ ଲାଗିନଥିଲା । ସେ ଲୋଭ, ମୋହ, ମାୟା ଠାରୁ ଦୂରେଇ ଯାଇ ପାହାଡ଼ରେ ରହୁଛନ୍ତି । ପଶୁପକ୍ଷୀଙ୍କୁ ଭଲ ପାଇ ନେଲୁଙ୍ଗର ମୋଗଲି ଭାବେ ପରିଚୟ ପାଇଛନ୍ତି । ପ୍ରତି ଦୁଇ ଦିନରେ ମା’ଖାଇବାକୁ ନେଇ ଦେଇଥାନ୍ତି । ସେତିକି ହିଁ ମା’-ପୁଅର ସମ୍ପର୍କ ।
ନେଲୁଙ୍ଗ ହୁଡ଼ିରେ ଭାଲୁ ଅଧିକ ଥିବାବେଳେ ଜୀବନ ପ୍ରତି ବିପଦ ରହିଛି । ଖରାଦିନେ ନିଆଁ ଲାଗିବାର ଆଶଙ୍କା ବି ରହୁଛି । ଏଭଳି ଥରେ ନିଆଁ ଲାଗିଥିବା ବେଳେ ବନ ଟିମ୍ ପହଞ୍ଚିଥିଲା । ବାବୁଙ୍କୁ ଗାଁକୁ ଫେରିବାକୁ ଅନୁରୋଧ କରାଯାଇଥିଲେ ସୁଦ୍ଧା ସେ ଫେରିବାକୁ ନାରାଜ ବୋଲି କହିଛନ୍ତି ଫରେଷ୍ଟଗାର୍ଡ ।
କେନ୍ଦୁଝରର ଆରାଧ୍ୟ ଦେବତା ପ୍ରଭୁ ଶ୍ରୀଶ୍ରୀ ବଳଦେବଜିଉ । ସୁନାବେଶରେ ସୁସଜ୍ଜିତ ହୋଇ ଭକ୍ତଙ୍କୁ ଦର୍ଶନ ଦେଇଛନ୍ତି । ଶ୍ରୀ ବଳଦେବଜିଉଙ୍କ ସୁନାବେଶ ଦେଖି ବିମୋହିତ ହୋଇଥିଲେ ଶ୍ରଦ୍ଧାଳୁ । କାଳିଆ’ର ଟିକିଏ ଆଶୀର୍ବାଦ ପାଇବା ପାଇଁ ସେମାନେ ଛୁଟି ଆସିଥିଲେ । ପୂଜାର୍ଚ୍ଚନା ସହ ମହାପ୍ରଭୁଙ୍କ ଦର୍ଶନ କରି ଭକ୍ତ ନିଜକୁ ଧନ୍ୟ ମନେ କରିଛନ୍ତି । ଦୂରଦୂରାନ୍ତରରୁ ପ୍ରାୟ ୫୦ ହଜାରରୁ ଅଧିକ ଶ୍ରଦ୍ଧାଳୁ କେନ୍ଦୁଝରରେ ଅନୁଷ୍ଠିତ ସୁନାବେଶ ଦର୍ଶନ କରିଛନ୍ତି ।
ତିନି ଠାକୁରଙ୍କୁ ସୁନାବେଶରେ ସୁସଜ୍ଜିତ କରାଯିବା ପରେ ସନ୍ଧ୍ୟା ଆଳତୀ ହୋଇଥିଲା । ଏହି ଅବସରରେ ଭକ୍ତଙ୍କ ପାଇଁ ଶ୍ରୀ ଗୋପାଳଜିଉ ମଠ ପକ୍ଷରୁ ୧୨ ହଜାର ରସଗୋଲା ମଣୋହୀ କରାଯାଇ ବଣ୍ଟାଯାଇଥିଲା । ସୁନାବେଶ ସୁପରିଚାଳନା ପାଇଁ ପୋଲିସ ପ୍ରଶାସନ ପକ୍ଷରୁ ସରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିଲା । ସୁନାବେଶକୁ ଶୃଙ୍ଖଳିତ କରିବା ପାଇଁ ଜିଲ୍ଲା ପ୍ରଶାସନ, ମନ୍ଦିର କମିଟି ପକ୍ଷରୁ ବ୍ୟାପକ ପ୍ରସ୍ତୁତି ହୋଇଥିଲା ।
ସୁନାବେଶ ସମୟରେ ରଥ ଉପରକୁ ଯାଇ ଦର୍ଶନ କରିବା ସମ୍ପୂର୍ଣ୍ଣ ବାରଣ ହୋଇଥିଲା । କେବଳ ନିୟୋଜିତ ସେବାୟତ, ସେବକ ଏବଂ ମାଜିଷ୍ଟ୍ରେଟ ରଥ ଉପରେ ରହିବା ପାଇଁ ସ୍ୱତନ୍ତ୍ର ଅନୁମତି ପ୍ରଦାନ କରାଯାଇଥିଲା । ଅପରାହ୍ନ ସାଢ଼େ ୩ଟାରୁ ୪ଟା ମଧ୍ୟରେ ମହାପ୍ରଭୁଙ୍କ ସୁନାବେଶ ଫଟୋ ଉତ୍ତୋଳନ ପାଇଁ ରଥ ଉପରକୁ ଯାଇଥିଲେ ଗଣମାଧ୍ୟମ ପ୍ରତିନିଧି । ଜିଲ୍ଲାରେ ମହାପ୍ରଭୁଙ୍କ ସୁନାବେଶ ବେଶ୍ ଧୁମଧାମରେ ଅନୁଷ୍ଠିତ ହୋଇଥିବାରୁ ଭକ୍ତମାନେ ନିଜକୁ ଧନ୍ୟ ମନେ କରିଛନ୍ତି ।
କେନ୍ଦୁଝର ପୁରୁଣା ସହରର ଷଠିଘରସାହି ନିକଟରେ ମର୍ମନ୍ତୁଦ ଦୁର୍ଘଟଣା ଘଟିଛି । ୨୦ ନମ୍ବର ଜାତୀୟ ରାଜପଥରେ ବିବାହ ଶୋଭାଯାତ୍ରା ବେଳେ ବରଯାତ୍ରୀଙ୍କ ଉପରେ ଟ୍ରକ୍ ମାଡ଼ିଯିବାରୁ ୬ ଜଣଙ୍କ ମୃତ୍ୟୁ ଘଟିଛି । ୮ ଗୁରୁତରଙ୍କ ଚିକିତ୍ସା ଜାରି ରହିଛି ।
ଷଠିଘରସାହିର କାର୍ତ୍ତିକ ପାତ୍ରଙ୍କ ଝିଅଙ୍କ ବାହାଘର ଥିବାରୁ ହରିଚନ୍ଦନପୁର ବ୍ଲକ ମାନପୁର ଗାଁରୁ ବରଯାତ୍ରୀ ଆସିଥିଲେ । ରାତି ପ୍ରାୟ ଗୋଟାଏ ବେଳେ ବରଯାତ୍ରୀ ଦଳ ଜାତୀୟ ରାଜପଥ ଉପରେ ରୋଷଣି କରି ଆସୁଥିଲେ । ବାଜା, ନାଚଗୀତର ତାଳେତାଳେ ହସଖୁସିରେ ନାଚୁଥିଲେ ବରଯାତ୍ରୀ । ହେଲେ ଭାଗ୍ୟର ବିଡ଼ମ୍ବନା, ଝିଅ ଘର ଠାରୁ ମାତ୍ର କିଛି ଦୂରରେ ଘଟିଲା ମର୍ମନ୍ତୁଦ ଦୁର୍ଘଟଣା । ବରଯାତ୍ରୀଙ୍କ ଉପରେ ଟ୍ରକ୍ ମାଡ଼ିଯିବାରୁ ଘଟଣାସ୍ଥଳରେ ୫ ଜଣଙ୍କ ମୃତ୍ୟୁ ଘଟିଲା । ଅନ୍ୟ ଜଣେ ଚିକିତ୍ସିତ ଅବସ୍ଥାରେ ଜୀବନ ହାରିଲେ । ମୃତକମାନଙ୍କ ମଧ୍ୟରେ ମାନପୁର ଗାଁର ଜିତ୍ ପାତ୍ର,କାଳିଆ ମହାନ୍ତ,ଲକ୍ଷ୍ମୀପାଦ ଗାଁର ରଥି ମୁଣ୍ଡା,ଷଠିଘର ଗାଁର ଅମିତ ପାତ୍ର,ବିଶୁ ପାତ୍ର, କେଉଟ ସାହିର ପାପୁନ ଦେହୁରୀଙ୍କ ମୃତ୍ଯୁ ହୋଇଛି । ମୃତକଙ୍କ ମଧ୍ୟରେ ବରର ପୁତୁରା ଥିବା ବେଳେ ବରଯାତ୍ରୀ ଦଳର ଜଣେ ବ୍ୟକ୍ତି ରହିଛନ୍ତି । ଏହି ଦୁର୍ଘଟଣାରେ ଷଠିଘର ସାହିର ୩ ଜଣଙ୍କ ମଧ୍ୟ ମୃତ୍ୟୁ ଘଟିଛି । ଅଗ୍ନିଶମ ବାହିନୀ ୯ ଗୁରୁତରଙ୍କୁ ଉଦ୍ଧାର କରି କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା । ସେମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ସଙ୍କଟାପନ୍ନ ଥିବାରୁ ସେମାନଙ୍କୁ କଟକ ସ୍ଥାନାନ୍ତର କରାଯାଇଥିଲା । ତେବେ ଅନ୍ୟ ଜଣଙ୍କ ମଧ୍ୟ ମୃତ୍ୟୁ ଘଟିଛି । ଦୁର୍ଘଟଣାରେ ମୃତ୍ୟୁ ସଂଖ୍ୟା ୬କୁ ବୃଦ୍ଧି ପାଇଛି ।
ଏଭଳି ଦୁର୍ଘଟଣାକୁ ନେଇ ଉତ୍ତେଜନା ଦେଖାଦେଇଥିଲା । ସେହି ସ୍ଥାନରେ ବାରମ୍ବାର ଦୁର୍ଘଟଣା ଘଟୁଥିବାରୁ ଓଭରବ୍ରିଜ ନିର୍ମାଣ ଦାବିରେ ସାହି ଲୋକେ ଜାତୀୟ ରାଜପଥକୁ ଅବରୋଧ କରିଥିଲେ । ମୃତଦେହ ନେବାକୁ ଦିଆଯାଇନଥିଲା । ପୋଲିସ ଓ ତହସିଲଦାର ପହଞ୍ଚି ଲୋକଙ୍କ ସହ ଦୀର୍ଘ ସମୟ ଧରି ଆଲୋଚନା କରିଥିଲେ । ଶେଷରେ ମୃତଦେହଗୁଡ଼ିକୁ ଉଦ୍ଧାର କରି ବ୍ୟବଛେଦ ପାଇଁ ପଠାଯାଇଛି । ଖୁସିର ଶୋଭାଯାତ୍ରା ଶେଷରେ ଶୋକଯାତ୍ରାରେ ପରିଣତ ହୋଇଥିଲା ।
କେନ୍ଦୁଝର ଜିଲ୍ଲା ଚମ୍ପୁଆ ରେଞ୍ଜରେ ବଢୁଛି ହାତୀପଲଙ୍କ ଉପଦ୍ରବ । କେତେବେଳେ ଫସଲ ତ ଆଉ କେତେବେଳେ ନଷ୍ଟ କରୁଛନ୍ତି ଘରଦ୍ୱାର । ବେଳେବେଳେ ହାତୀ ଆକ୍ରମଣରେ ଜୀବନ ହରାଉଛନ୍ତି ଲୋକେ । ଗାଁ ନିକଟ ଜଙ୍ଗଲରେ ହାତୀପଲ ଡେରା ପକାଇଥିବାରୁ ଭୟଭୀତ ଅଛନ୍ତି ସ୍ଥାନୀୟ ଲୋକେ ।
କୁଗୁରୁବାର ଅଞ୍ଚଳରେ ବୁଲୁଛନ୍ତି ୨୨ଟି ହାତୀ । ଗାଁ ଲୋକେ ଖରାଟିଆ ଧାନ ଫସଲ କରି ଚିନ୍ତାରେ । କାରଣ ନଷ୍ଟ ହେଉଛି ଏକର ଏକର ଧାନଫସଲ । ବିଲରେ ଧାନ ଖାଇବା ସହ ଦଳ ଚକଟି ଏହାକୁ ସମ୍ପୂର୍ଣ୍ଣ ନଷ୍ଟ କରିଛନ୍ତି ହାତୀ । କେବଳ ଏତିକି ନୁହଁ, ଖରାଦିନ ଥିବାରୁ ଆମ୍ବ, ପଣସ ଖାଇବା ପାଇଁ ଗଛ ଭାଙ୍ଗି ଦେଉଛନ୍ତି । ଗାଁ ନିକଟ ଜଙ୍ଗଲରେ ଡେରା ପକାଇଛନ୍ତି ହାତୀ ପଲ । କେଉଁ ମୁହୂର୍ତ୍ତରେ ଗାଁ ଭିତରେ ପଶିବେ ସେ ନେଇ ଭୟଭୀତ ଅଛନ୍ତି ଲୋକେ ।
ଗାଁ ନିକଟରେ ହାତୀ ପଲ ଥିବାରୁ ସେମାନଙ୍କ ଗତିବିଧି ଉପରେ ନଜର ରଖିଛି ବନ ବିଭାଗ । ତୁରନ୍ତ ସେମାନଙ୍କୁ ଘଉଡ଼ାଇବା ପାଇଁ ଉଦ୍ୟମ ଜାରି ରହିଛି ।