ବଦଳୁଛି ଜଳବାୟୁ। ଋତୁଚକ୍ରରେ ଘଟୁଛି ବହୁ ପରିବର୍ତ୍ତନ। ଧୀରେ ଧୀରେ ଗ୍ରୀଷ୍ମର ପ୍ରବାହ ବୃଦ୍ଧି ପାଇଛି। ଗ୍ରୀଷ୍ମ ପ୍ରବାହରୁ ଜୀବ ଜଗତ ଉପରେ ପଡୁଛି ନକାରାତ୍ମକ ପ୍ରଭାବ। ଜଳବାୟୁ ପରିବର୍ତ୍ତନରୁ ଘଟୁଥିବା ବିଭିନ୍ନ ଘଟଣାବଳୀ ସମ୍ପର୍କରେ ଆସନ୍ତୁ ଜାଣିବା ଏହି ରିପୋର୍ଟରେ।
ଜଳବାୟୁ ପରିବର୍ତ୍ତନ ପରିବେଶ ଓ ଜୀବନଶୈଳୀ ଉପରେ ପକାଉଛି କୁପ୍ରଭାବ । ଅନେକ ଜୀବଙ୍କ ଠାରେ ଦେଖିବାକୁ ମିଳୁଛି ବହୁ ବ୍ୟତିକ୍ରମ। ନିକଟରେ ହୋଇଥିବା ଏକ ଗବେଷଣାରୁ ଜଣାପଡିଛି କି, ପାଣିପାଗରେ ଦେଖାଦେଇଥିବା ପରିବର୍ତ୍ତନ ପାଇଁ ବେଙ୍ଗଙ୍କ ବହୁ ପ୍ରଜାତିର ଆକାର ଛୋଟ ହେବାରେ ଲାଗିଛି। ପ୍ୟୁର୍ଟୋ ରିକୋରେ ଦେଖାଦେଉଥିବା କୋକୁଇ ନାମ ବେଙ୍ଗ ପ୍ରଜାତିର ଆକାର ଛୋଟ ହେବାରେ ଲାଗିଛି। ପୂର୍ବରୁ ଏହି ପ୍ରଜାତିର ବେଙ୍ଗର ଆକାର ବଡ ଥିଲା ଓ ସେସବୁ ସେଠାରେ ଥିବା ପାହାଡ ଉପରେ ବାସ କରୁଥିଲେ। ଏବେ ସେମାନଙ୍କ ଆକାର ଛୋଟ ହୋଇଛି ଓ ସେସବୁ ପାହାଡର ନିମ୍ନ ଭାଗରେ ବାସ କରୁଛନ୍ତି। ଏହି ପରିବର୍ତ୍ତନ ବିଗତ ଦୁଇ ଦଶକରେ ହୋଇଥିବା ଷ୍ଟଡିରୁ ଜଣାପଡିଛି।
ସେହିପରି ଜଳବାୟୁରେ ବ୍ୟତିକ୍ରମ କାରଣରୁ ବାୟୁମଣ୍ଡଳୀୟ ତରଙ୍ଗ ବଦଳୁଛି। ଏକ ଗବେଷଣା ମୁତାବକ ୧୯୭୯ରୁ ୨୦୨୦ ମଧ୍ୟରେ ବାୟୁମଣ୍ଡଳରେ ଅସ୍ଥିରତା ଲଗାତାର ବଢିଚାଲିଛି। ୧୯୭୯ରେ ଏହା ୧୭.୭ ଘଣ୍ଟା ଥିଲା ବେଳେ ୨୦୨୦ରେ ବୃଦ୍ଧିପାଇ ୨୭.୪ ଘଣ୍ଟା ହୋଇଯାଇଛି। ମଧ୍ୟମ ଧରଣର ଅସ୍ଥିରତା ୩୭ ପ୍ରତିଶତ ବୃଦ୍ଧିପାଇଛି। ଏଥିପାଇଁ ବିମାନ ଯାତ୍ରା କାଳରେ ଝଟକା ବଢିବ ବୋଲି କୁହାଯାଉଛି। ଜଳବାୟୁ ପରିବର୍ତ୍ତନ ମଣିଷର ଆଚାର ବ୍ୟବହାର ଓ ଆଚରଣରେ ମଧ୍ୟ ସୃଷ୍ଟି କରିଛି ବହୁ ଅନିୟମିତତା। ଏହା ମଣିଷର ଅନିଦ୍ରାର କାରଣ ମଧ୍ୟ ହେଉଛି। ୨୦୧୦ ପର୍ଯ୍ୟନ୍ତ ଲୋକଙ୍କ ବାର୍ଷିକ ନିଦ୍ରା ହାର ୪୪ ଘଣ୍ଟା କମିଥିଲା, ଯାହା ୨୧00 ସୁଦ୍ଧା ବଢି ୫୮ ଘଣ୍ଟା ହୋଇଯିବ ବୋଲି ଗବେଷଣା ତଥ୍ୟରୁ ବାହାରିଛି। ଏହି ନିଦ୍ରାହୀନତାର କାରଣ ଅଧିକ ଅଙ୍ଗାରକାମ୍ଲ ଉତ୍ସର୍ଗ। ସେହିପରି ମଣିଷର ପ୍ରଜନନ କ୍ଷମତା ମଧ୍ୟ ହ୍ରାସ ପାଇବ ଅଧିକ ଗରମ ପାଇଁ। ବୈଜ୍ଞାନିକ ମତରେ ତାପମାତ୍ରା ୨୬.୭ ଡିଗ୍ରୀ ସେଲସିୟସରୁ ଉପରକୁ ରହିଲେ ଏହା ମଣିଷର ପ୍ରଜନନ କ୍ଷମତାକୁ ପ୍ରଭାବିତ କରିବ। ଶିଶୁ ଜନ୍ମର ହାର ୦.4 ପ୍ରତିଶତ କମିବ। ଲୋକଙ୍କଠାରେ ଆଲର୍ଜି ସମସ୍ୟା ବୃଦ୍ଧି ପାଇବ।
ଏହା ବ୍ୟତୀତ ଗୀଷ୍ମ ପ୍ରବାହ କାରଣରୁ ମଣିଷ ଭିତରେ ହିଂସ୍ରତା ବୃଦ୍ଧି ପାଇବାରୁ ବହୁ ଅପରାଧିକ ଘଟଣା ଘଟୁଛି। କିନ୍ତୁ ନିକଟରେ ହୋଇଥିବା ଷ୍ଟଡି ମୁତାବକ, ଅଧିକ ଗ୍ରୀଷ୍ମ ପ୍ରବାହ ଜୀବ ଜନ୍ତୁଙ୍କୁ ମଧ୍ୟ ଉଗ୍ର କରି ଦେଉଛି। ଗ୍ରୀଷ୍ମ ଋତୁରେ କୁକୁର କାମୁଡା ଘଟଣା ବଢିଛି। ଏକ ରିପୋର୍ଟ ମୁତାବକ ଆମେରିକାର ୮ ସହରରେ କୁକୁର କାମୁଡାର ଘଟଣା ୭୦ ହଜାର ଥିଲା। ଗ୍ରୀଷ୍ମ କାଳରେ କୁକୁର କାମୁଡା ଘଟଣାରେ ୧୧ ପ୍ରତିଶତ ବୃଦ୍ଧି ହୋଇଥିଲା।
ସେହିପରି ପ୍ରାକୃତିକ ବିପର୍ଯ୍ୟୟ କାରଣ ମଧ୍ୟ ହୋଇଛି ଜଳବାୟୁ ପରିବର୍ତ୍ତନ। ଏଥିପାଇଁ ବର୍ଷା ଋତୁରେ ବଜ୍ରାଘାତ ସଂଖ୍ୟା ବଢୁଥିବା ଦେଖିବାକୁ ମିଳୁଛି। ବଜ୍ରାଘାତ ପାଇଁ ଜଙ୍ଗଲ ନିଆଁ ସଂଖ୍ୟା ୪୦ ପ୍ରତିଶତ ବୃଦ୍ଧିପାଇବାର ଆଶଙ୍କା ସୃଷ୍ଟି ହୋଇଛି। ଏହି ରୌଦ୍ରତାପ ଆଗ୍ନେୟ ଉଦଗୀରଣର କାରଣ ହେବ ବୋଲି ମଧ୍ୟ ବୈଜ୍ଞାନିକ ଭବିଷ୍ୟବାଣୀ କରିଛନ୍ତି।
