ଭୁବନେଶ୍ୱର ହେବ ଏକ ସ୍ୱତନ୍ତ୍ର ଜିଲ୍ଲା । ଭୁବନେଶ୍ୱରକୁ ଜିଲ୍ଲା ମାନ୍ୟତା ପ୍ରଦାନ ଦାବି ଜୋର ଧରିଛି । ଏ ନେଇ ବରିମୁଣ୍ଡର ଲକ୍ଷେଶ୍ୱର ମହାଦେବ ମନ୍ଦିର ପରିସରରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏଥିରେ ୨୦୦ରୁ ଅଧିକ ସଦସ୍ୟ ଯୋଗ ଦେଇ ଜିଲ୍ଲା ମାନ୍ୟତା ଦାବି ସମ୍ପର୍କରେ ଆଲୋଚନା କରିଛନ୍ତି ।
ରାଜଧାନୀ ଭୁବନେଶ୍ୱରରେ ଲୋକସଂଖ୍ୟା ବଢୁଛି । ଯାନବାହନ ଚଳାଚଳ ବୃଦ୍ଧି ପାଇଥିବା ବେଳେ ଘରଦ୍ୱାର,କାରଖାନା ମଧ୍ୟ ବଢ଼ୁଛି । ବିଭିନ୍ନ ସରକାରୀ କାର୍ଯ୍ୟାଳୟର ମରାମତି ହୋଇଥିବା ବେଳେ ନୂତନ ଭାବେ ଅଫିସ ବି ନିର୍ମିତ ହୋଇଛି । ଶିକ୍ଷା କ୍ଷେତ୍ରରେ ରାଜଧାନୀ ବେଶ୍ ଆଗରେ ରହିଛି । ହେଲେ ପ୍ରଶାସନିକ ସ୍ତରରେ ସେବା ପାଇବାରେ ବିଳମ୍ବ ହେଉଛି । କାରଣ ଲୋକଙ୍କୁ ଭୁବନେଶ୍ୱରରୁ ଖୋର୍ଦ୍ଧା ଯାଇ ଅଧିକାଂଶ ଅଫିସିଆଲ୍ କାମ ସାରିବାକୁ ପଡୁଛି ।
ବ୍ୟସ୍ତବହୁଳ ଜୀବନ ଭିତରେ ରାଜଧାନୀବାସୀଙ୍କ ସମସ୍ୟା ବଢ଼ିବାରେ ଲାଗିଛି । ଏବେ ରାଜଧାନୀର ସୁରକ୍ଷା, ଲୋକଙ୍କ ସୁରକ୍ଷା ପାଇଁ ଲୋକେ ଆଗେଇ ଆସିଛନ୍ତି । ଏ ନେଇ ମୁଖ୍ୟମନ୍ତ୍ରୀ ଏବଂ ରାଜ୍ୟପାଳଙ୍କୁ ଦାବିପତ୍ର ମଧ୍ୟ ଦିଆଯିବ । ସ୍ଥାନୀୟ ବିଧାୟକମାନଙ୍କୁ ଏ ସମ୍ପର୍କରେ ଅବଗତ କରାଯିବ । ଏଥିସହ ଭୁବନେଶ୍ୱରକୁ ଜିଲ୍ଲା ମାନ୍ୟତା ଦାବି ଆନ୍ଦୋଳନକୁ ଜୋରଦାର କରିବାକୁ ପ୍ରେସମିଟ ପରେ ଅନୁଷ୍ଠିତ ବୈଠକରେ ନିଷ୍ପତ୍ତି ହୋଇଛି ।
ଭୁବନେଶ୍ୱର ଯୁବ ମଞ୍ଚ ପକ୍ଷରୁ ସାମ୍ବାଦିକ ସମ୍ମିଳନୀର ଆୟୋଜନ କରାଯାଇଥିଲା । ଏଥିରେ ଭୁବନେଶ୍ୱରସ୍ଥିତ ବିଭିନ୍ନ ଅଞ୍ଚଳ ଏବଂ ପଞ୍ଚାୟତର ସମାଜସେବୀ, ଜନପ୍ରତିନିଧି, ମାନ୍ୟଗଣ୍ୟ ବ୍ୟକ୍ତି, ବରିଷ୍ଠ ନେତାମାନେ ଯୋଗ ଦେଇଥିଲେ । ଆଜିର ଏହି କାର୍ଯ୍ୟକ୍ରମରେ ଅନୁଷ୍ଠାନର ସଭାପତି ତଥା ଭୁବନେଶ୍ୱର ବାଲିଯାତ୍ରା ଆବାହକ ଯଶୱନ୍ତ ଓଝା, ସ୍ଥାନୀୟ ସରପଞ୍ଚ ଦେବରାଜ ଭୋଇ, ନିଶିପଦ୍ମା କାଣ୍ଡି, ସୁପ୍ରିୟା ମଲ୍ଲିକ, ସସ୍ମିତା ବରାଳ, ପୂର୍ବତନ ଜିଲ୍ଲା ପରିଷଦ କୁନାଲ ରାଉତ, ବରିଷ୍ଠ ଆଇନଜୀବୀ ତଥା ପୂର୍ବତନ ବାର ଆସୋସିଏସନ ସଭାପତି ନିର୍ମଳ କିଶୋର ରଥ, ପୂର୍ବତନ କର୍ପୋରେଟର ନିର୍ମଳ ରାଉତ, ବରିଷ୍ଠ ନାରୀନେତ୍ରୀ ଅନ୍ନପୂର୍ଣ୍ଣ ମିଶ୍ର,ଭୁବନେଶ୍ୱର ବାଲିଯାତ୍ରା ସମ୍ପାଦକ ତପନ ବଳିୟାର ସିଂହ,ଯୁବମଞ୍ଚ ସମ୍ପାଦକ ନବକିଶୋର ବାରିକ,ସହସମ୍ପାଦକ ରାଜେଶ ପଲ, ଉପସଭାପତି ତପନ ଦାସଙ୍କ ସମେତ ୨୦୦ରୁ ଅଧିକ ସଦସ୍ୟ ଯୋଗ ଦେଇଥିଲେ । …
……………………..