Author: suchanatv24x7

ଘର ପାଖରେ ପ୍ରେମକରି ବାହା ହୋଇଥିଲା ଝିଅ, ଯୌତୁକ ପାଇଁ ସ୍ବାମୀ ମାରିଦେଇଥିବା ଅଭିଯୋଗ

ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅନ୍ତର୍ଗତ ଭୁଟୁକାବାଦୀ ଗ୍ରାମର ତାପସ ନନ୍ଦଙ୍କ ପତ୍ନୀ ରେଖା ପରମାଣିକଙ୍କର ବାରିପଦା ପଣ୍ଡିତ ରଘୁନାଥ ମୁର୍ମୁ ହସ୍ପିଟାଲରେ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ସୂଚନା ଅନୁଯାୟୀ, ଭୁଟୁକାବାଦୀ(ନାକି) ଗ୍ରାମର ମନୋଜ ନନ୍ଦଙ୍କ ପୁଅ ତାପସ ନନ୍ଦଙ୍କ ସହ ସେହି ଗ୍ରାମର ହିମାଂଶୁ ପରମାଣିକଙ୍କ ବଡ଼ ଝିଅ ରେଖା ପରମାଣିକଙ୍କୁ ପ୍ରେମ ବିବାହ କରିଥିଲେ । ଗତ ୨୦/୧/୨୦୨୧ରେ ପୁରୀର ଜଗନ୍ନାଥ ମନ୍ଦିରରେ ଉଭୟଙ୍କ ବାହାଘର ହୋଇଥିଲା । ପରେ ଅନୁଗୋଳ କୋର୍ଟରେ ୨୨/୧/୨୦୨୧ ରୋଟାରୀ ପାଖରେ ରେଜିଷ୍ଟ୍ରି ବିବାହ କରିଥିଲେ । ଦୁଇ ପରିବାରର ଘର ସେହି ଗାଁରେ ହୋଇଥିବା ବେଳେ ଉଭୟ ପରିବାର ମଧ୍ୟରେ ଦୂରତା ମାତ୍ର ୫୦ ମିଟର । କିନ୍ତୁ, ବିବାହ ପରେ ଯୌତୁକ ପାଇଁ ରେଖା ସହିତ ସ୍ବାମୀ ତାପସ ଏବଂ ଶାଶୁ ଓ ଶ୍ବଶୁରଙ୍କର ମନୋମାଳିନ୍ଯ ଲାଗି ରହୁଥିଲା । ସେମାନେ ବାରମ୍ବାର ରେଖା ଉପରେ ଶାରିରୀକ, ମାନସିକ ନିର୍ଯାତନା ଦେଉଥିଲେ । ପରେ ପାରିବାରିକ ହିଂସା ବଢିଥିଲା ବୋଲି ରେଖାଙ୍କ ପରିବାର ଲୋକେ ଅଭିଯୋଗ କରିଛନ୍ତି ।

ହଠାତ କଣ ହେଲା କେଜାଣି, ଗତ ୧୯/୫/୨୩ ତାରିଖ ରାତିରେ ରେଖାକୁ ଗୁରୁତର ଅବସ୍ଥାରେ ରାଇରଙ୍ଗପୁର ହସ୍ପିଟାଲକୁ ଆମ ଅଜଣାତରେ ନେଇ ଯାଇଥିଲେ ରେଖାଙ୍କ ପରିବାର ଲୋକେ କହିଛନ୍ତି । ପରେ ରେଖାର ଅବସ୍ଥା ଗୁରୁତର ହେବାରୁ ତାଙ୍କୁ ବାରିପଦା ନେବା ରାସ୍ତାରେ କୁଳିଅଣା ପାଖରେ ରେଖାର ମୃତ୍ୟୁ ହୋଇଥିଲା । ରେଖାର ମୃତଦେହକୁ ବାରିପଦା ପିଆରଏମ ହସ୍ପିଟାଲ ନିଆଯାଇଥିଲା । ରେଖାର ମୃତ୍ୟୁ ହୋଇଛି ବୋଲି ତାପସ ତାର ସମ୍ପର୍କୀୟଙ୍କ ଦ୍ବାରା ଅନ୍ୟ ଫୋନରେ ଶୁଶୁର ହିଂମାଶୁକୁ ଜଣାଇଥିଲେ । ପରିବାର ଲୋକଙ୍କ ଅଭିଯୋଗ ଅନିଯାୟୀ, ସେଠାରେ ତାଙ୍କ ଝିଅକୁ ସାପ କାମୁଡିଛି ବୋଲି କୁହାଯାଇଥିଲା । ହେଲେ ରେଖାର କାନ ଓ ନାକରୁ ରକ୍ତ ବାହାରିବା ସହିତ ବେକରେ ପାଖରେ ଆଘାତ ଲାଗିଥିବା ତାଙ୍କ ବାପା ଦେଖିଥିଲେ । ତେଣୁ ସେ ନିଶ୍ଚିତ ହୋଇଥିଲେ ଯେ, ତାଙ୍କ ଝିଅକୁ ଯୋଜନାବଦ୍ଧ ଭାବେ ମାରି ଦିଆଯାଇଛି ।

ଘର ପାଖରେ ଘର ହୋଇଥିଲେ ସୁଦ୍ଧା ତାଙ୍କ ପରିବାରକୁ ନଜଣାଇ ରାତିରେ ଝିଅକୁ ରାଇରଙ୍ଗପୁର ହସ୍ପିଟାଲ ଆଣିବା ଏବଂ ପରେ ବାରିପଦା ନେବା ଅନେକ ସନ୍ଦେହ ସୃଷ୍ଟି କରିଛି । ରେଖାର ବାପା ରାଇରଙ୍ଗପୁର ଗ୍ରାମାଞ୍ଚଳ ଥାନାରେ ଝିଅକୁ ହତ୍ୟା କରାଯାଇଥିବା ନେଇ ଜ୍ବାଇଁ ତାପସ, ସମୁଦି ମନୋଜ ନନ୍ଦ ଏବଂ ସମୁଦୁଣୀଙ୍କ ନାଁରେ ଲିଖିତ ଅଭିଯୋଗ କରିଛନ୍ତି । ଝିଅକୁ ହରାଇଵା କଷ୍ଟ ସହିତ ତାପସର ପରିବାର ଗଣ୍ଡଗୋଳ କରିବାର ଆଶଙ୍କା ନେଇ ଭୟଭୀତ ଅବସ୍ଥାରେ ହିମାଂଶୁଙ୍କ ପରିବାର ଅଛନ୍ତି ।
ଅକୃତକାର୍ଯ୍ୟ ଛାତ୍ରଛାତ୍ରୀଙ୍କ ପାଇଁ ହେବ ସପ୍ଲିମେଣ୍ଟାରୀ ପରୀକ୍ଷା

ମାଧ୍ୟମିକ ଶିକ୍ଷା ବୋର୍ଡ ଦ୍ୱାରା ପରିଚାଳିତ ‌ମାଟ୍ରିକ୍‌ ପରୀକ୍ଷାରେ କୃତକାର୍ଯ୍ୟ ହୋଇପାରି ନଥିବା ପିଲାମାନଙ୍କ ପାଇଁ ସପ୍ଲିମେଣ୍ଟାରୀ ପରୀକ୍ଷା ହେବ। ଏହା ଆସନ୍ତା ଜୁଲାଇ ୩ ତାରିଖରୁ ଆରମ୍ଭ ହୋଇ ଜୁଲାଇ ୮ ତାରିଖ ପର୍ଯ୍ୟନ୍ତ ଚାଲିବ। ପରୀକ୍ଷାରେ ସାମିଲ ହେବାକୁ ଚାହୁଁଥିବା ପିଲାମାନଙ୍କୁ ଏଥିପାଇଁ ମେ’ ୨୬ରୁ ଜୁନ୍‌ ୧ ତାରିଖ ମଧ୍ୟରେ ଫର୍ମ ଫିଲ୍‌ଅପ୍‌ କରିବାକୁ ପଡ଼ିବ ବୋଲି ବୋର୍ଡ ସଭାପତି ରାମାଶିଷ ହାଜରା ବୁଧବାର ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।

ହାଜରା କହିଛନ୍ତି ଯେ, ମାଟ୍ରିକ୍‌ ପରୀକ୍ଷା ଢାଞ୍ଚାରେ ପରିବର୍ତ୍ତନ କରାଯାଇଛି। ପୂର୍ବ ପ୍ରଚଳିତ ୨ଟି ସମ୍ମେଟିଭ୍‌ ପରୀକ୍ଷା ଆଉ କରାଯିବ ନାହିଁ। କେବଳ ଦଶମ ଶ୍ରେଣୀରେ ବାର୍ଷିକ ପରୀକ୍ଷା ହେବ। ପିଲାଙ୍କ ଅଭ୍ୟାସ ପାଇଁ ପୂର୍ବରୁ ଯେଉଁଭଳି ଷାଣ୍ମାସିକ ପରୀକ୍ଷା ହେଉଥିଲା ତାହା କରାଯିବ। ଇଣ୍ଟରନାଲ ଆସେସମେଣ୍ଟ ପରୀକ୍ଷା ୪ଟି କ୍ବାର୍ଟରରେ ଜାରି ରହିବ। ସେହିପରି ନବମ ଶ୍ରେଣୀ ‌ପାଇଁ ବାର୍ଷିକ ପରୀକ୍ଷାରେ ବୋର୍ଡ ପକ୍ଷରୁ ପ୍ରଶ୍ନପତ୍ର ଯୋଗାଇ ଦିଆଯିବ।

ସୂଚନାଯୋଗ୍ୟ, କୋଭିଡ-୧୯ ସମୟରେ ୨୦୨୦ ମାଟ୍ରିକ୍‌ ପରୀକ୍ଷା ସଂପୂର୍ଣ୍ଣ କରାଯାଇ ପାରି ନଥିଲା। ସେହିଭଳି ‌କରୋନା ସଂକ୍ରମଣ ଯୋଗୁଁ ୨୦୨୧ ମାଟ୍ରିକ ପରୀକ୍ଷା ମଧ୍ୟ ହୋଇପାରି ନଥିଲା। ତେଣୁ ବିକଳ୍ପ ମାଧ୍ୟମରେ ପରୀକ୍ଷା ଫଳ ପ୍ରକାଶ କରାଯାଇଥିଲା। ସଂକ୍ରମଣ ଓ ପିଲାଙ୍କ ଭବିଷ୍ୟତକୁ ଦୃଷ୍ଟିରେ ରଖି ମାଧ୍ୟମିକ ଶିକ୍ଷା ବୋର୍ଡ ସମ୍ମେଟିଭ ପରୀକ୍ଷା ଢାଞ୍ଚା ଆପଣାଇଥିଲା।
ଐତିହାସିକ ସେଙ୍ଗୋଲ ସ୍ଥାପିତ ହେବ ସଂସଦ ଭବନରେ

ଆସନ୍ତା ୨୮ରେ ନୂତନ ସଂସଦ ଗୃହ ଉଦଘାଟନ ହେବାକୁ ଯାଉଛି। ଏହାକୁ ନେଇ ବିଜେପି ନେତୃତ୍ୱାଧୀନ କେନ୍ଦ୍ର ସରକାର ବେଶ ଉତ୍ସାହିତ। କାରଣ ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପବିତ୍ର ସେଙ୍ଗୋଲକୁ ଗ୍ରହଣ କରିବେ, ଯାହା ଆମ ସଭ୍ୟତା ସହ ଜଡିତ ଏକ ଗରିମାମୟ ବସ୍ତୁ। ବ୍ରିଟିଶମାନଙ୍କଠାରୁ ଶକ୍ତି ହସ୍ତାନ୍ତରର ପ୍ରତୀକ ଏହି ଐତିହାସିକ ସେଙ୍ଗୋଲକୁ ନୂତନ ସଂସଦ ଗୃହରେ ସ୍ଥାପନ ମଧ୍ୟ କରାଯିବ। ତେଣୁ ଏହାକୁ ଏକ ଐତିହାସିକ କାର୍ଯ୍ୟକ୍ରମ ବୋଲି କହୁଛି ବିଜେପି।

ସେଙ୍ଗୋଲର ଇତିହାସ ସମ୍ପର୍କରେ ଗୃହମନ୍ତ୍ରୀ ଅମିତ ସାହ କହିଛନ୍ତି କି, ୧୯୪୭ ଅଗଷ୍ଟ ୧୪ ରେ ବ୍ରିଟିଶମାନେ ଭାରତକୁ ଶାସନ ଭାର ଦେଇଥିଲେ। କ୍ଷମତା ହସ୍ତାନ୍ତରର ସ୍ୱରୂପ, ଐତିହ୍ୟ ସମ୍ପନ୍ନ ସେଙ୍ଗୋଲକୁ ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହରଙ୍କୁ ହସ୍ତାନ୍ତର କରାଯାଇଥିଲା। କିନ୍ତୁ ଆଶ୍ଚର୍ଯ୍ୟର କଥା, ଆମେ ସିଙ୍ଗୋଲ ବିଷୟରେ ଅବଗତ ନୋହୁଁ। ସେବେଠାରୁ ଏହି ଐତିହ୍ୟ ସମ୍ପନ୍ନ ବସ୍ତୁଟି ଆଲାହବାଦର ଏକ ସଂଗ୍ରହାଳୟରେ ରଖାଯାଇଛି। ଏହି ଗରିମାପୂର୍ଣ୍ଣ ଐତିହାସିକ ରାଜଦଣ୍ଡ ସମ୍ପର୍କରେ ଯେତେବେଳେ ପ୍ରଧାନମନ୍ତ୍ରୀ ମୋଦୀ ଜାଣିଲେ ସେତେବେଳେ ସେ ନିଷ୍ପତ୍ତି ନେଇଥିଲେ ଯେ ନୂଆ ସଂସଦ ଭବନରେ ଏହାକୁ ସ୍ଥାପନ କରି ଦେଶବାସୀଙ୍କୁ ଉତ୍ସର୍ଗ କରିବେ।

କିପରି ଭାରତକୁ କ୍ଷମତା ହସ୍ତାନ୍ତର କରିବା ପ୍ରକ୍ରିୟା କ’ଣ ହେବ ସେ ନେଇ ଭାରତରେ ଅବସ୍ଥାପିତ ବ୍ରିଟେନର ସର୍ବୋଚ୍ଚପଦାଧିକାରୀ ଲର୍ଡ ମାଉଣ୍ଟବ୍ୟାଟେନ୍ ନେହରୁଙ୍କୁ ପଚାରିଥିଲେ। ଏସମ୍ପର୍କରେ ପଣ୍ଡିତ ନେହରୁ ତାଙ୍କ ସହକର୍ମୀଙ୍କ ସହ ଆଲୋଚନା କରିଥିଲେ। ଏହି ମାମଲା ସି ରାଜାଗୋପାଲାଚାରି ବା ରାଜାଜୀଙ୍କୁ ପଚରାଯାଇଥିଲା। ରାଜାଜୀ ଏସମ୍ପରରେ ଜାଣିବାକୁ ଅନେକ ଗ୍ରନ୍ଥ ଅଧ୍ୟୟନ କରିଥିଲେ ଓ ସେଙ୍ଗୋଲ ପ୍ରକ୍ରିୟାକୁ ଚିହ୍ନିତ କରିଥିଲେ। ଚୋଳ ଆଧ୍ୟାତ୍ମିକ ପରମ୍ପରା ଅନୁଯାୟୀ ଯେତେବେଳେ ଜଣେ ରାଜାଙ୍କଠାରୁ ଅନ୍ୟ ରାଜା କ୍ଷମତା ନିଅନ୍ତି ସେତେବେଳେ ଏହି ରାଜଦଣ୍ଡକୁ ତାଙ୍କୁ ପୁରୁଣା ରାଜାଙ୍କଠାରୁ ରାଜପୁରୋହିତ ଆଣି ନୂଆ ରାଜାଙ୍କୁ ଦେବା ସହ ଆଶୀର୍ବାଦ ଦେଇଥାନ୍ତି। ଏହି ରାଜଦଣ୍ଡ ଅତ୍ୟନ୍ତ ପବିତ୍ର। ଏହାର ଉପରେ ନନ୍ଦୀ ବିରାଜମାନ କରିଛନ୍ତି। ଅଷ୍ଟମ ଶତାବ୍ଦୀରୁ ଏହି ପରମ୍ପରା ଚାଲିଆସୁଥିଲା।

ରାଜଜୀ ତାମିଲନାଡୁର ତାନଜୋର ଜିଲ୍ଲାରେ ଅବସ୍ଥିତ ଏକ ଧାର୍ମିକ ମଠ ଥିରୁଭାଭଦୁଥୁରାଇ ଅଧୀନମକୁ ଯାଇଥିଲେ। ଏହି ମଠ ଶୈବ ଶିକ୍ଷା ଏବଂ ପରମ୍ପରାକୁ ଅନୁସରଣ କରୁଥିବା ଏକ ଭିକ୍ଷୁ ଅନୁଷ୍ଠାନ । ସେଠାରେ ରାଜାଜୀ ମଠାଧିଶଙ୍କୁ ସେଙ୍ଗୋଲ ପ୍ରସ୍ତୁତି କରିବାରେ ତାଙ୍କ ସାହାଯ୍ୟ ଲୋଡିଥିଲେ। ମଠାଧୀଶଙ୍କ ସହଯୋଗରେ ସେଙ୍ଗୋଲ ପ୍ରସ୍ତୁତ ହୋଇଥିଲା।, ଯାହାର ଲମ୍ୱା ପାଞ୍ଚ ଫୁଟ ଥିଲା। ଏହାକୁ ଚେନ୍ନାଇର ଜଣାଶୁଣା ବଣିଆ ୱୁମ୍ମିଦୀ ବଙ୍ଗାରୁ ଚେଟ୍ଟୀଙ୍କୁ ଦିଆଯାଇଥିଲା।

ତେବେ କଣ ଏହି ସେଙ୍ଗୋଲ ଓ କାହିଁକି ଏହାକୁ ବାଛିଥିଲେ ରାଜାଜୀ?

ଐତିହାସିକ ରାଜଦଣ୍ଡ ‘ସେଙ୍ଗୋଲ’! ସେଙ୍ଗୋଲ ଶବ୍ଦଟି ତାମିଲ ଭାଷାରୁ ଉଦ୍ଧୃତ। ଏହାର ଅର୍ଥ ଧର୍ମ, ସଚ୍ଚୋଟତା ଓ ନିଷ୍ଠା। ସେଙ୍ଗୋଲ ରାଜଦଣ୍ଡ ଭାରତୀୟ ସମ୍ରାଟଙ୍କ ଶକ୍ତି ଓ ଅଧିକାରର ପ୍ରତୀକ ହୋଇଥିଲା। ୫୦୦ ବର୍ଷ ପୂର୍ବେ ଚୋଳ ସାମ୍ରାଜ୍ୟରୁ ସେଙ୍ଗୋଲ ପରମ୍ପରା ଆସିଥିଲା। ଶକ୍ତି ବା କ୍ଷମତା ହସ୍ତାନ୍ତର ସମୟରେ ସେଙ୍ଗୋଲକୁ ନୂଆ ରାଜାଙ୍କୁ ତାଙ୍କ ରାଜ ପୁରୋହିତ ହସ୍ତାନ୍ତର କରିଥାନ୍ତି।

ଚୋଳ ଶାସନ କାଳରେ ରାଜାଙ୍କ ରାଜ୍ୟାଭିଷେକ ସମାରୋହ ଏକ ସେଙ୍ଗୋଲର ଆଧ୍ୟାତ୍ମିକ ମହତ୍ୱ ରହିଥିଲା। ଏହା ଏକ ଧ୍ୱଜଦଣ୍ଡ ରୂପେ କାର୍ଯ୍ୟ କରୁଥିଲା, ଯେଉଁଥିରେ ସର୍ବୋତ୍କୃଷ୍ଟ କାରିଗରୀ ଓ ଜଟିଳ ସାଜ୍ଜସଜ୍ଜା ହେଉଥିଲା। ଏହି ରାଜଦଣ୍ଡ ଯାହାଙ୍କୁ ଦିଆଯାଏ, ତାଙ୍କଠାରୁ ନ୍ୟାୟସଂଗତ ଓ ନିରପେକ୍ଷ ଶାସନର ଅପେକ୍ଷା କରାଯାଇଥାଏ
ଭୁବନେଶ୍ୱର: ମେ’୨୭ରେ ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତ, ନୀତି ଆୟୋଗ ବୈଠକରେ ଯୋଗ ଦେବେ ନବୀନ
ଆମେରିକା ରାଷ୍ଟ୍ରପତି ବାଇଡେନଙ୍କୁ ମାରିବାକୁ ଷଡ଼ଯନ୍ତ୍ର, ସ୍ବୀକାର କଲା ଭାରତୀୟ ଯୁବକ

ଆମେରିକାର ରାଷ୍ଟ୍ରପତିଙ୍କ ସରକାରୀ ବାସଭବନ ହ୍ବାଇଟ ହାଉସରେ ଏକ ଟ୍ରକକୁ ବ୍ୟାରିକେଡରେ ଚଢାଇ ଦେଇଥିବା ଜଣେ ୧୯ ବର୍ଷିୟ ଭାରତୀୟ ଯୁବକ ସେଠାକାର ଅଧିକାରୀଙ୍କୁ କହିଛି ଯେ, କ୍ଷମତା ହାସଲ ଏବଂ ରାଷ୍ଟ୍ରପତି ଜୋ ବାଇଡେନଙ୍କୁ ହତ୍ୟା କରିବା ପାଇଁ ହ୍ବାଇଟ ହାଉସ ଭିତରକୁ ପ୍ରବେଶ କରିବାକୁ ଚାହୁଁଥିଲା । ହ୍ବାଇଟ ହାଉସର ଅଧିକାରୀ ମାନେ ଏହି ଘଟଣାକୁ ନିଶ୍ଚିତ କରିଛନ୍ତି । ଏଥିସହିତ ଏହି ସୂଚନା ସରକାରୀ ଗଣମାଧ୍ୟମ ରିପୋର୍ଟରେ ସେୟାର କରାଯାଇଛି ।

ୱାଶିଂଟନ୍‌ର ପୋଲିସ ଏବଂ ଆମେରିକାର ଗୁପ୍ତଚର ଏଜେନ୍ସି ମାନେ ଏହି ଘଟଣାର ତଦନ୍ତ ଜାରି ରଖିଛନ୍ତି । ବରିଷ୍ଠ ଅଧିକାରୀ ମାନେ ଏହି ଘଟଣାର ଚେର ପର୍ଯ୍ୟନ୍ତ ଯିବାକୁ କହିଛନ୍ତି । ଏହି ଷଡଯନ୍ତ୍ର ପଛରେ ଅନ୍ୟ କୌଣସି ବ୍ୟକ୍ତି କିମ୍ବା ସଂଗଠନ ଅଛନ୍ତି କି ନାହିଁ ତାହା ମଧ୍ୟ ଜାଣିବାକୁ ଚେଷ୍ଟା କରାଯିବ । ଖବରକାଗଜ ‘ଦ ୱାଶିଂଟନ୍ ଟାଇମ୍ସ’ର ରିପୋର୍ଟ ଅନୁଯାୟୀ, ଲାଫାୟେଟ୍ ପାର୍କର ଉତ୍ତର ପାର୍ଶ୍ୱରେ ଥିବା ସୁରକ୍ଷା ବ୍ୟାରିକେଡକୁ ଟ୍ରକ୍ ଧକ୍କା ଦେବା ପରେ ଆମେରିକାର ପାର୍କ ପୋଲିସ, ସାଇ ବଶିଷ୍ଠ କଣ୍ଡୁଲାଙ୍କୁ ଗିରଫ କରିଥିଲା ।

ଏହି ଘଟଣା ଗତ ସୋମବାର ରାତି ପ୍ରାୟ ୧୦ଟା (ସ୍ଥାନୀୟ ସମୟ)ରେ ଘଟିଥିଲା । ଘଟଣାସ୍ଥଳ ଏବଂ ହ୍ବାଇଟ ହାଉସର ଗେଟ୍ ମଧ୍ୟରେ ଯଥେଷ୍ଟ ଦୂରତା ରହିଥିଲା । ଏହା ସତ୍ତ୍ବେ ଏହି ଘଟଣା ପରେ ସେହି ରାସ୍ତାକୁ ବନ୍ଦ କରିଦିଆଯାଇଥିଲା । ଏହାସହିତ ନିକଟରେ ଥିବା ହେ ଆଡମ୍ସ ହୋଟେଲକୁ ମଧ୍ୟ ତୁରନ୍ତ ଖାଲି କରିଦିଆଯାଇଥିଲା । ଟ୍ରକ ଧକ୍କାରେ କେହି ଆହତ ହୋଇ ନାହାନ୍ତି ।
କେନ୍ଦୁଝର: ମାରଣାସ୍ତ୍ର ଦେଖାଇ ଲୁଟିନେଲେ ଟଙ୍କା ଓ ସୁନା ଅଳଙ୍କାର

କେନ୍ଦୁଝର ଜିଲ୍ଲା ତେଲକୋଇ ଥାନା ଅଞ୍ଚଳରେ ଡକାୟତି ଅଭିଯୋଗ ହୋଇଛି । ମାରଣାସ୍ତ୍ର ଦେଖାଇ କନ୍ତଲେଇ ଗାଁର ଦୁର୍ଯ୍ୟୋଧନ ବେହେରାଙ୍କ ଘରୁ ଡକାୟତି ହୋଇଛି । ଦୁର୍ଯ୍ୟୋଧନଙ୍କ ୯ ମାସର ଶିଶୁ ତଣ୍ଟିରେ ଭୁଜାଲି ଲଗାଇ ୫ ଡକାୟତ ଲୁଟିଛନ୍ତି ।

ପ୍ରବଳ ଗରମ ଯୋଗୁଁ ଘରର କବାଟ ଝରକା ଖୋଲି ସମସ୍ତେ ଶୋଇ ପଡ଼ିଥିଲେ । ଦୁର୍ଯ୍ୟୋଧନଙ୍କ ସ୍ତ୍ରୀ ୯ ମାସର ଶିଶୁକୁ ଧରି ଶୋଇଥିବା ବେଳେ ଘରେ ପଶିଥିଲେ ଦୁର୍ବୃତ୍ତ । ଭୟଭୀତ କରାଇ ନେଇଗଲେ ୪ ଭରି ସୁନା ଓ ୨୫ ହଜାର ଟଙ୍କା । ବନ୍ଧୁକ ଓ ଭୂଜାଲି ଦେଖାଇଥିଲେ । ମା’କୋଳରୁ ଶିଶୁକୁ ଉଠାଇ ନେଇ ତଣ୍ଟିରେ ଭୁଜାଲି ଲଗାଇଥିଲେ । ସୁନା ଓ ଟଙ୍କା ଦେବାପାଇଁ ଧମକ ଦେଇ ଶେଷରେ ସର୍ବସ୍ୱ ଲୁଟିନେଲେ । ଦୁର୍ଯ୍ୟୋଧନଙ୍କ ସ୍ତ୍ରୀ ଆଲମାରୀ ଚାବି ଦେବା ପରେ ସୁନା ଅଳଙ୍କାର ଏବଂ ଟଙ୍କା ନେଇ ଚମ୍ପଟ ମାରିଲେ ଡକାୟତ ।

ଦୁର୍ବୃତ୍ତଙ୍କ ସହ ଦୁର୍ଯ୍ୟୋଧନଙ୍କ ଧସ୍ତାଧସ୍ତି ହୋଇଥିଲା । ସେଥିରେ ସେ ସାମାନ୍ୟ ଆହତ ହୋଇଥିବା ବେଳେ ଭୁଜାଲି ମାଡ଼ ଚିହ୍ନ ରହିଛି । ଡକାୟତମାନେ ହଳେ ଚପଲ ଓ ଗୋଟିଏ ଶାବଳ ଛାଡ଼ି ପଳାଇଛନ୍ତି । ତେବେ ତେଲକୋଇ ଥାନା ଅଞ୍ଚଳରେ ବାରମ୍ବାର ଚୋରି, ଡକାୟତି, ହତ୍ୟାକାଣ୍ଡ ଘଟୁଥିଲେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବା ଅଭିଯୋଗ ହୋଇଛି । ସେଥିପାଇଁ ଅଞ୍ଚଳରେ ଏଭଳି ଘଟଣା ବୃଦ୍ଧି ପାଉଛି ।
ଗ୍ୟାଙ୍ଗଷ୍ଟର ଜରନେଲ ସିଂଙ୍କୁ ଗୁଳି କରି ହତ୍ୟା

ପଞ୍ଜାବର ଅମୃତସରରେ ଆଜି ସକାଳ ୧୧:୩୦ ସମୟରେ ଘଟିଥିବା ଏକ ଗ୍ୟାଙ୍ଗଓ୍ବାରରେ ଗ୍ୟାଙ୍ଗଷ୍ଟର ଜରନେଲ ସିଂଙ୍କର ମୃତ୍ୟୁ ଘଟିଛି । ଅମୃତସର ଦେହାତର ଏସଏସପି ସତୀନ୍ଦର ସିଂ କହିଛନ୍ତି ଯେ, ଏହି ଘଟଣା ସାଠିୟାଲା ଗ୍ରାମରେ ଘଟିଛି, ଯେଉଁଠାରେ ଜରନେଲ ସିଂଙ୍କ ବିରୋଧି ଗ୍ୟାଙ୍ଗରୁ ତିନି ଜଣ ଆକ୍ରମଣକାରୀ ଗୁଳି ଚଳାଇଥିଲେ । ସେହି ଘଟଣା ସମୟର ସିସିଟିଭି ଫୁଟେଜ ମଧ୍ୟ ସାମ୍ନାକୁ ଆସିଛି, ଯାହା ଆଧାରରେ ଅଧିକ ତଦନ୍ତ ଆରମ୍ଭ ହୋଇଛି ।

ଆକ୍ରମଣକାରୀ ମାନେ ଗ୍ୟାଙ୍ଗଷ୍ଟର ଜରନେଲ ସିଂଙ୍କ ଉପରେ ପ୍ରାୟ ୨୪ଟି ଗୁଳି ଚଳାଇଥିଲେ । ମୃତ ଜରନେଲ ସିଂ ଗୋପୀ ଘନଶ୍ୟାମପୁରିଆ ଗ୍ୟାଙ୍ଗର ସଦସ୍ୟ ବୋଲି କୁହାଯାଉଛି । ସାମ୍ନାକୁ ଆସିଥିବା ଘଟଣାର ସିସିଟିଭି ଫୁଟେଜରେ ୪ ଜଣ ଆକ୍ରମଣକାରୀ ନଜର ଆସିଛନ୍ତି । ଯେଉଁମାନେ ପ୍ରାୟ ୧୫ ମିନିଟ୍ ଗୁଳି ଚଳାଇ ଜରନେଲ ସିଂଙ୍କୁ ହତ୍ୟା କରିଥିଲା । ଫୁଟେଜରେ ଏହା ଦେଖିବାକୁ ମିଳୁଛି ଯେ, ଜରନେଲ ସିଂ ଦୋକାନରୁ ବାହାରିବା ମାତ୍ରେ ଆକ୍ରମଣକାରୀ ମାନେ ତାଙ୍କ ଉପରକୁ ଗୁଳି ଚଳାଇଥିଲେ । ଯେଉଁଥି ପାଇଁ ଜରନେଲ ସିଂ ଘଟଣା ସ୍ଥଳରେ ମୃତ୍ୟୁ ବରଣ କରିଥିଲେ । ଆକ୍ରମଣକାରୀ ମାନେ ଏକ ସ୍ୱିଫ୍ଟ କାରରେ ଆସିଥିଲେ । କୁହାଯାଉଛି ଯେ, ଜରନେଲ ସିଂ କିଛି କାମ ପାଇଁ ଯାଉଥିଲେ । ଏହି ସମୟରେ ଆକ୍ରମଣକାରୀମାନେ ଏହାର ସୁଯୋଗ ନେଇ ତାଙ୍କୁ ଆକ୍ରମଣ କରିଥିବା କୁହାଯାଉଛି ।

ଏଠାରେ ଆପଣଙ୍କୁ କହିରଖୁଛୁ ଯେ, ପଞ୍ଜାବର ଆଣ୍ଟି ଗ୍ୟାଙ୍ଗଷ୍ଟର ଟାସ୍କ ଫୋର୍ସ ଦୁଇ ଦିନ ପୂର୍ବରୁ ଗ୍ୟାଙ୍ଗଷ୍ଟର ଲରେନ୍ସ ବିଷ୍ନୋଇ ଗ୍ୟାଙ୍ଗର ୪ ଜଣ ସୁଟରଙ୍କୁ ଗିରଫ କରିଥିଲା । ସେହି ସମୟରେ ସେମାନେ କୌଣସି ସ୍ଥାନରେ ଆକ୍ରମଣ କରିବାକୁ ପ୍ରସ୍ତୁତ ହେଉଥିଲେ । ଏହି ଅଭିଯୁକ୍ତ ମାନଙ୍କ ଠାରୁ ୬ ଟି ପିସ୍ତଲ ସମେତ ୨୬ଟି ଲାଇଭ କାର୍ଟ୍ରିଜ ଉଦ୍ଧାର କରାଯାଇଛି ।
ଖରାଦିନେ ନିୟମିତ ବିୟର ପିଇଲେ କ’ଣ ହେବ ?

ଆପଣ ବିୟର ପିଉଛନ୍ତି କି । ତେବେ ହୋଇଯାଆନ୍ତୁ ସାବଧାନ । ହୋଇପାରେ ଅନେକ କ୍ଷତି । ବିଶେଷ କରି ଖରା ଦିନେ ବିୟର ପିଇବା ଶରୀର ପ୍ରତି ହାନିକାରକ । ତେବେ କେବଳ 5 ରୁ 12 ପ୍ରତିଶତ ଆଲକହଲ ଥିବା ହେତୁ , ବିୟର ଅନ୍ୟ ମଦ୍ୟପାନକାରୀ ଅପେକ୍ଷା କମ୍ କ୍ଷତିକାରକ ବୋଲି ବିବେଚନା କରାଯାଏ । ଅନେକ ଅଧ୍ୟୟନରୁ ଜଣାପଡିଛି ଯେ ବିୟର ପିଇବା ଦ୍ୱାରା ଦୀର୍ଘାୟୁ ହୁଅନ୍ତି , ଯନ୍ତ୍ରଣା କମିଯାଏ ଏବଂ ହୃଦରୋଗ ହେବାର ଆଶଙ୍କା ମଧ୍ୟ କମିଯାଏ । କିନ୍ତୁ ଏ କଥା କୁମଧ୍ୟ ଏଡାଇ ଦିଆଯାଇପାରିବ ନହିଁ ଯେ ଏଥିରେ କିଛି ପରିମାଣର ଆଲକହଲ ରହିଛି ।”ବିୟର କରୋନାରୀ ହୃଦ୍ ରୋଗ, ଇସକେମିକ୍ ଷ୍ଟ୍ରୋକ୍, ଟାଇପ୍-୨ ମଧୁମେହ ଏବଂ ହଜମ ପ୍ରକ୍ରିୟା ସଂକ୍ରମଣକୁ ରୋକିବାରେ ସାହାଯ୍ୟ କରେ । ତଥାପି, ଏହା କମ ପରିମାଣରେ ପିଇବା ଉଚିତ୍ ଏବଂ କିଛି ନିୟମ ଅଛି ଯାହାକୁ ବିୟର ପିଇବା ସମୟରେ ମନେ ରଖିବାକୁ ହେବ” ଭାରତର ସର୍ବ ପୁରାତନ ବିୟର ଏବଂ ମାଲ୍ଟ ସ୍ପିରିଟ୍ ନିର୍ମାତା, ଡିଭାନ୍ସ ଆଧୁନିକ ବ୍ରୁରିଜ୍ ଲିମିଟେଡ୍ ର ପରିଚାଳନା ନିର୍ଦ୍ଦେଶକ ପ୍ରେମ ଦେୱାନ୍ କହିଛନ୍ତି । ତେବେ ଆସନ୍ତୁ ଜାଣଇବା ବିୟର କେଉଁ ମାନେ ପିଇପାରିବେ ଏବଂ ଅଧିକ ପିଇଲେ କଣ କ୍ଷତି ହୁଏ ।

ଯଦି ଆପଣ ଡାଏଟିଂ ରେ ଅଛନ୍ତି ତେବେ ବିୟର ଠାରୁ ଦୁରେଇ ରୁହନ୍ତୁ । ବିୟର ଏକ ମୃଦୁ ପାନୀୟ ହେବା ସହିତ ଏଥିରେ ସମାନ କ୍ୟାଲୋରୀ ଥାଏ, ଏଥିରେ ବିଭିନ୍ନ ପ୍ରକାରର ଭିଟାମିନ୍ ଆକାରରେ ଅନେକ ପୋଷକ ତତ୍ତ୍ୱ ରହିଥାଏ । ବିୟର ପିଇବା ଦ୍ବାରା ଅଧିକ ଭୋକ ଲାଗିଥାଏ । ଯାହା ଦ୍ବାରା ଆପଣଙ୍କ ଡାଏଡିଂ ର କୈଣସି ଅର୍ଥ ରହିବ ନାହିଁ ।

ସେହିଭଳି, ଜଣେ ଗର୍ଭବତୀ ମହିଳାଙ୍କ ପାଇଁ ମଦ୍ୟପାନ ନିଶେଧ ଥାଏ । ଗର୍ଭବତୀସମୟରେ ବିୟର ପିଇଲେ ଏବା ରକ୍ତରେ ମିଶ୍ରିତ ହୁଏ ଯାହା ଗର୍ଭସ୍ଥ ଶିଶୁକୁ ମଧ୍ୟ ଯୋଗାଇଥାଏ ଏବଂ ଏହାର ବିକାଶ ଉପରେ ପ୍ରଭାବ ପକାଇପାରେ । ଯଦି ଆପଣ ଗର୍ଭବତୀ ଅଛନ୍ତି ତେବେ ବିୟରକୁ ନା କୁହନ୍ତୁ ।
ଏବଂ ଅଧିକ ବିୟର ପିଇବା ଦ୍ୱାରା ଆପଣଙ୍କୁ ଉଚ୍ଚ ରକ୍ତଚାପ ଏବଂ କିଡନୀ ରୋଗ ହେବାର ଆଶଙ୍କା ରହିଥାଏ । ଏହାର କାରଣ ହେଉଛି ବିୟର ଡାଇୟୁରେଟିକ୍ ଏବଂ ଏହା ଆପଣଙ୍କ କିଡନୀ ଉପରେ ଅତିରିକ୍ତ ଚାପ ପକାଇପାରେ ।

ଏହା ଶରୀରକୁ ଡିହାଇଡ୍ରେସନରୁ ଦୁରେଇ ରଖେ । ଏବଂ କିଛି ସମୟ ମଧ୍ୟରେ, ଏହା ଆପଣଙ୍କ କିଡନୀକୁ କ୍ଷତି ପହଞ୍ଚାଇପାରେ ଯାହା କିଡନୀରେ ଷ୍ଟୋନ କିମ୍ବା କିଡନୀ ଫେଲ ହୋଇପାରେ । କିଛି ଅଧ୍ୟୟନର ଅନୁସନ୍ଧାନରୁ ଜଣାପଡିଛି ଯେ ବିୟର ପିଇବା ଦ୍ବାରା ଶୀଘ୍ର ନିଦ ଆସିଥାଏ , କିନ୍ତୁ ଏହା ବେଶୀ ଦିନ ରହି ନଥାଏ । ବାସ୍ତବରେ, ମଦ୍ୟପାନ ଆପଣଙ୍କ ନିଦ ଏବଂ ମନୋବଳକୁ ଦୁର୍ବଳ କରିଥାଏ । କେତେକ ଲୋକ ଅତ୍ୟଧିକ ମଦ୍ୟପାନ ହେତୁ ରାତିରେ ଅନିଦ୍ରା ମଧ୍ୟ ରହିଥାନ୍ତି ।

ଆଉ ରିଟେଲରଙ୍କୁ ଦେବାକୁ ହେବନି ବ୍ୟକ୍ତିଗତ ତଥ୍ୟ

ଗ୍ରାହକଙ୍କୁ ସେମାନଙ୍କ ବ୍ୟକ୍ତିଗତ ତଥ୍ୟ କେତେକ ନିର୍ଦ୍ଧିଷ୍ଟ ସେବା ଯୋଗାଇବା ପାଇଁ ମାଗି ପାରିବେ ନାହିଁ। ଏନେଇ ଉପଭୋକ୍ତା ବ୍ୟାପାର ମନ୍ତ୍ରଣାଳୟ ପକ୍ଷରୁ ଏକ ନିର୍ଦ୍ଦେଶନାମା ଜାରି କରାଯାଇଥିବା ବିଭାଗୀୟ ସଚିବ ରୋହିତ କୁମାର ସିଂହ ସୂଚନା ଦେଇଛନ୍ତି। ବହୁ ଉପଭୋକ୍ତାଙ୍କ ପକ୍ଷରୁ ହୋଇଥିବା ଅଭିଯୋଗ ଆଧାରରେ ଏହି ପଦକ୍ଷେପ ନିଆଯାଇଥିବା ସୂଚନା ଦେଇଛନ୍ତି ସିଂହ।

ସିଂହ କହିଛନ୍ତି କି, ବହୁ ଉପଭୋକ୍ତା ଏନେଇ ଅଭିଯୋଗ କରିଥିଲେ। ସେମାନଙ୍କ ଅଭିଯୋଗରେ ଦର୍ଶାଯାଇଥିଲା କି, ସେମାନେ ବ୍ୟକ୍ତିଗତ କଣ୍ଚାକ୍ଟ ନମ୍ବର ନ ଦେବାରୁ ସେମାନଙ୍କୁ ରିଟେଲର ସେବା ଯୋଗାଇ ଦେବାକୁ ମନା କରିଦେଇଥିଲେ। ସେପଟେ ଏନେଇ ସେବା ଯୋଗଣକାରୀ କହିଛନ୍ତି କି, ଯେ ପର୍ଯ୍ୟନ୍ତ ସେମାନଙ୍କୁ ବ୍ୟକ୍ତିଗତ ସମ୍ପର୍କ ସମ୍ବନ୍ଧିତ ସବିଶେଷ ତଥ୍ୟ ନ ମିଳିଛି ସେମାନେ ବିଲ ପ୍ରସ୍ତୁତ କରି ପାରିବେ ନାହିଁ। ଗ୍ରାହକ ସୁରକ୍ଷା ଆଇନ ଅନୁଯାୟୀ ଏହା ଏକ ଅଯୁକ୍ତିକର ଏବଂ ପ୍ରତିବନ୍ଧକ ବାଣିଜ୍ୟ ଅଭ୍ୟାସ। ତଥ୍ୟ ସଂଗ୍ରହ କରିବା ପଛରେ କୌଣସି ଯୁକ୍ତିଯୁକ୍ତତା ନାହିଁ ବୋଲି ସିଂହ କହିଛନ୍ତି। 

ସେ ଆହୁରି କହିଛନ୍ତି କି ଏହା ଏକ ଗୋପନୀୟତା ସମ୍ବନ୍ଧିତ ପ୍ରସଙ୍ଗ। ତେଣୁ ଗ୍ରାହକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଏଥି ସମ୍ବନ୍ଧରେ ଏକ ଆଡଭାଇଜୋରୀ ଜାରି କରାଯାଇଛି ସମନ୍ତ ରିଟେଲ ଇଣ୍ଡଷ୍ଟ୍ରୀ ଓ ଇଣ୍ଡଷ୍ଟ୍ରୀ ଚାମ୍ବର୍ସ  ସିଆଇଆଇ ଓ ଏଫଆଇସିସିଆଇକୁ।

ଭାରତରେ ବିଲ ପ୍ରସ୍ତୁତ କରିବାକୁ ଗ୍ରାହକଙ୍କ ମୋବାଇ ନମ୍ବର ଦେବା ବାଧ୍ୟତାମୂଳକ ନୁହେଁ। ଯେତେବେଳେ ରିଟେଲର ସେମାନଙ୍କୁ ସେମାନଙ୍କ କଣ୍ଟାକ୍ଟ ନମ୍ବର ଦେବାକୁ ବାଧ୍ୟ କରୁଥିଲେ ଏହା ସେମାନଙ୍କୁ ଏକ ଅପ୍ରିତିକର ପରିସ୍ଥିତିରେ ପକାଇଥିଲା। ଏମିତିକି ନମ୍ବର ଦେବା ସେମାନଙ୍କ ପାଇଁ ବଧ୍ୟବାଧକତା ଥିଲା। ଆଉ ଯେଉଁ ଗ୍ରାହକ ନମ୍ବର ଦେବାକୁ ଅରାଜି ହେଉଥିଲେ, ସେମାନଙ୍କୁ ରିଲେଟରଙ୍କ ନିକଟରୁ ସେବା ମିଳୁ ନ ଥିଲା।

ପାଟଣାଗଡ଼: ସାଂସଦଙ୍କ ଗାଡ଼ି ଧକ୍କାରେ ଜୀବନ ହାରିଲେ ସ୍କୁଟି ଚାଳକ

ପାଟଣାଗଡ଼ ଗାଇସିଲାଟ ମୁଖ୍ୟ ରାସ୍ତାରେ ଦୁର୍ଘଟଣା । ତମିଆଁ ଓ ସୁନାମୁଦି ଛକ ମଝିରେ ମର୍ମନ୍ତୁଦ ସଡ଼କ ଦୁର୍ଘଟଣାରେ ଜଣଙ୍କ ଜୀବନ ଯାଇଛି । ରାଜ୍ୟସଭା ସାଂସଦଙ୍କ ଚାରିଚକିଆ ଗାଡ଼ି ସ୍କୁଟିକୁ ଧକ୍କା ଦେବା ପରେ ଘଟଣାସ୍ଥଳରେ ସ୍କୁଟି ଚାଳକଙ୍କ ମୃତ୍ୟୁ ଘଟିଛି ।

ରାଜ୍ୟସଭା ସାଂସଦ ନିରଞ୍ଜନ ବିଶିଙ୍କ ଗାଡ଼ି ଧକ୍କାରେ ସ୍କୁଟି ଚାଳକଙ୍କ ମୃତ୍ୟୁ । ଘଟଣାସ୍ଥଳରେ ଜୀବନ ହାରିଛନ୍ତି ସ୍କୁଟି ଚାଳକ । ମୃତକ ଲରମ୍ଭା ଥାନା ଇନ୍ଦପୁର ଗାଁର ଟଙ୍କଧର ବିଶ୍ବାଳ । ପାଟଣାଗଡ଼ ପୋଲିସ ପହଞ୍ଚି ମୃତଦେହ ଜବତ କରିବା ସହ ଶବ ବ୍ୟବଚ୍ଛେଦ ପାଇଁ ପାଟଣାଗଡ଼ ଉପଖଣ୍ଡ ଡାକ୍ତରଖାନା ଆଣିଛି । କୌଣସି ଏକ କାର୍ଯରେ ରାଜ୍ୟସଭା ସାଂସଦ ନିରଞ୍ଜନ ବିଶି ନିଜ ଗାଡ଼ିରେ ଯାଉଥିଲେ । ସେ ପାଟଣାଗଡ଼-ଗାଇସିଲାଟ ମୁଖ୍ୟ ରାସ୍ତାରେ ଯାଉଥିବା ବେଳେ ତମିଆଁ ଓ ସୁନାମୁଦି ଛକରେ ଦୁର୍ଘଟଣା ଘଟିଥିଲା ଗାଡ଼ି । ଭାରସାମ୍ୟ ହରାଇ ସ୍କୁଟିକୁ ଧକ୍କା ଦେଇଥିଲା ସାଂସଦଙ୍କ ଗାଡ଼ି । ଫଳରେ ସ୍କୁଟି ଚାଳକ ଛିଟିକି ପଡ଼ିବା ସହ ଘଟଣାସ୍ଥଳରେ ପ୍ରାଣ ହରାଇଥିଲେ

ପରିବାର ଲୋକ ପହଞ୍ଚିବା ପରେ ଶବ ବ୍ୟବଚ୍ଛେଦ କରାଯିବ ବୋଲି ପୋଲିସ ପକ୍ଷରୁ କୁହାଯାଇଛି । ସେପଟେ, ଦୁର୍ଘଟଣା ପରେ ସାଂସଦଙ୍କ ଡ୍ରାଇଭର ଥାନାରେ ଆତ୍ମସମର୍ପଣ କରିଛି ।