Author: suchanatv24x7

ବେଆଇନ୍ ମାଟି ଖୋଳାକୁ ନେଇ ପର୍ଜଙ୍ଗ ତହସିଲଦାରଙ୍କୁ ଆକ୍ରମଣ ଅଭିଯୋଗ

ଢେଙ୍କାନାଳ ଜିଲ୍ଲା ପର୍ଜଙ୍ଗ ତହସିଲଦାରଙ୍କୁ ମାଫିଆଙ୍କ ଆକ୍ରମଣ ଅଭିଯୋଗ ହୋଇଛି । ତହସିଲଦାରଙ୍କୁ ଜେସିବି ଚଢ଼ାଇ ଦେବାକୁ ଉଦ୍ୟମ କରାଯାଇଥିବା ଅଭିଯୋଗ କରିଛନ୍ତି ପରିବାର ଲୋକେ ।

ସୂଚନା ଅନୁସାରେ ପଥରଖମ୍ବ ଗାଁ ନିକଟରେ ବେଆଇନ୍ ମାଟି ଖୋଳା ଯାଉଥିଲା । ସରକାରୀ ଜମିରୁ ଜେସିବି ମାଧ୍ୟମରେ ମାଟି ଖୋଳା ଯାଉଥିବାକୁ ନେଇ ଚଢ଼ାଉ କରିଥିଲେ ତହସିଲଦାର ଶୁଭ୍ର ପଟେଲ । ଘଟଣାସ୍ଥଳରେ ପହଞ୍ଚି ମାଟି ଉଠାଉଥିବା ବେଳେ ନିଜ ମୋବାଇଲରେ ଫଟୋ ମଧ୍ୟ ଉଠାଇଥିଲେ । ମୋବାଇଲରେ ଫଟୋ ଉଠାଇବା ବେଳେ ସେଠାରେ ଉପସ୍ଥିତ ମାଫିଆମାନେ ତାଙ୍କୁ ଆକ୍ରମଣ କରିଥିଲେ। । ମାଡ଼ ମାରିବା ସହ ମରଣାନ୍ତ୍ରକ ଆକ୍ରମଣ କରିଥିଲେ ।

ତେବେ ଆକ୍ରମଣ ପରେ ଗୁରୁତର ହୋଇଥିଲେ ତହସିଲଦାର । ତାଙ୍କୁ ଉଦ୍ଧାର କରିବାକୁ ଯାଇଥିବା ରାଜସ୍ବ ନିରୀକ୍ଷକ ଆଲୋକ କୁମାର ଲେଙ୍କା ମଧ୍ୟ ଆକ୍ରମଣର ଶିକାର ହୋଇଥିବା ଖବର ମିଳିଛି । ଗୁରୁତର ତହସିଲଦାରଙ୍କୁ କାମାକ୍ଷାନଗର ଉପଖଣ୍ଡ ଡାକ୍ତରଖାନାରେ ଭର୍ତ୍ତି କରାଯାଇଛି । ମାଫିଆ ଗ୍ୟାଙ୍ଗରେ ୮ରୁ ୧୦ ଜଣ ସାମିଲ ଥିବା ନେଇ ସୂଚନା ମିଳିଛି ।

ଏହି ଘଟଣା ପରେ ଖବର ପାଇ ପର୍ଜଙ୍ଗ ବିଧାୟକ ନୃସିଂହ ଚରଣ ସାହୁ ମେଡିକାଲ ଯାଇଥିଲେ । କାମାକ୍ଷାନଗର ଉପଜିଲ୍ଲାପାଳ ଜ୍ୟୋତିଶଙ୍କର ସାହୁ ମଧ୍ୟ ମେଡିକାଲରେ ପହଞ୍ଚି ଗୁରୁତର ତହସିଲଦାରଙ୍କ ସହ ଆଲୋଚନା କରିଛନ୍ତି । ସେମାନେ ସ୍ବାସ୍ଥ୍ୟବସ୍ଥା ପଚାରି ବୁଝିଛନ୍ତି । ଘଟଣାସ୍ଥଳ ଯାଇ ଗୋଟିଏ ଟ୍ରାକ୍ଟର ଜବତ କରିବା ସହ ତଦନ୍ତ ଜାରି ରଖିଛି ପୋଲିସ ।
ମୟୂରଭଞ୍ଜ: ଡାହାଣୀ ସନ୍ଦେହରେ ବୋହୂକୁ ତୀର ମାରିଲା ଶ୍ୱଶୁର

ଏବେ ବି ଅନ୍ଧବିଶ୍ୱାସର ଅନ୍ଧ ଗଳିରେ ବସବାସ କରୁଛନ୍ତି ଲୋକେ । ମୁର୍ଖତାର ଶିକାର ହୋଇ ଲୋକେ ହତ୍ୟା ମଧ୍ୟ କରିବାକୁ ପଛାଉ ନାହାଁନ୍ତି । ବିଶେଷ କରି ଆଦିବାସୀ ଅଧ୍ୟୁଷିତ ଅଞ୍ଚଳ ମାନଙ୍କରେ ଏହି ଅନ୍ଧବିଶ୍ୱାସର ପ୍ରଭାବ ଅଧିକ ମାତ୍ରାରେ ଦେଖିବାକୁ ମିଳିଥାଏ । ଅନ୍ଧବିଶ୍ୱାସର ନେଇ ରହିଛି ଅନେକ କଠୋର ନିୟମ, ତଥାପି କେହି ତାହାକୁ ଖାତିର କରୁନାହାନ୍ତି । ଏପରି ଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ମଣଦା ଫାଣ୍ଡି ଅନ୍ତର୍ଗତ ରାଧାନଗର ଗ୍ରାମରେ ।

ସୂଚନା ଅନୁଯାୟୀ, ରାଧାନଗର ଗ୍ରାମର ସୁକୁରୁମୁଣୀ ପୂର୍ତ୍ତୀ ନାମକ ମହିଳା ସନ୍ଧ୍ୟା ସମୟରେ ସାପ୍ତାହିକ ହାଟରୁ ଘରକୁ ଫେରିବା ସମୟରେ ଫାଣ୍ଡି ନିକଟରେ ନିଜର କକାଶ୍ବଶୁର ଲଛମନ ପୂର୍ତ୍ତିଙ୍କ ତୀର ମାଡ଼ର ଶିକାର ହୋଇଥିଲେ । ତାଙ୍କର ତଳି ପେଟରେ ତୀର ପଶିଥିବା ବେଳେ ସେ ଗୁରୁତର ହୋଇଛନ୍ତି । ତୀର ବାଜିବାକ୍ଷଣି ସେ ଚିତ୍କାର କରିଥିଲେ । ଆଉ ଚିତ୍କାର ଶୁଣି ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରିବା ସହ ଡାକ୍ତରଖାନା ପଠାଇଥିଲେ ।

ଅଭିଯୁକ୍ତ ଲଛମନ ପୂର୍ତି ଘଟଣା ସ୍ଥଳରୁ ଫେରାର ହୋଇଯାଇଥିଲା । ହେଲେ ପୋଲିସ ଏକ ମାମଲା ରୁଜୁ କରି ଅଭିଯୁକ୍ତକୁ ଧରିବାରେ ସଫଳ ହୋଇଛି । ତେବେ ଡାହାଣୀ ସନ୍ଦେହରେ‌ ଏହି ତୀର ମାଡ଼ କରାଯାଇଥିବା ପିଡିତ ମହିଳା ଗଣମାଧ୍ୟମକୁ କହିଛନ୍ତି । ହେଲେ ଲଛମନ ପୂର୍ତି ପାରିବାରିକ ଜମିବାଡି ମାମଲା ନେଇ ରାଗିଯାଇ ଏଭଳି କାଣ୍ଡ କରିଥିବା ଗଣମାଧ୍ୟମକୁ ସୂଚନା ଦେଇଛି ।
ମୌସୁମୀ ରିଟର୍ଣ୍ଣସ: ଏବର୍ଷ ସ୍ୱାଭାବିକ ରହିବ ମୌସୁମୀ, କହିଲା IMD

ଚଳିତବର୍ଷ ଦେଶରେ ମୌସୁମୀଜନିତ ବର୍ଷା ସ୍ୱାଭାବିକ ରହିବାର ସମ୍ଭାବନା ରହିଛି । ଜୁନ୍ ୪ ତାରିଖ ବେଳକୁ ମୌସୁମୀ କେରଳ ଛୁଇଁବ । ଏଭଳି ପୂର୍ବାନୁମାନ କରିଛି ଭାରତୀୟ ପାଣିପାଗ ବିଭାଗ ବା ଆଇଏମଡି । ସେହିପରି ଉତ୍ତର ପଶ୍ଚିମ ଭାରତରେ ସ୍ୱାଭାବିକ ଠାରୁ କମ୍ ବର୍ଷା ହେବାର ସମ୍ଭାବନା ରହିଛି ।

ମୌସୁମୀକୁ ନେଇ IMD ବିଭିନ୍ନ ଆକଳନ କରିଛି । ଏଥର ସ୍ୱାଭାବିକ ବର୍ଷା ହେବାକୁ ଥିବାବେଳେ ଦକ୍ଷିଣ-ପଶ୍ଚିମ ମୌସୁମୀ ୯୬% ରହିବ ବୋଲି ଆକଳନ କରାଯାଇଛି । ଏହା ସ୍ୱାଭାବିକ ରହିବ ବୋଲି କହିଛି ବିଭାଗ । ଏଥର ଏଲ୍ ନିନୋର ପ୍ରଭାବ ନିଶ୍ଚୟ ଦେଖିବାକୁ ମିଳିବ ବୋଲି ପୂର୍ବାନୁମାନ କରିଛନ୍ତି ଭାରତୀୟ ପାଣିପାଗ ବିଭାଗର ବରିଷ୍ଠ ବୈଜ୍ଞାନିକ । ଭାରତୀୟ ଅର୍ଥନୀତି ଉପରେ ସବୁଠାରୁ ଅଧିକ ପ୍ରଭାବ ପକାଉଥିବା ଦକ୍ଷିଣ-ପଶ୍ଚିମ ମୌସୁମୀ ସାଧାରଣତଃ ଜୁନ୍ ୧ରେ କେରଳ ଛୁଇଁଥାଏ । କିନ୍ତୁ ଚଳିତବର୍ଷ ୪ ଦିନ ବିଳମ୍ବରେ ଆସିବ । ସେହିପରି ଆସନ୍ତା ଜୁନ୍ ୧୨ ବେଳକୁ ଓଡ଼ିଶାକୁ ମୌସୁମୀ ଆସିବା ନେଇ ସମ୍ଭାବନା ରହିଛି ।

ଗତକାଲି ରାଜ୍ୟରେ କାଳବୈଶାଖୀଜନିତ ବର୍ଷା ଦେଖିବାକୁ ମିଳିଥିଲା । ଅପରାହ୍ଣରେ ପ୍ରାୟ ୩ ଘଣ୍ଟା ଯାଏ କଚାଡ଼ିଥିଲା । ଆଜି ମଧ୍ୟ କାଳବୈଶାଖୀ ପ୍ରଭାବ ରହିବ ବୋଲି ଆଞ୍ଚଳିକ ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି । ବିଜୁଳି, ଘଡ଼ଘଡ଼ି ସହ ବର୍ଷା ହେବାର ଆଶଙ୍କା ରହିଛି । ସେଥିପାଇଁ ୯ଟି ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି ।
ନୂଆଦିଲ୍ଲୀ: ଚଳିତବର୍ଷ ସ୍ୱାଭାବିକ ହେବ ମୌସୁମୀ, ଜୁନ୍ ୪ ସୁଦ୍ଧା କେରଳ ଛୁଇଁବ, IMD ପକ୍ଷରୁ ସୂଚନା
ସରକାରଙ୍କ ୯ ବର୍ଷ ପୂର୍ତ୍ତିରେ ମୋଦୀ ସରକାରଙ୍କୁ କଂଗ୍ରେସର ୯ ପ୍ରଶ୍ନ

ମୋଦୀ ସରକାରର ୯ ବର୍ଷ ପୂରଣ ଅବସରରେ କଂଗ୍ରେସ ପ୍ରଧାନମନ୍ତ୍ରୀଙ୍କୁ ୯ଟି ପ୍ରଶ୍ନ ପଚାରିଛି । କଂଗ୍ରେସ ପକ୍ଷରୁ ଆଦାନୀ, କୃଷକ ମାନଙ୍କ ଆୟକୁ ଦ୍ୱିଗୁଣିତ କରିବା, ଦରଦାମ୍ ବୃଦ୍ଧି ଏବଂ ବେକାରୀ ଭଳି ପ୍ରସଙ୍ଗ ଉପରେ ପ୍ରଶ୍ନ କରାଯାଇଛି । କଂଗ୍ରେସ ତରଫରୁ ‘୯ ବର୍ଷ, ୯ ପ୍ରଶ୍ନ’ ଉପରେ ଏକ ବୁକଲେଟ୍ ମଧ୍ୟ ଜାରି କରାଯାଇଛି । ଦଳର ବରିଷ୍ଠ ନେତା ଜୟରାମ ରମେଶ କହିଛନ୍ତି ଯେ, ଶନିବାର ଦିନ ଦେଶର ୩୫ଟି ସହରରେ କଂଗ୍ରେସ ଏକ ସାମ୍ବାଦିକ ସମ୍ମିଳନୀ କରିବ ।

କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ଶୁକ୍ରବାର ଦିନ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ମୋଦୀ ସରକାରଙ୍କ ନଅ ବର୍ଷ ପୂରଣ ହେବା ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନଅଟି ପ୍ରଶ୍ନ ପଚାରିବାକୁ ଚାହୁଁଛନ୍ତି । ଆମେ ‘୯ ବର୍ଷ ୯ ପ୍ରଶ୍ନ’ ପାଇଁ ଆମେ ଏକ ଡକ୍ୟୁମେଣ୍ଟ୍ ମଧ୍ୟ ପ୍ରକାଶ କରୁଛୁ ବୋଲି ଜୟରାମ କହିଛନ୍ତି ।

କଂଗ୍ରେସ ତରଫରୁ କୁହାଯାଇଥିଲା ଯେ, ରାହୁଲ ଗାନ୍ଧୀ ଏହି ୯ଟି ପ୍ରଶ୍ନକୁ ଭାରତ ଯୋଡା ଯାତ୍ରା ସମୟରେ ଏବଂ ପରେ କ୍ରମାଗତ ଭାବରେ ଉଠାଇଥିଲେ । କିନ୍ତୁ, ଆଜି ପର୍ଯ୍ୟନ୍ତ କୌଣସି ଉତ୍ତର ମିଳିନାହିଁ । କଂଗ୍ରେସ ଦଳ ଆଜି ପ୍ରଧାନମନ୍ତ୍ରୀ ମୋଦୀଙ୍କୁ ୯ ଟି ପ୍ରଶ୍ନ ପଚାରିଛନ୍ତି । ଆମେ ଚାହୁଁଛୁ ପିଏମ ମୋଦୀ ଏହି ପ୍ରଶ୍ନଗୁଡ଼ିକ ଉପରେ ନୀରବତା ଭାଙ୍ଗନ୍ତୁ ବୋଲି କଂଗ୍ରେସ କହିଛି ।

ପ୍ରଧାନମନ୍ତ୍ରୀ ମୋଦୀଙ୍କୁ କଂଗ୍ରେସ ଏହି ୯ଟି ପ୍ରଶ୍ନ ପଚାରିଛି

୧. ଅର୍ଥନୀତି- ଦେଶରେ ଦରଦାମ ବୃଦ୍ଧି ଏବଂ ବେରୋଜଗାରୀ କାହିଁକି ଆକାଶ ଛୂଇଁଛି ? ଧନୀ ଲୋକମାନେ କାହିଁକି ଧନୀ ହେଉଛନ୍ତି ଏବଂ ଗରିବ ମାନେ କାହିଁକି ଗରିବ ହେଉଛନ୍ତି ? ସର୍ବସାଧାରଣ ସମ୍ପତ୍ତି ମୋଦୀଙ୍କ ସାଙ୍ଗ ମାନଙ୍କୁ କାହିଁକି ବିକ୍ରି ହେଉଛି ? ଅର୍ଥନୈତିକ ପାର୍ଥକ୍ୟ କାହିଁକି ବଛି?

୨. କୃଷି ଏବଂ କୃଷକ- ଗତ ୯ ବର୍ଷ ମଧ୍ୟରେ ମଧ୍ୟ କୃଷକଙ୍କ ଆୟ ଦ୍ୱିଗୁଣିତ ହୋଇନାହିଁ କାହିଁକି? କଳା କୃଷି ଆଇନକୁ ରଦ୍ଦ କରାଯାଇଥିବା ବେଳେ କୃଷକ ସଂଗଠନ ସହିତ ହୋଇଥିବା ଚୁକ୍ତିନାମା କାହିଁକି କାର୍ଯ୍ୟକାରୀ ହୋଇନାହିଁ? କାହିଁକି MSP ଗ୍ୟାରେଣ୍ଟି ଦିଆଗଲା ନାହିଁ?

୩. ଦୁର୍ନୀତି/ମିତ୍ରବାଦ- ଆଦାନୀକୁ ଲାଭ ପହଞ୍ଚାଇବା ପାଇଁ LIC ଏବଂ SBIରେ ଜମା ହୋଇଥିବା ଲୋକଙ୍କ କଷ୍ଟ ଉପାର୍ଜିତ ଟଙ୍କା କାହିଁକି ବିପଦରେ ପଡିଛି? ଦୁର୍ନୀତିର ସମାପ୍ତି ବିଷୟରେ ଆଲୋଚନା କରୁଥିବା ପ୍ରଧାନମନ୍ତ୍ରୀ କାହିଁକି ଉତ୍ତର ଦେଉନାହାନ୍ତି ଯେ, ଆଦାନୀଙ୍କ ନକଲି କମ୍ପାନୀରେ ରହିଥିବା ୨୦ ହଜାର କୋଟି ଟଙ୍କା କାହାର?

୪. ଚୀନ୍ ଏବଂ ଜାତୀୟ ସୁରକ୍ଷା- ଚୀନକୁ ନାଲି ଆଖି ଦେଖାଉଥିବା ପ୍ରଧାନମନ୍ତ୍ରୀ କାହିଁକି ଚୀନ ଆମ ଜମି ଦଖଲ କରି ବସିଥିବା ବେଳେ ୨୦୨୦ରେ ଏହାକୁ କ୍ଲିନଚିଟ ଦେଇଦେଲେ ?

୫. ସାମାଜିକ ସଦ୍ଭାବ- ନିର୍ବାଚନୀ ଫାଇଦା ପାଇଁ ବିଭାଜନକାରୀ ରାଜନୀତିକୁ ପ୍ରୋତ୍ସାହିତ କରାଯାଉଥିବା ବେଳେ ସମାଜରେ ଭୟର ବାତାବରଣ କାହିଁକି ସୃଷ୍ଟି କରାଯାଉଛି ?

୬. ସାମାଜିକ ନ୍ୟାୟ- ମହିଳା, ଦଳିତ, ଏସସି, ଏସଟି, ଓବିସି ଏବଂ ସଂଖ୍ୟାଲଘୁଙ୍କ ପ୍ରତି ହେଉଥିବା ଅତ୍ୟାଚାର ଉପରେ ପ୍ରଧାନମନ୍ତ୍ରୀ କାହିଁକି ଚୁପ୍ ରହିଛନ୍ତି? ଜାତି ଜନଗଣନା ପାଇଁ ସେ କାହିଁକି ଅବହେଳା କରୁଛନ୍ତି ?

୭. ଗଣତାନ୍ତ୍ରିକ ସଂସ୍ଥା- ପ୍ରତିଶୋଧର ଭାବନା ସହିତ ବିରୋଧୀ ଦଳ ଏବଂ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ କାହିଁକି ନିଆଯାଉଛି? ଜନସାଧାରଣଙ୍କ ଦ୍ୱାରା ନିର୍ବାଚିତ ବିରୋଧୀ ଦଳର ଅନେକ ସରକାରକୁ କାହିଁକି ଭାଙ୍ଗି ଦିଆଗଲା ? ଗତ ୯ ବର୍ଷରେ ସାମ୍ବିଧାନିକ ଏବଂ ଗଣତାନ୍ତ୍ରିକ ଅନୁଷ୍ଠାନ ଗୁଡ଼ିକ କାହିଁକି ଦୁର୍ବଳ ହେଲା ?

୮. ଜନକଲ୍ୟାଣ ଯୋଜନା- ମନରେଗା ପରି ଜନ କଲ୍ୟାଣ ଯୋଜନା କାହିଁକି ବଜେଟରୁ କାଟି ଦୁର୍ବଳ କରାଗଲା? ଗରିବ, ଆଦିବାସୀ ଏବଂ ଅଭାବୀ ଲୋକମାନଙ୍କର ସ୍ୱପ୍ନ କାହିଁକି ଭାଙ୍ଗିଦିଆ ଯାଉଛି ?

୯. କରୋନା ମିସମ୍ୟାନେଜମେଣ୍ଟ – କାହିଁକି କରୋନା କାରଣରୁ ୪୦ ଲକ୍ଷ ଲୋକଙ୍କ ମୃତ୍ୟୁ ପରେ ସେମାନଙ୍କ ପରିବାରକୁ କ୍ଷତିପୂରଣ ପାଇଁ ମନା କରାଯାଇଥିଲା ? କାହିଁକି ଲକ୍ଷ ଲକ୍ଷ ଶ୍ରମିକ ହଠାତ୍ ତାଲା ପକାଇ ଘରକୁ ଯିବାକୁ ବାଧ୍ୟ ହେଲେ ଏବଂ ସେମାନଙ୍କୁ ନିଜ ଅବସ୍ଥାରେ ଛାଡି ଦିଆଗଲା ?
IPL: ଫାଇନାଲ୍ ପୂର୍ବରୁ ଆଜି ଲଢ଼ିବେ ଗୁଜରାଟ ଓ ମୁମ୍ବାଇ

ଫଟାଫଟ୍ କ୍ରିକେଟ୍ IPLରେ ଆଉ ମାତ୍ର ୨ଟି ମ୍ୟାଚ୍ ଅଛି । ଆଜି ଦ୍ୱିତୀୟ କ୍ୱାଲିଫାଏରରେ ମୁହାଁମୁହିଁ ହେବେ ମୁମ୍ବାଇ ଇଣ୍ଡିଆନ୍ସ ଏବଂ ଗୁଜରାଟ ଟାଇଟନ୍ସ । ଅହମ୍ମଦାବାଦରେ ସନ୍ଧ୍ୟା ୭.୩୦ରେ ଏହି ମ୍ୟାଚ୍ ଖେଳାଯିବ । ଆଜିର ବିଜେତା ଚେନ୍ନାଇ ବିପକ୍ଷରେ ଟାଇଟଲ୍ ପାଇଁ ଲଢ଼ିବ ।

ମେ’୨୮ରେ IPL ଫିନାଲେ ମାନେ ଟାଇଟଲ୍ ପାଇଁ ଲଢ଼େଇ । ଗୁଜରାଟକୁ ହରାଇ ପ୍ରଥମ ଟିମ୍ ଭାବେ ଫାଇନାଲରେ ଏଣ୍ଟ୍ରି କରିଛି ଚେନ୍ନାଇ । ଏବେ ଦ୍ୱିତୀୟ ଟିମ୍ ଅପେକ୍ଷାରେ ଦର୍ଶକ । ଆଜି ମୁମ୍ବାଇ ଓ ଗୁଜରାଟ ଖେଳାଳି ମୈଦାନରେ ନିଜ ଦମ୍ ଦେଖାଇବେ । କଳେବଳେ କୌଶଳେ ମ୍ୟାଚ୍ ଜିତିବାକୁ ସମସ୍ତେ ଉଦ୍ୟମ କରିବେ । ଡିଫେଣ୍ଡିଂ ଚାମ୍ପିଅନ୍ ଗୁଜରାଟ ଏବେ ପୁରା ଫର୍ମରେ ରହିଛି । ଗତଥର ପରି ଚଳିତଥର ମଧ୍ୟ ଖେଳାଳିମାନେ ଦମଦାର ପ୍ରଦର୍ଶନ କରୁଛନ୍ତି । ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ଦଳର ପ୍ରଦର୍ଶନ ବେଶ୍ ପ୍ରଶଂସନୀୟ ରହିଛି । ଇନଫର୍ମ ଶୁବମନ୍ ଗିଲ୍, ବିଜୟ ଶଙ୍କର, ପାଣ୍ଡ୍ୟା, ମିଲରଙ୍କ ପରି ଖେଳାଳିଙ୍କ ଉପରେ ଦଳର ବ୍ୟାଟିଂ ନିର୍ଭର କରୁଛି । ଅଲରାଉଣ୍ଡର ରସିଦ ଖାନଙ୍କ ସମେତ ଅଭିଜ୍ଞ ସାମି ବୋଲିଂ ଡିପାର୍ଟମେଣ୍ଟ ସମ୍ଭାଳିବେ । ତେଣୁ ଦ୍ୱିତୀୟ ଟିମ୍ ଭାବେ ଫାଇନାଲ୍ ଯିବାକୁ ଲକ୍ଷ୍ୟ ରଖିଛି ଦଳ ।

ସେପଟେ, ଭାଗ୍ୟ ସାଥ୍ ଦେବାରୁ ଅଳ୍ପକେ କ୍ୱାଲିଫାଏ ରାଉଣ୍ଡରେ ଏଣ୍ଟ୍ରି କରିଛି ମୁମ୍ବାଇ । ଏଲିମିନେଟର ମୁକାବିଲାରେ ଲକ୍ଷ୍ନୌକୁ ମାତ୍ ଦେଇଥିଲା ମୁମ୍ବାଇ । ଆଜି ଗୁଜରାଟ ବିପକ୍ଷରେ ଉନ୍ନତ ପ୍ରଦର୍ଶନ ପାଇଁ ଲକ୍ଷ୍ୟ ରଖିଛି ଟିମ୍ । ବ୍ୟାଟିଂ, ବୋଲିଂ ଏବଂ ଫିଲ୍ଡିଂରେ କମାଲ କରି ଗୁଜରାଟକୁ ହରାଇବା ପାଇଁ ରଣନୀତି ପ୍ରସ୍ତୁତ କରିଛି ରୋହିତ ଆଣ୍ଡ କୋ । ଖାସ୍ କରି ଅଲାରାଉଣ୍ଡର ଗ୍ରୀନ୍ ଏବଂ ବିସ୍ଫୋରକ ସୂର୍ଯ୍ୟକୁମାରଙ୍କ ଉପରେ ଦଳର ବିଜୟ ନିର୍ଭର କରୁଛି । ତେଣୁ ଏ ଦୁଇ ପ୍ଲେୟାରଙ୍କୁ ସତର୍କତାର ସହ ଖେଳିବାକୁ ହେବ । ମେ’୨୮ରେ ଫାଇନାଲ୍ ମୁକାବିଲା । ଚେନ୍ନାଇ ଫାଇନାଲରେ ପ୍ରବେଶ କରିଥିବା ବେଳେ ଆଜି ମୁମ୍ବାଇ ନା ଗୁଜରାଟ ବିଜୟୀ ହେବ ତାକୁ ସମସ୍ତଙ୍କ ଅପେକ୍ଷା ।
ଭାରତୀୟ ପରମ୍ପରା ପ୍ରତି କଂଗ୍ରେସର ଏତେ ଘୃଣା କାହିଁକି: ଅମିତ ଶାହା

ନୂତନ ସଂସଦ ଭବନ ଉଦଘାଟନୀ ସମାରୋହକୁ ନେଇ ଗତ କିଛି ଦିନ ହେବ ଉତ୍ତେଜନା ଜାରି ରହିଛି ।
ସମସ୍ତ ବିରୋଧୀ ଦଳ ଏହାକୁ ଉଦଘାଟନ କରିବାକୁ ରାଷ୍ଟ୍ରପତିଙ୍କୁ ଦାବି କରିବା ସହ ବୟକଟ ଘୋଷଣା କରିଛନ୍ତି । ଏହି ବିବାଦ ମଧ୍ୟରେ ଏବେ ଆଉ ଏକ ବିବାଦ ଆରମ୍ଭ ହୋଇଛି । ଏଥର ସେଙ୍ଗୋଲ ଅର୍ଥାତ୍ ନୂତନ ସଂସଦ ଗୃହରେ ରଖାଯିବାକୁ ଥିବା ରାଜଦଣ୍ଡ ବିଷୟରେ ବିତର୍କ ଆରମ୍ଭ ହୋଇଛି । ଗୃହମନ୍ତ୍ରୀ ଅମିତ ଶାହା ଦେଶକୁ କହିଥିଲେ ଯେ, ସ୍ୱାଧୀନତାର ପ୍ରତୀକ ଭାବରେ ୧୯୪୭ ମସିହାରେ ଜବାହରଲାଲ ନେହେରୁଙ୍କୁ ଦିଆଯାଇଥିବା ସେଙ୍ଗୋଲକୁ ନୂତନ ସଂସଦରେ ରଖାଯିବ । ଏ ବିଷୟରେ ଅନେକ ପ୍ରଚାର ମଧ୍ୟ କରାଯାଇଥିଲା । କିନ୍ତୁ କଂଗ୍ରେସ ନେତା ଜୟରାମ ରମେଶ ସେଙ୍ଗୋଲ ଉପରେ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ଯେ, ସେଙ୍ଗୋଲ ବିଷୟରେ ବିଭ୍ରାନ୍ତିକର ତଥ୍ୟ ବିସ୍ତାର କରାଯାଉଛି । ଏବେ ଅମିତ ଶାହା ନିଜେ ଜୟରାମ ରମେଶଙ୍କୁ ଟୁଇଟ୍ କରି ପ୍ରତିଉତ୍ତର ଦେଇଛନ୍ତି ।

ଗୃହମନ୍ତ୍ରୀ ଅମିତ ଶାହା ଟୁଇଟ୍ କରି ଲେଖିଛନ୍ତି ଯେ କଂଗ୍ରେସ ଇତିହାସକୁ ମିଥ୍ୟା କରିବାକୁ ପ୍ରୟାସ କରୁଛି । ଅମିତ ଶାହା ଟ୍ୱିଟରରେ ଲେଖିଛନ୍ତି, “ବର୍ତ୍ତମାନ କଂଗ୍ରେସ ଆଉ ଏକ ଲଜ୍ଜାଜନକ ଅପମାନ କରିଛି । ଏକ ପବିତ୍ର ଶୈବ ମଠ, ଥିରୁବଦୁଥୁରାଇ ଅଧିନମ ନିଜେ ଭାରତର ସ୍ବାଧୀନତା ସମୟରେ ସେଙ୍ଗୋଲର ମହତ୍ତ୍ବ ବିଷୟରେ କହିଥିଲେ । କଂଗ୍ରେସ ଅଧିନମଙ୍କ ଇତିହାସକୁ ମିଥ୍ୟା ବୋଲି କହୁଛି । କଂଗ୍ରେସ ନିଜର ଆଚରଣକୁ ବିଚାର କରିବା ଆବଶ୍ୟକ। “

ଅମିତ ଶାହା ତାଙ୍କର ଦ୍ୱିତୀୟ ଟୁଇଟରେ ଲେଖିଛନ୍ତି, “କଂଗ୍ରେସ ଦଳ ଭାରତୀୟ ପରମ୍ପରା ଓ ସଂସ୍କୃତିକୁ ଏତେ ଘୃଣା କରେ କାହିଁକି ? ତାମିଲନାଡୁର ଏକ ପବିତ୍ର ଶୈବ ମଠ ଦ୍ୱାରା ପଣ୍ଡିତ ନେହେରୁଙ୍କୁ ଏକ ପବିତ୍ର ସେଙ୍ଗୋଲ ଭାରତର ସ୍ୱାଧୀନତାର ପ୍ରତୀକ ରୂପେ ଦିଆଯାଇଥିଲା । କିନ୍ତୁ ଏହାକୁ ଏକ ‘ଚାଲିବା ବାଡ଼ି’ ଭାବି ଏକ ସଂଗ୍ରହାଳୟକୁ ପଠାଇ ଦିଆଯାଇଥିଲା ।
ମନ୍ତ୍ରୀ ନବଦାସ ହତ୍ୟା ମାମଲା, JMFCରେ ପ୍ରାଥମିକ ଚାର୍ଜସିଟ୍ ଦାଖଲ

ବହୁଚର୍ଚ୍ଚିତ ସ୍ୱାସ୍ଥ୍ୟମନ୍ତ୍ରୀ ନବକିଶୋର ଦାସ ହତ୍ୟା ମାମଲାରେ ଝାରସୁଗୁଡ଼ା JMFC କୋର୍ଟରେ ଚାର୍ଜସିଟ୍ ଦାଖଲ ହୋଇଛି । କୋର୍ଟରେ କ୍ରାଇମବ୍ରାଞ୍ଚ ୫୪୩ ପୃଷ୍ଠାର ଚାର୍ଜସିଟ ଦାଖଲ କରିଛି । ମୁଖ୍ୟ ଆସାମୀ ତଥା ଅଭିଯୁକ୍ତ ASI ଗୋପାଳ ଦାସ ଏବେ ଜେଲରେ ଅଛି ।

JMFC କୋର୍ଟରେ କ୍ରାଇମବ୍ରାଞ୍ଚ ପକ୍ଷରୁ ପ୍ରାଥମିକ ଚାର୍ଜସିଟ୍ ଦାଖଲ କରାଯାଇଛି । ପୂର୍ବ ଶତ୍ରୁତାରୁ ମନ୍ତ୍ରୀଙ୍କୁ ହତ୍ୟା କରିଥିଲା ଅଭିଯୁକ୍ତ ଗୋପାଳ ଦାସ । ଏହାକୁ ନିଜେ ସ୍ୱୀକାର କରିଛି ଅଭିଯୁକ୍ତ ଯାହା ଉଲ୍ଲେଖ ରହିଛି । ଗୋପାଳଙ୍କ ବିରୋଧରେ 302,307,27(1)ଆର୍ମସ ଆକ୍ଟ ଦଫା ଲାଗିଛି । ହତ୍ୟା ଘଟଣାର ୧୧୮ ଦିନରେ କ୍ରାଇମବ୍ରାଞ୍ଚ ଏହି ଚାର୍ଜସିଟ୍ ଦାଖଲ କରିଛି । ତେବେ ଏହି ମାମଲାରେ କ୍ରାଇମବ୍ରାଞ୍ଚ କେବେ ପୂର୍ଣ୍ଣାଙ୍ଗ ଚାର୍ଜସିଟ୍ ଦାଖଲ କରିବ ସେ ନେଇ ଅସ୍ପଷ୍ଚ ରହିଛି । ଆଜି ମାମଲାର ତଦନ୍ତକାରୀ ଅଧିକାରୀ ଡିଏସପି ରମେଶ ଦୋରାଙ୍କ ସମେତ ୩ ଜଣ ପହଞ୍ଚି ଜେଏମଏଫସିଙ୍କ ନିକଟରେ ଚାର୍ଜସିଟ ଦାଖଲ କରିଛନ୍ତି ।

ଗତ ଜାନୁଆରୀ ୨୯ ତାରିଖରେ ତତ୍କାଳୀନ ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କୁ ହତ୍ୟା କରିଥିଲା ଅଭିଯୁକ୍ତ ଗୋପାଳ ଦାସ । ଘଟଣାସ୍ଥଳରୁ ପିସ୍ତଲ ସହ ପୋଲିସ ଅଭିଯୁକ୍ତକୁ ଗିରଫ କରିଥିଲା । ଗୁଜରାଟ ଗାନ୍ଧିନଗରସ୍ଥିତ ଫରେନସିକ୍ ଲ୍ୟାବରେ ଅଭିଯୁକ୍ତ ଗୋପାଳର ପଲିଗ୍ରାଫ୍ ଓ ନାର୍କୋ ଟେଷ୍ଟ କରାଯାଇଥିଲା । ଏସସିବି ମାନସିକ ଚିକିତ୍ସା ପ୍ରତିଷ୍ଠାନର ୫ ଜଣିଆ ବିଶେଷଜ୍ଞ ଟିମ ଯାଞ୍ଚ କରିବା ସହ ମାନସିକ ସ୍ଥିତିର ପରୀକ୍ଷା ମଧ୍ୟ କରିଥିଲେ।
ଝାରସୁଗୁଡ଼ା: ସ୍ୱାସ୍ଥ୍ୟମନ୍ତ୍ରୀ ନବ ଦାସ ହତ୍ୟା ମାମଲା, JMFC କୋର୍ଟରେ କ୍ରାଇମବ୍ରାଞ୍ଚର ୫୪୩ ପୃଷ୍ଠାର ଚାର୍ଜସିଟ୍ ଦାଖଲ
ଜୁଲାଇ ୩ରୁ ମାଟ୍ରିକ ସପ୍ଲିମେଣ୍ଟାରୀ, ଆରମ୍ଭ ହେଲା ଫର୍ମ ଫିଲଅପ୍

ମାଟ୍ରିକ ଫେଲ୍ ହୋଇଥିବା ଛାତ୍ରଛାତ୍ରୀଙ୍କ ପାଇଁ ଆଉ ଏକ ସୁଯୋଗ ଦେଇଛନ୍ତି ରାଜ୍ୟ ସରକାର । ଚଳିତଥର ଛାତ୍ରଛାତ୍ରୀମାନେ ସପ୍ଲିମେଣ୍ଟାରୀ ପରୀକ୍ଷା ଦେଇପାରିବେ । ଡ୍ରପ୍ ଆଉଟ୍ ଏବଂ ଫେଲ୍ ହୋଇଥିବା ପିଲାଙ୍କ ପାଇଁ ଏହି ସୁଯୋଗ ଆଣିଛନ୍ତି ସରକାର ।

ଜୁଲାଇ ୩ରୁ ୮ ତାରିଖ ଯାଏ ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା ଅନୁଷ୍ଠିତ ହେବ । ଏଥିପାଇଁ ଆଜିଠାରୁ ଆରମ୍ଭ ହୋଇଛି ଫର୍ମ ଫିଲଅପ୍ । ଜୁନ୍ ମାସ ୧ ତାରିଖ ଯାଏ ଫର୍ମ ଫିଲଅପ୍ କରିପାରିବେ ଛାତ୍ରଛାତ୍ରୀ । ଏ ନେଇ ସୂଚନା ଦେଇଛନ୍ତି ମାଧ୍ୟମିକ ଶିକ୍ଷା ପରିଷଦ ସଭାପତି । ଯେଉଁମାନେ ସପ୍ଲିମେଣ୍ଟାରୀ ପରୀକ୍ଷାରେ ଉତ୍ତୀର୍ଣ୍ଣ ହେବେ ସେମାନେ ଚଳିତ ଶିକ୍ଷାବର୍ଷରେ ଯୁକ୍ତ ଦୁଇରେ ନାମ ଲେଖାଇପାରିବେ ବୋଲି ବୋର୍ଡ ପକ୍ଷରୁ କୁହାଯାଇଛି ।

ଚଳିତବର୍ଷ ମାଟ୍ରିକ୍ ପରୀକ୍ଷାରେ ଛାତ୍ରଛାତ୍ରୀଙ୍କ ସଫଳତା ପ୍ରଶଂସନୀୟ ରହିଛି । ଖାସ୍ କରି ପୁଅଙ୍କ ତୁଳନାରେ ଝିଅଙ୍କ ରେଜଲ୍ଟ ଭଲ ଆସିଛି । ପାସ୍ ହାର ୯୬.୧୯ ପ୍ରତିଶତ ଥିବାବେଳେ ଖୁବ୍ କମ୍ ଛାତ୍ରଛାତ୍ରୀ ଫେଲ୍ ହୋଇଛନ୍ତି । ସେପଟେ ଆସନ୍ତାବର୍ଷ ଠାରୁ ମାଟ୍ରିକ ପାଇଁ ଗୋଟିଏ ମାତ୍ର ଫାଇନାଲ ପରୀକ୍ଷା ଅନୁଷ୍ଠିତ ହେବ । ଦୁଇଟି ସମେଟିଭ୍ ପରୀକ୍ଷା ପରିବର୍ତ୍ତେ ଗୋଟିଏ ବୋର୍ଡ ପରୀକ୍ଷା ହେବ ବୋଲି ସୂଚନା ଦେଇଛି ବୋର୍ଡ । ଏଥିସହ ଚଳିତବର୍ଷ ଠାରୁ ପ୍ରତିବର୍ଷ ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା ହେବ ବୋଲି ମଧ୍ୟ ବୋର୍ଡ କହିଛି ।