Author: suchanatv24x7

ବିହାରରେ ଭୋଟ୍‌ରଙ୍କ ରେକର୍ଡ: ପ୍ରଥମ ପର୍ଯ୍ୟାୟରେ ୬୪.୬୬% ମତଦାନ, ଭାଙ୍ଗିଲା ୨୦୨୦ର ସମସ୍ତ ରେକର୍ଡ।

ବିହାର ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟରେ ଭୋଟରଙ୍କ ଅଭୂତପୂର୍ବ ଉତ୍ସାହ ଦେଖିବାକୁ ମିଳିଛି। ଗୁରୁବାର ୧୮ଟି ଜିଲ୍ଲାର ୧୨୧ଟି ଆସନରେ ଅନୁଷ୍ଠିତ ମତଦାନରେ ରେକର୍ଡ ୬୪.୬୬ ପ୍ରତିଶତ ଭୋଟ୍ ଗ୍ରହଣ କରାଯାଇଛି। ୨୦୨୦ ନିର୍ବାଚନ ତୁଳନାରେ ଏହି ହାର ପ୍ରାୟ ୮.୫ ପ୍ରତିଶତ ଅଧିକ, ଯାହା ରାଜନୈତିକ ସମୀକ୍ଷକଙ୍କୁ ଚକିତ କରିଛି। ଏହି ବର୍ଦ୍ଧିତ ମତଦାନ ହାରକୁ ଉଭୟ ଏନ୍‌ଡିଏ ଏବଂ ମହାମେଣ୍ଟ ନିଜ ସପକ୍ଷରେ ବୋଲି ଦାବି କରିଛନ୍ତି।

ରାଜନୈତିକ ପରିସଂଖ୍ୟାନ ଅନୁଯାୟୀ, ଯେତେବେଳେ ବି ମତଦାନ ହାର ୫ ପ୍ରତିଶତରୁ ଅଧିକ ବୃଦ୍ଧି ପାଇଛି, ସେତେବେଳେ ବିହାରରେ ସରକାର ପରିବର୍ତ୍ତନ ହୋଇଛି। ୧୯୬୭: ୭ ପଏଣ୍ଟ ବୃଦ୍ଧି ସହ ପ୍ରଥମ ଥର ପାଇଁ ଅଣ-କଂଗ୍ରେସ ମେଣ୍ଟ ଶାସନକୁ ଆସିଥିଲା। ୧୯୮୦: ପ୍ରାୟ ୭ ପ୍ରତିଶତ ବୃଦ୍ଧି ଫଳରେ ଜନତା ପାର୍ଟିର ପତନ ଓ କଂଗ୍ରେସର ପ୍ରତ୍ୟାବର୍ତ୍ତନ ହୋଇଥିଲା। ୧୯୯୦: ୫.୮ ପ୍ରତିଶତ ବୃଦ୍ଧି ଲାଲୁ ପ୍ରସାଦ ଯାଦବଙ୍କ ପାଇଁ କ୍ଷମତାର ବାଟ ଖୋଲିଥିଲା। ତେବେ ୨୦୦୫ରେ ଭୋଟ୍ ହାର କମିଥିଲେ ମଧ୍ୟ ନୀତୀଶ କୁମାରଙ୍କ ନେତୃତ୍ୱରେ ଜେଡିୟୁ କ୍ଷମତାକୁ ଆସିଥିଲା। ଏହି ଧାରାକୁ ଦେଖିଲେ ଚଳିତ ବର୍ଷର ୮.୫ ପ୍ରତିଶତ ବୃଦ୍ଧି କୌଣସି ବଡ଼ ରାଜନୈତିକ ଓଲଟଫେରର ସଙ୍କେତ ହୋଇପାରେ ବୋଲି ଚର୍ଚ୍ଚା ହେଉଛି। ପ୍ରଥମ ପର୍ଯ୍ୟାୟରେ ପ୍ରାୟ ୩.୭୫ କୋଟି ଭୋଟର ନିଜ ମତାଧିକାର ସାବ୍ୟସ୍ତ କରିଥିବା ବେଳେ, ଆସନ୍ତା ନଭେମ୍ବର ୧୧ରେ ଦ୍ୱିତୀୟ ପର୍ଯ୍ୟାୟ ମତଦାନ ଅନୁଷ୍ଠିତ ହେବ। ଏହି ମହାଲଢ଼େଇର ଚୂଡ଼ାନ୍ତ ଫଳାଫଳ ନଭେମ୍ବର ୧୪ ତାରିଖରେ ପ୍ରକାଶ ପାଇବ, ଯେଉଁଥିରୁ ଜଣାପଡ଼ିବ ଯେ ବିହାର ଜନତା ପୁଣି ଥର ଇତିହାସର ପୁନରାବୃତ୍ତି କରିଛନ୍ତି ନା ଶାସକ ଦଳ ଉପରେ ଭରସା ରଖିଛନ୍ତି।
“ଡବଲ ଇଞ୍ଜିନ ସରକାର ବିଫଳ”: କେନ୍ଦ୍ର ଉପରେ ବର୍ଷିଲେ ମେୟର ସୁବାସ ସିଂ; କଟକରୁ ସମ୍ବଲପୁର ଯାଏଁ ହାହାକାର।

ରାଜ୍ୟରେ ଗ୍ୟାସ୍ ସଙ୍କଟ ଏବେ ଉତ୍କଟ ରୂପ ଧାରଣ କରିଛି। ଏହାର ପ୍ରତିବାଦରେ କଟକ ବାରବାଟୀ ବିଜେଡି ମହିଳା ଶାଖା ପକ୍ଷରୁ ଏକ ଅଭିନବ ବିକ୍ଷୋଭ ପ୍ରଦର୍ଶନ କରାଯାଇଛି। କଟକ ବକ୍ସି ବଜାର ଛକ ନିକଟରେ ମହିଳା କର୍ମୀମାନେ ଏକତ୍ରିତ ହୋଇ ଗ୍ୟାସ୍ ଚୂଲି ବଦଳରେ ପାରମ୍ପରିକ କାଠ ଚୂଲିରେ ଚା’ ତିଆରି କରି ଲୋକଙ୍କୁ ବିତରଣ କରିଛନ୍ତି। ଏହି ପ୍ରତିବାଦରେ ସାମିଲ ହୋଇ କଟକ ମେୟର ସୁବାସ ସିଂ କେନ୍ଦ୍ର ସରକାରଙ୍କ ବୈଦେଶିକ ନୀତିକୁ ତୀବ୍ର ସମାଲୋଚନା କରିଛନ୍ତି। ସେ କହିଛନ୍ତି ଯେ, ଡବଲ ଇଞ୍ଜିନ ସରକାର ଗ୍ୟାସ୍ ସଙ୍କଟ ରୋକିବାରେ ସମ୍ପୂର୍ଣ୍ଣ ବିଫଳ ହୋଇଛି। ପଶ୍ଚିମ ଏସିଆରେ ଚାଲିଥିବା ଯୁଦ୍ଧ ଯୋଗୁଁ ଯୋଗାଣ ବାଧାପ୍ରାପ୍ତ ହେଉଥିବା ବେଳେ ସାଧାରଣ ଲୋକେ ଏବେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।

ଗ୍ୟାସ୍ ଅଭାବରୁ କେବଳ ରୋଷେଇ ଘର ନୁହେଁ, ବରଂ ଛୋଟ ଛୋଟ ଦୋକାନ ଏବଂ ରେଷ୍ଟୁରାଣ୍ଟ ମଧ୍ୟ ବନ୍ଦ ହେବାକୁ ବସିଲାଣି। ବୁକିଂ ହେଉଥିଲେ ମଧ୍ୟ ଗ୍ୟାସ୍ ସିଲିଣ୍ଡର ମିଳୁନାହିଁ। ସମ୍ବଲପୁରରେ ମହିଳା ସ୍ୱୟଂ ସହାୟିକା ଗୋଷ୍ଠୀଙ୍କ ଦ୍ୱାରା ପରିଚାଳିତ କାଫେଗୁଡ଼ିକ ମଧ୍ୟ ବନ୍ଦ ହେବା ପରିସ୍ଥିତିକୁ ଆସିଗଲାଣି। ଗ୍ୟାସ୍ ପାଇଁ ଲୋକେ ଡିପୋ ଆଗରେ ଲମ୍ବା ଲାଇନ୍ ଲଗାଉଥିବା ବେଳେ ଆଗକୁ ଏହି ଆନ୍ଦୋଳନ ଆହୁରି ଜୋରଦାର ହେବ ବୋଲି ବିଜେଡି ମହିଳା କର୍ପୋରେଟରମାନେ ଚେତାବନୀ ଦେଇଛନ୍ତି।
ମୋଜତବା ଖେମିନିଙ୍କୁ ନେଇ ଟ୍ରମ୍ପଙ୍କ ବଡ଼ ବୟାନ; ଜୀବିତ ଥାଇପାରନ୍ତି, କିନ୍ତୁ ଅବସ୍ଥା ଅତ୍ୟନ୍ତ ସଙ୍କଟାପନ୍ନ।

ଇରାନର ନୂଆ ସର୍ବୋଚ୍ଚ ନେତା ଆୟାତୋଲ୍ଲା ମୋଜତବା ଖେମିନିଙ୍କୁ ନେଇ ବିଶ୍ୱ ରାଜନୀତିରେ ଚର୍ଚ୍ଚା ଜୋର ଧରିଛି। ମୋଜତବା ଜୀବିତ ନା ମୃତ, ସେ ନେଇ ଚାଲିଥିବା କଳ୍ପନା ଜଳ୍ପନା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ବଡ଼ ବୟାନ ଦେଇଛନ୍ତି। ଫକ୍ସ ନ୍ୟୁଜ୍ ରେଡିଓକୁ ଦେଇଥିବା ଏକ ସାକ୍ଷାତକାରରେ ଟ୍ରମ୍ପ କହିଛନ୍ତି ଯେ, ମୋଜତବା ଜୀବିତ ଥାଇପାରନ୍ତି, କିନ୍ତୁ ସେ ଗୁରୁତର ଭାବେ ଆହତ ହୋଇଛନ୍ତି। ଗତ ଫେବ୍ରୁଆରି ୨୮ ତାରିଖରେ ଆମେରିକା ପକ୍ଷରୁ ହୋଇଥିବା ଆକ୍ରମଣରେ ଆୟାତୋଲ୍ଲା ଅଲି ଖେମିନିଙ୍କ ମୃତ୍ୟୁ ହୋଇଥିବା ବେଳେ ଏହି ସମୟରେ ମୋଜତବା ମଧ୍ୟ ଗୁରୁତର ହୋଇଥିବା କୁହାଯାଉଛି। ବ୍ରିଟିଶ ଖବରକାଗଜ ‘ଦ ସନ୍’ର ରିପୋର୍ଟ ଅନୁଯାୟୀ, ୫୬ ବର୍ଷୀୟ ଏହି ଧର୍ମଗୁରୁ ବର୍ତ୍ତମାନ କୋମାରେ ଅଛନ୍ତି।

ଆକ୍ରମଣରେ ତାଙ୍କର ଗୋଟିଏ କିମ୍ବା ଦୁଇଟି ଯାକ ଗୋଡ଼ କାଟିବାକୁ ପଡ଼ିଥିବା ବେଳେ ପାକସ୍ଥଳୀ ଓ ଯକୃତ ମଧ୍ୟ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି। ସୂଚନା ଅନୁଯାୟୀ, ତେହେରାନର ସିନା ବିଶ୍ବବିଦ୍ୟାଳୟ ହସ୍ପିଟାଲର ଏକ ନିର୍ଦ୍ଦିଷ୍ଟ ଅଂଶକୁ ସିଲ୍ କରାଯାଇ ତାଙ୍କର ଚିକିତ୍ସା କରାଯାଉଛି। ସେଠାକୁ ଇରାନ ରାଷ୍ଟ୍ରପତିଙ୍କ ବ୍ୟତୀତ ଅନ୍ୟ କାହାରିକୁ ଯିବାକୁ ଅନୁମତି ନାହିଁ। ଅନ୍ୟପଟେ, ସାଇପ୍ରସରେ ଅବସ୍ଥାପିତ ଇରାନ ରାଷ୍ଟ୍ରଦୂତ ଆଲିରେଜା ସାଲାରିଆନ୍ ମଧ୍ୟ ସ୍ୱୀକାର କରିଛନ୍ତି ଯେ, ମୋଜତବା ଆକ୍ରମଣରେ ଆହତ ହୋଇଛନ୍ତି ଏବଂ ତାଙ୍କ ହାତ ଓ ଗୋଡ଼ରେ ଶକ୍ତ ଆଘାତ ଲାଗିଛି। ମାର୍ଚ୍ଚ ୮ ତାରିଖରେ ମୋଜତବାଙ୍କୁ ସର୍ବୋଚ୍ଚ ନେତା ଘୋଷଣା କରାଯାଇଥିଲେ ହେଁ, ଆକ୍ରମଣ ପରଠାରୁ ସେ ସର୍ବସାଧାରଣରେ ଦେଖା ଦେଇନାହାନ୍ତି। ଏହି ଘଟଣା ଏବେ ଇରାନର ଶାସନ ବ୍ୟବସ୍ଥା ଓ ନେତୃତ୍ୱ ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।
ଇରାକରେ ଭୟଙ୍କର ଡ୍ରୋନ୍ ଆକ୍ରମଣ: ଫ୍ରାନ୍ସ ସୈନିକ ଅର୍ନାଡ ଫ୍ରିୟନ ସହିଦ, ଗଭୀର ଶୋକ ପ୍ରକାଶ କଲେ ମାକ୍ରଁନ।

ମଧ୍ୟପ୍ରାଚ୍ୟରେ ଜାରି ରହିଥିବା ସଂଘର୍ଷ ମଧ୍ୟରେ ଏକ ଅତ୍ୟନ୍ତ ଦୁଃଖଦ ଖବର ସାମ୍ନାକୁ ଆସିଛି। ଉତ୍ତର ଇରାକର ଇରବିଲ ନିକଟରେ ହୋଇଥିବା ଏକ ଭୟଙ୍କର ଡ୍ରୋନ୍ ଆକ୍ରମଣରେ ଫ୍ରାନ୍ସ ସୈନିକ ଅର୍ନାଡ ଫ୍ରିୟନଙ୍କ ମୃତ୍ୟୁ ଘଟିଛି। ଏହି ଆକ୍ରମଣରେ ଅନ୍ୟ କେତେକ ସୈନିକ ଆହତ ହୋଇଥିବା ବେଳେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରଁନ ଏହାକୁ ନେଇ ଗଭୀର କ୍ଷୋଭ ଓ ଅସନ୍ତୋଷ ପ୍ରକାଶ କରିଛନ୍ତି। ଇରାକ ସୈନ୍ୟଙ୍କ ସହ ମିଶି ଫ୍ରାନ୍ସ ସେନା ଆତଙ୍କବାଦୀ ବିରୋଧୀ ପ୍ରଶିକ୍ଷଣ ନେଉଥିବା ସମୟରେ ଦୁଇଟି ଡ୍ରୋନ୍ ସେମାନଙ୍କ ଉପରେ ଅତର୍କିତ ଆକ୍ରମଣ କରିଥିଲା।

ଉତ୍ତର ଇରାକର କୁର୍ଦ୍ଦିସ ଅଞ୍ଚଳ ସ୍ଥିତ ଇରବିଲକୁ ଟାର୍ଗେଟ କରି ଏହି ହମ୍ଲା କରାଯାଇଥିଲା। ଏହି ଘଟଣାରେ ପ୍ରାୟ ୬ ଜଣ ସୈନିକ ଆହତ ହୋଇଥିବା ପୂର୍ବରୁ ସୂଚନା ମିଳିଥିଲା। ଶୁକ୍ରବାର ସୋସିଆଲ ମିଡିଆରେ ଏକ ପୋଷ୍ଟ କରି ରାଷ୍ଟ୍ରପତି ମାକ୍ରଁନ ଏହି ଆକ୍ରମଣକୁ ତୀବ୍ର ନିନ୍ଦା କରିଛନ୍ତି। ସେ ଉଲ୍ଲେଖ କରିଛନ୍ତି ଯେ, ସେମାନଙ୍କ ସୈନିକମାନେ ଶାନ୍ତି ଓ ସୁରକ୍ଷା ପାଇଁ କାର୍ଯ୍ୟ କରୁଥିଲେ। ତେବେ ଏହି ଆକ୍ରମଣ ପଛରେ କେଉଁ ସଙ୍ଗଠନର ହାତ ରହିଛି, ସେ ନେଇ ମାକ୍ରଁନ ସ୍ପଷ୍ଟ ଭାବେ କିଛି କହିନାହାନ୍ତି। ଘଟଣା ପରେ ସେଠାରେ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି।
ଶ୍ରୀକ୍ଷେତ୍ର ଏବେ ସଜେଇ ହେବ ନୂଆ ରୂପରେ !

ଶ୍ରୀକ୍ଷେତ୍ର ପୁରୀକୁ ମହାନଗର ନିଗମରେ ପରିଣତ କରିବା ପାଇଁ ପ୍ରକ୍ରିୟା ଶେଷ ପର୍ଯ୍ୟାୟରେ ପହଞ୍ଚିଛି। ସହରର ସୀମା ବଢ଼ିବା ସହ ଏବେ ୯ଟି ପଞ୍ଚାୟତର ୩୪ଟି ରାଜସ୍ୱ ଗ୍ରାମକୁ ନୂତନ ଭାବେ ସାମିଲ କରାଯାଇଛି। ଏଥିପାଇଁ ଜିଲ୍ଲା ପ୍ରଶାସନ ପକ୍ଷରୁ ୱାର୍ଡ ବିଭାଜନ ଓ ସୀମା ନିର୍ଦ୍ଧାରଣ ରିପୋର୍ଟ ସରକାରଙ୍କ ନିକଟକୁ ପଠାଯାଇଛି। ପୁରୀ ପୌରସଂସ୍ଥାରେ ଏବେ ୩୨ଟି ୱାର୍ଡ ରହିଛି। ଜନସଂଖ୍ୟା ବୃଦ୍ଧି ହେତୁ ପୁରୁଣା ୩୨ଟି ୱାର୍ଡ ମଧ୍ୟରୁ ପ୍ରାୟ ୨୦ଟି ୱାର୍ଡକୁ ବିଭାଜନ କରାଯିବ। ସଦର ବ୍ଲକର ୯ଟି ପଞ୍ଚାୟତରୁ ଆସିଥିବା ଅଞ୍ଚଳକୁ ନେଇ ପ୍ରାୟ ୯୨ଟି ନୂତନ ୱାର୍ଡର ସୀମା ଚିହ୍ନଟ ପ୍ରକ୍ରିୟା ଚାଲିଛି।

୨୦୧୧ ଜନଗଣନା ଅନୁସାରେ ପୁରୀ ସହରର ଜନସଂଖ୍ୟା ପ୍ରାୟ ୨ ଲକ୍ଷ ଥିବାବେଳେ, ୨୦୨୬ ବେଳକୁ ଏହା ୩ ଗୁଣରୁ ଅଧିକ ବୃଦ୍ଧି ପାଇଛି। ଏହି ବର୍ଦ୍ଧିତ ଜନସଂଖ୍ୟାକୁ ଉନ୍ନତ ନାଗରିକ ସେବା ଯୋଗାଇବା ପାଇଁ ମହାନଗର ନିଗମ ଗଠନ ଏବେ ଜରୁରୀ ହୋଇପଡ଼ିଛି। ସୀମା ନିର୍ଦ୍ଧାରଣ ସମୟରେ କିଛି ଭୌଗୋଳିକ ଅସୁବିଧା ସାମ୍ନାକୁ ଆସିଛି। ମଙ୍ଗଳା ନଦୀର ଆରପଟେ ଥିବା ସମଙ୍ଗ ପଞ୍ଚାୟତର କିଛି ଗାଁ ଏବଂ ଜାତୀୟ ରାଜପଥର ଦୁଇ ପାର୍ଶ୍ୱରେ ଥିବା ଗଦାଧରପାଟଣା, ନରସିଂହବଲ୍ଲଭ ଭଳି ଅଞ୍ଚଳକୁ ସଜାଡ଼ିବା ପାଇଁ ପ୍ରଶାସନ ପୁଣି ଥରେ କସରତ କରିପାରେ। ଓଡ଼ିଶା ମହାନଗର ନିଗମ ଆଇନ ଅନୁଯାୟୀ, ୱାର୍ଡ ସଂରକ୍ଷଣ ତାଲିକା ଚୂଡ଼ାନ୍ତ ହେବା ପରେ ରାଜ୍ୟ ନିର୍ବାଚନ କମିଶନ ପୁରୀ ମହାନଗର ନିଗମ ପାଇଁ ନିର୍ବାଚନ ତାରିଖ ଘୋଷଣା କରିବେ। ସାମିଲ ହେବାକୁ ଥିବା ଅଞ୍ଚଳବାସୀ ସହରାଞ୍ଚଳ ସୁବିଧା ପାଇବାକୁ ଆଶା ରଖୁଥିବା ବେଳେ, ମୌଳିକ ଭିତ୍ତିଭୂମିର ବିକାଶ କେବେ ହେବ ତାହା ଏବେ ବଡ଼ ପ୍ରଶ୍ନ?
ସୁପର-ହିଟ୍ ସରକାରୀ ବାହାଘର! କଟକରେ ଲାଗିଲା ପ୍ରେମର ‘ମେଳା’, ଉପ-ମୁଖ୍ୟମନ୍ତ୍ରୀ କଲେ କନ୍ୟାଦାନ!

ସମ୍ପର୍କୀୟ କଲେ ଆୟୋଜନ, ସରକାର କରାଇଲେ ବିବାହ। କଟକର ଜବାହରଲାଲ ନେହେରୁ ଇନଡୋର ଷ୍ଟାଡିୟମ ଆଜି ଏକ ସାକ୍ଷୀ ରହିଲା ଏକ ଐତିହାସିକ ମୁହୂର୍ତ୍ତର। ରାଜ୍ୟ ସରକାରଙ୍କ ‘ମୁଖ୍ୟମନ୍ତ୍ରୀ କନ୍ୟା ବିବାହ ଯୋଜନା’ ଅଧୀନରେ ଆଜି ୫୫ ଯୋଡ଼ା (୧୧୦ ବର-କନ୍ୟା) ବୈଦିକ ରୀତିନୀତି ଅନୁସାରେ ବିବାହ ବନ୍ଧନରେ ଆବଦ୍ଧ ହୋଇଛନ୍ତି।

ଏହି ସାମୁହିକ ବିବାହ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ରାଜ୍ୟ ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ନିଜେ କନ୍ୟାଦାନ କରିଥିଲେ। ନବ ଦମ୍ପତିଙ୍କୁ ଆଶୀର୍ବାଦ ଦେବା ସହ ସେ କହିଛନ୍ତି ଯେ, ଆର୍ଥିକ ଅଭାବ ଯୋଗୁଁ ଯେପରି କୌଣସି ଝିଅର ବିବାହ ଅଟକି ନଯାଏ, ତାହା ଏହି ଯୋଜନାର ମୁଖ୍ୟ ଲକ୍ଷ୍ୟ।

ଗଞ୍ଜାମ ପରେ କଟକରେ ଏହି ଯୋଜନାର ଦ୍ୱିତୀୟ ପର୍ଯ୍ୟାୟ ସଫଳତାର ସହ ସମ୍ପାଦିତ ହୋଇଛି। ସମାନ୍ତରାଳ ଭାବେ ସୁନ୍ଦରଗଡ଼ରେ ମଧ୍ୟ ସାମୁହିକ ବିବାହ ଅନୁଷ୍ଠିତ ହୋଇଛି। ସମାଜରେ ଯୌତୁକ ପ୍ରଥାକୁ ପ୍ରତିହତ କରିବା ଏବଂ ଏକ ସୁସ୍ଥ ସମାଜ ଗଠନ ପାଇଁ ଏହି ଯୋଜନା ଏକ ବରଦାନ ସଦୃଶ। ଖବର ଅନୁଯାୟୀ, ଏହି ଯୋଜନା ପାଇଁ ବାର୍ଷିକ ପ୍ରାୟ ୧୨ କୋଟି ଟଙ୍କା ଏବଂ ୫ ବର୍ଷରେ ମୋଟ ୬୦ କୋଟି ଟଙ୍କାର ବ୍ୟୟବରାଦ କରାଯାଇଛି। ବିନା କୌଣସି ଆର୍ଥିକ ବୋଝରେ ନୂଆ ସଂସାର ଆରମ୍ଭ କରିଥିବାରୁ ନବ ଦମ୍ପତିମାନେ ସରକାରଙ୍କୁ ଧନ୍ୟବାଦ ଜଣାଇଛନ୍ତି। ଜନମ ଜନମର ସାଥୀ ହେବାକୁ ଶପଥ ନେବା ସହ ଏହି ସ୍ମରଣୀୟ ଦିନ ପାଇଁ ସେମାନେ ବେଶ୍ ଉତ୍ସାହିତ ଥିବା ଦେଖିବାକୁ ମିଳିଥିଲା।
ଓଡ଼ିଶାରେ ପାଣିପାଗର ‘ଡବଲ୍ ଆଟାକ୍’: ସିଝୁଛି ପଶ୍ଚିମ, ଭିଜିବ ପୂର୍ବ!

ରାଜ୍ୟରେ ଏବେ ପ୍ରକୃତିର ଅଜବ ଖେଳ। ଗୋଟିଏ ପଟେ ସୂର୍ଯ୍ୟଙ୍କ ପ୍ରକୋପରେ ଜଳୁଛି ଆଭ୍ୟନ୍ତରୀଣ ଓଡ଼ିଶା, ତ ଅନ୍ୟପଟେ କାଳବୈଶାଖୀର ଆଶଙ୍କା। ଆଗାମୀ ୨୪ ଘଣ୍ଟା ମଧ୍ୟରେ ତାପମାତ୍ରା ଆହୁରି ୨ ରୁ ୩ ଡିଗ୍ରୀ ବୃଦ୍ଧି ପାଇବା ନେଇ ଆଞ୍ଚଳିକ ପାଣିପାଗ ବିଭାଗ ସତର୍କ ସୂଚନା ଜାରି କରିଛି। ରାଜ୍ୟର ପାରଦ ଏବେ ଉପରମୁହାଁ। ବିଶେଷ କରି ପଶ୍ଚିମ ଓ ଆଭ୍ୟନ୍ତରୀଣ ଓଡ଼ିଶାରେ ତାତି ଅସହ୍ୟ ହେଲାଣି। ଗତ ୨୪ ଘଣ୍ଟା ମଧ୍ୟରେ ୩୯ ଡିଗ୍ରୀ ସହ ଝାରସୁଗୁଡ଼ା ରାଜ୍ୟର ସବୁଠୁ ଉତ୍ତପ୍ତ ସହର ପାଲଟିଛି। ରାଜ୍ୟର ପ୍ରାୟ ୧୩ଟି ସହରରେ ତାପମାତ୍ରା ୩୭ ଡିଗ୍ରୀ ଉପରେ ରହିଛି, ଯାହା ସାଧାରଣ ଜୀବନଯାତ୍ରାକୁ ପ୍ରଭାବିତ କରୁଛି।

ତାତି ମଧ୍ୟରେ ବର୍ଷା ଓ ଘଡ଼ଘଡ଼ିର ମଧ୍ୟ ପୂର୍ବାନୁମାନ କରାଯାଇଛି। ଦକ୍ଷିଣ ଝାଡ଼ଖଣ୍ଡ ଓ ଉତ୍ତର ଛତିଶଗଡ଼ ଉପରେ ସକ୍ରିୟ ଥିବା ଏକ ନିମ୍ନ ଚାପରେଖା ପ୍ରଭାବରେ କିଛି ସ୍ଥାନରେ ପାଗ ପରିବର୍ତ୍ତନ ହେବ। ସୁନ୍ଦରଗଡ଼, ମୟୂରଭଞ୍ଜ, କେନ୍ଦୁଝର, ବାଲେଶ୍ୱର ଏବଂ ଭଦ୍ରକ, ଏହି ୫ଟି ଜିଲ୍ଲାକୁ ପାଣିପାଗ ବିଭାଗ ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି।
୫୮ରେ ବି ଫିଟ୍‌ନେସ୍‌ର ‘ରାଣୀ’! ମାଧୁରୀଙ୍କ କର୍ଲି ହେୟାର ଓ କାତିଲ୍ ହସରେ ପୁଣି ଘାଇଲା ହେଲା ବଲିଉଡ!

ବଲିଉଡର ସବୁଠାରୁ ଚର୍ଚ୍ଚିତ ଏବଂ ପ୍ରିୟ ଅଭିନେତ୍ରୀ ମାଧୁରୀ ଦୀକ୍ଷିତ। ବୟସ ବଢୁଛି ସତ, କିନ୍ତୁ ମାଧୁରୀଙ୍କ କ୍ଷେତ୍ରରେ ଏହି ବୟସ କେବଳ ଏକ ସଂଖ୍ୟା ମାତ୍ର | ୫୮ ବର୍ଷ ବୟସରେ ମଧ୍ୟ ତାଙ୍କ ସୌନ୍ଦର୍ଯ୍ୟ ଏବଂ ଫିଟନେସ୍‌ର ଜଲୱା ଟିକିଏ ବି କମିନାହିଁ | ନିକଟରେ ସେ ନିଜର କିଛି ଫଟୋ ସୋସିଆଲ ମିଡିଆରେ ସେୟାର କରିଛନ୍ତି, ଯାହା ପ୍ରଶଂସକଙ୍କ ନିଦ ହଜାଇ ଦେଇଛି | ମାଧୁରୀଙ୍କ ଜନ୍ମ ୧୯୬୭ରେ, ସେହି ଅନୁସାରେ ଦେଖିବାକୁ ଗଲେ ୨୦୨୬ ମସିହା ସୁଦ୍ଧା ତାଙ୍କୁ ୫୮ ବର୍ଷ |

ସୋସିଆଲ ମିଡିଆରେ ଭାଇରାଲ ହେଉଥିବା ଏହି ଫଟୋଗୁଡ଼ିକରେ ମାଧୁରୀ ଏକ ଷ୍ଟାଇଲିସ୍ କଳା ବଡିକନ୍ ଡ୍ରେସ୍ ପିନ୍ଧିଥିବାର ନଜର ଆସିଛନ୍ତି | ଖୁବ୍ ସାଧାରଣ ବା ମିନିମାଲ୍ ମେକଅପ୍‌ରେ ବି ସେ ବହୁତ ଗ୍ଲାମରସ୍ ଦେଖାଯାଉଛନ୍ତି। କର୍ଲି ହେୟାର ଷ୍ଟାଇଲ୍ ଏବଂ ଆଧୁନିକ ଆସେସୋରିଜ୍ ତାଙ୍କ ଲୁକ୍‌କୁ ଏକ ପରଫେକ୍ଟ ଟଚ୍ ଦେଇଛି। ପ୍ରତିଟି ପୋଜ୍‌ରେ ମାଧୁରୀଙ୍କ ସେହି ଚିରାଚରିତ ଆତ୍ମବିଶ୍ୱାସ ଏବଂ ହସ ଦେଖିବାକୁ ମିଳିଛି।

ଫଟୋଗୁଡ଼ିକ ସେୟାର ହେବା ମାତ୍ରେ ଲାଇକ୍ ଏବଂ କମେଣ୍ଟର ବର୍ଷା ହେବାରେ ଲାଗିଛି। ପ୍ରଶଂସକମାନେ କହୁଛନ୍ତି, “ମାଧୁରୀ ଆଜି ବି ବଲିଉଡର ଅସଲ କୁଇନ୍‌”। ତାଙ୍କର ଏହି ଚମତ୍କାର ଫିଟନେସ୍ ଦେଖିଲେ ଲାଗୁଛି ଯେ ସେ ଆଜିର ଯୁବ ଅଭିନେତ୍ରୀଙ୍କୁ ମଧ୍ୟ କଡ଼ା ଟକ୍କର ଦେଇପାରିବେ।

ଏହା ମଧ୍ୟ ଚର୍ଚ୍ଚା ହେଉଛି ଯେ ମାଧୁରୀ ଖୁବଶୀଘ୍ର କିଛି ବଡ଼ ପ୍ରୋଜେକ୍ଟରେ ନଜର ଆସିବେ। ନିକଟରେ ତୃପ୍ତି ଡିମରିଙ୍କ ସହ ତାଙ୍କର କୋଲାବୋରେସନ୍‌କୁ ନେଇ ଗସିପ୍ ଗଳିରେ ଚର୍ଚ୍ଚା ଜୋର ଧରିଛି। ଯଦି ଏହି ଦୁଇ ପ୍ରତିଭା ଏକାଠି ପରଦାକୁ ଆସନ୍ତି, ତେବେ ଏହା ଦର୍ଶକଙ୍କ ପାଇଁ ଏକ ବଡ଼ ସରପ୍ରାଇଜ୍ ହୋଇପାରେ ବୋଲି ଜଣାପଡୁଛି |
ପ୍ଲେଟ୍ ଅଛି କିନ୍ତୁ ଖାଦ୍ୟ ନାହିଁ; ହୋଟେଲରେ ପଡ଼ିଲା ତାଲା

ବିଶ୍ୱ ରାଜନୀତିର ପ୍ରଭାବ ଏବେ ରାଜଧାନୀ ଦିଲ୍ଲୀର ରୋଷେଇଶାଳା ଉପରେ ଦେଖିବାକୁ ମିଳିଛି। ଇରାନ ଏବଂ ଆମେରିକା ମଧ୍ୟରେ ଲାଗିରହିଥିବା ଅଶାନ୍ତ ପରିସ୍ଥିତି ଯୋଗୁଁ ବାଣିଜ୍ୟିକ ଏଲପିଜି (LPG) ଯୋଗାଣ ବାଧାପ୍ରାପ୍ତ ହୋଇଛି। ଏହାର ସିଧାସଳଖ ପ୍ରଭାବ ଦିଲ୍ଲୀର ହୋଟେଲ ଓ ରେଷ୍ଟୁରାଣ୍ଟ ଶିଳ୍ପ ଉପରେ ପଡ଼ିଥିବା ବେଳେ ଅନେକ ପ୍ରତିଷ୍ଠିତ ହୋଟେଲ ଏବେ ତାଲା ପଡ଼ିବା ଅବସ୍ଥାକୁ ଚାଲିଆସିଛି। ଗ୍ୟାସ୍ ଅଭାବରୁ ଦିଲ୍ଲୀର ପ୍ରାୟ ୧୨ଟି ପ୍ରମୁଖ ରେଷ୍ଟୁରାଣ୍ଟ ଓ ହୋଟେଲ ଅସ୍ଥାୟୀ ଭାବେ ବନ୍ଦ ହୋଇଯାଇଛି। ଇନ୍ଦ୍ରପ୍ରସ୍ଥ ଗ୍ୟାସ ଲିମିଟେଡ୍ (IGL) ବାଣିଜ୍ୟିକ ଗ୍ରାହକଙ୍କ ପାଇଁ ଯୋଗାଣରେ ୨୦% ହ୍ରାସ କରିବାକୁ ପରାମର୍ଶ ଦେଇଛି, ଯାହା ସମସ୍ୟାକୁ ଦ୍ୱିଗୁଣିତ କରିଛି। ଗ୍ୟାସ୍ ମିଳୁ ନ ଥିବାର ସୁଯୋଗ ନେଇ କିଛି ଅସାଧୁ ବ୍ୟବସାୟୀ ଗୋଟିଏ ସିଲିଣ୍ଡରକୁ ୫,୦୦୦ ଟଙ୍କାରୁ ଅଧିକ ଦାମରେ ବିକ୍ରି କରୁଥିବା ଅଭିଯୋଗ ସାମନାକୁ ଆସିଛି |

ଇଣ୍ଡିଗୋ ହସପିଟାଲିଟିର ପ୍ରତିଷ୍ଠାତା ଅନୁରାଗ କଟିୟାରଙ୍କ କହିବା ଅନୁସାରେ, ଯଦି ଏହି ସମସ୍ୟା ଖୁବଶୀଘ୍ର ସମାଧାନ ନହୁଏ, ତେବେ ରେଷ୍ଟୁରାଣ୍ଟ ମାଲିକମାନେ ଗ୍ୟାସ୍ ବଦଳରେ ଇଣ୍ଡକସନ୍ କିମ୍ବା ଇଲେକ୍ଟ୍ରିକ୍ ରୋଷେଇ ଭଳି ବିକଳ୍ପ ବ୍ୟବସ୍ଥା ଆପଣାଇବାକୁ ବାଧ୍ୟ ହେବେ। ଅନ୍ୟପଟେ ଦରିଆଗଞ୍ଜ ହସପିଟାଲିଟିର ସହ-ପ୍ରତିଷ୍ଠାତା ଅମିତ ବାଗା ଏହି ସଙ୍କଟ ପାଇଁ ଉଦବେଗ ପ୍ରକାଶ କରିଛନ୍ତି। ଏହି ସଙ୍କଟ ଏତେ ଭୟଙ୍କର ରୂପ ନେଇଛି ଯେ ଦିଲ୍ଲୀ ହାଇକୋର୍ଟର ଓକିଲ କ୍ୟାଣ୍ଟିନରେ ମଧ୍ୟ ରୋଷେଇ ବନ୍ଦ ହୋଇଯାଇଥିଲା। ଗ୍ୟାସ୍ ଶେଷ ହେବା କାରଣରୁ ମୁଖ୍ୟ ପାଠ୍ୟକ୍ରମ ସେବା ବନ୍ଦ ରହିବା ପରେ, ନୂତନ ଷ୍ଟକ୍ ଆସିବା ପରେ ପୁଣି ସେବା ଆରମ୍ଭ ହୋଇଛି।
ହାର୍ଦ୍ଦିକଙ୍କୁ ମହଙ୍ଗା ପଡ଼ିଲା ମସ୍ତି! ସେଲିବ୍ରେସନ୍ ମଝିରେ ଫସିଲେ ପାଣ୍ଡ୍ୟା

ଟି-୨୦ ବିଶ୍ୱକପରେ ଟିମ୍ ଇଣ୍ଡିଆର ଐତିହାସିକ ବିଜୟ ପରେ ସାରା ଦେଶରେ ଏବେବି ଉତ୍ସବର ମାହୋଲ ଜାରି ରହିଛି। ବିଶ୍ୱବିଜୟୀ ବୀରମାନେ ସ୍ୱଦେଶ ଫେରିବା ପରେ ସେମାନଙ୍କୁ ଭବ୍ୟ ସ୍ୱାଗତ କରାଯାଉଛି। କିନ୍ତୁ ଏହି ଖୁସି ମଧ୍ୟରେ ଦଳର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏବେ ଏକ ଆଇନଗତ ସମସ୍ୟାରେ ଛନ୍ଦି ହୋଇଯାଇଛନ୍ତି |

ବ୍ୟକ୍ତିଗତ ଜୀବନକୁ ନେଇ ସବୁବେଳେ ଚର୍ଚ୍ଚାରେ ରହୁଥିବା ହାର୍ଦ୍ଦିକ, ବିଶ୍ୱକପ୍ ବିଜୟ ପରେ ନିଜର ଜଣେ ବାନ୍ଧବୀଙ୍କୁ ନେଇ ବେଶ୍ ଭାବପ୍ରବଣ ହୋଇଥିବା ଦେଖିବାକୁ ମିଳିଥିଲା। ସେ ତାଙ୍କୁ ନିଜ ଜୀବନର ‘ଲକି ଚାର୍ମ’ ବୋଲି ସମ୍ବୋଧନ କରିବା ସହ ତାଙ୍କ ଆସିବା ପରେ କ୍ରିକେଟ୍ କ୍ୟାରିୟରରେ ସଫଳତା ମିଳୁଥିବା କହିଥିଲେ। ସୂଚନାଯୋଗ୍ୟ ଯେ, ୨୦୨୪ ମସିହାରେ ପତ୍ନୀ ନତାଶା ଷ୍ଟେନକୋଭିକଙ୍କ ସହ ବିବାହ ବିଚ୍ଛେଦ ପରେ ହାର୍ଦ୍ଦିକଙ୍କ ବ୍ୟକ୍ତିଗତ ଜୀବନକୁ ନେଇ ଅନେକ କଳ୍ପନାଜଳ୍ପନା ପ୍ରକାଶ ପାଇଥିଲା।

ପୁଣେର ଜଣେ ସ୍ଥାନୀୟ ଓକିଲ ୱାଜିଦ ଖାନ, ହାର୍ଦ୍ଦିକ ପାଣ୍ଡ୍ୟାଙ୍କ ବିରୋଧରେ ଜାତୀୟ ପତାକାକୁ ଅପମାନିତ କରିଥିବା ଅଭିଯୋଗ ଆଣିଛନ୍ତି। ଶିବାଜୀନଗର ପୁଲିସ ଷ୍ଟେସନରେ ଦାଖଲ ହୋଇଥିବା ଏହି ଅଭିଯୋଗ ଅନୁଯାୟୀ, ବିଜୟ ଉତ୍ସବ ସମୟରେ ହାର୍ଦ୍ଦିକ ଜାତୀୟ ପତାକାକୁ ନିଜ ଦେହରେ ଘୋଡ଼ାଇ ମଞ୍ଚ ଉପରେ ଶୋଇଥିଲେ। ସେହି ସମୟରେ ତାଙ୍କ ସହ ତାଙ୍କର ବାନ୍ଧବୀ ମଧ୍ୟ ଉପସ୍ଥିତ ଥିଲେ। ଅଭିଯୋଗକାରୀଙ୍କ କହିବାନୁଯାୟୀ, ଏହି କମ କରିବା ଜାତୀୟ ପତାକାର ମର୍ଯ୍ୟାଦା ହାନି କରିବା ସହ କୋଟି କୋଟି ଭାରତୀୟଙ୍କ ଭାବନାକୁ ଆଘାତ ପହଞ୍ଚାଇଛି।

ପୁଣେ ପୁଲିସ ଅଭିଯୋଗ ପତ୍ର ଗ୍ରହଣ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ FIR ରୁଜୁ କରିନାହିଁ। ପୁଲିସ ଅଧିକାରୀଙ୍କ କହିବା ଅନୁସାରେ, ଘଟଣାର ସତ୍ୟାସତ୍ୟ ଏବଂ ଭିଡିଓ ଫୁଟେଜ୍ ଯାଞ୍ଚ କରାଯିବା ପରେ ଆଇନଗତ ପଦକ୍ଷେପ ନିଆଯିବ।