Author: suchanatv24x7

ବାହାନଗା ପରେ ବରଗଡ଼, ମାଲବାହୀ ଟ୍ରେନ୍ ଦୁର୍ଘଟଣାଗ୍ରସ୍ତ

ବାହାନଗା ଦୁଃଖ ନଯାଉଣୁ ପୁଣି ଆଉ ଏକ ରେଳ ଦୁର୍ଘଟଣା ଘଟିଛି । ବରଗଡ଼ ଜିଲ୍ଲା ମେଣ୍ଢାପାଲି ନିକଟରେ ମାଲବାହୀ ଟ୍ରେନ୍ ଦୁର୍ଘଟଣାଗ୍ରସ୍ତ ହୋଇଛି । ଏହି ଟ୍ରେନ୍ ଲାଇନଚ୍ୟୁତ ହେବାରୁ ୫ଟି ଡବା ଓଲଟି ପଡ଼ିଛି । ତେବେ ଏଥିରେ କେହି ମୃତାହତ ହୋଇନାହାଁନ୍ତି ।

ମାଲବାହୀ ଟ୍ରେନଟି ବରଗଡ଼ ଜିଲ୍ଲା ଡୁଙ୍ଗୁରୀରୁ ଚୂନପଥର ନେଇ ଏସିସି ସିମେଣ୍ଟ କାରଖାନା ଯାଉଥିଲା । ଆଜି ସକାଳେ ଯାଉଥିବା ବେଳେ ଟ୍ରେନର ୫ଟି ବଗି ଲାଇନଚ୍ୟୁତ ହୋଇଥିଲା । ସେପଟେ ଦୁର୍ଘଟଣା ସହ ଭାରତୀୟ ରେଳ ବିଭାଗର କୌଣସି ସମ୍ପର୍କ ନାହିଁ ।

ଏଭଳି କହିଛି ପୂର୍ବତଟ ରେଳବାଇ । ମାଲବାହୀ ଟ୍ରେନଟି ଏକ ଘରୋଇ ସିମେଣ୍ଟ କମ୍ପାନୀର । ଟ୍ରେନ୍ ଚଲାଇବା ପାଇଁ ଯାହା କିଛି ଭିତ୍ତିଭୂମିର ଆବଶ୍ୟକତା ରହିଛି ତାହା ସିମେଣ୍ଟ କମ୍ପାନୀ କରିଛି । ସେହି କମ୍ପାନୀ ଭିତ୍ତିଭୂମିର ରକ୍ଷଣାବେକ୍ଷଣ କରୁଥିବା ନେଇ ପୂର୍ବତଟ ରେଳବାଇ ପକ୍ଷରୁ ସୂଚନା ଦିଆଯାଇଛି ।

ଗତ ୨ ତାରିଖରେ ବାହାନଗାରେ ବଡ଼ ଧରଣର ରେଳ ଦୁର୍ଘଟଣା ଘଟି ୨୭୫ ଜଣଙ୍କ ମୃତ୍ୟୁ ଘଟିଛି । ଅନେକ ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି । ମୃତ୍ୟୁ ସଂଖ୍ୟା ଆହୁରି ବଢ଼ିବା ନେଇ ଆଶଙ୍କା ମଧ୍ୟ ରହିଛି । ଯୁଦ୍ଧକାଳୀନ ଭିତ୍ତିରେ ମରାମତି କାମ ସରିଛି । ପରୀକ୍ଷାମୂଳକ ଭାବେ ଟ୍ରେନ୍ ଟ୍ରାକରେ ଗଡ଼ିଛି । ଏଭଳି ସ୍ଥିତିରେ ପୁଣି ରେଳ ଦୁର୍ଘଟଣାକୁ ନେଇ ଚିନ୍ତା ବଢୁଛି ।
କୁସ୍ତି ଯୋଦ୍ଧାଙ୍କ ବିଷୟରେ ମିଛ ଖବର ପ୍ରସାରଣ କରାଯାଉଛି, ମୁହଁ ଖୋଲିଲେ ବଜରଙ୍ଗ ପୁନିଆ ଆଉ ସାକ୍ଷୀ ମଲିକ

ଭାରତୀୟ ରେସଲିଂ ଫେଡେରେସନର ବିଦାୟୀ ଅଧ୍ୟକ୍ଷ ତଥା ବିଜେପି ସାଂସଦ ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ କୁସ୍ତିଯୋଦ୍ଧାଙ୍କ ଆନ୍ଦୋଳନକୁ ନେଇ ଗୁଜବ ସୃଷ୍ଟି ହୋଇଛି । ବାସ୍ତବରେ ଆନ୍ଦୋନ କରୁଥିବା କୁସ୍ତି ଯୋଦ୍ଧା ସାକ୍ଷୀ ମଲିକ ଏବଂ ବଜରଙ୍ଗ ପୁନିଆଙ୍କ ବିଷୟରେ ଖବର ପ୍ରଚାର ହୋଇଥିଲା ଯେ, ଏମାନେ ଆନ୍ଦୋଳନ ଛାଡି ରେଲଓ୍ବେ ଚାକିରିରେ ଯୋଗ ଦେଇଛନ୍ତି । ଏହାପରେ କୁହାଯାଇଥିଲା ଯେ ଏହି ଆନ୍ଦୋଳନ ଶେଷ ହେବାକୁ ଯାଉଛି ।

ଏହାକୁ ନେଇ ସାକ୍ଷୀ ମଲିକ ଏବଂ ବଜରଙ୍ଗ ପୁନିଆଙ୍କ ବୟାନ ମଧ୍ୟ ସାମ୍ନାକୁ ଆସିଛି । ଆନ୍ଦୋଳନର ସମାପ୍ତି ଖବର ସଂପୂର୍ଣ୍ଣ ଭୁଲ ବୋଲି ଉଭୟ କୁସ୍ତି ଯୋଦ୍ଧା ଟୁଇଟ୍ କରି ଲେଖିଛନ୍ତି । ଏହି ଆନ୍ଦୋଳନ ସମାପ୍ତ ହୋଇନାହିଁ । ରେସଲର ସାକ୍ଷୀ ମଲିକ ଏବଂ ବଜରଙ୍ଗ ପୁନିଆଙ୍କ ବିଷୟରେ ଏକ ନ୍ୟୁଜ୍ ଏଜେନ୍ସି ସୋମବାର କହିଥିଲା ଯେ, ସେମାନେ ଭାରତୀୟ ରେଳବାଇରେ ଚାକିରିରେ ଯୋଗ ଦେଇଛନ୍ତି ।

ଏହି ଖବର ସାମ୍ନାକୁ ଆସିବା ପରେ ସାକ୍ଷୀ ମଲିକ କୁସ୍ତିଯୋଦ୍ଧାଙ୍କ ଆନ୍ଦୋଳନରୁ ନିଜକୁ ଦୂରେଇ ରଖିଥିଲେ ବୋଲି ଦାବି କରାଯାଇଥିଲା ।

ଏହି ଖବର ସମ୍ପର୍କରେ ରେସଲର ପୁନିଆ ଟ୍ୱିଟ୍ କରି କହିଛନ୍ତି, “ଆନ୍ଦୋଳନ ପ୍ରତ୍ୟାହାର ଖବର ଏକ ଗୁଜବ। ଏହି ଖବର ଆମକୁ କ୍ଷତି ପହଞ୍ଚାଇବା ପାଇଁ ପ୍ରସାରିତ ହେଉଛି । ଆମେ ପଛକୁ ଫେରି ନାହୁଁ କିମ୍ବା ଆନ୍ଦୋଳନ ପ୍ରତ୍ୟାହାର କରିନାହୁଁ । ମହିଳା କୁସ୍ତିଯୋଦ୍ଧାଙ୍କ ଏଫଆଇଆର ପ୍ରତ୍ୟାହାର ଖବର ମଧ୍ୟ ମିଥ୍ୟା ଅଟେ । ନ୍ୟାୟ ନହେବା ପର୍ଯ୍ୟନ୍ତ ସଂଗ୍ରାମ ଜାରି ରହିବ ବୋଲି ସେ କହିଛନ୍ତି ।

ଅନ୍ୟପକ୍ଷରେ ରେସଲର ସାକ୍ଷୀ ମଲିକ ଟ୍ୱିଟ କରି କହିଛନ୍ତି, “ଏହି ଖବର ସଂପୂର୍ଣ୍ଣ ଭୁଲ ଅଟେ। ନ୍ୟାୟ ସଂଗ୍ରାମରେ ଆମ ମଧ୍ୟରୁ କେହି ପଛଘୁଞ୍ଚା ଦେଇନାହାନ୍ତି କିମ୍ବା ଆମେ ମଧ୍ୟ କରିବୁ ନାହିଁ। ସତ୍ୟଗ୍ରାହ ସହିତ ମୁଁ ରେଳବାଇରେ ମୋର ଦାୟିତ୍ବ ସୂଚାରୁ ରୂପେ ପୂରଣ କରୁଛି । ଆମେ ନ୍ୟାୟ ପାଇବା ପର୍ଯ୍ୟନ୍ତ ଆମର ସଂଗ୍ରାମ ଜାରି ରହିବ । ଦୟାକରି କୌଣସି ଭୁଲ ଖବର ଚଲାନ୍ତୁ ନାହିଁ ବୋଲି ସାକ୍ଷୀ ଲେଖିଛନ୍ତି ।

ସୋମବାର ସାକ୍ଷୀ ମଲିକ କହିଛନ୍ତି ଯେ, ଆମେ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଭେଟିଛୁ, ଏହା ଏକ ସାଧାରଣ ବାର୍ତ୍ତାଳାପ, ଆମର କେବଳ ଗୋଟିଏ ଦାବି ଅଛି ତାହା ହେଉଛି ବ୍ରିଜ ଭୂଷଣ ସିଂଙ୍କୁ ଗିରଫ କରିବା ।

ଏହା ସହିତ ସାକ୍ଷୀ ସ୍ପଷ୍ଟ ଭାବେ କହିଛନ୍ତି, “ମୁଁ ବିରୋଧରୁ ପଛଘୁଞ୍ଚା ଦେଇନାହିଁ, ମୁଁ ରେଳବାଇରେ OSD ଭାବରେ କାର୍ଯ୍ୟ ପୁଣି ଆରମ୍ଭ କରିଛି । ମୁଁ ଏହା ସ୍ପଷ୍ଟ କରିବାକୁ ଚାହୁଁଛି ଯେ, ନ୍ୟାୟ ପାଇବା ପର୍ଯ୍ୟନ୍ତ ଆମେ ବିରୋଧ ଜାରି ରଖିବୁ। ଆମେ ପଛକୁ ଫେରିବୁ ନାହିଁ । ନାବାଳିକା ଜଣକ କୌଣସି FIR ପ୍ରତ୍ୟାହାର କରି ନାହାନ୍ତି, ଏହା ସବୁ ନକଲି ବୋଲି ସେ କହିଛନ୍ତି ।
ଆଇଇଡି ବିସ୍ଫୋରଣରେ ଦୁଇ ଯବାନ ଆହତ

ଛତିଶଗଡର ବିଜାପୁରରେ ଆଇଇଡି ବିସ୍ଫୋରଣ। ସୋମବାର ସକାଳୁ ବିଜାପୁରରେ ହୋଇଥିବା ଆଇଇଡି ବିସ୍ଫୋରଣରେ ୨ ସେଣ୍ଟ୍ରାଲ ରିଜର୍ଭ ପୋଲିସ ଫୋର୍ସ ବା ସିଆରପିଏଫ ଯବାନ ଆହତ ହୋଇଛନ୍ତି। ଆହତ ଦୁଇ ଜଣଙ୍କୁ ଜିଲ୍ଲା ହସ୍ପିଟାଲରେ ପ୍ରାଥମିକ ଚିକିତ୍ସା ପରେ ଏୟାର ଲିପ୍ଟ କରାଯାଇଥିବା ସୂଚନା ଦେଇଛି ପୋଲିସ।
ପୋଲିସ ସୂଚନା ମୁତାବକ, ସୋମବାର ସକାଳୁ ସିଆରପିଏଫ ଟିମ ପୁସନାରରୁ ହିରୋଲିକୁ ସ୍ଥାନାନ୍ତର ହୋଇଥିଲା ଅଞ୍ଚଳର ଯାଞ୍ଚ ପାଇଁ। ସେଠାରେ ମାଓବାଦୀ ଗତିବିଧିର ଖାନତଲାସ ଚାଲିଥିବା ବେଳେ ପୂର୍ବରୁ ମାଓବାଦୀଙ୍କ ଦ୍ୱାରା ସଂଯୋଗ ହୋଇଥିବା ବିସ୍ଫୋରକ ଉପରେ ପାଦ ପଡିଯିବାରୁ ତାହାର ବିସ୍ଫୋରଣ ହୋଇଥିଲା।
ପୂର୍ବାହ୍ନ ପ୍ରାୟ ୧୦.୩୦ରେ ଗଙ୍ଗାଲୁର ନିକଟବର୍ତ୍ତୀ ଟାକମେଟା ପାହାଡ ଉପରେ ଏହି ବିସ୍ଫୋରଣ ହୋଇଥିଲା। ଏଥିରେ ଦୁଇ ଯବାନ ଆହତ ହୋଇଥିଲେ।
ଏହା ପୂର୍ବରୁ ମେ ମାସ ପ୍ରଥମାର୍ଦ୍ଧରେ ସେହି ବିଜାପୁରରେ ୨୦୨ ବାଟାଲିୟନର କୋବ୍ରା ଫୋର୍ସର ଦୁଇ ଜଣ ଯବାନ ଏନକାଉଣ୍ଟରରେ ଆହତ ହୋଇଥିଲେ। ପୁସନାର ଓ ହିରୋଲିରେ ଏକ ଆଇଇଡି ଆକ୍ରମଣ ପାଇଁ ମାଓବାଦୀମାନେ ଯୋଜନା କରୁଥିବାର ସୂଚନା ପୋଲିସକୁ ମିଳିଥିଲା। ସୂଚନା ଆଧାରରେ ଅପରେସନ ଚାଲିଥିବା ବେଳେ ମାଓବାଦୀ ଓ ସୁରକ୍ଷାବଳଙ୍କ ମଧ୍ୟରେ ଏନକାଉଣ୍ଟର ହୋଇଥିଲା।
ଟ୍ରେନ ଟ୍ରାଜେଡ଼ିର ସିବିଆଇ ତଦନ୍ତକୁ ସ୍ୱାଗତ କରିଛି ବିଜେଡି

ଟ୍ରେନ ଟ୍ରାଜେଡ଼ିର ସିବିଆଇ ତଦନ୍ତକୁ ସ୍ୱାଗତ କରିଛି ବିଜେଡି । ଦଳର ଉପ ସଭାନେତ୍ରୀ ତଥା ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲିକ ପ୍ରତିକ୍ରିୟା ରଖି କହିଛନ୍ତି ଭଲ ହୋଇଛି ସିବିଆଇକୁ ତଦନ୍ତ ଭାର ଦିଆ ଯାଇଛି । ଯିଏ ଦୋଷୀ ସେ ଦଣ୍ଡ ପାଇବ । ସିବିଆଇ ତଦନ୍ତ ହେଲେ ତ ଲୋକଙ୍କ ଜୀବନ ଫେରି ଆସିବିନି କିନ୍ତୁ ତଦନ୍ତ ହେଲେ ଦୋଷୀ ଧରା ପଡ଼ିବ । ସିବିଆଇ ତଦନ୍ତ କରୁଛନ୍ତି ଠିକ ଜିନିଷ ଧରା ପଡ଼ିବ । ଯେଉଁମାନେ ସମ୍ପୃକ୍ତ ଥିବେ ସେମାନେ ସାମ୍ନାକୁ ଆସିବେ । ନିଶ୍ଚିତ ଭାବେ କିଛି ଭୁଲ ଭଟକା ଯୋଗୁ ଏହି ଘଟଣା ଘଟିଛି ତେଣୁ ଆମେ ସିବିଆଇ ତଦନ୍ତକୁ ସ୍ୱାଗତ କରୁଛୁ ।
ମଲିକ ଆଗକୁ ଆହୁରି କହିଛନ୍ତି କି, କୌଣସି ମୃତ୍ୟୁ ଲୁଚା ଯାଇନି । ଆମେ ପ୍ରାଣ ପ୍ରଣେ ଉଦ୍ୟମ କରି ସବୁ ଡେଡ଼ ବଡ଼ି ବାହାର କରିଛୁ । ତଥ୍ୟ ଲୁଚେଇ ଆମର କଣ ଲାଭ ହେବ ଯେ ଆମେ ଲୁଚେଇବୁ । ସମସ୍ତେ ତନ ତନ କରି ଦେଖିଛିନ୍ତି । କେଉଁଠି କିଛି ଲୁଚା ଯାଇନି ।

ରାଜନୀତି କରିବାର ଇଏ ସମୟ ନୁହେଁ । ଅନେକ ଲୋକ ଚିକିତ୍ସିତ ହେଉଛନ୍ତି। ଅନେକ ଲୋକଙ୍କ ଜୀବନ ଯାଇଛି। ଏହି ସଙ୍କଟ ସମୟରେ ସେମାନଙ୍କ ସହ ଛିଡା ହେବାର ଇଏ ସମୟ । ରାଜନୀତି କରିବା ପାଇଁ ବହୁତ ସମୟ ଅଛି। ଯେଉଁମାନେ ଏଇ ଘଟଣାକୁ ନେଇ ରାଜନୀତି କରୁଛନ୍ତି ସେମାନେ ଆଗ ଆହତ ଓ ମୃତ୍ୟୁ ବ୍ୟକ୍ତିଙ୍କ ପରିବାର ସହ ଯାଇକି ଛିଡ଼ା ହୁଅନ୍ତୁ ଆଉ ସାନ୍ତ୍ୱନା ଦିଅନ୍ତୁ । କହିବା ବଦଳରେ ଯାଇ କି କିଛି କରନ୍ତୁ । ଘଟଣା କୁ ନେଇ ରାଜନୀତି ନ କରନ୍ତୁ ବୋଲି ଭାବବିହ୍ୱଳ କଣ୍ଠରେ କହିଛନ୍ତି ମନ୍ତ୍ରୀ ମଲିକ ।

ଏହା ପୂର୍ବରୁ ରାଜ୍ୟ କଂଗ୍ରେସ ପକ୍ଷରୁ ରେଳ ମନ୍ତ୍ରୀଙ୍କ ଇସ୍ତଫା ଦାବି କରାଯାଇଥିଲା। ଏଥିସହ ପିସିସି ସଭାପତି ଶରତ ପଟ୍ଟନାୟକ ମୃତକଙ୍କ ପରିବାରର ଜଣେ ସଦସ୍ୟଙ୍କୁ ଚାକିରି ସହ କ୍ଷତି ପୂରଣ ୧୦ ରୁ ୧୫ ଲକ୍ଷ କରିବା, ଓ ଗୁରୁତର ଆହତ ତଥା ପଙ୍ଗୁଙ୍କୁ ବି ଚାକିରି ଦେବା ପାଇଁ ଦାବି ହୋଇଥିଲା। ଏବେ ଦେଶରେ ରେଳ ବିଭାଗରେ ଲକ୍ଷେ ଚାଳିଶ ହାଜର ପଦବୀ ଖାଲି ଅଛି, ତାହା ପୂରଣ କରାଯାଉନି। ଟ୍ରାକ୍ ନବୀକରଣ ହେଉନି। ରେଳ ମନ୍ତ୍ରୀ ସିବିଆଇକୁ ତଦନ୍ ଭାର ଦେଇ ଚାଲାକି ଦେଖାଉଛନ୍ତି। ସିବିଆଇ ତଦନ୍ତ କେବଳ ଅପରାଧିକ ମାମଲାରେ ହୁଏ । ତା ମାନେ ଏହି ମନ୍ତ୍ରାଳୟର କିଛି ଗୋଟେ ଅପରାଧିକ ଘଟଣା ହେଉଥିଲା। ଏଠି ନିଶ୍ଚୟ ଅପରାଧ ହୋଇଛି। ନହେଲେ କାହିଁକି, ସିବିଆଇ ତଦନ୍ତ ନିର୍ଦ୍ଦେଶ ଦେଲେ ବୋଲି ପ୍ରଶ୍ନ କରିଥିଲେ ପଟ୍ଟନାୟକ।
୧୭୦ ମୃତଦେହ ଚିହ୍ନଟ, କରମଣ୍ଡଳ ଡ୍ରାଇଭର ଜୀବିତ

ବାହାନଗା ଟ୍ରେନ୍ ଦୁର୍ଘଟଣାରେ ଚୂଡ଼ାନ୍ତ ମୃତ୍ୟୁ ସଂଖ୍ୟା ୨୭୫ । ଏଯାଏ ୧୭୦ ଜଣଙ୍କ ମୃତଦେହ ଚିହ୍ନଟ ସରିଛି । ଏ ନେଇ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ପ୍ରଦୀପ ଜେନା । ମୃତ ଶରୀର ନେବାକୁ ଆସୁଥିବା ଲୋକଙ୍କୁ ରାଜ୍ୟ ସରକାରଙ୍କ ଖର୍ଚ୍ଚ ଓ ସହଯୋଗରେ ମୃତ ଶରୀର ପଠାଯାଉଛି । ସ୍ଥାନୀୟ ଲୋକଙ୍କ ସହଯୋଗ,ରାଜ୍ୟ ସରକାର, ପ୍ରଶାସନ ତତ୍ପରତା ଏବଂ ପାଖାପାଖି ଜିଲ୍ଲାର ଭିତ୍ତିଭୂମିକୁ ବ୍ୟବହାର କରି ଅନେକ ଜୀବନ ରକ୍ଷା କରାଯାଇଛି ।

ଦୁର୍ଘଟଣାସ୍ଥଳରେ ବାରମ୍ବାର ଯାଞ୍ଚ ହୋଇଛି । ମୃତ ଶରୀରଗୁଡ଼ିକୁ କିଛି ଦିନ ପର୍ଯ୍ୟନ୍ତ ରଖିବା ପାଇଁ ବ୍ୟବସ୍ଥା କରାଯାଇଛି । ଅନେକ ଲୋକଙ୍କ ଜୀବନ ଚାଲିଯାଇଥିବାରୁ ମୃତଦେହ ଚିହ୍ନଟ କରିବାରେ ସମସ୍ୟା ସୃଷ୍ଟି ହେଉଛି । ଦୁର୍ଘଟଣାରେ ଶରୀର ଅଧିକ କ୍ଷତିଗ୍ରସ୍ତ ହୋଇଯାଇଥିବାରୁ ମୃତ ଶରୀର ଚିହ୍ନିବା କଷ୍ଟସାଧ୍ୟ ହେଉଛି । ମୃତଦେହ ଚିହ୍ନଟ ପରେ ହସ୍ତାନ୍ତର ପ୍ରକ୍ରିୟା ଜାରି ରହିଛି ।

ସେପଟେ, ଆହତମାନଙ୍କ ଚିକିତ୍ସା ଠିକ୍ ଭାବେ ଚାଲିଥିବା ବେଳେ ସେମାନଙ୍କ ପାଇଁ ରକ୍ତର ଅଭାବ ନାହିଁ । କାରଣ ରାଜ୍ୟରେ ସ୍ୱତଃପ୍ରବୃତ୍ତ ଭାବେ ରକ୍ତ ଦେଇ ଚାଲିଛନ୍ତି । ସମସ୍ତଙ୍କ ସହଯୋଗ ଯୋଗୁଁ ପ୍ରାୟ ୧୨ ଶହ ଲୋକଙ୍କ ଜୀବନ ବଞ୍ଚିଗଲା ବୋଲି ସ୍ୱତନ୍ତ୍ର ରିଲିଫ୍ କମିଶନର କହିଛନ୍ତି । ସ୍ଥାନୀୟ ଲୋକ, ଅଗ୍ନିଶମ ବାହିନୀ,ଓଡ୍ରାଫ୍ ଟିମଙ୍କ କାମ ସବୁବେଳେ ପ୍ରଶଂସନୀୟ ହୋଇ ରହିବ । ଦୁର୍ଘଟଣାସ୍ଥଳରେ ଆସ୍କା ଲାଇଟ ଏବଂ ବିଭିନ୍ନ ଲାଇଟ୍ ଲଗାଇବା ଦ୍ୱାରା ଉଦ୍ଧାର କାର୍ଯ୍ୟରେ ବେଶ୍ ସହାୟକ ହୋଇଥିଲା ବୋଲି କହିଛନ୍ତି SRC ସତ୍ୟବ୍ରତ ସାହୁ ।

ସେପଟେ ଦୁର୍ଘଟଣା ପରେ ମେଡିକାଲ ବ୍ୟବସ୍ଥାକୁ ସଙ୍ଗେ ସଙ୍ଗେ ଆକ୍ଟିଭ କରାଯାଇଥିଲା । ପୁଣି ସମସ୍ତଙ୍କ ସାହାଯ୍ୟ ଏବଂ ସହଯୋଗରେ ଶହ ଶହ ଲୋକଙ୍କ ଜୀବନ ରକ୍ଷା ପାଇଲା ବୋଲି କହିଛନ୍ତି ଶିଳ୍ପ ସଚିବ ।

ଆଗକୁ ଏଭଳି ବଡ଼ ଘଟଣା ଘଟିଲେ ଆମକୁ ଏହି ଅଭିଜ୍ଞତା ଅନେକ ସହାୟକ ହେବ । ଦୁଇଟି ଟ୍ରେନରେ ପ୍ରାୟ ୧୫୦୦ ଲୋକ ଥିଲେ । ସେମାନଙ୍କୁ ଅନ୍ଧାର ଭିତରେ କମ୍ ସମୟରେ ଉଦ୍ଧାର କରିବା ବଡ଼ ଚ୍ୟାଲେଞ୍ଜ ଥିଲା । ସେଥିପାଇଁ ୨୭୫ ଲୋକଙ୍କ ଜୀବନ ଚାଲିଗଲା ବୋଲି କହିଛନ୍ତି ଶିଳ୍ପ ସଚିବ ।

ସେପଟେ ଭଗବାନଙ୍କ କୃପାରୁ କରମଣ୍ଡଳ ଏକ୍ସପ୍ରେସ ଡ୍ରାଇଭର ଏବେ ବି ଜୀବିତ ଅଛନ୍ତି । ଆହତ ପରେ ମେଡିକାଲରେ ଭର୍ତ୍ତି ହୋଇଥିଲେ । ତାଙ୍କର ଚିକିତ୍ସା ଚାଲିଥିବା ବେଳେ ସେ ଜୀବିତ ଅଛନ୍ତି । କରମଣ୍ଡଳ ଏକ୍ସପ୍ରେସ ଡ୍ରାଇଭର କଟକ ୪୨ ମୌଜା ନହରପଡ଼ା ଗାଁ ବାସିନ୍ଦା ।
ଧନୀ ହେବା ଲାଳସାରେ ଦୁଇ ଭାଇ ସାଜିଲେ ରାକ୍ଷସ

ଦିଲ୍ଲୀର କୃଷ୍ଣନଗରରେ ଜଣେ ୬୪ ବର୍ଷୀୟା ମହିଳା ଏବଂ ତାଙ୍କ ଝିଅଙ୍କୁ ହତ୍ୟା । ହତ୍ୟା ଓ ଡକାୟତି ଅଭିଯୋଗରେ ଦୁଇ ସମ୍ପର୍କୀୟ ଭାଇଙ୍କୁ ଗିରଫ କରିଛି ପୋଲିସ। ଧନୀ ହେବା ନିଶାରେ ଅଭିଯୁକ୍ତମାନେ ଏହି ହତ୍ୟାକାଣ୍ଡ ଭିଆଇଥିଲେ। ଏହି ହତ୍ୟାକାଣ୍ଡ ‘ମିଶନ ମାଲାମାଲ’ରେ ସଂଗଠିତ ହୋଇଥିଲା।

ପୋଲିସ କହିଛି ଯେ ଉଭୟ ଅଭିଯୁକ୍ତ କିଶନ (୨୮ ) ଏବଂ ତାଙ୍କ ସମ୍ପର୍କୀୟ ଦାଦା ପୁଅ ଭାଈ ଅଙ୍କିତ କୁମାର ସିଂ (୨୫ ) ବିହାରର ସିୱାନ ଜିଲ୍ଲାର ବାସିନ୍ଦା। କିଶନ ଲକ୍ଷ୍ମୀ ନଗରରେ ରହୁଥିଲେ। ଅଙ୍କିତ ଜଣେ ଗାୟକ ଏବଂ ତାଙ୍କର ଏକ ମ୍ୟୁଜିକ୍ ବ୍ୟାଣ୍ଡ ଅଛି |ଅଙ୍କିତ ଓ-ଟି-ଟି ପ୍ଲାଟଫର୍ମରେ ଆସୁଥିବା ଏକ ଫିଲ୍ମ ପାଇଁ ସଙ୍ଗୀତ ପ୍ରସ୍ତୁତ କରୁଥିଲେ । ଅଭିଯୁକ୍ତ ଅପରାଧ କରିବା ପୂର୍ବରୁ ଆଇନଗତ ପରାମର୍ଶ ପାଇଁ ଦୁଇ ଓକିଲଙ୍କ ନିକଟକୁ ଯାଇଥିଲେ।

ପୋଲିସ ସୂଚନା ଅନୁଯାୟୀ ୩୧ ମଇରେ କୃଷ୍ଣନଗର ଇ ବ୍ଲକର ପ୍ରଥମ ମହଲାରେ ଥିବା ଏକ ଫ୍ଲାଟରୁ ଦୁର୍ଗନ୍ଧ ବାହାରିଥିଲା। ଏନେଇ ଜଣେ ବ୍ୟକ୍ତି ପିସିଆରକୁ ଫୋନ କରିଥିଲେ । ତା’ପରେ ପୁଲିସ ଘରର ତାଲା ଭାଙ୍ଗି ଉଭୟଙ୍କ ମୃତଦେହ ବାହାର କରିଥିଲା। ଏହି ହତ୍ୟା ଘଟଣାରେ ସମ୍ପୃକ୍ତ ଅପରାଧୀଙ୍କୁ ଧରିବାକୁ ପୋଲିସ ୨୦୦ ରୁ ଅଧିକ କ୍ୟାମେରା ଖୋଜାଖୋଜି କରିଥିଲା। ସେହିସବୁ କ୍ୟାମେରାରୁ ଗୋଟିଏରେ ଅପରାଧ କରିବା ପରେ ଅଭିଯୁକ୍ତ ଏକ ଘରେ ପ୍ରବେଶ କରୁଥିବା ଦେଖିଥିଲା ପୋଲିସ। ଡେପୁଟି କମିଶନର ଅଫ ପୋଲିସ ମୀନା କହିଛନ୍ତି ଯେ କ୍ୟାମେରାରୁ ମିଳିଥିବା ସୂଚନା ଅନୁଯାୟୀ ପୋଲିସ ଘରେ ଚଢ଼ାଉ କରି ଜାଣିବାକୁ ପାଇଥିଲେ ଯେ ମୁଖ୍ୟ ଅଭିଯୁକ୍ତ ଘର କୃଷ୍ଣ ନଗରରେ ।

ମହିଳାଙ୍କ ମୃତଦେହ ମିଳିବା ମାତ୍ରେ କିଶନ ଘରୁ ଫେରାର ହୋଇଯାଇଥିଲା ।ପୋଲିସ ତା’ପିଛା କରି ତାକୁ ଦିଲ୍ଲୀର କାଣ୍ଟି ନଗର ଅଞ୍ଚଳରୁ ଗିରଫ କରିଥିଲା। ପଚରାଉଚରାରୁ ଜଣାପଡିଛି ଯେ ସେ ଏକ ମେଡିକାଲ ଫାର୍ମରେ ମାର୍କେଟିଂ ମ୍ୟାନେଜର ଭାବରେ କାର୍ଯ୍ୟରତ। ଅନଲାଇନ୍ ଟୁଇଟର ସେବା ପ୍ରଦାନ କରୁଥିବା ଏକ ୱେବସାଇଟରେ ସେ ନିଜକୁ ପଞ୍ଜୀକୃତ କରିଥିଲେ। ଏହି କାରଣରୁ ସେ ରାଜରାଣୀଙ୍କ ସହ ଯୋଗାଯୋଗ କରିଥିଲେ। ରାଜରାଣୀ ତାଙ୍କ ଭିନ୍ନକ୍ଷମ ଝିଅ ଗିନ୍ନି କିରାର ପାଇଁ ଏକ କମ୍ପ୍ୟୁଟର ଟୁଇଟର ଖୋଜୁଥିଲେ | କିଶନ ଗିନ୍ନୀକୁ ପଢାଇବାପାଇଁ ଏପ୍ରିଲରୁ ରାଜରାଣୀଙ୍କ ଘରକୁ ଯିବା ଆରମ୍ଭ କରିଦେଇଥିଲେ ଓ ଧୀରେ ଧୀରେ ମହିଳାଙ୍କ ବିଶ୍ୱାସର ପାତ୍ର ହୋଇପାରିଥିଲେ |

ଯେତେବେଳେ ରାଜରାଣୀ ଘର ସିପଟ କରିବାକୁ ଚାହୁଁଥିଲେ, କିଶନ ତାଙ୍କୁ ଲଜପତ ନାଗରରେ ଘର ଖୋଜିବାରେ ମଧ୍ୟ ସାହାଯ୍ୟ କରିଥିଲେ। ଅନ୍ ଲାଇନ୍ ଦେୟ ପାଇଁ କିଶାନଙ୍କ ସହ ରାଜରାଣୀ ଆକାଉଣ୍ଟ ସେୟାର କରିଥିଲେ, ଯେଉଁଥିରେ ସେ ଜାଣିବାକୁ ପାଇଲେ ଯେ ତାଙ୍କ ବ୍ୟାଙ୍କ ଆକାଉଣ୍ଟରେ ୫୦ ଲକ୍ଷରୁ ଅଧିକ ଟଙ୍କା ଅଛି। ଏହା ପରେ ସେ ତାଙ୍କୁ ହତ୍ୟା କରିବାକୁ ଯୋଜନା କରିଥିଲେ ।

ଏହି ହତ୍ୟା ଷଡଯନ୍ତ୍ରର ନାମ ଥିଲା ‘ମିଶନ୍ ମାଲାମାଲ୍’। ଏହା ପରେ କିଶନ ପୀଡିତାଙ୍କୁ ଲୁଟିବାକୁ ଯୋଜନା କରିଥିଲା। ମଇ ୧୭ ରେ ହ୍ୱାଟ୍ସଆପରେ ନିଜର ଷଡଯନ୍ତ୍ରକୁ ‘ମିଶନ୍ ମାଲାମଲ୍’ ବୋଲି ନାମ ଦେଇଥିଲା । ‘ମିଶନ’କୁ ସମ୍ପୂର୍ଣ୍ଣ କରିବା ପାଇଁ ଅଭିଯୁକ୍ତ ଅଙ୍କିତ ଆସାମରୁ ଦିଲ୍ଲୀ ଆସିଥିଲା । ରାଜରାଣୀ ତାଙ୍କ ଝିଅ ପାଇଁ ଆଉ ଜଣେ ଶିକ୍ଷକ ଖୋଜୁଥିଲେ। ଯେଉଁଥିପାଇଁ କିଶନ ଅଙ୍କିତଙ୍କୁ ତାଙ୍କ ସହିତ ପରିଚିତ କରାଇଥିଲା।
ରାଜରାଣୀଙ୍କ ସହମତିରେ କିଶନ ଅଙ୍କିତକୁ ସୂଚନା ଦିଏ ଯେ ‘ମିଶନ ମାଲାମାଲ’ କାର୍ଯ୍ୟରତ । ଏହା ପରେ ଦୁଇ ଭାଇ ମିଶି ମା ଝିଅଙ୍କ ହତ୍ୟା କରି ଘରୁ ସବୁ ସଫା କରି ପଳାଇ ଯାଇଥିଲେ।
ବାହାନଗା ଦୁର୍ଘଟଣା ପରେ ନନଷ୍ଟପ୍ ମରାମତି, ଟ୍ରାକରେ ଗଡ଼ିଲା ଟ୍ରେନ୍

ଦୀର୍ଘ ୫୦ ଘଣ୍ଟାରୁ ଅଧିକ ସମୟ । ନନଷ୍ଟପ୍ ମରାମତି ପରେ ଶେଷରେ ବାହାନଗା ଟ୍ରେନ୍ ଦୁର୍ଘଟଣାସ୍ଥଳରେ ଗଡ଼ିଛି ଟ୍ରେନ୍ । ଉଭୟ ଅପ୍ ଓ ଡାଉନ୍ ଲାଇନରେ ପରୀକ୍ଷାମୂଳକ ଭାବେ ରେଳ ଚଳାଚଳ ଆରମ୍ଭ ହୋଇଛି । ପାସେଞ୍ଜର ଏବଂ ମାଲବାହୀ ଟ୍ରେନ୍ ଟ୍ରାକରେ ଗଡ଼ିଛି । ଗତକାଲି ଉଭୟ ଟ୍ରାକରେ ମାଲବାହୀ ଟ୍ରେନ୍ ଚଳାଚଳ କରିଥିଲା । ବାଲେଶ୍ୱର ବାହାନଗାରେ ଭୟଙ୍କର ଟ୍ରେନ୍ ଦୁର୍ଘଟଣା ପରେ ଜୋରସୋରରେ ମରାମତି ଚାଲିଥିଲା ।

ଟ୍ରେନ୍ ଚଳାଚଳ ସ୍ୱାଭାବିକ କରିବାକୁ ଯୁଦ୍ଧକାଳୀନ ଭିତ୍ତିରେ କାମ ଆରମ୍ଭ ହୋଇଥିଲା । ବିଦ୍ୟୁତ ଖୁଣ୍ଟି ଓ ରେଳଧାରଣା ମରାମତି କାମ ଜୋରସୋରରେ କରାଯାଇଥିଲା । ଏହି କାର୍ଯ୍ୟରେ ଏକ ହଜାରରୁ ଅଧିକ କର୍ମଚାରୀ ନିୟୋଜିତ ହୋଇଥିଲେ । ଦୁର୍ଘଟଣା ପରେ କ୍ଷତିଗ୍ରସ୍ତ ଧାରଣା ଏବଂ ୨୧ଟି କ୍ଷତିଗ୍ରସ୍ତ ବଗି ହଟାଯାଇଥିଲା । ୩୦ରୁ ଅଧିକ ବିଦ୍ୟୁତ୍ ଖୁଣ୍ଟି ଭାଙ୍ଗିଥିବା ବେଳେ ତାର ଗୁଡ଼ିକ ଛିଣ୍ଡି ଯାଇଥିଲା । ଏବେ ନୂଆ ବିଦ୍ୟୁତ୍ ଖୁଣ୍ଟି ଲାଗିଛି । ଏଥିସହ ରେଳ ଲାଇନ୍ ମରାମତି କାମ ସମ୍ପୂର୍ଣ୍ଣ ହୋଇଛି ।

ଗତ ୨ ତାରିଖରେ ଭୟଙ୍କର ଟ୍ରେନ୍ ଦୁର୍ଘଟଣା ହୋଇଥିଲା । କରମଣ୍ଡଳ ଏକ୍ସପ୍ରେସ୍ ଦୁର୍ଘଟଣାଗ୍ରସ୍ତ ହୋଇ ୨୭୫ ଜଣଙ୍କ ମୃତ୍ୟୁ ଘଟିଛି । ଅନେକ ଯାତ୍ରୀ ଏବେ ବି ଗୁରୁତର ଅଛନ୍ତି । ସେମାନଙ୍କ ଚିକିତ୍ସା ଜାରି ରହିଛି । ସରକାର ଅନୁକମ୍ପା ରାଶି ଘୋଷଣା କରିଛନ୍ତି । ଶବ ହସ୍ତାନ୍ତର ପ୍ରକ୍ରିୟା ଜାରି ରହିଛି । ସେପଟେ, ଘଟଣାର CBI ତଦନ୍ତ ଜାରି ରହିଛି ।

ଆଉ ଏକ ଖବର ଯାହା ଆପଣମାନଙ୍କୁ ଆଶ୍ଚର୍ଯ୍ୟ କରିବ । ୪୮ ଘଣ୍ଟା ପରେ ଜଣେ ଯୁବକଙ୍କୁ ଜୀବିତ ଉଦ୍ଧାର କରାଯାଇଛି । ଦୁର୍ଘଟଣାସ୍ଥଳ ଠାରୁ କିଛି ଦୂରରେ ତାଙ୍କୁ ଉଦ୍ଧାର କରାଯାଇଛି । ଛିଟିକି ପଡ଼ିଥିବା ବଗିତଳେ ସେ ଫସି ରହିଥିଲେ । ରେଲୱେ ପୋଲିସ କର୍ମଚାରୀ ତାଙ୍କୁ ଉଦ୍ଧାର କରି ବାଲେଶ୍ୱର ହସ୍ପିଟାଲରେ ଭର୍ତ୍ତି କରିଛନ୍ତି । ଉଦ୍ଧାର ଯୁବକ ଆସାମ ଅଞ୍ଚଳର ଧୋଲାଲ ବୋଲି ସୂଚନା ମିଳିଛି ।

ମହାଭାରତର ‘ଶକୁନି ମାମା’ଙ୍କ ୭୮ ବର୍ଷ ବୟସରେ ଦେହାନ୍ତ

ମହାଭାରତ ସିରିଏଲରେ ଶକୁନି ମାମା ଭୂମିକାରେ ଅଭିନୟ କରିଥିବା ଅଭିନେତା ଗୋଫି ପେଣ୍ଟାଲଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତାଙ୍କ ଅବସ୍ଥା ଅତ୍ୟନ୍ତ ଗୁରୁତର ବୋଲି କୁହାଯାଉଥିଲା। ଜଣାଶୁଣା ଅଭିନେତ୍ରୀ ଟିନା ଘାଇ ମଧ୍ୟ ଏହା ନିଶ୍ଚିତ କରିଥିଲେ, କିନ୍ତୁ ବର୍ତ୍ତମାନ ସମଗ୍ର ସିନେମା ଜଗତରେ ଶୋକର ବାତାବରଣ ସୃଷ୍ଟି ହୋଇଛି କାରଣ ଅଭିନେତା ଗୋଫି ପେଣ୍ଟାଲ ଆମ ମଧ୍ୟରେ ଆଉ ନାହାଁନ୍ତି। ଆଜି ଅଭିନେତାଙ୍କର ଦେହାନ୍ତ ହୋଇଛି ଏବଂ ଏହା ସହିତ ଅନ୍ୟ ଜଣେ ଭେଟେରାନ କଳାକାର ଏହି ଦୁନିଆକୁ ବିଦାୟ ଦେଇଛନ୍ତି । ବି.ଆର ଚୋପ୍ରାଙ୍କ ପ୍ରସିଦ୍ଧ ଏୈତିହାସିକ ଶୋ 'ମହାଭାରତ' ଦର୍ଶକଙ୍କ ଠାରୁ ବହୁତ ଭଲ ପାଇବା ପାଇଥିଲା । ଏହି ଶୋ’ର ପ୍ରତ୍ୟେକ ଚରିତ୍ର ପ୍ରଶଂସକଙ୍କ ହୃଦୟରେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ସୃଷ୍ଟି କରିଥିଲା । ଏହି କଳାକାରମାନଙ୍କ ମଧ୍ୟରେ ଗୋଫି ପେଣ୍ଟାଲଙ୍କ ନାମ ମଧ୍ୟ ଅନ୍ତର୍ଭୁକ୍ତ । 

ଶୋ’ରେ ଶକୁନି ମାମାଙ୍କ ଚରିତ୍ରରେ ଗୋଫି ପେଣ୍ଟାଲ ଅଭିନୟ କରିଥିଲେ । ଆଜି ବି ଯେତେବେଳେ ଶକୁନି ମାମାଙ୍କ ଅଭିନୟ ବିଷୟରେ କୁହାଯାଏ, ଗୋଫି ପେଣ୍ଟାଲଙ୍କ ନାମ ଏଥିରେ ଉଲ୍ଲେଖ କରାଯାଇଥାଏ, କିନ୍ତୁ ଦୁଖର ବିଷୟ ଯେ ଅଭିନେତା ଆଉ ଆମ ସହିତ ନାହାଁନ୍ତି । ଦୀର୍ଘ ଦିନ ଧରି ତାଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ଥିଲା। ଏହି ସମୟରେ ଗୋଫି ପେଣ୍ଟାଲଙ୍କ ଭଣଜା ହିଟେନ ଏକ ଗଣମାଧ୍ୟମ ସଂସ୍ଥାକୁ ସୂଚନା ଦେବାବେଳେ କହିଥିଲେ ଯେ ଅନେକ ବୟସ ଜନିତ ରୋଗରେ ପୀଡିତ ଗୋଫି ପେଣ୍ଟାଲଙ୍କର ହୃଦ୍‌ଘାତ ହେତୁ ମୃତ୍ୟୁ ଘଟିଛି। ବର୍ତ୍ତମାନ ଏହି ଖବର ସୋସିଆଲ ମିଡିଆରେ ଅଧିକ ଭାଇରାଲ ହେବାରେ ଲାଗିଛି ଏବଂ ପ୍ରଶଂସକଙ୍କ ସମେତ ସିନେମାର ଅନେକ ତାରକା ଅଭିନେତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛନ୍ତି ।

ତେବେ  ଗୋଫି ପେଣ୍ଟାଲର ଶେଷ ରୀତିଗୁଡିକ ଅପରାହ୍ନ ୪ ଟାରେ କରାଯିବ । ଏହି ଶେଷ ଯାତ୍ରାରେ ସିନେମା ଜଗତର ଅନେକ ଭେଟେରାନ ଏବଂ ବଡ ତାରକା ତାଙ୍କ ସହ ଯୋଗଦେବେ ବୋଲି ଆଶା କରାଯାଉଛି। ଗୋଫିଙ୍କ ବିୟୋଗ ଯୋଗୁଁ ସିନେମା ଜଗତରେ ଶୋକର ଲହରୀ ଖେଳିଯାଇଛି । ଗୋଫିଙ୍କ କ୍ୟାରିୟର ବିଷୟରେ କହିବାକୁ ଗଲେ ଏହି ଅଭିନେତା ୧୯୮୦ ଦଶକରେ ହିନ୍ଦୀ ଚଳଚ୍ଚିତ୍ର ବ୍ୟତୀତ କିଛି ଟିଭି ସିରିଏଲରେ ଅଭିନୟ କରିଥିଲେ । ଦୟାକରି କୁହନ୍ତୁ ଅଭିନୟ ଜଗତରେ ପାଦ ଦେବା ପୂର୍ବରୁ ସେ ଜଣେ ଇଞ୍ଜିନିୟର ଥିଲେ । ଗୋଫି ବି.ଆର ଚୋପ୍ରାଙ୍କ ସିରିଏଲ ମହାଭାରତରୁ ସ୍ୱୀକୃତି ପାଇଥିଲେ । ଏହି ଶୋ’ରେ ସେ ଶକୁନି ମାମା ଚରିତ୍ରରେ ଅଭିନୟ କରିଥିଲେ।

ମୌସୁମୀ ପାଇଁ କରିବାକୁ ପଡିବ ଅପେକ୍ଷା

ରାଜଧାନୀ ଦିଲ୍ଲୀ ସମେତ ଉତ୍ତର ଭାରତର ରାଜ୍ୟଗୁଡିକରେ ପୁଣି ଥରେ ଉତ୍ତାପର ସମୟ ଆରମ୍ଭ ହେବାକୁ ଯାଉଛି। ଭାରତ ପାଣିପାଗ ବିଭାଗ ଅନୁଯାୟୀ ଆଜିଠାରୁ ତାପମାତ୍ରା ବୃଦ୍ଧି ରେକର୍ଡ ହେବ। ଏଥି ସହିତ ମୌସୁମୀ ଉପରେ ଏକ ଅପଡେଟ୍ ଦେବା ବେଳେ ଆଇଏମଡି କହିଛି ଯେ ଏହାର ଗତି ମଧ୍ୟ ମନ୍ଥର ହୋଇଯାଇଛି।

ଆଇଏମଡି ଅନୁଯାୟୀ, ମୌସୁମୀ ଏପର୍ଯ୍ୟନ୍ତ କେରଳ ଏବଂ ଅନ୍ୟ ଉପକୂଳବର୍ତ୍ତୀ ଅଞ୍ଚଳରେ ପହଞ୍ଚି ନାହିଁ। ବାସ୍ତବରେ, ରବିବାର (ଜୁନ୍୪)ରେ ମୌସୁମୀ କେରଳକୁ ଧକ୍କା ଦେବାକୁ ଯାଉଥିଲା କିନ୍ତୁ ଏହା ବର୍ତ୍ତମାନ ପର୍ଯ୍ୟନ୍ତ ସମ୍ଭବ ହୋଇନାହିଁ। ଦକ୍ଷିଣ-ପଶ୍ଚିମ ମୌସୁମୀ ସାଧାରଣତଃ ଜୁନ୍ ୧ ରେ କେରଳକୁ ଛୁଂଇଥାଏ ଏବଂ ସାତ ଦିନ ପୂର୍ବରୁ କିମ୍ବା ସାତ ଦିନ ପରେ ବର୍ଷା ହୋଇଥାଏ |

ଆଇଏମଡିର ପୂର୍ବ ରିପୋର୍ଟରେ କୁହାଯାଇଥିଲା କି, ମଇ ମଧ୍ୟଭାଗରୁ ଜୁନ୍ ୪ ତାରିଖ ସୁଦ୍ଧା ମୌସୁମୀ କେରଳକୁ ଛୁଂଇପାରେ। କିନ୍ତୁ ଆଇଏମଡି ରବିବାର ଦିନ ଏକ ବିବୃତ୍ତି ଜାରି କରି କହିଛି ଯେ ମୌସୁମୀ ଆସିବାରେ ତିନିରୁ ଚାରି ଦିନ ବିଳମ୍ବ ହୋଇପାରେ। ବଙ୍ଗୋପସାଗରରେ ମୌସୁମୀ କାର୍ଯ୍ୟକଳାପ ଉପରେ ପାଣିପାଗ ବିଭାଗ ନିରନ୍ତର ନଜର ରଖିଛି। ଏହା ବ୍ୟତୀତ ହିମାଳୟର ପାହାଡ଼ିଆ ଅଞ୍ଚଳରେ ହାଲୁକା ବର୍ଷା ହେବାର ଆଇଏମଡି ପୂର୍ବାନୁମାନ କରିଛି।

ବିହାର, ଝାରଖଣ୍ଡ ଏବଂ ପଶ୍ଚିମବଙ୍ଗ ପାଇଁ ପାଣିପାଗ ବିଭାଗ ଭୀଷଣ ଉତ୍ତାପ ବା ଗୁଳଗୁଳି ହେବାର ସତର୍କ ସୂଚନା ଜାରି କରିଛି। ଜୁନ୍ ୪ ରୁ ଜୁନ୍ ୮ ପର୍ଯ୍ୟନ୍ତ ପଶ୍ଚିମବଙ୍ଗର ବିହାରରେ ଆଇଏମଡି ଭୀଷଣ ଉତ୍ତାପର ଚେତାବନୀ ଦେଇଛି। ଏହା ସହିତ ୬ ଜୁନ୍ ରେ କେରଳରେ ପ୍ରବଳ ବର୍ଷା ହେବାର ସମ୍ଭାବନା ପ୍ରକାଶ ପାଇଛି | ଏହାକୁ ଦୃଷ୍ଟିରେ ରଖି ପାଣିପାଗ ବିଭାଗ ସମୁଦ୍ର କୂଳିଆ ଅଞ୍ଚଳର ମତ୍ସ୍ୟଜୀବୀଙ୍କୁ ଆସନ୍ତା ୫ ଦିନ ପାଇଁ ସତର୍କ ରହିବାକୁ ସୂଚନା ଦେଇଛି ।
ରେଳମନ୍ତ୍ରୀଙ୍କ ଇସ୍ତଫା ଦାବି କଲା ରାଜ୍ୟ କଂଗ୍ରେସ

ବାହାନଗା ରେଳ ଦୁର୍ଘଟଣା ପାଇଁ କେନ୍ଦ୍ର ରେଳମନ୍ତ୍ରୀଙ୍କୁ ଦାୟୀ କରି ତାଙ୍କ ଇସ୍ତଫା ଦାବି କରିଛି ରାଜ୍ୟ କଂଗ୍ରେସ। ସୋମବାର ଦିନ ଏକ ସାମ୍ବାଦିକ ସମ୍ମିଳନୀ କରି ଏହି ଦାବି ଉପସ୍ଥାପନ କରିଛି ପ୍ରଦେଶ କଂଗ୍ରେସ । ରେଳ ମନ୍ତ୍ରୀ ତୁରନ୍ତ ଇସ୍ତଫା ଦିଅନ୍ତୁ, ମୃତକଙ୍କ ପରିବାରର ଜଣେ ସଦସ୍ୟଙ୍କୁ ଚାକିରି ସହ କ୍ଷତି ପୂରଣ ୧୦ରୁ ୧୫ ଲକ୍ଷ ଟଙ୍କା ଓ ଗୁରୁତର ଆହତ ଓ ପଙ୍ଗୁ ହୋଇଥିବା ଯାତ୍ରୀଙ୍କୁ ବି ଚାକିରି ଦେବା ପାଇଁ ଦାବି କରିଛନ୍ତି ରାଜ୍ୟ କଂଗ୍ରେସ ସଭାପତି ଶରତ ପଟ୍ଟନାୟକ।

ପଟ୍ଟନାୟକ କହିଛନ୍ତି କି, ଦେଶର ରେଳ ବିଭାଗରେ ଲକ୍ଷେ ଚାଳିଶ ହାଜର ପଦବୀ ଖାଲି ଅଛି, ତାହା ପୂରଣ କରାଯାଉନି। କଂଗ୍ରେସ ସମୟରେ ୨୦୧୨ରେ ଆଣ୍ଟି କୋରିଜନ ସିଷ୍ଟମ ହୋଇଥିଲା । ବିଜେପି ସରକାର ଆସିବା ପରେ କେବଳ ଏହାର ନାମ ବଦଳାଇ କବଚ କରିଦେଲା । ହେଲେ ମାତ୍ର ୨ ପ୍ରତିଶତ ଏହି ବ୍ୟବସ୍ଥା ଲାଗୁ ହୋଇଛି। ପୂର୍ବତଟ ରେଳବାଇରେ ଟଙ୍କାଏ ଖର୍ଚ୍ଚ ହୋଇନାହିଁ । ଏ ସମ୍ପର୍କରେ ସିଏଜି ମଧ୍ଯ ରିପୋର୍ଟ୍ ପ୍ରଦାନ କରିଥିଲେ ବି ଏହାକୁ ଚପାଇ ଦେଇଛି । ଟ୍ରାକ୍ ନବୀକରଣ ହେଉନି ବୋଲି ପଟ୍ଟନାୟକ କହିଛନ୍ତି।

ରେଳ ମନ୍ତ୍ରୀ ସିବିଆଇକୁ ତଦନ୍ତ ଦେଇ ଚାଲାକି ଦେଖାଉଛନ୍ତି। ସିବିଆଇ ତଦନ୍ତ କେବଳ ଅପରାଧିକ ମାମଲାରେ ହୁଏ । ତାମାନେ ଏହି ମନ୍ତ୍ରାଳୟରେ କିଛି ଗୋଟେ ଅପରାଧିକ ଘଟଣା ହେଉଥିଲା। ଏଠି ନିଶ୍ଚୟ ଅପରାଧ ହୋଇଛି। ନହେଲେ କାହିଁକି, ସିବିଆଇ ତଦନ୍ତ ନିର୍ଦ୍ଦେଶ ଦେଲେ ବୋଲି ପ୍ରଶ୍ନ କରିଛନ୍ତି ପିସିସି ସଭାପତି?

ଆଗକୁ ସେ ଆହୁରି କହିଛନ୍ତି କି, ସୋରୋ ଡାକ୍ତରଖାନାରେ ୧୦ ଜଣ ଡାକ୍ତର ଆବଶ୍ଯକ ଅଛନ୍ତି, ହେଲେ ସେଠାରେ କାର୍ଯ୍ୟରତ ମାତ୍ର ୩ ଅଛନ୍ତି । ବାଲେଶ୍ବରରେ ରାତି ଡ୍ୟୁଟି ପାଇଁ ଡାକ୍ତର ନଥିଲେ । ରାଜ୍ଯରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ। ବିଭିନ୍ନ ହସ୍ପିଟାଲରେ ଡ଼ାକ୍ତରଙ୍କ ସହ ନର୍ସଙ୍କର ବି ଘୋର ଅଭାବ ରହିଛି। ରାଜ୍ୟ ସରକାର ଯେଉଁ ତତ୍ପରତା ଦେଖାଇବା କଥା ତାହା ଆମେ ଦେଖିବାକୁ ପାଇଲୁ ନାହିଁ ବୋଲି କହି ଉଦବେଗ ପ୍ରକାଶ କରିଛନ୍ତି ଶରତ ପଟ୍ଟନାୟକ।
ରେଳ ଦୁର୍ଘଟଣାକୁ ନେଇ ହୋଇଥିବା ଏହି ସାମ୍ବାଦିକ ସମ୍ମିଳନୀରେ ପିସିସି ସଭାପତି ଦୁର୍ଘଟଣାର ହୃଦୟ ବିଦାରକ ଦୃଶ୍ୟ ବର୍ଣ୍ଣନା କରୁଥିବା ବେଳେ ତାଙ୍କ ଆଖି ଲୁହରେ ଛଳ ଛଳ ହୋଇଯାଇଥିଲା। ଶେଷରେ ପ୍ରଦେଶ କଂଗ୍ରେସ ପକ୍ଷରୁ ମୃତକଙ୍କ ପ୍ରତି ନୀରବ ପ୍ରାର୍ଥନା କରାଯାଇଛି।