Author: suchanatv24x7

ପ୍ରଜାପିତା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟ କେବଳ ଏକ ସଂଗଠନ ନୁହେଁ,ଏହା ମହିଳାଙ୍କ ଦ୍ୱାରା ପରିଚାଳିତ ଏକ ସାମାଜିକ ଓ ଆଧ୍ୟାତ୍ମିକ ଅଭିଯାନ

ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ଆଜି ଭୁବନେଶ୍ୱର ଉପକଣ୍ଠ ତମାଣ୍ଡୋ ଦଶବାଟିଆ ଠାରେ ପ୍ରଜାପିତା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟର ‘‘ଡିଭାଇନ୍ ଲାଇଟ୍ ହାଉସ’’ ବା ଦୈବିକ ଆଲୋକ ଭବନ ପାଇଁ ଶିଳାନ୍ୟାସ କରିଛନ୍ତି । ଏହି ଅବସରରେ ସେ ସେମିନାର ଓ ସମ୍ମିଳନୀ ଆୟୋଜନ କରିବା ଲାଗି ଚଳିତ ବର୍ଷର ବିଷୟବସ୍ତୁ ‘‘ସକାରାତ୍ମକ ପରିବର୍ତ୍ତନର ବର୍ଷ’’ କାର୍ଯ୍ୟକ୍ରମକୁ ଶୁଭାରମ୍ଭ କରିଛନ୍ତି ।

ରାଷ୍ଟ୍ରପତି କାର୍ଯ୍ୟକ୍ରମ ଅବସରରେ ଉଦବୋଧନ ଦେଇ କହିଥିଲେ, ପ୍ରଜାପିତା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟ କେବଳ ଏକ ସଂଗଠନ ନୁହେଁ ବରଂ ଏହା ମହିଳାଙ୍କ ଦ୍ୱାରା ପରିଚାଳିତ ଏକ ସାମାଜିକ ଓ ଆଧ୍ୟାତ୍ମିକ ଅଭିଯାନ। ମାନବ ଜଗତ ପାଇଁ ଉଭୟ ଭୌତିକ ଏବଂ ଆଧ୍ୟାତ୍ମିକ ବିକାଶ ଜରୁରୀ । ସେ ଆହୁରି କହିଥିଲେ ଯେ, ପ୍ରଯୁକ୍ତି ପରିବର୍ତ୍ତନର ବାହକ ଏବଂ ସେହି ପରିବର୍ତ୍ତନକୁ ଅଣଦେଖା କରାଯାଇପାରିବ ନାହିଁ, କାରଣ ବିକାଶ ପାଇଁ ଏହା ଜରୁରୀ । ଶ୍ରୀମତୀ ମୁର୍ମୁ କହିଥିଲେ ଯେ, ଭୌତିକ ପରିବର୍ତ୍ତନ ଆମକୁ ଖୁସି ଦେଇପାରେ କିନ୍ତୁ ଆଧ୍ୟାତ୍ମିକ ମାର୍ଗରେ ଚାଲିଲେ ମାନସିକ ଶାନ୍ତି ମିଳିଥାଏ। ଧ୍ୟାନ ଏବଂ ଏକ ଶୃଙ୍ଖଳିତ ଜୀବନଶୈଳୀ ଜରିଆରେ ପ୍ରଜାପିତା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟ ଆଧ୍ୟତ୍ମିକତାର ମାର୍ଗ ଦେଖାଉଥିବାରୁ ରାଷ୍ଟ୍ରପତି ଖୁସି ବ୍ୟକ୍ତ କରିଥିଲେ।

ରାଷ୍ଟ୍ରପତି କହିଥିଲେ ଯେ, ବିଭିନ୍ନ ସମୟରେ ଅନେକ ନକାରାତ୍ମକ ଚିନ୍ତାଧାରା ଆମ ମାନସିକତାକୁ ପ୍ରଭାବିତ କରିଥାଏ। କିନ୍ତୁ ଆତ୍ମସମୀକ୍ଷା ନକରିବା କାରଣରୁ, ଆମେ ନକାରାତ୍ମକ ବିଚାରର ଶିକାର ହୋଇଥାଉ ବୋଲି ସେ କହିଥିଲେ। ଶ୍ରୀମତୀ ମୁର୍ମୁ ଆହୁରି କହିଥିଲେ ଯେ, ଆମ ଭିତରେ ଈର୍ଷା ଓ ଘୃଣା ଭାବନା ବଢ଼ିଚାଲିଛି । ‘‘ଆଜି ଆମ ଆଗରେ ସବୁଠୁ ବଡ଼ ଆହ୍ୱାନ ହେଉଛି, ନକାରାତ୍ମକ ଚିନ୍ତାଧାରାର ମୁକାବିଲା କରିବା ଏବଂ ସକାରାତ୍ମକତା ଦିଗରେ ଅଗ୍ରସର ହେବା,’’ ରାଷ୍ଟ୍ରପତି କହିଥିଲେ । ମାନବ ଜାତିକୁ ସଚେତନ କରିବା ଏବଂ ସକାରାତ୍ମକ ଦିଗରେ ଅଗ୍ରସର ହେବା ଲାଗି ଲୋକମାନଙ୍କୁ ସହାୟତା କରିବା ଲାଗି ସେ ବ୍ରହ୍ମାକୁମାରୀ ସଂଗଠନର ପ୍ରୟାସକୁ ପ୍ରଶଂସା କରିଥିଲେ ।
ଅଙ୍ଗରକ୍ଷୀ ବନ୍ଦୀ କଲେ ରାଷ୍ଟ୍ରପତିଙ୍କୁ

ପଶ୍ଚିମ ଆଫ୍ରିକାରେ ପ୍ରାୟ ଅଢେଇ କୋଟି ଜନସଂଖ୍ୟା ବିଶିଷ୍ଟ ଦେଶ ନାଇଜର ଗୁରୁବାର ହଠାତ ଚର୍ଚ୍ଚାରେ ଆସିଯାଇଛି। ନାଇଜରରେ ସେନା ଅଧିକାରୀ କ୍ଷମତା ଦଖଲ କରିଥିବା ନେଇ ଦାବି କରିଛନ୍ତି। ଅଙ୍ଗରକ୍ଷକମାନେ ହିଁ ରାଷ୍ଟ୍ରପତି ମହମ୍ମଦ ବେଜୋମଙ୍କୁ ବନ୍ଦୀ କରିଛନ୍ତି ଓ ଦେଶରେ ସାମରିକ ଶାସନର ଘୋଷଣା କରିଛନ୍ତି। ଏହି ଖବର ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଆମେରିକାଠାରୁ ନେଇ ଜାତିସଂଘ ପର୍ଯ୍ୟନ୍ତ ସମସ୍ତେ ଏବେ ନାଇଜର ରାଷ୍ଟ୍ରପତିଙ୍କୁ ସମର୍ଥନ କରିଛନ୍ତି। ପ୍ରାରମ୍ଭିକ ରିପୋର୍ଟ ଅନୁସାରେ, ରାଷ୍ଟ୍ରପତି ବେଜୋମଙ୍କ ଅଙ୍ଗରକ୍ଷକ ହିଁ ରାଷ୍ଟ୍ରପତି ଭବନରେ ତାଙ୍କୁ ଓ ତାଙ୍କର ପରିବାରକୁ ବନ୍ଦୀ କରାଯାଇଥିଲା।

ଏପରିକି ଭବନ ପର୍ଯ୍ୟନ୍ତ ଯିବା ଆସିବା କରିବାର ରାସ୍ତାକୁ ବନ୍ଦ କରିଦିଆଯାଇଛି, ଆଖପାଖରେ ଯେଉଁ ସମର୍ଥକ ଏକାଠି ହେଉଛନ୍ତି ତାଙ୍କୁ ଦୂରେଇ ରଖିବାକୁ ଚେଷ୍ଟା କରାଯାଇଛି। କମାଣ୍ଡର ଏମଦୋଉ ଏବ୍ରାମ୍ୟାନ୍ ଟିଭିକୁ ଲାଇଭ ଆସି ଦେଶରେ କ୍ଷମତା ଦଖଲ ହୋଇଥିବା ନେଇ ଘୋଷଣା କରିଛନ୍ତି, ତାଙ୍କ ସହିତ ୟୁନିଫର୍ମରେ ଥିବା ଅନେକ ଅଧିକାରୀ ଥିଲା ଯେଉଁମାନେ ଦେଶରେ ସାମରିକ ଶାସନ ନେଇ ଘୋଷଣା କରିଥିଲେ। ସେମାନେ କହିଥିଲେ ବର୍ତ୍ତମାନର ସରକାରକୁ ହଟାଇ ଦେଉଛି ଓ ଏବେ ପୁରା ଶାସନ ଆମ ଅଣ୍ଡରରେ ରହିଛି।

ଦେଶରେ ସରକାରମାନେ ସ୍ଥିତିକୁ ଖୁବ୍ ଖରାପ କରିଦେଇଥାଏ, ଏହି କାରଣରୁ ସବୁ ଜିନିଷକୁ ହାତକୁ ନେବା ଦରକାର ଥିଲା। ଉଲ୍ଲେଖନୀୟ ଯେ, ୨୦୨୦ ରୁ ଏପର୍ଯ୍ୟନ୍ତ ଆଫ୍ରିକୀୟ ଦେଶ ଗୁଡିକରେ ପ୍ରାୟ ୭ ଥର କ୍ଷମତା ଦଖଲ ହୋଇସାରିଛି ଓ ନାଇଜର ମଧ୍ୟ ଏବେ ଲିଷ୍ଟରେ ସାମିଲ ହୋଇ ସାରିଛି। ସ୍ଥାନୀୟ ରିପୋର୍ଟ ଅନୁସାରେ, ରାଷ୍ଟ୍ରପତି ମହମ୍ମଦ ବେଜୋମ ନିଜ ସାମରିକ କାଳରେ ନାଇଜରରେ ଅଲକାଏଦା ଓ ଏ ସମ୍ପର୍କିତ ସଂଗଠନ ଉପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ଏହା ପରେ ସେ ଟାର୍ଗେଟରେ ଥିଲେ।
ହାପିଭାଲି ଚିଲଡ୍ରେନ୍ ହୋମ ଡକାୟତି ଘଟଣାରେ ୪ ଗିରଫ

ଜି. ଉଦୟଗିରି ବାଡେନାଜୁ ସ୍ଥିତ ହାପିଭାଲି ଚିଲଡ୍ରେନ୍ ହୋମ ଡକାୟତି ଘଟଣାର ପ୍ରାୟ ୨୦ ଦିନ ପରେ ପୋଲିସ କାବଜାରେ ୪ ଡକାୟତ। ଗିରଫ ଚାରି ଯୁବକ ହେଲେ ପୁଷ୍ପକ ପ୍ରଧାନ,ରମେଶ ଚନ୍ଦ୍ର ପ୍ରଧାନ, ସୁନିବ ପ୍ରଧାନ, ବାମଦେବ ପ୍ରଧାନ। ସଂସ୍ଥାର ରାତି ଜଗୁଆଳି ପୁଷ୍ପକ ହିଁ ଭିଆଇଥିଲା ଡକାୟତିର ପ୍ଲଟ। ପୋଲିସ ଅଭିଯୁକ୍ତମାନଙ୍କୁ ଗିରଫ କରି ସେମାନଙ୍କ ନିକଟରୁ ଜବତ କରିଛି ଚାରୋଟି ମୋବାଇଲ୍,ସୁନା ଚେନ ଓ ଦୁଇଟି ବାଇକ୍। ଏମାନଙ୍କ ନାମରେ ପୂର୍ବରୁ ମଧ୍ୟ ବିଭିନ୍ନ ଥାନାରେ ବହୁ ମାମଲା ରହିଥିବା ସୂଚନା ଦେଇଛନ୍ତି ଥାନା ଅଧିକାରୀ।

ଏଠାରେ କହି ରଖୁଛୁ କି, ହାପି ଭାଲି ଚିଲଡ୍ରେନ୍ ହୋମ କାର୍ଯ୍ୟରତ ମହିଳା ବନବାସୀନି ରାଉତ ତାଙ୍କ ପରିବାର ସହ ସେଠାରେ ରୁହନ୍ତି। ଗତ ଦୁଇ ତାରିଖ ରାତି ୧୧ଟା ସମୟରେ ୪ ଯୁବକ ତାଙ୍କ ଘରେ ବନବାସୀନି ରାଉତଙ୍କ ବେକରୁ ସୁନା ଚେନ୍ ଓ ଦୁଇ ହଜାର ଟଙ୍କା ନେଇଯାଇଥିଲେ। ଏନେଇ ଜି ଉଦୟଗିରି ଥାନାରେ ବନବାସିନୀ ଅଭିଯୋଗ କରିଥିଲେ। ପୋଲିସ ଗିରଫ କରିଥିବା ଅଭୁଯୁକ୍ତଙ୍କ ଭିତରେ ଥିବା ପୁଷ୍ପକ ସେହି ସଂସ୍ଥାରେ ରାତ୍ରୀ ଜଗୁଆଳି ଭାବେ କାମ କରନ୍ତି।
ସରକାରୀ ସହାୟତା ଦାବିରେ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଲେ ଦିବ୍ୟାଙ୍କ ପରିବାର

ଦୁଇ ଦିବ୍ୟାଙ୍ଗ ପିଲାକୁ ଧରି ପାରାଦୀପ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ଫାଟକ ସମ୍ମୁଖରେ ଧାରଣାରେ ବସିଲେ ବାପା ମାଆ । ରହିବା ପାଇଁ ଘର ଖଣ୍ଡିଏ ଏବଂ ମୁନସିପାଲିଟିରେ ପରିବାରରୁ ଜଣଙ୍କୁ ନିଯୁକ୍ତି ଦାବି କରି ଧାରଣାରେ ବସି ରହିଛନ୍ତି । ସୂଚନା ମୁତାବକ ଜଗତସିଂହପୁର ଜିଲ୍ଲା ପାରାଦୀପ ଅଠରବାଙ୍କୀ ଗୋପୀନାଥ କଲୋନୀର ଏକ ଭଡା ଘରେ ଦୁଇ ଦିବ୍ୟାଙ୍ଗଙ୍କୁ ଧରି ରହିଆସୁଛନ୍ତି ଶିବଶଙ୍କର ନାୟକ ଏବଂ ନିରୁପାମା ନାୟକ । ଝିଅ ମାମାଲିଙ୍କୁ ୧୬ ବର୍ଷ ହୋଇଥିବା ବେଳେ ପୁଅ ସାନୁକୁ ୧୪ ବର୍ଷ । ପ୍ରଶାସନ ପକ୍ଷରୁ ଏହି ଦୁଇ ପିଲାଙ୍କୁ କେବଳ ଶାରିରୀକ ଅକ୍ଷମ ଭତ୍ତା ହିଁ ମିଳୁଛି । ହେଲେ ପରିବାରକୁ ଆଉ କୌଣସି ସୁବିଧା ସୁଯୋଗ ଯୋଗାଇ ଦିଆଯାଉ ନାହିଁ । ଘର ଖଣ୍ଡେ ନଥିବାରୁ ରାଜ୍ୟପାଳ ଗଣେଶୀଲାଲଙ୍କୁ ପରିବାର ଲୋକେ ଦେଖା କରିବା ପରେ ଘର ଖଣ୍ଡିଏ ଯୋଗାଇ ଦେବାକୁ ପ୍ରଶାସନକୁ ନିର୍ଦ୍ଦେଶ ଦିଆଯାଇଥିଲା । ହେଲେ ଦଉଡି ଦଉଡି ନୟାନ୍ତ ହେବା ପରେ ମଧ୍ୟ ଆଜିପର୍ଯ୍ୟନ୍ତ ଘରଟିଏ ମିଳିପାରିଲା ନାହିଁ । ବାଧ୍ୟ ହୋଇ ଦୁଇ ଦିବ୍ୟାଙ୍ଗ ଶିଶୁକୁ ଧରି ପାରାଦୀପ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି ।

ମାମାଲି ଓ ସୋନୁ ଜନ୍ମ ହେବାର ଦୁଇ ବର୍ଷ ପରେ ଦିବ୍ୟାଙ୍ଗ ହୋଇପଡିଥିବା ବାପା ମାଆ ଜାଣିବା ପରେ ଚିକିତ୍ସା ଲାଗି ବହୁ ଅର୍ଥ ଖର୍ଚ୍ଚ କରିଥିଲେ । ହେଲେ କୌଣସି ସୁଫଳ ମିଳିନଥିବା ତାଙ୍କ ବାପା ମା କହିଛନ୍ତି । ଅନ୍ୟପଟେ ପାରାଦୀପ ଏଡିଏମ ଲଗ୍ନଜିତ ରାଉତ କହିଛନ୍ତି, ସେହି ପରିବାରକୁ ସମସ୍ତ ସରକାରୀ ସହାୟତା ଯୋଗାଇ ଦିଆଯାଉଥିବା ବେଳେ ଭୂମିହୀନ ପଟ୍ଟା ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଛନ୍ତି ।
ତଳି ରୋଇବା ବେଳେ କାମୁଡିଲା ସାପ,ଚାଲିଗଲା ଯୁବକଙ୍କ ଜୀବନ

ଖଲ୍ଲିକୋଟ ବ୍ଲକ ଅନ୍ତର୍ଗତ ଡିମିରିଆ ପଞ୍ଚାୟତର ଏନ୍. ବରପଲ୍ଲୀ ଗ୍ରାମରେ ଅଭାବନୟ ଘଟଣା ଦେଖିବାକୁ ମିଳିଛି । ଗ୍ରାମର ଜଣେ ଯୁବକଙ୍କୁ ସାପ କାମୁଡିବାରୁ ତାଙ୍କ ମୃତ୍ୟୁ ହୋଇଥିବା ବେଳେ ଏବେ ସାରା ରାଜ୍ୟରେ ଏହି ସରିସୃପକୁ ନେଇ ସୃଷ୍ଟି ହୋଇଛି ଆତଙ୍କ। ସୂଚନା ମୁତାବକ, ବରପଲ୍ଲୀ ଗ୍ରାମର ପୁନିଆ ପ୍ରଧାନଙ୍କ ପୁଅ ସନିଆ ପ୍ରଧାନ ବିଲରେ ତଳି ରୋଇବା ସମୟରେ ଏକ ବିଷଧର ସାପ ତାଙ୍କୁ କାମୁଡି ଦେଇଥିଲା। ସାପ କାମୁଡିବା ପରେ ସନିଆଙ୍କ ଅବସ୍ଥା ଗୁରୁତର ହୋଇପଡିଥିଲା ।

ଗ୍ରାମବାସୀ ତୁରନ୍ତ ତାଙ୍କୁ ଖଲ୍ଲିକୋଟ ଡାକ୍ତରଖାନାକୁ ନେଇଯାଇଥିଲେ। କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ସ୍ଥାନୀୟ ପୋଲିସ୍ ଏକ ଅପମୃତ୍ୟୁ ମାମଲା ରୁଜୁ କରି ଶବକୁ ବ୍ୟବଚ୍ଛେଦ ପାଇଁ ପଠାଇ ଦେଇଛି।

ସେପଟେ ବର୍ଷା ପରେ ରାଜ୍ୟରେ ବଢିଚାଲିଛି ସାପ କାମୁଡା ଘଟଣା। ଦୈନିକ ଏକାଧିକ ସାପକାମୁଡା ଘଟଣା ସାମ୍ନାକୁ ଆସୁଛି। ଏହାକୁ ନେଇ ଲୋକେ ଭୟଭୀତ ହୋଇପଡିଛନ୍ତି।
ମା ଦକ୍ଷିଣ କାଳୀ ମନ୍ଦିରରେ କଳାକନା ବୁଲାଇଲେ ଦୁର୍ବୃତ୍ତ

ଏ କି କଳିକାଳ? ମନ୍ଦିରକୁ ବି ଛାଡୁ ନାହାନ୍ତି ଚୋର। ମନ୍ଦିରରେ ବୁଲାଇଲେ କଳାକନା। ଗଞ୍ଜାମ ଥାନା ଅଧୀନ ଦାମୋଦର ପୁର ଗ୍ରାମ କଲେଜ ରୋଡରେ ଥିବା ମା ଦକ୍ଷିଣ କାଳୀ ମନ୍ଦିରରୁ ବଡ଼ ଧରଣର ଚୋରି। ବିଳମ୍ବିତ ରାତିରେ ମନ୍ଦିର ତାଲା ଭାଙ୍ଗି ମାଙ୍କ ରୁପା ଓ ସୁନା ଅଳଙ୍କାର, ଦାନ ଟଙ୍କା ଚୋରି କରି ନେଇଛନ୍ତି ଦୁର୍ବୃତ୍ତ। ଏଥିସହ ମା ‘ଙ୍କ ଦାନ ହୁଣ୍ଡୀକୁ ଭାଙ୍ଗି ସେଥିରେ ଥିବା ପ୍ରାୟ ଦଶ ହଜାରରୁ ଊର୍ଦ୍ଧ୍ୱ ଟଙ୍କା ନେଇ ଯାଇଥିବା ଜଣାପଡିଛି । ଘଟଣା ସମ୍ପର୍କରେ ଗଞ୍ଜାମ ଥାନା ପୋଲିସ ସୂଚନା ପାଇ ତଦନ୍ତ ଆରମ୍ଭ କରିଛି। ଗଞ୍ଜାମରେ ଚୋରିର ଏହା ପ୍ରଥମ ଘଟଣା ନୁହେଁ। ଚାରିଦିନ ତଳେ ଷ୍ଟେସନ ଅଂଚଳର ଏକ ଦୋକାନରୁ ପ୍ରାୟ ପଚାଶରୁ ଷାଠିଏ ହଜାର ଟଙ୍କାର ଚୋରି ହୋଇଥିଲା। ସେହିପରି ମା ଦୁର୍ଗା ମନ୍ଦିର, ଜଗନ୍ନାଥ ମନ୍ଦିରରୁ ମଧ୍ୟ ଚୋରି ହୋଇଥିଲା। ଏସବୁ ଘଟଣାରେ ଏପର୍ଯ୍ୟନ୍ତ ପୋଲିସ ହାତ ଖାଲି। ପୁଣି ମା’ଦକ୍ଷିଣ କାଳୀଙ୍କ ମନ୍ଦିରରୁ ଚୋରି ଘଟଣା ସ୍ଥାନୀୟ ଅଞ୍ଚଳବାସୀଙ୍କ ଭିତରେ ଅସନ୍ତୋଷ ସୃଷ୍ଟି କରିଛି। ଗଞ୍ଜାମରେ ବାରମ୍ବାର ଚୋରି ହେଉଥିବା ବେଳେ ପୋଲିସ ପଦକ୍ଷେପ ନେଉନି କି ସହରରେ ପୋଲିସ ପାଟ୍ରୋଲିଂ ଗାଡି ବୁଲୁନି ବୋଲି ଅଭିଯୋଗ ହେଉଛି। ପୋଲିସର ସ୍ଥାଣୁତା ପାଇଁ ଏପରି ଘଟଣା ହେଉଥିବା ଅଭିଯୋଗ ସହ ସହରରେ ପାଟ୍ରୋଲିଙ୍ଗ କଡା କଡ଼ି କରିବା ପାଇଁ ଦାବି ହେଉଛି ।
ଧୋକା ଦେଲା ଜୀବନ ସାଥି, ଜୀବିତ ସ୍ୱାମୀଙ୍କୁ ସୋସିଆଲ ମିଡ଼ିଆରେ ଦିଆଯାଉଛି ଶ୍ରଦ୍ଧାଞ୍ଚଳି

ପ୍ରଥମେ ପ୍ରେମ, ତାପରେ ବିବାହ ଏବେ ଦେଖିବାକୁ ମିଳୁଛି ତାର କୁପରିଣାମ। ବିବାହର ୪ ବର୍ଷ ପରେ ସ୍ତ୍ରୀ ସବୁ ଗହଣା ଗାଣ୍ଠି, ବୁଲେଟ ଓ ଟଙ୍କା ନେଇ ଫେରାର ହୋଇଯାଇଥିବା ବେଳେ ସ୍ତ୍ରୀଙ୍କ ସମ୍ପର୍କୀୟ ସୋସିଆଲ ମିଡିଆରେ ପ୍ରେମିକରୁ ସ୍ୱାମୀ ବନିଥିବା ଭୀଷ୍ମଙ୍କୁ ଦେଉଛନ୍ତି ଶ୍ରଦ୍ଧାଞ୍ଜଳି। କେନ୍ଦ୍ରାପଡ଼ା ସଦର ଥାନା ଅଧୀନ ଡେରାବିଶ ବ୍ଲକ ଇନ୍ଦାଳ ପଞ୍ଚାୟତ ବାଲିସାହି ଗ୍ରାମରେ ଘଟିଛି ଏଭଳି ଦୁଃଖଦାୟକ ଘଟଣା । ବାଲିସାହି ଗ୍ରାମର ଭୀଷ୍ମ ରଂଜନ ରଥ ସ୍କୁଲ ଜୀବନରୁ ପ୍ରେମ କରୁଥିଲେ ଚାନ୍ଦୋଳ ଫାଣ୍ଡି ଅନ୍ତର୍ଗତ ଅର୍ତାମୂଳ ଗ୍ରାମର ଶୁଭଶ୍ରୀ ବଳଙ୍କୁ ।

୨୦୧୮ ମସିହାରେ ଶେଷରେ ଉଭୟ ପ୍ରେମ ବିବାହ କରିଥିଲେ। ତିନି ବର୍ଷରୁ ଅଧିକ ସମୟ ଦୁହେଁ ହସସୁଖରେ ଜୀବନ ବିତାଉଥିବା ବେଳେ ଗତ ବର୍ଷ ସେପ୍ଟେମ୍ବରରେ ସ୍ୱାମୀ ଭୀଷ୍ମଙ୍କ ସହ ପାଟିତୁଣ୍ଡ ଓ ମାଡପିଟ କରି ଘରୁ ଚାଲିଯାଇଥିଲେ ଶୁଭଶ୍ରୀ । ଆଉ ସାଙ୍ଗରେ ନେଇଯାଇଥିଲେ ଭୀଷ୍ମଙ୍କ କଷ୍ଟ ଅର୍ଜିତ ୮୦ ହଜାର ଟଙ୍କା, ସୁନା ଅଳଙ୍କାର ଓ ବୁଲେଟ। ଶୁଭଶ୍ରୀ ସ୍ୱାମୀଙ୍କୁ ଛାଡି ନିଜ ବାପା ମା ଓ ଭାଇଙ୍କ ପାଖକୁ ଯାଇଥିବା ଜାଣିବାକୁ ପାଇ ଭୀଷ୍ମ ସେଠାକୁ ଯାଇ ଯେତେ ବୁଝେଇଲେ ବି ନା ଶୁଣିଥିଲେ ଶୁଭଶ୍ରୀ ନା ତାଙ୍କ ପରିବାର ଲୋକେ। ତେଣୁ ନଭେମ୍ବରରେ ଭୀଷ୍ମ କଟକ ଫାମିଲି କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହାପରେ ଶୁଭଶ୍ରୀ ଭୀଷ୍ମଙ୍କ ବିରୋଧରେ ଥାନାରେ ଦାୟର କରିଥିଲେ ଯୌତୁକ ନିର୍ଯାତନା, ଯୌନ ଉତ୍ପୀଡନ ପରି ସାଙ୍ଘାତିକ ଦଫାରେ ମାମଲା । ଯାହାକୁ ନେଇ ପୋଲିସ ତାଙ୍କୁ ବହୁ ନିର୍ଯାତନା ଦେଇଥିଲା।

ଏସବୁ ସତ୍ତ୍ୱେ ଜାମିନରେ ଆସିଥିବା ଭୀଷ୍ମ ଶୁଭଶ୍ରୀଙ୍କୁ ଫେରାଇ ଆଣିବାକୁ ଚାହୁଁଛନ୍ତି। ହେଲେ ତାଙ୍କୁ ଶୁଭଶ୍ରୀଙ୍କ ପରିବାର ଲୋକେ ଧମକଚମକ ଦେଉଥିବା ଅଭିଯୋଗ ହେଉଛି । ତାଙ୍କ ଜୀବିତାବସ୍ଥାରେ ତାଙ୍କୁ ମୃତ ଦର୍ଶାଇ ଶୁଭଶ୍ରୀଙ୍କ ଭାଇ ସୋସିଆଲ ମିଡିଆରେ ଦେଉଛନ୍ତି ଶ୍ରଦ୍ଧାଞ୍ଜଳି। ଏମିତି କି ସେମାନଙ୍କ ଘରକୁ ଶୁଭଶ୍ରୀଙ୍କ ଧରମ ମାମୁଁ, ଭାଇ ଓ ଅନ୍ୟ କିଛି ଯୁବକ ଆସି ଧମକାଇଥିବା ଅଭିଯୋଗ କରିଛନ୍ତି ଭୀଷ୍ମଙ୍କ ମା।

ସେପଟେ ଧୋକା ଖାଇ ଭାଙ୍ଗି ପଡ଼ିଥିବା ଭୀଷ୍ମ ଓ ତାଙ୍କ ବିଧବା ମା ଏବେ ଭୟରେ ବିତାଉଛନ୍ତି ଜୀବନ। ତାଙ୍କୁ ତାଙ୍କ ସ୍ତ୍ରୀଙ୍କୁ ଫେରାଇ ଦେବାକୁ ନହେଲେ ଛାଡପତ୍ର ଦେଇ ଶୁଭଶ୍ରୀ ସାଙ୍ଗରେ ନେଇଯାଇଥିବା ସବୁ ସାମଗ୍ରୀ ଫେରାଇ ତାଙ୍କୁ ଶାନ୍ତିରେ ବଞ୍ଚିବାକୁ ଦେବାକୁ କରୁଛନ୍ତି ଗୁହାରୀ।
ନାଚୁ ନାଚୁ ମାଲିକାଣିଙ୍କୁ ନଚେଇ ଚାଲିଗଲା

ପେଶାରେ ଜଣେ ଡ୍ୟାନ୍ସର । କିନ୍ତୁ ତାଙ୍କ କାଣ୍ଡ ଯଦି ଆପଣ ଶୁଣିବେ ଆପଣ ମଧ୍ୟ ଚକିତ ହୋଇଯିବେ । ନିଜେ ନାଚୁ ନାଚୁ ମାଲିକାଣିଙ୍କୁ ମଧ୍ୟ ନଚେଇ ଦେଇ ଚାଲିଗଲା ଡ୍ୟାନ୍ସର। ମେଲୋଡି ପାଟି ମାଲିକାଣିଙ୍କ ଘରେ ରହି କଳାକନା ବୁଲାଇ ଫେରାର ହୋଇଯାଇଥିଲେ ଏହି ମହିଳା ଡ୍ୟାନ୍ସର। ଖାଲି ସେତିକି ନୁହେଁ ଚୋରୀ ଜିନିଷ ଫେରାଇବା ପାଇଁ ଫୋନ କଲେ କିନ୍ତୁ ନିଜେ ଗାଏବ ହୋଇଗଲେ । ଏଭଳି ଘଟଣା ଘଟିଛି ପାଟକୁରା ଥାନା ପୁନ୍ଦାଳ ସ୍ଥିତ ବାଦଲ ଡ୍ୟାନ୍ସ ଗ୍ରୁଫର ମାଲିକାଣି ମଞ୍ଜୁଲତା ନାୟକ ଙ୍କ ଘରେ । ସୁପ୍ରଭା ଦାସ(ପାପାଲୀ) ମଞ୍ଜୁଲତା ଙ୍କ ଘରେ ରହି ନୃତ୍ୟ ଶିଖୁଥିଲେ। ଗତ ଶୁକ୍ରବାର ଦିନ ସୁଯଗ ଦେଖି ଘର ଲୋକ ଙ୍କ ଆଖି ଆଢୁଆଳ ରେ ଗଡ଼ରେଜ ଭାଙ୍ଗି ପଈଁଚାଳିଶି ହଜାର ଟଙ୍କା, ଦୁଇଟି ମୋବାଇଲ ଫୋନ, ପିନ୍ଧା ବସ୍ତ୍ର ଓ ଡ୍ୟାନ୍ସ କଷ୍ଟିଉମ ଆଦି ନେଇ ନିଜ ପୁରୁଷ ବନ୍ଧୁ ସହ ଫେରାର ହୋଇଯାଇଥିବା ଅଭିଯୋଗ ହୋଇଛି । ପରେ ପୁଣି ଫୋନ କରି ଚୋରି କରିଥିବା ଜିନିଷ ଫେରାଇ ଦେବ ବୋଲି ମାଲିକ କୁ ପ୍ରତିଶୃତି ଦେଇ ଗରା ପୁର ଛକ କୁ ଡାକି ଥିଲା। କିନ୍ତୁ ସେ ସ୍ଥାନ କୁ ଯିବା ପରେ ସେଠାରେ କେହି ନଥିବା ବେଳ ପରବର୍ତୀ ମୁହୂର୍ତ୍ତ ରେ ମାଲିକାଣି ମଞ୍ଜୁଳତା ନାୟକ ସୁପ୍ରଭା ଓ ତାଙ୍କ ପୁରୁଷ ବନ୍ଧୁ ଙ୍କୁ ଶ୍ୟାମସୁନ୍ଦର ପୁର ଅଞ୍ଚଳରେ ପାଇଥିଲେ । ଏବଂ ସଙ୍ଗେ ସଙ୍ଗେ ସଦର ଥାନା ତାଙ୍କୁ ଜିମା ଦେଇଥିଲେ । ଏନେଇ ପୋଲିସ ଅଧିକ ତଦନ୍ତ କରୁଥିବା ଜଣା ପଡିଛି ।
ସ୍ୱାମୀର ଜୀବନ ନେଲା ସ୍ତ୍ରୀ

ସ୍ୱାମୀକୁ ଛୁରି ଭୁସି ହତ୍ୟା କଲା ସ୍ତ୍ରୀ । ସ୍ତ୍ରୀ ଓ ପୁଅକୁ ଗଛରେ ବାନ୍ଧି ମାଡ ମାରିଲେ ଗ୍ରାମବାସୀ । ୨ଜଣଙ୍କୁ ଉଦ୍ଧାର କରି ପୋଲିସ ଅଟକ ରଖିଛି । ତେବେ ଗ୍ରାମାଞ୍ଚଳ ଥାନା ବାଣିତିଆ ପଞ୍ଚାୟତ ମହଲା ସାହିରେ ଅଘଟଣ ।

ସୂଚନା ଅନୁଯାୟୀ, ସୁରେଶ ଲାଲ ବାଣିତିଆ ପଞ୍ଚାୟତ ମହଲା ସାହିର ସଞ୍ଜୁଲତାଙ୍କୁ ବାହା ହୋଇ ଘରଜ୍ବାଇଁ ଭାବେ ସେଠାରେ ରହୁଥିଲା । ହେଲେ ପତିପତ୍ନୀଙ୍କ ଭିତରେ ଅନେକ ସମୟରେ ଝଗଡ଼ା ହୁଏ । ଗତକାଲି ରାତିରେ କଳହ ତୀବ୍ର ରୂପ ନେଇଥିଲା । ସ୍ତ୍ରୀ ସଞ୍ଜୁଲତା ସ୍ୱାମୀ ସୁରେଶକୁ ଛୁରିରେ ଭୁସି ଦେଇଥିଲା । ଏଥିରେ ତାକୁ ନାବାଳକ ପୁଅ ସହଯୋଗ କରିଥିଲା । ଏହାଫଳରେ ଘଟଣାସ୍ଥଳରେ ହିଁ ସୁରେଶର ମୃତ୍ୟୁ ଘଟିଥିଲା ।

ଗ୍ରାମବାସୀଙ୍କ କହିବା ଅନୁଯାୟୀ ସୁରେଶ ମହଲାଙ୍କ ସ୍ତ୍ରୀ ସଂଜୁଲତା ମହଲା ଓ ନାବାଳକ ପୁଅ ସହ ରହୁଥିଲେ । ଆଜି ଭୋରୁ ଭୋରୁ ସୁରେଶ ଘର ଭିତରୁ ଚିତ୍କାର କରି ବାହାରକୁ ଦୌଡ଼ିଥିଲେ । ପରେ ସେ ରାସ୍ତାରେ ପଡ଼ି ଯାଇଥିଲେ । ଲୋକେ ତାଙ୍କ ଦେହରେ ଦୁଇଟି କ୍ଷତ ଚିହ୍ନ ଦେଖିଥିଲେ । ପରେ ସୁରେଶର ମୃତ୍ୟୁ ହୋଇଯାଇଥିଲା । ଏହି ଘଟଣା ଜଣାଯିବା ପରେ ଗ୍ରାମବାସୀ ଉଭୟ ମା ଓ ପୁଅକୁ ଗଛରେ ବାନ୍ଧି ଦେଇ ପୁଲିସକୁ ଖବର ଦେଇଥିଲେ ।

ଓଡିଶା କ୍ଷୁଦ୍ରଶିଳ୍ପ ନିଗମ ପକ୍ଷରୁ ରାଜ୍ୟ ସରକାରଙ୍କୁ ୫ କୋଟି ଟଙ୍କାର ଲାଭାଂଶ

ଓଡିଶା କ୍ଷୁଦ୍ରଶିଳ୍ପ ନିଗମ ପକ୍ଷରୁ ରାଜ୍ୟ ସରକାରଙ୍କୁ ୫ କୋଟି ଟଙ୍କାର ଲାଭାଂଶ ପ୍ରଦାନ କରାଯାଇଛି । ରାଜ୍ୟ ଶିଳ୍ପ ମନ୍ତ୍ରୀ ଶ୍ରୀ ପ୍ରତାପ କେଶରୀ ଦେବ, କ୍ଷୁଦ୍ର ଶିଳ୍ପ ନିଗମର ଅଧ୍ୟକ୍ଷ ଶ୍ରୀ ଚିନ୍ମୟ ସାହୁ, ପରିଚାଳନା ନିର୍ଦ୍ଦେଶକ ଶ୍ରୀ ଦୀପଙ୍କର ମହାପାତ୍ର ପ୍ରମୁଖ ଆଜି ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରି ୨୦୧୯-୨୦, ୨୦୨୦-୨୧ ଓ ୨୦୨୧-୨୨ ତିନି ବର୍ଷର ଲାଭାଂଶ ବାବଦରେ ୫ କୋଟି ୨ ଲକ୍ଷ ୬୬ ହଜାର ଟଙ୍କାର ଲାଭାଂଶ ପ୍ରଦାନ କରିଛନ୍ତି ।

ଓଡିଶା କ୍ଷୁଦ୍ରଶିଳ୍ପ ନିଗମ ଲିମିଟେଡ ଏକ ରୌପ୍ୟ ବର୍ଗର ସାର୍ବଜନୀକ କ୍ଷେତ୍ରର ରାଜ୍ୟ ସରକାରଙ୍କ ଉଦ୍ୟୋଗ, ଯାହାକି କ୍ଷୁଦ୍ରଶିଳ୍ପର ପ୍ରତିଷ୍ଠା, ପ୍ରଚାର ଏବଂ ପ୍ରସାର ନିମନ୍ତେ ଅଂଗୀକାରବଦ୍ଧ । ସରକାରଙ୍କ ନିମନ୍ତେ ବିଭିନ୍ନ ସାମଗ୍ରୀର କ୍ରୟ କରିବାରେ ଏହା ପ୍ରମୁଖ ଭୂମିକା ଗ୍ରହଣ କରିଛି । ଏତଦ୍‌ବ୍ୟତୀତ ବିଭିନ୍ନ ଦୁର୍ଗମ ଅଞ୍ଚଳରେ ବିଦ୍ୟୁତିକରଣ ତଥା ନିର୍ମାଣ କାର୍ଯ୍ୟରେ ନିଜର ଅବଦାନ ମଧ୍ୟ ଦେଇଆସୁଅଛି।


ଏତଦ୍ବ୍ୟତୀତ କମ୍ପାନୀ ମାନଙ୍କର ସାମାଜିକ ଦାୟିତ୍ବ ପାଣ୍ଠିର ସୁବିନିଯୋଗରେ ସ୍କୁଲ ନିର୍ମାଣ, ପଶୁଧନ କେନ୍ଦ୍ର ନିର୍ମାଣ, ସ୍କୁଲ ଉପକରଣ କ୍ରୟ, ଜଳ ବିଶୋଧନ ଉପକରଣ କମ୍ପ୍ୟୁଟର କ୍ରୟ, ଫ୍ରିଜ ତଥା ବିଭିନ୍ନ କ୍ରୟ ମୋ ସ୍କୁଲ ଅଭିଯାନ। ଆଜି ବିଭିନ୍ନ କଲ୍ୟାଣ ଓ ବିକାଶ କାର୍ଯ୍ୟକ୍ରମ ମଧ୍ୟ ନିଗମ ପକ୍ଷରୁ କରାଯାଉଅଛି ।