ଭିଜିଲାନ୍ସ ଜାଲରେ ଚାନ୍ଦିପୁର ଥାନା ଅଧିକାରୀଙ୍କ ସହ ଏଏସଆଇ

ଭିନିଲାନ୍ସ ଜାଲରେ ବାଲେଶ୍ଵର ଜିଲ୍ଲା ଚାନ୍ଦିପୁର ଥାନା ଅଧିକାରୀଙ୍କ ସହ ଜଣେ ଏଏସଆଇ । ଲାଞ୍ଚ ନେବା ମାମଲାରେ ଭିଜିଲାନ୍ସ ଆଇଆଇସି ଗଣେଶ୍ୱର ପ୍ରଧାନ ଓ ଏଏସଆଇ ପ୍ରଦୀପ କୁମାର ମହାନ୍ତିଙ୍କୁ ହେପାଜତକୁ ନେଇଛି। ଚାନ୍ଦିପୁର ଥାନା ଅଧୀନରେ ଥିବା ଏକ ସରକାରୀ ବିଦେଶୀ ମଦ ଦୋକାନରୁ ମାସିକିଆ ବଟି ହିସାବରେ ଦୁଇ ପୋଲିସ ବାବୁ ୫୦ ହଜାର ଟଙ୍କା ଦାବି କରିଥିଲେ। ସରକାରୀ ବିଦେଶୀ ମଦ ଦୋକାନର ମାଲିକ ଏହାକୁ ପ୍ରତ୍ୟାଖାନ କରିଥିଲେ। ମାତ୍ର ସ୍ଥାନୀୟ ପୋଲିସର ତାଙ୍କ ଉପରେ ବିଭିନ୍ନ ଉପାୟରେ ଚାପ ପକାଇଥିଲେ। ପୋଲିସର ଏପରି ଚାପରେ ମଦ ଦୋକାନ ମାଲିକ ୫୦ ହଜାର ଟଙ୍କା ଦେବା ପାଇଁ ରାଜି ହୋଇଥିଲେ ମଧ୍ୟ ଭିଜିଲାନ୍ସକୁ ଏନେଇ ସୂଚିତ କରିଦେଇଥିଲେ। ପୂର୍ବ ଯୋଜନା ମୁତାବକ ମଦ ଦୋକାନ ମାଲିକ ଦୁଇ ପୋଲିସ ବାବୁଙ୍କୁ ନିର୍ଦ୍ଧାରିତ ପରିମାଣର ଟଙ୍କା ଦେବା ବେଳକୁ ଭିଜିଲାନ୍ସ ମାଡି ବସିଥିଲା ଉଭୟଙ୍କୁ।

ତେବେ ଚାନ୍ଦିପୁର ଥାନାରେ ଥିବା ପୂର୍ବତନ ଆଇଆଇସି ନିଶାସକ୍ତ ଅବସ୍ଥାରେ ନିଜ କାର ଦୁର୍ଘଟଣା ଘଟାଇବା ଯୋଗୁଁ ତାଙ୍କୁ ବଦଳି କରାଯାଇ ଟ୍ରାଫିକ ଥାନା ଅଧିକାରୀ ଥିବା ଗଣେଶ୍ୱର ପ୍ରଧାନଙ୍କୁ ଚାନ୍ଦିପୁର ଥାନାକୁ ପଠାଯାଇଥିଲା। ମାତ୍ର ମାସିଟିଏ ନ ଯାଉଣୁ ଥାନା ଅଧିକାରୀ ଶ୍ରୀ ପ୍ରଧାନ ଲାଞ୍ଚ ନେବା ମାମଲାରେ ଛନ୍ଦି ହୋଇ ଯାଇଛନ୍ତି। ଏହାସହ ଲାଞ୍ଚ ନେବାରେ ସହଯୋଗ କରିଥିବା ଏଏସଆଇ ପ୍ରଦୀପ କୁମାର ମହାନ୍ତି ଓରଫ ବଳୀ ମଧ୍ୟ ଭିଜିଲାନ୍ସ ହାତରେ ଧରା ପଡିଛନ୍ତି। ଅନ୍ୟପଟେ ବାଲେଶ୍ଵର ଏସ୍ପି ସାଗରିକା ନାଥ ଜିଲ୍ଲାରେ ଅପରାଧ ନିୟନ୍ତ୍ରଣ କରିବାରେ ବେଶ ସକ୍ଷମ ହେଉଥିବା ବେଳେ ତାଙ୍କ ଅଧିନସ୍ଥ କର୍ମଚାରୀଙ୍କ ଏତାଦୃଶ କାର୍ଯ୍ୟ ପୁରା ପୋଲିସ ବିଭାଗର ସ୍ଵଛତା ପ୍ରତି ଆଙ୍ଗୁଳି ନିର୍ଦ୍ଦେଶ କରୁଛି। ଏନେଇ ଭିଜିଲାନ୍ସ ବିଭାଗ ପକ୍ଷରୁ କୌଣସି ସୂଚନା ଦିଆଯାଇ ନଥିବା ବେଳେ ଦୁଇ ପୋଲିସ ବାବୁ ଗିରଫ ହୋଇ ପାରନ୍ତି ବୋଲି ଅନୁମାନ କରାଯାଉଛି।