ଜାତୀୟ ରାଜଧାନୀରେ ଉତ୍କଟ ହେଉଛି ବାୟୁ ପ୍ରଦୂଷଣ। ସବୁଆଡେ ଭରି ରହିଛି ଧୂଳି ଓ ଧୂଆଁ। ବାୟୁର ମାନ ଏପରି ନିମ୍ନଗାମୀ ହୋଇଛି କି ଶ୍ବାସକ୍ରିୟାରେ ସମସ୍ୟା ହେଲାଣି। ଆଜି ସକାଳୁ ଦିଲ୍ଲୀର ଏୟାର କ୍ବାଲିଟି ଇଣ୍ଡେକ୍ସ ଥିଲା ୪୫୩, ଯାହା ଜୀବ ଜଗତ ପାଇଁ ଘାତକ ବୋଲି କୁହାଯାଉଛି। ଏପରି ସ୍ଥିତିରେ ସରକାର ସ୍କୁଲ ସବୁକୁ ଆସନ୍ତା ୧୦ ତାରିଖ ଯାଏଁ ବନ୍ଦ କରିବାକୁ ଘୋଷଣା କରିଛନ୍ତି। ପ୍ରାଥମିକ ସ୍କୁଲ ସମ୍ପୂର୍ଣ୍ଣ ବନ୍ଦ ହୋଇଥିବା ବେଳେ ଷଷ୍ଠରୁ ଦ୍ବାଦଶ ପର୍ଯ୍ୟନ୍ତ ପିଲାଙ୍କ ପାଠପଢା ଅନଲାଇନରେ କରାଇବାକୁ ଦିଲ୍ଲୀ ଶିକ୍ଷା ବିଭାଗ ନିର୍ଦେଶ ଦେଇଥି। ।
ଦିଲ୍ଲୀ ଶିକ୍ଷା ମନ୍ତ୍ରୀ ଅତିଶି ଏ ବିଷୟରେ ସୂଚନା ଦେଇଛନ୍ତି। ଦୁଇ ଦିନ ପୂର୍ବରୁ ଦିଲ୍ଲୀରେ ପ୍ରଦୂଷଣ ବୃଦ୍ଧି ହେତୁ ନଭେମ୍ବର ୫ ପର୍ଯ୍ୟନ୍ତ ପଞ୍ଚମ ଶ୍ରେଣୀ ଯାଏ ସମସ୍ତ ସ୍କୁଲ ବନ୍ଦ ରହିଥିଲା। ବର୍ତ୍ତମାନ ଏହାକୁ ୧୦ ନଭେମ୍ବର ପର୍ଯ୍ୟନ୍ତ ବଢାଇ ଦିଆଯାଇଛି। ଦିଲ୍ଲୀରେ ବାୟୁ ପ୍ରଦୂଷଣସ୍ତର ବିପଜ୍ଜନକ ସ୍ଥିତିରେ ପହଞ୍ଚିଛି। ଦିଲ୍ଲୀ-ଏନସିଆରର ଅନେକ ସ୍ଥାନରେ ଏକ୍ୟୁଆଇ ୪୫୦ ଅତିକ୍ରମ କଲାଣି। ସେଣ୍ଟ୍ରାଲ୍ ପ୍ରଦୂଷଣ ନିୟନ୍ତ୍ରଣ ବୋର୍ଡ ର ତଥ୍ୟ ଅନୁଯାୟୀ, ଆଜି ସକାଳେ ଦିଲ୍ଲୀରେ ଏକ୍ୟୁଆଇ ୪୫୩ ଥିବା ରେକର୍ଡ କରାଯାଇଛି, ଯାହା ଗୁରୁତର ଶ୍ରେଣୀରେ ଆସୁଛି।
ସ୍ୱିସ୍ ଗ୍ରୁପ୍ ତଥ୍ୟ ଅନୁଯାୟୀ ରାଜଧାନୀ ଦିଲ୍ଲୀ, କୋଲକାତା ଏବଂ ମୁମ୍ବାଇ ଆଜି ବିଶ୍ୱରେ ସବୁଠୁ ପ୍ରଦୂଷିତ ସହର । ସକାଳେ ନୂଆଦିଲ୍ଲୀ ପୁନର୍ବାର ଏକ୍ୟୁଆଇ ୪୮୩ ସହିତ ରିଅଲ୍ ଟାଇମ୍ ତାଲିକାରେ ଶୀର୍ଷରେ ଅଛି। ଏହା ପଛକୁ ଅଛି ଲାହୋରରେ ଏକ୍ୟୁଆଇ ୩୭୧ ଥିବା ରେକର୍ଡ କରାଯାଇଛି। ସେହିପରି କୋଲକାତାର ୨୦୬ ଏବଂ ମୁମ୍ବାଇର ୧୬୨ ଏକ୍ୟୁଆଇ ରେକର୍ଡ ହୋଇଛି।