ମହାରାଷ୍ଟ୍ରର ରାୟଗଡ ଜିଲ୍ଲାର ଏକ ଆଦିବାସୀ ଗ୍ରାମରେ ପାହାଡ ଭୁଶୁଡ଼ିବା କାରଣରୁ ପ୍ରାୟ ୪୦ ଟି ଘର ଆବର୍ଜନା ତଳେ ପୋତି ହୋଇଯାଇଥିବାବେଳେ ଅନ୍ୟୂନ ୫ଜଣ ବ୍ୟକ୍ତିଙ୍କର ମୃତ୍ୟୁ ଘଟିଥିବା ବେଳେ ଆହୁରି ଅନେକ ଘଟଣାସ୍ଥଳରେ ଫସି ରହିଥିବା କଥା ‘ଏନ୍ଡିଆର୍ଏଫ୍’ କହିଛି। ୧୦୦ ରୁ ଅଧିକ ଲୋକ ନିଖୋଜ ଅଛନ୍ତି। ମହାରାଷ୍ଟ୍ରରେ ପ୍ରବଳ ବର୍ଷା ଲାଗି ରହିଛି । ମହାରାଷ୍ଟ୍ରର ରାୟଗଡ ଜିଲ୍ଲାରେ ବୁଧବାର (ଜୁଲାଇ ୧୯) ବିଳମ୍ବିତ ରାତିରେ ଭୂସ୍ଖଳନ ଘଟିବା ପରେ ୩୦ ରୁ ଅଧିକ ପରିବାର ଫସି ରହିଥିବାର ଆଶଙ୍କା ରହିଛି, ଯେଉଁଠାରେ ପ୍ରାୟ ୪୬ ଟି ଆଦିବାସୀ ବସ୍ତି ଅବସ୍ଥିତ।
ଗଣମାଧ୍ୟମକୁ ରାୟଗଡ଼ ପୁଲିସ କହିଛି, ଏପର୍ଯ୍ୟନ୍ତ ୨୨ଜଣ ଲୋକଙ୍କୁ ଉଦ୍ଧାର କରାଯାଇଛି। ଅନେକ ଲୋକ ପୋତି ହୋଇ ପଡ଼ିଥିବା ଆଶଙ୍କା କରାଯାଉଛି। ବର୍ତ୍ତମାନ ପୁଲିସ ଏବଂ ଜିଲ୍ଲା ପ୍ରଶାସନର ଶତାଧିକ କର୍ମଚାରୀ ଉଦ୍ଧାର କାର୍ଯ୍ୟରେ ଲାଗିଛନ୍ତି। ଆମେ ‘ଏନ୍ଡିଆର୍ଏଫ୍’, ସ୍ଥାନୀୟ ଜନସାଧାରଣ ଏବଂ କେତେକ ‘ଏନ୍ଜିଓ’ରୁ ସହାୟତା ପାଉଛୁ।
ଉଦ୍ଧାର କାର୍ଯ୍ୟ ସମୀକ୍ଷା କରିବା ଲାଗି ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଘଟଣାସ୍ଥଳରେ ପହଞ୍ଚିଛନ୍ତି। ସେହିପରି, ଉପମୁଖ୍ୟମନ୍ତ୍ରୀ ଅଜିତ ପାୱାର୍ ମଧ୍ୟ ରାୟଗଡ଼ରେ ଚାଲିଥିବା ଉଦ୍ଧାର କାର୍ଯ୍ୟ ସମୀକ୍ଷା ଲାଗି ଏମର୍ଜେନ୍ସି କଣ୍ଟ୍ରୋଲ୍ ରୁମ୍ରେ ପହଞ୍ଚିଛନ୍ତି।
ଭୂସ୍ଖଳନ ଯୋଗୁଁ ମୃତ୍ୟୁବରଣ କରିଥିବା ଲୋକଙ୍କ ପ୍ରତି ସମବେଦନା ବ୍ୟକ୍ତ କରି ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନବୀସ କହିଛନ୍ତି, ଗତରାତିରୁ ମୁଁ ସ୍ଥାନୀୟ ପ୍ରଶାସନ ସହିତ ଯୋଗାଯୋଗ ରଖି ଘଟଣା ସଂକ୍ରାନ୍ତରେ ସୂଚନା ପାଉଛି। ପ୍ରବଳ ବର୍ଷା ଓ ଅନ୍ଧାର ଯୋଗୁଁ ପ୍ରଥମେ ରିଲିଫ୍ କାର୍ଯ୍ୟାରେ ବ୍ୟାଘାତ ସୃଷ୍ଟି ହୋଇଥିଲା। କିନ୍ତୁ, ଏବେ ଦ୍ରୁତ ବେଗରେ ଉଦ୍ଧାର କାର୍ଯ୍ୟ ଚାଲିଛି। ଆହତମାନଙ୍କ ଚିକିତ୍ସା ନିମନ୍ତେ ମଧ୍ୟ ବ୍ୟବସ୍ଥା କରାଯାଇଛି।
ପ୍ରଶାସନିକ ଅଧିକାରୀ କହିଛନ୍ତି ଯେ ଏହି ଦୁର୍ଘଟଣାରେ କେବଳ ଦୁଇ-ଚାରି ଘର ଉଦ୍ଧାର ହୋଇଛି ଏବଂ ଗାଁରେ ନିର୍ମିତ ବିଦ୍ୟାଳୟରେ କୌଣସି କ୍ଷୟକ୍ଷତି ହୋଇନାହିଁ। ଏହି ଘଟଣା ରାୟଗଡର ଖାଲାପୁର ଅଞ୍ଚଳଠାରୁ ମାତ୍ର ୬ କିଲୋମିଟର ଦୂରରେ ଘଟିଛି। ଖାଲାପୁର ଅଞ୍ଚଳରେ ହିଁ ମୋର୍ବେ ଡ୍ୟାମ ନିର୍ମାଣ କରାଯାଇଛି ଯାହାକି ନବୀ ମୁମ୍ବାଇକୁ ଜଳ ଯୋଗାଇଥାଏ |