୧୦ ବର୍ଷର କୁନିଝିଅ ୧୦ ବର୍ଷ ହେଲା ଖାଇନାହାନ୍ତି ଭାତ

ଭଦ୍ରକ ଜିଲ୍ଲା ଭଣ୍ଡାରପୋଖରୀରୁ ଆସିଛି ଏକ ଅଦ୍ଭୁତ ଖବର। କେବଳ ମୁଢି ଖାଇ ବଞ୍ଚିଛନ୍ତି। ଖାଲି ବଞ୍ଚି ନାହାନ୍ତି, ବରଂ ସମ୍ପୂର୍ଣ୍ଣ ସୁସ୍ଥ ଓ ସବଳ ରହିଛନ୍ତି। ସବୁଠାରୁ ମଜାଦାର କଥା ହେଉଛି, ଝିଅ ଭାତ ଖାଉନଥିବାରୁ ସ୍କୁଲରେ ମଧ୍ୟାହ୍ନ ଭୋଜନରେ ତାଙ୍କ ପାଇଁ ମୁଢିର ବ୍ୟବସ୍ଥା କରାଯାଇଛି। ବୟସ ୧୦ବର୍ଷ ,ନାଁ ଲଷ୍ମୀପ୍ରିୟା ଭଣ୍ଡାରିପୋଖରୀ ବ୍ଲକ୍‌ ମାଳଦା ପଞ୍ଚାୟତର ଚତୁର୍ଭୁଜପୁର ଗାଁ। ଏହି ଗାଁର ମକରା ମାଝୀ ଓ କମଳିନୀଙ୍କ ସାନ ଝିଅ ହେଉଛନ୍ତି ଲକ୍ଷ୍ମୀପ୍ରିୟା। ଜନ୍ମ ପରେ ମାଆ କ୍ଷୀର ଖାଉଥିଲେ। ଧୀରେ ଧୀରେ ଲକ୍ଷ୍ମୀପ୍ରିୟା ବଢ଼ିଲେ। ଝିଅ ବଢ଼ିଲା ପରେ ଭାତ, ଡାଲି, ରୁଟି ଓ ଅନ୍ୟାନ୍ୟ ଖାଦ୍ୟ ଖାଇବାକୁ ଦେଇଥିଲେ ମାଆ। ହେଲେ ସେଥିପ୍ରତି ତାଙ୍କର ସାମାନ୍ୟତମ ରୁଚି ନଥିଲା। ଭାତ ଓ ଡାଲି ବଦଳରେ ପାଖରେ ଥିବା ମୁଢି ଖାଇଥିଲେ। ଯେଉଁଥିପାଇଁ ବାପା-ମାଆ ଅଡୁଆରେ ପଡ଼ି ଯାଇଥିଲେ।

ମୁଢିଠାରୁ ଦୂରେଇବା ପାଇଁ ଲକ୍ଷ୍ମୀପ୍ରିୟାଙ୍କୁ ନେଇ ତାଙ୍କ ବଡ଼ ଭଉଣୀଙ୍କ ଘରେ ଛାଡ଼ି ଦେଇଥିଲେ ପରିବାର ଲୋକ। ସେଠାରେ ତାଙ୍କୁ ଭାତ ଓ ଅନ୍ୟାନ୍ୟ ତରକାରି ଖାଇବାକୁ ଦିଆଯାଇଥିଲା। ହେଲେ ସେ ଖାଇନଥିଲେ। ତା’ପରେ ପରିବାର ଲୋକେ ଲକ୍ଷ୍ମୀପ୍ରିୟାଙ୍କୁ ତାଙ୍କ ମାଉସୀ ଓ ପିଉସୀଙ୍କ ଘରେ ଛାଡ଼ିଥିଲେ। ସେଠାରେ ମଧ୍ୟ ଭାତ ଓ ତରକାରୀ ଖାଇନଥିଲେ ଲକ୍ଷ୍ମୀପ୍ରିୟା। କେବଳ ମୁଢି ଖାଇବାକୁ ମାଗିଥିଲେ। ତେଣୁ ବାଧ୍ୟ ହୋଇ ଲକ୍ଷ୍ମୀପ୍ରିୟାଙ୍କୁ ମୁଢି ଖାଇବାକୁ ଦେଇଥିଲେ।

ଲକ୍ଷ୍ମୀପ୍ରିୟାଙ୍କ ମାଆ କମଳିନୀ କହିଛନ୍ତି, ଆମେ ଗରିବ ଲୋକ। ପ୍ରତି ଦିନ ମୁଢି କେଉଁଠୁ ଆଣିବୁ? ଯେଉଁଦିନ ଘରେ ମୁଢି ନଥିବ, ତାକୁ ଭାତ ଖାଇବାକୁ ଦେଲେ ସେ ଖାଇବ ନାହିଁ। ଲୁଣ ଓ ଚିନିକୁ ପାଣି କରି ପିଇଦେଇ ରହିଯିବ। ଯେତେ କହିଲେ ମଧ୍ୟ ଭାତ ଖାଇବନାହିଁ। ଦିନେ କି ଦୁଇ ଦିନ ନୁହେଁ, ଦରକାର ପଡ଼ିରୁ ଦୁଇରୁ ତିନି ପର୍ଯ୍ୟନ୍ତ ସେ ଲୁଣ ଓ ଚିନି ପାଣି ପିଇ ରହି ଯିବ ବୋଲି କମଳିନୀ କହିଛନ୍ତି। ସେପଟେ ଲକ୍ଷ୍ମୀପ୍ରିୟାର ବୟସ ବଢିବା ସଙ୍ଗେ ସଙ୍ଗେ ଅଭ୍ୟାସରେ ପରିବର୍ତ୍ତନ ହେଉନଥିବାରୁ ପରିବାର ଲୋକେ ତାଙ୍କ ଡାକ୍ତରୀ ପରୀକ୍ଷା କରିଥିଲେ। ହେଲେ ଲକ୍ଷ୍ମୀପ୍ରିୟା ସଂପୂର୍ଣ୍ଣ ସୁସ୍ଥ ଥିବା ଡାକ୍ତର କହିବା ପରେ ତାଙ୍କ ମୁଢି ଖିଆ ଅଭ୍ୟାସ ଅବ୍ୟାହତ ରହିଛି।

ଲକ୍ଷ୍ମୀପ୍ରିୟାଙ୍କୁ ଏବେ ୧୦ ବର୍ଷ ହେଲାଣି। ସେ ଚତୁର୍ଭୁପୁର ସରକାରୀ ପ୍ରାଥମିକ ବିଦ୍ୟାଳୟରେ ଚତୁର୍ଥ ଶ୍ରେଣୀରେ ପାଠ ପଢ଼ୁଛନ୍ତି। ଅନ୍ୟ ପିଲାଙ୍କ ପରି ସ୍କୁଲ ଯାଉଛନ୍ତି। ପାଠ ପଢ଼ୁଛନ୍ତି। ହେଲେ ମଧ୍ୟାହ୍ନ ଭୋଜନ ଖାଉନାହାନ୍ତି। ତା’ ବଦଳରେ ସ୍କୁଲ ପକ୍ଷରୁ ତାଙ୍କୁ ମୁଢି ଖାଇବାକୁ ଦେଉଛନ୍ତି। ତା’ ସାଙ୍ଗକୁ ଫଳ, ବିସ୍କୁଟ୍‌ ଓ ପାଉଁରୁଟି ଆଦି ମଧ୍ୟ ଖାଇବାକୁ ଦିଆଯାଉଛି।