ନୟାଗଡ଼ ଜିଲ୍ଲାର ଦଶପଲ୍ଲା ଅଞ୍ଚଳରେ ଘଟିଥିବା ଭୟାବହ ବସ୍ ଦୁର୍ଘଟଣା ସମଗ୍ର ରାଜ୍ୟକୁ ଶୋକାକୁଳ କରିଦେଇଛି। ପୀଠାଖାଇ ଘାଟି ନିକଟରେ ଘଟିଥିବା ଏହି ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ଘଟିଥିବାବେଳେ ଅନେକ ଯାତ୍ରୀ ଆହତ ହୋଇଛନ୍ତି। ଏହି ଦୁର୍ଘଟଣା ପରେ ମୁଖ୍ୟମନ୍ତ୍ରୀ ମୋହନ ମାଝୀ ଗଭୀର ଶୋକ ପ୍ରକାଶ କରିଥିବା ସହ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି। ସେହିପରି ପ୍ରତି ମୃତକଙ୍କ ପରିବାରକୁ ମୁଖ୍ୟମନ୍ତ୍ରୀ ରିଲିଫ୍ ପାଣ୍ଠିରୁ ୪ ଲକ୍ଷ ଟଙ୍କାର ସହାୟତା ଘୋଷଣା କରାଯାଇଛି।
ସୂଚନା ଅନୁସାରେ, ‘ମା’ ସିଂହେଶ୍ୱରୀ’ ନାମକ ପର୍ଯ୍ୟଟକ ବସ୍ଟି ୫୦ରୁ ଅଧିକ ଯାତ୍ରୀଙ୍କୁ ନେଇ ବ୍ରହ୍ମପୁରରୁ ବଲାଙ୍ଗିର ଜିଲ୍ଲାର ହରିଶଙ୍କର ଅଭିମୁଖେ ଯାଉଥିଲା। ତୀର୍ଥଯାତ୍ରାରେ ଯାଉଥିବା ସମୟରେ ବିଳମ୍ବିତ ରାତିରେ ପୀଠାଖାଇ ଘାଟି ନିକଟରେ ବସ୍ଟି ନିୟନ୍ତ୍ରଣ ହରାଇ ରାସ୍ତା କଡ଼କୁ ଓଲଟି ପଡିଥିଲା। ଏହି ମର୍ମନ୍ତୁଦ ଦୁର୍ଘଟଣାରେ ଡ୍ରାଇଭର ପ୍ରବୀଣ କୁମାର ସାହୁ ସହିତ ହରି ପାତ୍ର, ଲକ୍ଷ୍ମୀ ପାତ୍ର, ସୁପ୍ରଭା ସାହୁ ଓ ସୁମନ୍ତୀ ସାହୁଙ୍କ ମୃତ୍ୟୁ ଘଟିଛି। ସମସ୍ତେ ବ୍ରହ୍ମପୁର ଅଞ୍ଚଳର ବାସିନ୍ଦା ଥିବା ଜଣାପଡିଛି। ସୁମନ୍ତୀ ସାହୁଙ୍କ ମୃତ୍ୟୁ ପରେ ତାଙ୍କ ଦୁଇ ଛୋଟ ପିଲା ମାଆକୁ ହରାଇ ବେସାହାର ହୋଇପଡିଛନ୍ତି, ଯାହା ଘଟଣାକୁ ଆହୁରି ହୃଦୟବିଦାରକ କରିଛି।
ଦୁର୍ଘଟଣା ପରେ ସ୍ଥାନୀୟ ଲୋକମାନେ ପ୍ରଥମେ ଉଦ୍ଧାର କାର୍ଯ୍ୟରେ ଲାଗିଥିଲେ। ପରେ ପୋଲିସ ଓ ଅଗ୍ନିଶମ ବିଭାଗ ଘଟଣାସ୍ଥଳକୁ ପହଞ୍ଚି ଆହତମାନଙ୍କୁ ଉଦ୍ଧାର କରିଥିଲେ। ଗୁରୁତର ଆହତମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ, ୭ ଜଣଙ୍କ ଅବସ୍ଥା ଅଧିକ ଗୁରୁତର ହେବାରୁ ସେମାନଙ୍କୁ ଭୁବନେଶ୍ୱରକୁ ସ୍ଥାନାନ୍ତର କରାଯାଇଛି। ଏହି ଦୁର୍ଘଟଣା ପୁଣିଥରେ ପାହାଡ଼ିଆ ଓ ଘାଟି ଅଞ୍ଚଳରେ ସଡ଼କ ସୁରକ୍ଷା ଓ ସତର୍କ ଡ୍ରାଇଭିଂର ଆବଶ୍ୟକତାକୁ ସ୍ମରଣ କରାଇଛି।