ଜାମ୍ମୁ କାଶ୍ମୀରର ଏଲ ଓ ସି ନିକଟରେ ଥିବା କୁପୱାରା ଜିଲ୍ଲାରେ ୫ ଆତଙ୍କବାଦୀଙ୍କୁ ମାରି ଗଡାଇଛି ସେନା। ଜାମ୍ମୁ କାଶ୍ମୀର ପୋଲିସ ଏବଂ ସେନାର ମିଳିତ ଅପରେସନରେ ମିଳିଛି ଏହି ବଡ ସଫଳତା। ଗୁଇନ୍ଦା ସୂଚନା ଆଧାରରେ ସେନା ଓ ପୋଲିସ ପକ୍ଷରୁ କୁପୱାରାରେ ଆରମ୍ଭ ହୋଇଥିଲା ସର୍ଚ୍ଚ ଅପରେସନ।
ଗୁରୁବାର ସେନା ଏବଂ ଜାମ୍ମୁ କାଶ୍ମୀର ପୋଲିସ ଏହି ଅଞ୍ଚଳରେ ସର୍ଚ୍ଚ ଅପରେସନ କରିଥିଲେ। ସର୍ଚ୍ଚ ଅପରେସନ ସମୟରେ ଆତଙ୍କବାଦୀମାନେ ସୁରକ୍ଷା କର୍ମୀଙ୍କ ଉପସ୍ଥିତି ଜାଣି ଆଗ ସେମାନଙ୍କ ଉପରକୁ ଗୁଳି ଚଳାଇଥିଲେ। ଏହା ପରେ ସୁରକ୍ଷା ବଳଙ୍କ ପକ୍ଷରୁ ହୋଇଥିଲା ପାଲଟା ଗୁଳି ଚାଳଣା। ଉଭୟ ପକ୍ଷରୁ ହୋଇଥିବା ଗୁଳି ଚାଳଣା ପରେ ଜଣାପଡିଥି କି, ୫ ଆତଙ୍କବାଦୀଙ୍କ ମୃତ୍ୟୁ ହୋଇଛି। ନିହତ ସମସ୍ତ ଆତଙ୍କବାଦୀ ଥିଲେ ପାକିସ୍ତାନର। ସେନା ଜାମ୍ମୁ କାଶ୍ମୀରର ପୁଞ୍ଚ ଜିଲ୍ଲାରେ ଆତଙ୍କବାଦୀଙ୍କ ଅନୁପ୍ରବେଶ ଉଦ୍ୟମକୁ ପଣ୍ଡ କରି ନିୟନ୍ତ୍ରଣ ଲାଇନ୍ ନିକଟରୁ ବହୁ ସଂଖ୍ୟକ ଅସ୍ତ୍ରଶସ୍ତ୍ର ଏବଂ ଗୁଳି ଜବତ କରିଛି। ଅଧିକାରୀ କହିଛନ୍ତି ଯେ କୃଷ୍ଣ ଘାଟି ସେକ୍ଟରରେ ସର୍ଚ୍ଚ ଅପରେସନ ବେଳେ ଏହି ପୁନରୁଦ୍ଧାର କାର୍ଯ୍ୟ କରାଯାଇଛି। ଏଥିରେ ପାକିସ୍ତାନରେ ନିର୍ମିତ ଷ୍ଟିଲ କୋର କାର୍ଟୁସ ଏବଂ ପାକିସ୍ତାନରେ ତିଆରି ହେଉଥିବା ଔଷଧ ମଧ୍ୟ ଜବତ କରାଯାଇଛି।
ଜୁନ୍ ୧୪ ଏବଂ ୧୫ ମଧ୍ୟରାତ୍ରିରେ କୃଷ୍ଣ ଘାଟି ସେକ୍ଟରରେ ଭାରତୀୟ ସେନା ଏବଂ ଜାମ୍ମୁ କାଶ୍ମୀର ପୋଲିସର ମିଳିତ ଅପରେସନ ଘାଟିରେ ଆତଙ୍କବାଦୀଙ୍କ ଅନୁପ୍ରବେଶ ଉଦ୍ୟମକୁ ପଣ୍ଡ କରିଥିବା ସୂଚନା ଦେଇଛନ୍ତି ଜାମ୍ମୁ ସେନାର ମୁଖପାତ୍ର ଲେଫ୍ଟନେଣ୍ଟ କର୍ଣ୍ଣଲ ଦେବେନ୍ଦ୍ର ଆନନ୍ଦ।
ଆନନ୍ଦଙ୍କ ସୂଚନା ମୁତାବକ, ନିର୍ଦ୍ଦିଷ୍ଟ ସୂଚନା ଆଧାରରେ ଯବାନମାନେ ସର୍ଚ୍ଚ ଅପରେସନ ଆରମ୍ଭ କରିଥିଲେ ଏବଂ ଏହି ସମୟରେ ଦୁଇଟି ବ୍ୟାଗ ମିଳିଥିଲା। ଯେଉଁଥିରେ ଏକେ-୪୭ ରାଇଫଲ, ନଅ ମାଗାଜିନ, ୪୩୮ କାର୍ଟୁସ , ଚାରୋଟି ମାଗାଜିନ ସହ ଦୁଇଟି ପିସ୍ତଲ ଏବଂ ଛଅ ଟି ଗ୍ରେନେଡ ସହ କିଛି ଔଷଧ ମିଳିଥିଲା। ଲେଫ୍ଟନାଣ୍ଟ କର୍ଣ୍ଣଲ ଆନନ୍ଦ କହିଛନ୍ତି ଯେ ଏହି କାର୍ଯ୍ୟାନୁଷ୍ଠାନ ଶୀଘ୍ର ଶୀଘ୍ର ହେବାରୁ ଅନୁପ୍ରବେଶକାରୀଙ୍କ ଆଉ ଏକ ବଡ଼ ଷଡ଼ଯନ୍ତ୍ର ଉଦ୍ୟମକୁ ପଣ୍ଡ କରାଯାଇଛି।