ଭାରତୀୟ ସଙ୍ଗୀତ ଜଗତର ସବୁଠୁ ଲୋକପ୍ରିୟ କଣ୍ଠଶିଳ୍ପୀ ଅରିଜିତ୍ ସିଂହଙ୍କୁ ନେଇ ଏବେ ସୋସିଆଲ ମିଡିଆରେ ଜୋରଦାର ଚର୍ଚ୍ଚା ଧରିଛି | ଇନଷ୍ଟାଗ୍ରାମରେ ଆସିଥିବା ଏକ ପୋଷ୍ଟକୁ କେନ୍ଦ୍ର କରି ଅନେକ ଫ୍ୟାନ୍ଙ୍କ ମଧ୍ୟରେ ଆଶଙ୍କା ସୃଷ୍ଟି ହୋଇଛି ଯେ ଅରିଜିତ୍ ସିଂହ ପ୍ଲେବ୍ୟାକ୍ ସିଙ୍ଗିଙ୍ଗ୍କୁ ବିଦାୟ ନେବାକୁ ଯାଉଛନ୍ତି | ତେବେ ଏନେଇ କୌଣସି ସରକାରୀ ଘୋଷଣା ନ ହୋଇଥିବାବେଳେ ଗୁଜବ ଓ ଅନୁମାନ ହିଁ ଚାଲିଛି |
ଆଉ ଶୁଣାଯିବନି ସେଇ ସ୍ୱର, ସିନେମା ସିନା ଚାଲିବ କିନ୍ତୁ ସେ ଆଉ ଗାଇବେନି। ଯାହାଙ୍କ ଗୋଟିଏ ଗୀତ ସାରା ସିନେମାକୁ ହିଟ୍ କରିଦିଏ, ଯାହାର ଗୋଟିଏ ‘ଆଲାପ’ ମନର ଆଘାତକୁ ଭରି ଦିଏ, ସେ ହେଲେ ଅରିଜିତ୍ | ଯୁବ ହେଉ କି ବୟସ୍କ, ହିନ୍ଦୀ ହେଉ କି ବଙ୍ଗଳା, ଓଡ଼ିଶାର ହେଉ କି ତାମିଲନାଡ଼ୁ କିଏ ନ ସେ ଜାଣିଚି ଅରିଜିତଙ୍କୁ ଆଉ ତାଙ୍କ ଗୀତକୁ |
୨୦୦୫ ମସିହାରେ ଏକ ରିଆଲିଟି ଶୋ’ରୁ ଯାତ୍ରା ଆରମ୍ଭ କରି ବିଫଳତାକୁ ଜୟ କରିଥିବା ଅରିଜିତ୍ ୨୦୧୨ରେ ‘ମର୍ଡର ୨’ର ‘ଫିର୍ ମୋହବ୍ବତ୍’ ମାଧ୍ୟମରେ ଦେଶବ୍ୟାପୀ ପରିଚୟ ପାଇଥିଲେ | ‘ଆଶିକୀ ୨’ ପରେ ସେ ଭାରତୀୟ ସଙ୍ଗୀତ ଶିଳ୍ପରେ ଏକ ଅଲଗା ଧାରା ସୃଷ୍ଟି କରିଥିଲେ। ‘ଏ ଦିଲ୍ ହେ ମୁସକିଲ’, ‘ଖାମୋସିଆଁ’, ‘ଚେନ୍ନାଇ ଏକ୍ସପ୍ରେସ’, ‘ବ୍ରହ୍ମାସ୍ତ୍ର’ ପରି ଅନେକ ସୁପରହିଟ୍ ଗୀତ ତାଙ୍କ ସଫଳତାର ସାକ୍ଷୀ |
ସଫଳତାର ଶିଖରରେ ଥିଲେ ମଧ୍ୟ ଅରିଜିତ୍ଙ୍କ ସରଳ ଜୀବନଶୈଳୀ ତାଙ୍କୁ ଅନ୍ୟମାନଙ୍କଠାରୁ ଅଲଗା କରେ | ପଶ୍ଚିମବଙ୍ଗର ମୁର୍ସିଦାବାଦରେ ସାଧାରଣ ଜୀବନ, ସ୍କୁଟରରେ ଘୁରିବା, ବିନା ସୁରକ୍ଷାରେ ବୁଲିବା ଏହା ତାଙ୍କର ସରଳତାର ପରିଚୟ | ନିକଟରେ ଓଡ଼ିଶାର ଯାଜପୁର ଗସ୍ତ ମଧ୍ୟ ଫ୍ୟାନ୍ମାନଙ୍କ ମଧ୍ୟରେ ଆଲୋଚନାର ବିଷୟ ହୋଇଥିଲା |ଏହି ପରିପ୍ରେକ୍ଷିତରେ ପ୍ଲେବ୍ୟାକ୍ ସିଙ୍ଗିଙ୍ଗ୍କୁ ନେଇ ଚାଲିଥିବା ଗୁଜବ ଫ୍ୟାନ୍ମାନଙ୍କୁ ଭାବୁକ କରିଥିଲେ ମଧ୍ୟ, ସମସ୍ତେ ଆଶା କରୁଛନ୍ତି ଯେ ଅରିଜିତ୍ଙ୍କ ସ୍ୱର ଆଗାମୀ ଦିନରେ ମଧ୍ୟ ସିନେମା ପରଦା ଓ ସଙ୍ଗୀତପ୍ରେମୀଙ୍କ ମନକୁ ସ୍ପର୍ଶ କରିବ |