ନୂଆପଡ଼ାରେ ଆତଙ୍କ ଖେଳାଇଥିବା ମଣିଷଖିଆ କଲରା ପତରିଆ ବାଘ ଯନ୍ତାରେ। ନୂଆପଡ଼ା ଜିଲ୍ଲା ସଦର ରେଞ୍ଜ ଧରମବନ୍ଧା ଅଞ୍ଚଳର କୋଦୋପାଲିରୁ ଧରାପଡ଼ିଛି ଏହି କଲରାପତରିଆ ବାଘ। ଗତକାଲି ରାତିରେ ଜଣଙ୍କ ଛାତ ଉପରେ ବାଘ ବସିଥିବା ଗ୍ରାମବାସୀ ଦେଖିବାକୁ ପାଇଥିଲେ। ଏହା ଦେଖି ଲୋକଙ୍କ ଭିତରେ ଖେଳିଯାଇଥିଲା ଆତଙ୍କ। ଏନେଇ ତୁରନ୍ତ ବନବିଭାଗକୁ ସୂଚିତ କରାଯିବା ପରେ ବାଘ ଧରିବା ଅଭିଯାନ ଆରମ୍ଭ ହୋଇଥିଲା। ରାତି ପ୍ରାୟ ୧୧ଟା ବେଳେ ବାଘଟି ଯନ୍ତାରେ ପଡ଼ିଥିଲା। ଯନ୍ତାରେ ପଡ଼ିବା ପରେ ଗତକାଲି ବିଳମ୍ବିତ ରାତିରେ ବାଘକୁ ନୂଆପଡ଼ା ରେଞ୍ଜ ଅଫିସ୍କୁ ଅଣାଯାଇଥିଲା।
ଏହି କଲରାପତରିଆ ବାଘ ଗତ ୫ ଦିନ ମଧ୍ୟରେ ଦୁଇ ଜଣଙ୍କୁ ମାରିଥିବା ବେଳେ ଜଣଙ୍କୁ ଆକ୍ରମଣ କରି ଗୁରୁତର କରି ଦେଇଥିଲା। ଶୁକ୍ରବାର ସିଲିଆରିବାହାରା ଗାଁର ଜଣେ ମହିଳା ଜଙ୍ଗଲକୁ ଯାଇ ଆଉ ଫେରି ନଥିଲେ। ଗତକାଲି ବାଘଟି ତାଙ୍କୁ ମାରି ଖାଉଥିବାର ଲୋକେ ଦେଖିଥିଲେ।