ଶ୍ରୀଜଗନ୍ନାଥ ମନ୍ଦିର ରତ୍ନଭଣ୍ତାର ଚାବି ହଜିବା ପ୍ରସଙ୍ଗରେ ହାଇକୋର୍ଟଙ୍କଠାରୁ ଆହୁରି ସମୟ ମାଗିଲେ ରାଜ୍ୟ ସରକାର। ଜଷ୍ଟିସ୍ ରଘୁବୀର ଦାଶ କମିସନ୍ ଦାଖଲ କରିଥିବା ରିପୋର୍ଟର ସାନି ସ୍ଥିତି ସମ୍ପର୍କରେ କୋର୍ଟଙ୍କୁ ଅବଗତ କରିବାକୁ ଆଉ ଦୁଇ ମାସ ମାଗିଛନ୍ତି ସରକାର। ଗତ ଏପ୍ରିଲ ୨୫ରେ ହାଇକୋର୍ଟ ଯାଚିକାକର୍ତ୍ତା ଦିଲ୍ଲୀପ କୁମାର ବରାଳଙ୍କ ଆବେଦନର ଶୁଣାଣି କରି କମିସନ୍ ଅଫ୍ ଇନକ୍ବାରି ଆଇନ ଅନୁସାରେ ଜଷ୍ଟିସ୍ ରଘୁବୀର ଦାସ କମିସନ୍ଙ୍କ ପକ୍ଷରୁ ଦାଖଲ ରିପୋର୍ଟର ସ୍ଥିତି ତଲବ କରିଥିଲେ କୋର୍ଟ। ଜୁଲାଇ ୧ ସୁଦ୍ଧା ରିପୋର୍ଟ ଦାଖଲ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ।
କିନ୍ତୁ ରାଜ୍ୟ ସରକାର ଅଦ୍ୟାବଧି ଏହି ରିପୋର୍ଟ ଦାଖଲ କରିବାରେ ଆକ୍ଷମତା ପ୍ରକାଶ କରିଛନ୍ତି। କମିଶନଙ୍କ ତଦନ୍ତ ରିପୋର୍ଟ ରାଜ୍ୟ ସରକାରଙ୍କ ନିକଟରେ ବିଚାରାଧୀନ ରହିଛି ସରକାର ପକ୍ଷରୁ କୋର୍ଟଙ୍କୁ ଜଣା ଯାଇଛି।ଜଷ୍ଟିସ୍ ରଘୁବୀର ଦାସ କମିସନ୍ ଦାଖଲ କରିଥିବା ଅନ୍ତରୀଣ ରିପୋର୍ଟର ସାନି ସ୍ଥିତି ସଂକ୍ରାନ୍ତରେ ରିପୋର୍ଟ ଦାଖଲ କରିବାକୁ ଆହୁରି ଦୁଇ ମାସ ସମୟ ଦେବାକୁ ଅନୁରୋଧ କରାଯାଇଛି। ଜୁଲାଇ ୧୦ରେ ମୂଳ ଆବେଦନ ସହିତ ସରକାରଙ୍କ ଅନ୍ତରୀଣ ଆବେଦନ ହାଇକୋର୍ଟରେ ଶୁଣାଣି ପାଇଁ ତାଲିକାଭୁକ୍ତ ହୋଇଥିଲା। କିନ୍ତୁ ମାମଲାର ଶୁଣାଣି ଘୁଞ୍ଚିଥିଲା। ଅଗଷ୍ଟ ୨୧କୁ ମାମଲାର ପରବର୍ତ୍ତୀ ଶୁଣାଣି ପାଇଁ ଦିନ ଧାର୍ଯ୍ୟ ହୋଇଛି।ସୂଚନା ଯୋଗ୍ୟ, ଏପ୍ରିଲ ୨୫ରେ ହାଇକୋର୍ଟ ଏହି ଜନସ୍ବାର୍ଥ ଆବେଦନର ଶୁଣାଣି କରିଥିଲେ। ଏହା ଉପରେ ମୁଖ୍ୟ ଶାସନ ସଚିବ, ଆଇନ ସଚିବ ଓ ଗୃହ ସଚିବଙ୍କୁ ନୋଟିସ୍ ଜାରି କରିବା ସହିତ ଜୁଲାଇ ୧ ସୁଦ୍ଧା ତଦନ୍ତ କମିସନ୍ ଦାଖଲ କରିଥିବା ରିପୋର୍ଟର ସାନି ସ୍ଥିତି ସଂପର୍କରେ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ହୋଇଥିଲା।
ହାଇକୋର୍ଟରେ ଯାଚିକାରେ ଉଲ୍ଲେଖ କରାଯାଇଛି ଯେ, ଶ୍ରୀଜଗନ୍ନାଥ ମନ୍ଦିର ରତ୍ନ ଭଣ୍ତାରରେ ବହୁ ମୂଲ୍ୟବାନ ଅଳଙ୍କାର ରହିଛି। ଶ୍ରୀଜିଉଙ୍କ ବେଶରେ ବ୍ୟବହାର କରାଯାଉଥିବା ଅଳଙ୍କାର ବାହାର ରତ୍ନ ଭଣ୍ଡାରରେ ରହୁଥିବାରୁ ଏହାକୁ ନିୟମିତ ଖୋଲାଯାଉଛି ଓ ମରାମତି ମଧ୍ୟ ହେଉଛି। କିନ୍ତୁ ଭିତର ରତ୍ନ ଭଣ୍ଡାରରେ ଆହୁରି ଅଧିକ ଅଳଙ୍କାର ଥିବା ବେଳେ ତାହାକୁ ବହୁ ବର୍ଷ ହେବ ଖୋଲା ଯାଇ ନାହିଁ। ମରାମତି ଅଭାବରୁ ଭିତର ରତ୍ନ ଭଣ୍ଡାରର ସ୍ଥିତି ସଙ୍କଟାପନ୍ନ ହୋଇ ରହିଛି। କେତେବେଳେ ଏହା ଭୁସୁଡି ପଡିବ କହି ହେବ ନାହିଁ।
ସେପଟେ କେତେବେଳେ ସରକାର ପକ୍ଷରୁ ଚାବି ହଜିଥିବା କୁହାଯାଇ ରତ୍ନ ଭଣ୍ଡାର ଖୋଲା ଯାଉନି ତ ପୁଣି କେତେବେଳେ କୋର୍ଟରେ ମାମଲା ଥିବା କୁହା ଯାଉଛି। ସେପଟେ କିନ୍ତୁ କୋର୍ଟ ମାଗୁଥିବା ରିପୋର୍ଟ ଜାଣି ଶୁଣି ଦାଖଲ ନ କରି ସମୟ ଗଡାଇବାର ବ୍ୟସ୍ତ ରାଜ୍ୟ ସରକାର। ଓଡିଆଙ୍କ ଆସ୍ଥା ଓ ବିଶ୍ବାସର ଭଗବାନ ଜଗନ୍ନାଥଙ୍କ ରତ୍ନ ଭଣ୍ଡାରରେ ବହୁ କାଳରୁ ବହୁ ପୁରାତନ, ବହୁମୂଲ୍ୟ ଅଳଙ୍କାର ଥିଲେ ମଧ୍ୟ ବାହାର ଭଣ୍ଡାରର ଅଳ୍ପ କିଛି ଅଳଙ୍କାରକୁ ନେଇ ଠାକୁରଙ୍କ ଦୈନନ୍ଦିନ ବେଶଲାଗି ହେଉଛି। ଏହାକୁ ନେଇ ଲୋକଙ୍କ ଭିତରେ ଅସନ୍ତୋଷ ଦେଖା ଦେଉଛି।
ରତ୍ନଭଣ୍ଡାର ନ ଖୋଲାଯିବାକୁ ନେଇ ସନ୍ଦେହ ସୃଷ୍ଟି ହେଲାଣି। ସରକାର ଓ ପଣ୍ଡା ମିଶି ରତ୍ନଭଣ୍ଡାର ଖାଲି କରିଥିବାରୁ ଭଣ୍ଡାର ଖୋଲା ଯାଉ ନାହିଁ ବୋଲି ଅଭିଯୋଗ ମଧ୍ୟ ହେଉଛି।