ଯାଜପୁର ଜିଲ୍ଲାର ବରପୁତ୍ର ଭାବେ ପରିଚିତ ସ୍ୱର୍ଗତ ଅନାଦୀ ଚରଣ ଦାସଙ୍କ ସ୍ମୃତି ଉଦ୍ଦେଶ୍ୟରେ ପୂଜ୍ୟପୂଜା ପ୍ରତିଭା ପରିଷଦ ପକ୍ଷରୁ ଏକ ଶଦ୍ଧାଞ୍ଜଳି ସଭା ଆୟୋଜିତ ହୋଇଯାଇଛି । ସ୍ଥାନୀୟ ଜିଲ୍ଲା ପରିଷଦ ସମ୍ମିଳନୀ କକ୍ଷରେ ପରିଷଦର ରାଜ୍ୟ ସଭାପତି ପଦ୍ମାକର ଗୁରୁଙ୍କ ସଭାପତିତ୍ୱରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି ସଭାରେ ଉପଦେଷ୍ଠା ସନ୍ତୋଷ ନନ୍ଦ ମଞ୍ଚ ପରିଚାଳନା କରିଥିଲେ ।
ଅତିଥି ଭାବେ ଯାଜପୁର ଏସ୍ଡିପିଓ ସରୋଜ ଉପାଧ୍ୟାୟ, ପୂବର୍ତନ ସାଂସଦ ଅଞ୍ଚଳ ଦାଶ, ବରିଷ୍ଠ କଂଗ୍ରେସ ନେତା ଶିଶିର ନାୟକ ପ୍ରମୁଖ ଯୋଗଦେଇ ପ୍ରଦୀପ ପ୍ରଜ୍ଜ୍ୱଳନ ସହ ସ୍ୱର୍ଗତ ଦାସଙ୍କ ଫଟୋରେ ପୁଷ୍ପମାଲ୍ୟା ଅର୍ପଣ କରିଥିଲେ ।
ଅନ୍ୟମାନଙ୍କ ମଧ୍ୟରେ ଜିଲ୍ଲା କଂଗ୍ରେସ ସଭାପତି ମନୋଜ ରାଉତ, ବିଜେପି ରାଜ୍ୟ ଯୁବମୋର୍ଚ୍ଚାର ସଂଯୋଜକ ସଂଗ୍ରାମ କେଶରୀ ପାତ୍ର, ବରିଷ୍ଠ ସମାଜସେବୀ ବଳଭଦ୍ର ଦାଶ, ସ୍ୱର୍ଗତ ଦାସଙ୍କ ପୁତ୍ର ହେମନ୍ତ ଦାସ, ସିପିଆଇ ନେତା ଗଣେଶ ସାହୁ ଯୋଗଦେଇ ଅନାଦି ଦାସଙ୍କ ଜୀବନୀ ଉପରେ ବକ୍ତବ୍ୟ ରଖିଥିଲେ । ଯାଜପୁର ଜିଲ୍ଲା ଜଣେ ବରପୁତ୍ରକୁ ହରାଇଲା ବୋଲି ଅତିଥିମାନେ କହିଛନ୍ତି । ଶ୍ରଦ୍ଧାଞ୍ଜଳି ସଭାରେ ଶତାଧିକ ଶୁଭେଚ୍ଛୁ, ପ୍ରଶଂସକ ମଧ୍ୟ ଯୋଗ ଦେଇଥିଲେ ।
ଏକାଧିକ ଥର ସାଂସଦ ଭାବେ ନିର୍ବାଚିତ ହୋଇଥିଲେ ସ୍ୱର୍ଗଦ ଅନାଦି ଚରଣ ଦାସ । ସଂସଦର ଏସସି ଓ ଏସଟି ଷ୍ଟାଣ୍ଡିଙ୍ଗ କମିଟିର ଅଧ୍ୟକ୍ଷ ଭାବେ ଦାୟିତ୍ୱ ତୁଲାଇଥିଲେ । ତାଙ୍କ ମୃତ୍ୟୁ ଜିଲ୍ଲା ରାଜନୀତି ପାଇଁ ଅପୂରଣୀୟ କ୍ଷତି ବୋଲି ଉପସ୍ଥିତ ଅତିଥିମାନେ କହିଥିଲେ ।