ଓଡିଆରେ ଗୋଟିଏ ଲୋକ କଥା ଅଛି, ରଖେ ହରି ମାରେ କିଏ। ଏହି ଉକ୍ତିଟି ଆମାଜନ ଘଞ୍ଚ ଜଙ୍ଗଲରେ ହୋଇଥିବା ପ୍ଲେନ କ୍ରାସର ଏକ ମାସରୁ ଅଧିକ ସମୟ ପରେ ଜୀବିତ ଉଦ୍ଧାର ହୋଇଥିବା ୪ ଜଣ ନାବାଳକଙ୍କୁ ଦେଖିବା ପରେ ସତ୍ୟ ପ୍ରମାଣିତ ହୋଇଛି।ମେ ୧ ତାରିଖ! ସାନ ଜୋସେ ଡେଲ ଗୁଆଭିଆରରୁ ୩୫୦ କିମି ଦୂରରେ ଥିବା ଅରାରାକୁଆରା ଜଙ୍ଗଲରେ ରହିଥିବା କିଛି ଆଦିବାସୀ ଙ୍କୁ ନେଇ ଉଡାଣ ଭରିଥିଲା କେସନା ୨୦୬ ଛୋଟ ବିମାନଟି। କାରଣ ଏମାନଙ୍କ ଜୀବନ ପ୍ରତି ସେଠାକାର ବିଦ୍ରୋହୀ ଗୋଷ୍ଠୀଠାରୁ ବିପଦ ଥିଲା।
କିନ୍ତୁ ବିମାନ ଉଡାଣ ଭରିବାର ମାତ୍ର କିଛି ସମୟ ପରେ ପାଇଲଟ ବିମାନର ଇଞ୍ଜିନରେ କିଛି ସମସ୍ୟା ଥିବା ରିପୋର୍ଟ କରିଥିଲେ ଓ ବିମାନ ସହ ଯୋଗାଯୋଗ ବିଚ୍ଛିନ୍ନ ହୋଇଥିଲା। ସର୍ଚ୍ଚ ଅପରେସନ ପରେ ଏକ ଗଛ ସହ ଭୂଲମ୍ବରେ ବିମାନ ପଡିଥିବା ଦେଖିବାକୁ ମିଳିଥିଲା। ପାଇଲଟ ସହ ପିଲାମାନଙ୍କ ମା ଓ ଜଣେ ସ୍ଥାନୀୟ ଆଦିବାସୀ ନେତାଙ୍କ ମୃତଦେହ ଘଟଣାସ୍ଥଳରୁ ମିଳିଥିଲା।କିନ୍ତୁ ସେଠାରେ ପିଲାଙ୍କର କୌଣସି ପତ୍ତା ମିଳି ନ ଥିଲା। ସେମାନଙ୍କ ଠାବ ପାଇଁ ଆରମ୍ଭ ହୋଇଥିଲା ଏକ ବିରାଟ ଉଦ୍ଧାର ଅଭିଯାନ। ଶହସ୍ରାଧିକ ଅଧିକାରୀଙ୍କ ସହ ଜଙ୍ଗଲ ସହ ପରିଚିତ ଆଦିବାସୀ ଏହି ଅଭିଯାନରେ ହୋଇଥିଲେ ସାମିଲ। ଏଥିରେ ୧୦ ହଜାରରୁ ଅଧିକ ବିମାନ ମଧ୍ୟ ଜଙ୍ଗଲ ଉପରେ ଉଡିଥିଲା ଶିଶୁମାନଙ୍କ ସନ୍ଧାନରେ।ଲଗାତର ୪୦ ଦିନ ଧରି ଚାଲିଥିବା ରେସ୍କୁ ଅପରେସନ ପରେ ଶେଷରେ ସେନା ୪ ନାବାଳକଙ୍କୁ ଘଞ୍ଚ ଜଙ୍ଗଲ ଭିତରେ ଠାବ କରିଛି।
ଏହି ପିଲାଙ୍କୁ ଠାବ କରିବାକୁ ସେଠାକାର ସରକାର ସେଠାରେ ଆକ୍ଟିଭ ଥିବା ବିଦ୍ରୋହୀଙ୍କ ସହ ୬ ମାସ ପାଇଁ ଶାନ୍ତି ଚୁକ୍ତି ମଧ୍ୟ କରିଛି। ଏତେ ଦିନ ଧରି ଘଞ୍ଚ, ଅନ୍ଧାରରେ ପୂର୍ଣ୍ଣ ତଥା ଜାଗୁଆର, ସାପ, ବିଭିନ୍ନ ବିଷାକ୍ତ ସରିସୃପରେ ପୂର୍ଣ୍ଣ ଜଙ୍ଗଲରେ ପିଲାମାନଙ୍କ ଉପସ୍ଥିତି ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଛି। କାରଣ ଏହି ପିଲାମାନଙ୍କ ବୟସ ୧ ବର୍ଷରୁ ୧୩ ବର୍ଷ ମଧ୍ୟରେ। ଏହାକୁ ନେଇ କୁହାଯାଉଛି କି, ହୁଇଟୋଟୋ ଆଦିବାସୀ ସମ୍ପ୍ରଦାୟର ପିଲାମାନେ ଶିକାର, ମାଛଧରା, ଖାଦ୍ୟ ସଂଗ୍ରହ ସହ ଜଙ୍ଗଲ ସହିତ ବେଶ ପରିଚିତ। ତେଣୁ କୌଣସି ପ୍ରକାରେ ସେମାନେ ନିଜର ବଞ୍ଚି ରହିବାର ସାଧନ ଜଙ୍ଗଲରୁ ସଂଗ୍ରହ କରିବାରେ ହୋଉଥିଲେ ସକ୍ଷମ।ଏହି ସଫଳତାକୁ ନେଇ କଲମ୍ବିଆର ରାଷ୍ଟ୍ରପତି ଗୁଷ୍ଟାଭୋ ପେଟ୍ରୋ ଶୁକ୍ରବାର ସୂଚନା ଦେଇଛନ୍ତି। ୪ ନାବାଳକଙ୍କ ଉଦ୍ଧାର ପରେ ଗୁଷ୍ଟାଭୋ କହିଛନ୍ତି ଆଜିର ଦିନ ଆମ ପାଇଁ ଏକ ଯାଦୁ’ର ଦିନ। ପୂରା ଦେଶ ଖୁସି। ନିଖୋଜର ୪୦ ଦିନ ପରେ ଜୀବିତ ଉଦ୍ଧାର ହୋଇଛନ୍ତି ୪ ଶିଶୁ।
ଅବଶ୍ୟ ସେମାନେ ଦୁର୍ବଳ ହୋଇ ପଡିଛନ୍ତି। ତେଣୁ ସେମାନଙ୍କୁ ଉପଯୁକ୍ତ ଚିକିତ୍ସା ପ୍ରଦାନ କରାଯିବ।ତେବେ ବିଶ୍ବର ନିଖୋଜ ଇତିହାସରେ ଏହି ଘଟଣାଟି ନିଶ୍ଚିତରୂରେ ଏକ ବିରଳରୁ ବିରଳତମ ଘଟଣା ।