ନବୀନ ସରକାରର ପଞ୍ଚମ ପାଳିକୁ ଆଜି ୪ ବର୍ଷ ପୂର୍ତ୍ତି ହୋଇଛି । ୨୯ ମେ’,୨୦୧୯ରେ ପଞ୍ଚମ ପାଳି ଦାୟିତ୍ୱ ନେଇଥିଲେ ନବୀନ ପଟ୍ଟନାୟକ । ଜଣ ଦକ୍ଷ, ଲୋକପ୍ରିୟ ନେତା ଭାବେ ନିଜକୁ ପ୍ରମାଣିତ କରିଛନ୍ତି ନବୀନ । କୁହାଯାଏ ନବୀନ ଯେଉଁଠି, ବିଜୟ ସେଇଠି । ଗତଥର ୧୧୨ ଆସନରେ ବାଜି ମାରି ଲଗାତାର ପଞ୍ଚମ ଥର ପାଇଁ କ୍ଷମତା ହାସଲ କରିଥିଲା ବିଜୁ ଜନତା ଦଳ ।
ରାଜ୍ୟରେ ଦୁର୍ନୀତିମୁକ୍ତ ଶାସନ ଦେବାରେ ନବୀନ ସରକାର ଉଦାହରଣ ପାଲଟିଛି । ଶିକ୍ଷା, ସ୍ବାସ୍ଥ୍ୟ,କ୍ରୀଡ଼ା,ଭିତ୍ତିଭୂମି ଏବଂ ମୌଳିକ ସୁବିଧା ଯୋଗାଇଦେବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବେଶ୍ ଲୋକପ୍ରିୟ ହୋଇଛନ୍ତି । 5T ଯୋଜନାରେ ବେଶ୍ ଫାଇଦା ପାଉଛନ୍ତି ରାଜ୍ୟବାସୀ । ସରକାରୀ କାର୍ଯ୍ୟାଳୟରେ ଲାଞ୍ଚ କାରବାର ଉପରେ ରୋକ୍ ଲାଗୁଛି । ସେଥିପାଇଁ ମୋ ସରକାର ଅଭିଯାନ ଜାରି ରହିଛି । ସ୍ବଚ୍ଛତା ସହ ରୂପାନ୍ତରଣର ନୂଆ ଅଧ୍ୟାୟ ଦେଖିବାକୁ ମିଳିଛି । ସରକାରୀ ସ୍କୁଲ ଅଧିକ ବିକଶିତ ହୋଇଛି । ସ୍ବାସ୍ଥ୍ୟସେବାରେ ମଧ୍ୟ ବ୍ୟାପକ ପରିବର୍ତ୍ତନ ଆଣିଛନ୍ତି ରାଜ୍ୟ ସରକାର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତ ୪ ବର୍ଷରେ ରାଜ୍ୟର ସ୍ବାସ୍ଥ୍ୟ,ଶିକ୍ଷା,ଗମନାଗମନ,ଐତିହ୍ୟ ସଂରକ୍ଷଣ କ୍ଷେତ୍ରରେ ବୈପ୍ଳବିକ ପରିବର୍ତ୍ତନ ଆଣିଛନ୍ତି । ସେଥିପାଇଁ କେବଳ ରାଜ୍ୟ ନୁହେଁ ଦେଶ ବିଦେଶରେ ମଧ୍ୟ ବେଶ୍ ଲୋକପ୍ରିୟ ହୋଇଛନ୍ତି ।
ଆଜି ବିଜେଡି ପକ୍ଷରୁ ବିଶେଷ କିଛି କାର୍ଯ୍ୟକ୍ରମ ନାହିଁ । ତଥାପି ପ୍ରଶାସନିକ ପ୍ରସ୍ତୁତି ଜୋରଦାର ଚାଲିଛି । ପଞ୍ଚମ ପାଳି ସରକାର ଗଠନ କରିବା ପାଇଁ ବିଜେଡି ଯେଉଁ ନିର୍ବାଚନ ଇସ୍ତାହାର ଜାରି କରିଥିଲା ସେସବୁ ପ୍ରତିଶ୍ରୁତି ପୂରଣ ପାଇଁ ପ୍ରସ୍ତୁତି ହେଉଛି । ଗତ ୪ ବର୍ଷରେ ବିଜେଡି ସରକାର ଅଧିକାଂଶ ପ୍ରତିଶ୍ରୁତି ପାଳନ କରିଛି । ହେଲେ ଏଯାଏ ବାକିଥିବା ଆଉ କିଛି କାମ କରିବ ଦଳ । ଆଜି ରାଜ୍ୟ କ୍ୟାବିନେଟ୍ର ଗୁରୁତ୍ୱପୂର୍ଣ୍ଣ ବୈଠକ ବସିବାକୁ ଯାଉଥିବା ବେଳେ ଏଥିରେ ଅନେକ ନିଷ୍ପତ୍ତି ନିଆଯିବ ବୋଲି ସୂଚନା ମିଳିଛି । ବିଶେଷ କରି ପଞ୍ଚାୟତିରାଜ ଓ ପାନୀୟ ଜଳ ବିଭାଗର ବିଭିନ୍ନ ପ୍ରକଳ୍ପ, ପୂର୍ତ୍ତ, ଗ୍ରାମ୍ୟ ଉନ୍ନୟନ,ମିଶନ୍ ଶକ୍ତି,ଇଲେକ୍ଟ୍ରୋନିକ୍ସ ଓ ଆଇଟି,ଉଚ୍ଚଶିକ୍ଷା, ନଗର ଉନ୍ନୟନ ବିଭାଗ ସମେତ ଆଉ କିଛି ବିଭାଗର ପ୍ରସ୍ତାବ ଉପରେ କ୍ୟାବିନେଟ୍ ମୋହର ବାଜିବ ବୋଲି ଜଣାପଡ଼ିଛି।