ମହାନଦୀ ଜଳସ୍ତର ବଢି ବେହାଲ ହେବାରେ ଲାଗିଲାଣି ଖୋର୍ଦ୍ଧାବ୍ଲକ ଓରାବର ପଞ୍ଚାୟତ। ପଞ୍ଚାୟତର ବହୁ ଗ୍ରାମରେ ପାଣି ପଶିବାରୁ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡିଛି। ହେକ୍ଟର ହେକ୍ଟର ଜମିରେ ନଦୀ ଜଳ ପ୍ରବେଶ କରିବା ପରେ ଚାଷବାସ ନଷ୍ଟ ହୋଇଛି। ଦୀର୍ଘ ଆଡିବନ୍ଧ ଦାବି ସତ୍ତ୍ୱେ ସରକାରର ଅଣଦେଖା ପାଇଁ ପ୍ରତିବର୍ଷ ଏମିତି ଅସୁବିଧା ଭୋଗିବାକୁ ନେଇ ଲୋକଙ୍କ ଭିତରେ ଦେଖାଦେଉଛି ଅସନ୍ତୋଷ।
ଲଗାଣ ବର୍ଷା ସାଙ୍ଗକୁ ଉପର ମୁଣ୍ଡ ପାଣିରେ ମହାନଦୀର ଜଳସ୍ତର ବୃଦ୍ଧି ପାଇବାରେ ଲାଗିଛି। ଫଳରେ ଦୟା ,ରାଜୁଆ ଓ ମକରା ନଦୀରେ ପ୍ରବଳ ମାତ୍ରାରେ ବନ୍ୟାଜଳ ପ୍ରବାହିତ ହେବାରୁ ଖୋର୍ଦ୍ଧା ଜିଲ୍ଲା ଖୋର୍ଦ୍ଧା ବ୍ଲକର ଓରବରସିଂହ ଗ୍ରାମ ପଞ୍ଚାୟତର ହିରିମୂଳ, ଡିହଖଳା ପରି ବହୁ ଗାଁ ବାହ୍ୟ ଜଗତରୁ ବିଛିନ୍ନ ହୋଇଯାଇଛି । ଗାଁ ଦାଣ୍ଡରେ ଖେଳୁଛି ପାଣି। ଚାଷଜମିରେ ମାଡିଯାଇଛି ବନ୍ୟାଜଳ। ଫଳରେ ବହୁ କଷ୍ଟରେ ଚାଷ କରିଥିବା ଚାଷୀ ମୁଣ୍ଡରେ ପଡିଛି ଚଡକ। ବାରମ୍ବାର ଆଡି ବନ୍ଧ ପାଇଁ ଦାବି ହେଉଥିଲେ ମଧ୍ୟ ସରକାର ନ ଶୁଣିବାରୁ ଲୋକେ ହନ୍ତସନ୍ତ ହେଉଥିବା ହେଉଛି ଅଭିଯୋଗ।
ସେପଟେ ବନ୍ୟାକୁ ଆଖି ଆଗରେ ରଖି ଖୋର୍ଦ୍ଧା ପ୍ରଶାସନ ଓ ସ୍ଥାନୀୟ ପ୍ରଶାସନ ବନ୍ୟା ମୁକାବିଲା ପାଇଁ ସଜାଗ ରହିଛି। ଲୋକଙ୍କୁ ଖାଦ୍ୟ ସାମଗ୍ରୀ ଯୋଗାଣ କାର୍ଯ୍ୟ ଆରମ୍ଭ ହୋଇଯାଇଛି।
