ପୁରୁଷ କମିଶନ ଗଠନର ସବୁ ବାଟ ବନ୍ଦ। ସୁପ୍ରିମ କୋର୍ଟରେ ଦାବି ଖାରଜ। ପୁରୁଷଙ୍କ ଉପରେ ହେଉନି ଘରୋଇ ହିଂସା, ଏହା ମାତ୍ର ଏକ ମାନସିକତା। ଘରୋଇ ହିଂସା ବିରୋଧରେ ପୁରୁଷ କମିଶନ ଗଠନ ପାଇଁ ହୋଇଥିବା ଯାଚିକାକୁ ଖାରଜ କରି ଏମିତି କହିଛନ୍ତି ସୁପ୍ରିମ କୋର୍ଟ। ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଦୀପଙ୍କର ଦତ୍ତଙ୍କ ଖଣ୍ଡପୀଠ ଶୁଣାଣି କାଳରେ ଆବେଦନକାରୀଙ୍କୁ ପ୍ରଶ୍ନ କରିଥିଲେ କି କଣ ବିବାହର ତୁରନ୍ତ ପରେ ପରେ ମରୁଥିବା ବା ମାରି ଦିଆଯାଉଥିବା ମହିଳାଙ୍କ ତଥ୍ୟ ଦେଇପାରିବେ?
ମାମଲାକୁ କୋର୍ଟ ସମ୍ପୂର୍ଣ୍ଣ ଏକତରଫା କହିବା ସହ କେହି କେବେ ଆତ୍ମହତ୍ୟା କରିବାକୁ ଚାହିଁ ନ ଥାଏ ଓ ଏହା ଭିନ୍ନ ଭିନ୍ନ ମାମଲାର ତଥ୍ୟ ଆଧାରିତ। ଏହା ଏକ ମାନସିକ ସ୍ଥିତି। ଅପରାଧିକ ଆଇନ ଦେଖାଶୁଣା କରିଥାଏ, କିନ୍ତୁ ଉପଚାର କରି ନ ଥାଏ ବୋଲି କହି ଯାଚିକା ଖାରଜ କରିଦେଇଛନ୍ତି କୋର୍ଟ। ପୁରୁଷ ବି ଘରୋଇ ହିଂସାର ଶିକାର ହେଉଛନ୍ତି। ସେମାନେ ମଧ୍ୟ ମହିଳାଙ୍କ ଦ୍ୱାରା ନିର୍ଯାତିତ ହେଉଛନ୍ତି। ଅନେକ ମଧ୍ୟ ଏଥିରେ ଅତିଷ୍ଠ ହୋଇ ନିଜ ଜୀବନ ନେଉଛନ୍ତି। ତେଣୁ ଏମାନଙ୍କ ସୁରକ୍ଷା ପାଇଁ ଏକ ଦକ୍ଷ, ଆଇନଗତ ବ୍ୟବସ୍ଥାର ଆବଶ୍ୟକତା ପାଇଁ ଦୀର୍ଘ ଦିନରୁ ଦାବି ହୋଇଆସୁଥିଲା।
ଅନେକ ବାଧା ବିଘ୍ନ, ଘାତ ପ୍ରତିଘାତର ସାମ୍ନା କରି ଶେଷରେ ସୁପ୍ରିମ କୋର୍ଟରେ ପହଞ୍ଚିଥିଲା ଦାବି। ଓକିଲ ମହେଶ ତିୱାରୀଙ୍କ ଦ୍ୱାରା ପୁରୁଷ କମିଶନ ଗଠନ ଯାଚିକା ସୁପ୍ରିମ କୋର୍ଟରେ ଦାୟର ହୋଇଥିଲା। ଏଥିରେ ସେ ଏନସିଆରଟିର ୨୦୨୧ ଡାଟା ଦେଇଥିଲେ। ଏହି ଡାଟା ଅନୁଯାୟୀ, ଏହି ବର୍ଷ ୧ଲକ୍ଷ ୬୪ହଜାର ୩୩ ଲୋକ ନିଜ ଜୀବନ ନିଜେ ନେଇଥିଲେ। ସେମାନଙ୍କ ମଧ୍ୟରୁ ୮୧ହଜାର ୦୬୩ ପୁରୁଷ ଥିଲେ ଓ ୨୮ହଜାର ୬୮୦ ମହିଳା ଥିଲେ। ଅର୍ଥାତ୍ ମହିଳାଙ୍କଠାରୁ ଅଧିକ ପୁରୁଷ ଘରୋଇ ହିଂସାର ଶିକାର ହେଉଛନ୍ତି। ତେଣୁ ଘରୋଇ ହିଂସାର ଶିକାର ପୁରୁଷଙ୍କ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ପାଇଁ ଦିଶା ନିର୍ଦ୍ଦେଶ ଜାରି କରିବାକୁ ହୋଇଥିଲା ଦାବି।
