ଅଡୁଆରେ ଯାଜପୁର ଜିଲ୍ଲା ସୁକିନ୍ଦା ଥାନା ଏସଆଇ ନିର୍ମଳ କୁମାର ସେନାପତି । ଲାଞ୍ଚ ନେଇ ସେ ଭିଜିଲାନ୍ସ ଦ୍ୱାରା ଧରାପଡ଼ିଛନ୍ତି । ବିଭିନ୍ନ ସ୍ଥାନରେ ଚଢ଼ାଉ କରିଛି ଭିଜିଲାନ୍ସ ଟିମ୍ ।
ସୂଚନା ଅନୁସାରେ ସୁକିନ୍ଦା ମୁଖ୍ୟ ରାଜପଥରୁ ଏକ ବାଲି ବୋଝେଇ ହାଇୱା ଜବତ କରିଥିଲେ ସୁକିନ୍ଦା ତହସିଲଦାର । ଏହି ଗାଡ଼ିକୁ ସେ ସୁକିନ୍ଦା ଥାନାରେ ଜିମା ଦେଇଥିଲେ । ଏହି ଘଟଣାରେ ସୁକିନ୍ଦା ପୋଲିସ ଏକ ମାମଲା ରୁଜ୍ଜୁ କରିଥିଲା । ବାଲି ଗାଡ଼ି ଡ୍ରାଇଭର ମନୋହରପୁର ଗାଁର ପ୍ରକାଶ ସିଂଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା । ସେହି ବାଲି ବୋଝେଇ ଗାଡ଼ି ଥାନାରୁ ଖଲାସ କରିବା ପାଇଁ ଗାଡ଼ି ମାଲିକଙ୍କ ଠାରୁ ଲାଞ୍ଚ ନେଉଥିଲେ ସୁକିନ୍ଦା ଥାନା ଏସ୍ଆଇ ନିର୍ମଳ ସେନାପତି । ସେ ୧୦ ହଜାର ଟଙ୍କା ଲାଞ୍ଚ ନେଉଥିବା ବେଳେ କଟକ ଭିଜିଲାନ୍ସ ଟିମ ହାତରେ ଧରାପଡ଼ିଛନ୍ତି । ଏହି ଘଟଣାରେ ସୁକିନ୍ଦା ଥାନା ଏସ୍ଆଇ ନିର୍ମଳ ସେନାପତିଙ୍କ ଘରେ ଚଢ଼ାଉ କରିବା ପରେ ତାଙ୍କୁ କଟକ ନିଆଯାଇଛି ।
ରାଜ୍ୟରେ ଲାଞ୍ଚ କାରବାର ବଢ଼ିବାରେ ଲାଗିଛି । ପିଅନ, କ୍ଲର୍କ ଠାରୁ ଆରମ୍ଭ କରି ବହୁ ଅଧିକାରୀ ଲାଞ୍ଚ ନେଉଥିବା ଅଭିଯୋଗ ଆସୁଛି । ଏମାନଙ୍କ ମଧ୍ୟରୁ ଅଧିକାଂଶ ଗିରଫ ହେଲେଣି । କେଉଁଠି କୋଟିପତି ପିଅନ ତ ଆଉ କେଉଁଠି କୋଟିପତି ଅଧିକାରୀ ଭିଜିଲାନ୍ସ ଜାଲରେ ପଡୁଛନ୍ତି । ଭିଜିଲାନ୍ସ ବିଭାଗ ଲାଞ୍ଚଖୋର ଅଧିକାରୀଙ୍କ ବିରୋଧରେ ଏହି ଅଭିଯାନ ଜାରି ରଖିଛି ।
