ସାମ୍ବାଦିକ ଏବଂ ଆଇଆଇସିଙ୍କ ବିବାଦ ହାଟରେ ପଡି ଦାଣ୍ଡରେ ଗଡୁଛି । ଯାହାକୁ ନେଇ ପାଟି ଖୋଲିଛନ୍ତି ଆଇଆଇସି ଯ୍ୟୋତିର୍ମୟୀ ସେଠୀ । ଗଣମାଧ୍ୟମ ଆଗରେ ସଫେଇ ରଖି ତାଙ୍କୁ ଫସେଇ ଦିଆଯାଇଛି ଏବଂ ଜଣେ ମହିଳା ପୋଲିସ ହିସାବରେ ତାଙ୍କ ଆତ୍ମସମ୍ନାନ ନଷ୍ଟ ହୋଇଛି ବୋଲି ସେ ପ୍ରତିକ୍ରିୟା ରଖିଛନ୍ତି । କିଛି ଦିନ ତଳେ ଡେରାବିଶ ଆଇଆଇସି ଥିବା ଯ୍ୟୋତିର୍ମୟୀ ସେଠୀଙ୍କୁ ନେଇ ବିବାଦ ଉଠିଥିଲା । ଖବର ସଂଗ୍ରହ ବେଳେ ତତ୍କାଳୀନ ଡେରାବିଶ ଥାନା ଅଧିକାରିଣୀ ଯ୍ୟୋତିର୍ମୟୀ ସେଠୀ ଜଣେ ଗଣମାଧ୍ୟମ ପ୍ରତିନିଧିଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଥିଲା । ପରେ କୌଣସି କାରଣ ବଶତଃ ଯ୍ୟୋତିର୍ମୟୀ ସେଠୀଙ୍କର ନିକିରେଇ ଥାନାକୁ ବଦଳି ହୋଇଥିଲା । କିନ୍ତୁ, ଆଜି ଆଇଆଇସି ଗଣମାଧ୍ୟମ ଆଗରେ ନିଜର ପକ୍ଷ ରଖିଛନ୍ତି ।
ଜଣେ କର୍ତ୍ତବ୍ୟନିଷ୍ଠ ପୋଲିସ ଅଧିକାରିଣୀ ଭାବେ ନିଜର କର୍ତ୍ତବ୍ୟ ଠିକ୍ ଭାବେ ତୁଲାଇବା ସହ ଲୋକଙ୍କ ସେବାରେ ନିଜକୁ ବ୍ରତି କରିଥିବା ଯ୍ୟୋତିର୍ମୟୀ କହିଛନ୍ତି । ଅନ୍ୟପଟେ ଯ୍ୟୋତିର୍ମୟୀ ଡେରାବିଶ ଥାନାରେ ଇନଚାର୍ଜ ଥିବା ସମୟରେ ଲୋକମାନେ ସଠିକ ନ୍ୟାୟ ପାଆନ୍ତି ବୋଲି ଡେରାବିଶ ଅଞ୍ଚଳର ଲୋକେ ମତ ଦେଇଛନ୍ତି । ଯ୍ୟୋତିର୍ମୟୀ ଜଣେ ଭଦ୍ର, ମିଷ୍ଟଭାସି ଓ ସରଳ ପ୍ରବୃତିର ମଣିଷ । ସେ ଡେରାବିଶ ଥାନାରୁ ବଦଳି ହେବା ପରେ ଡେରାବିଶ ଅଞ୍ଚଳ ଜଣେ ଦକ୍ଷ ଥାନା ଅଧିକାରିଣୀଙ୍କୁ ହରାଇଥିବା କହିଛନ୍ତି ସାଧାରଣ ଲୋକେ । ତେବେ ବିବାଦ ଯାହା ହେଉ ନା କାହିଁକି, ଆଇଆଇସି ଯ୍ୟୋତିର୍ମୟୀ ପୂର୍ବରୁ କାମ କରିଥିବା ଡରାବିଶ ଅଞ୍ଚଳର ଲୋକେ ତାଙ୍କ କାମରେ ବେଶ ଖୁସି ଥିବା ବ୍ୟକ୍ତ କରିଛନ୍ତି । ଯଦି ଜଣେ ସରକାରୀ ଅଧିକାରୀଙ୍କ କାର୍ଯ୍ୟରେ ଜନସାଧାରଣ ଖୁସୀ ତେବେ ତାଙ୍କ ଚରିତ୍ରକୁ ନେଇ ପ୍ରଶ୍ନ ଉଠାଇବା ନିହାତି ନିନ୍ଦନୀୟ ।
