ପ୍ରେସ ଗାଡିରେ ଗଞ୍ଜେଇ ହେଉଛି ଚୋରା ଚାଲାଣ । ଚୋର ଆପଣେଇଲା ଗଞ୍ଜେଇ ଚୋରୀର ନୂଆ ଫର୍ମୁଲା । ଘଟଣାଟି ହେଉଛି କୋରାପୁଟ ଜିଲ୍ଲା ପାଡୁଆ ବଡ଼ ଦେବତା ମନ୍ଦିର ନିକଟ ଛକର । ଏକ XUV ଗାଡ଼ିରୁ ପୋଲିସ ଦ୍ବାରା ୧୫୧ କେଜି ଗଞ୍ଜେଇ ଜବତ କରାଯିବା ସହ ୨ ଜଣଙ୍କୁ ଗିରଫ କରାଯାଇଛି । ଗିରଫ ଦୁଇ ଜଣ ହେଉଛନ୍ତି ମହାରାଷ୍ଟ୍ରର ଔରାଙ୍ଗାବାଦ ଅଞ୍ଚଳର ମିଳିନ୍ଦ ଚିକତେ ଓ ଶୁଭମ ସଞ୍ଜୟ ସିନ୍ଧେ ।
ଗତକାଲି ରାତିରେ କୋରାପୁଟ ଏସ୍ପିଙ୍କୁ ଇନପୁଟ ମିଳିଥିଲା ଯେ, ଏକ ଗାଡିରେ ଗଞ୍ଜେଇ ଚାଲାଣ ହେଉଛି । ସୂଚନା ପାଇବା ମାତ୍ରେ ପାଡ଼ୁଆ ଥାନା ଅଧିକାରୀ ସବ୍ୟସାଚୀ ଶତପଥୀଙ୍କ ନେତୃତ୍ୱରେ ଏକ ପୋଲିସ ଟିମ୍ ସକ୍ରିୟ ହୋଇଉଠିଥିଲେ । ବଡ଼ ଦେବତା ମନ୍ଦିର ନିକଟରେ ପୋଲିସର ମିଳିତ ଟିମ୍ ଗାଡ଼ିମୋଟର ଗୁଡ଼ିକୁ ଯାଞ୍ଚ କରିଥିଲେ । ଏହି ସମୟରେ ସେହି ରାସ୍ତା ଦେଇ ଯାଉଥିବା ଏହି XUV-500 ଗାଡ଼ିକୁ ପୋଲିସ ସନ୍ଦେହ କରିବା ସହିତ ଅଟକାଇଥିଲା । ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି ଏହି ଗାଡିର ଆଗ ଓ ପଛରେ ପ୍ରେସ ଲେଖାଯାଇଥିଲା । କାରଣ ଗଣମାଧ୍ୟମ ଗାଡି ଦେଖିଲେ ହୁଏତ ଅଧିକ ଯାଞ୍ଚ ହେବନାହିଁ ଭାବି ଚୋର ଏହି ଫଣ୍ଡା ଆପଣାଇଥିଲା ।
ହେଲେ ଚୋରଙ୍କ ଏହି ଚକ୍ରାନ୍ତ ଫେଲ ମରିଥିଲା । ଯାଞ୍ଚ ବେଳେ ଏହି ଗାଡ଼ି ଭିତରୁ ୭ଟି ଜରି ବସ୍ତାରେ ଗଞ୍ଜେଇ ମିଳିଥିଲା । ମାଜିଷ୍ଟ୍ରେଟଙ୍କ ଉପସ୍ଥିତିରେ ଗଞ୍ଜେଇ ପ୍ୟାକେଟ ଗୁଡ଼ିକୁ ଓଜନ କରାଯାଇଥିବା ବେଳେ ସେଥିରେ ୧୫୧ କେଜି ଗଞ୍ଜେଇ ଥିବା ଜଣାପଡ଼ିଥିଲା ।
ଏସମ୍ପର୍କରେ ସୂଚନା ଦେବାକୁ ଯାଇ ନନ୍ଦପୁର ଏସ୍ଡିପିଓ ସଞ୍ଜୟ କୁମାର ମହାପାତ୍ର କହିଛନ୍ତି ଯେ, ପୋଲିସ୍ ଆଖିରେ ଧୂଳି ଦେଇ ଯାଞ୍ଚରୁ ଖସିଯିବା ପାଇଁ ଅଭିଯୁକ୍ତ ମାନେ ଗାଡ଼ିରେ ପ୍ରେସ ଲେଖିଥିଲେ, କିନ୍ତୁ ସେମାନେ ସାମ୍ବାଦିକ ନୁହନ୍ତି ।
