Month: May 2023

ଅର୍ଡର କରିଥିଲେ ଲାପଟପ୍, ଆସିଲା ପାଉଡର ପ୍ୟାକେଟ୍

କେନ୍ଦୁଝର ଜିଲ୍ଲାରେ ବଡ଼ ଧରଣର ଠକେଇର ଶିକାର ହୋଇଛନ୍ତି ଯୁବକ । ଲାପଟପ୍ ଅର୍ଡର କରିଥିଲେ ହେଲେ ତାଙ୍କ ନିକଟକୁ ଆସିଛି ପାଉଡର ପ୍ୟାକେଟ୍ ଯାହାକୁ ନେଇ ସେ ଥାନାର ଦ୍ୱାରସ୍ଥ ହୋଇଛନ୍ତି ।

ଯୋଡ଼ା ପୌରପାଳିକା ଅନ୍ତର୍ଗତ ପଶ୍ଚିମ ଯୋଡ଼ା ସେଗ୍ରୀକେସନ ଅଞ୍ଚଳରେ ରୁହନ୍ତି ଚୌଧୁରୀ ମହାନ୍ତ । ସେ ଚଳିତମାସ ୧୪ ତାରିଖରେ ଅମାଜନ ନାମକ ସଂସ୍ଥା ଠାରୁ ଅନଲାଇନରେ ଅର୍ଡର କରିଥିଲେ ଏକ୍ ଲାପଟପ୍ । ଏହାର ମୂଲ୍ୟ ଥିଲା ୫୬ ହଜାର ୯୯୦ ଟଙ୍କା । ତେବେ ଶୁକ୍ରବାର ଡେଲିଭରୀ ଯୁବକ ଦ୍ଵାରା ଘରକୁ ପ୍ୟାକିଂ ହୋଇ ଏକ ପ୍ୟାକେଟ୍ ଆସିଥିଲା । ଲାପଟପ୍ ଆସିଲା ଜାଣି ପ୍ୟାକେଟ୍ ରିସିଭ୍ କରିଥିଲେ ଚୌଧୁରୀ ମହାନ୍ତ ।

ହେଲେ ଖୋଲିଲା ପରେ କିନ୍ତୁ ହୋସ୍ ଉଡ଼ିଗଲା । ପ୍ୟାକେଟ୍ ଭିତରୁ ଏମିତି କ’ଣ ବାହାରିଲା ସେ ଆଶ୍ଚର୍ଯ୍ୟ ହୋଇଗଲେ । ଲାପଟପ୍ ବଦଳରେ ବାହାରିଲା ମିଷ୍ଟର ହ୍ୱାଇଟର ଦୁଇ କିଲୋ ଡିଟରଜେଣ୍ଟ ପାଉଡର । ଏହାଦେଖି ହତୋତ୍ସାହ ହୋଇପଡ଼ିଲେ ଚୌଧୁରୀ ମହାନ୍ତ ।

ଏ ନେଇ ଯୋଡ଼ା ଥାନାରେ ଡେଲିଭରୀ କମ୍ପାନୀ ଅମାଜନ ନାଁରେ ଲିଖିତ ଅଭିଯୋଗ କରିଛନ୍ତି ଚୌଧୁରୀ । ଅନଲାଇନରେ ଗ୍ରାହକମାନେ ଘରେ ବସି ସବୁ ପ୍ରକାର ଜିନିଷ ପାଇପାରୁଛନ୍ତି । ଏଭଳି ଘଟଣା ନିହାତି କମ୍ପାନୀ ଉପରୁ ଧୀରେ ଧୀରେ ବିଶ୍ୱାସ ତୁଟାଉଛି ।
୨୦୨୪ ସାଧାରଣ ନିର୍ବାଚନ ପାଇଁ ସଜବାଜ ହେଉଛି ରାଜ୍ୟ ବିଜେପି

ଭାରତୀୟ ଜନତା ପାର୍ଟି ଆଗାମୀ ୨୦୨୪ ସାଧାରଣ ନିର୍ବାଚନରେ କିପରି ଭାବେ ପଡ଼ିଆକୁ ଓହ୍ଲାଇବ ସେ ନେଇ ରଣନୀତି ପ୍ରସ୍ତୁତ କରିଛି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଅଧ୍ୟକ୍ଷତାରେ ଆୟୋଜିତ ଏହି ରାଜ୍ୟ କାର୍ଯ୍ୟକାରିଣୀ ବୈଠକରେ ଶନିବାର ଏନେଇ ସୂଚନା ମିଳିଛି । ରଣନୀତି ଅନୁସାରେ ରାଜ୍ୟର ୧କୋଟି ପରିବାର ପାଖରେ କେମିତି ପହଞ୍ଚିବ, ସେଥିପାଇଁ ରୋଡମ୍ୟାପ୍ ପ୍ରସ୍ତୁତ କରୁଛି। ଆସନ୍ତା ଏକ ମାସ ଭିତରେ ଓଡ଼ିଶାରେ ଏହାର ମୂଳଦୁଆ ପକାଇବାକୁ ଦଳ ଲକ୍ଷ୍ୟ ରଖିଛି। ସେଥିପାଇଁ ପ୍ରତି ବୁଥରେ ୨୦୦ରୁ ୨୫୦ ଲୋକଙ୍କ ପାଖକୁ ଯାଇ ମହାଜନସମ୍ପର୍କ ଅଭିଯାନ କରିବ।

ସେହିପରି ମଣ୍ଡଳ ସ୍ତରରେ ୪ଜଣିଆ ଟିମ୍ ରହିବେ। ପ୍ରଦେଶ କାର୍ଯ୍ୟକାରିଣୀ, ଜିଲ୍ଲା ଓ ମଣ୍ଡଳ ବୈଠକ କରାଯିବାର କାର୍ଯ୍ୟକ୍ରମ ରହିଛି । ମେ ୨୫ ପୂର୍ବରୁ ସବୁ ଜିଲ୍ଲା ଓ ମଣ୍ଡଳ କାର୍ଯ୍ୟ ଓ ସମିତି ବୈଠକ ଶେଷ ହେବ। ସବୁ କାର୍ଯ୍ୟ ସମିତି ବୈଠକରେ ନିର୍ବାଚିତ ପ୍ରତିନିଧିମାନଙ୍କୁ ଯୋଡ଼ାଯିବ । ମେ ୨୯ରେ ବର୍ଷ ପୂର୍ତିର ଲୋକଙ୍କୁ ବାର୍ତା ଦିଆଯିବ । ତୃଣମୂଳସ୍ତରରେ କାମ ଆରମ୍ଭ କରାଯିବା ନେଇ ରଣନୀତି ପ୍ରସ୍ତୁତ ହେଉଛି ।

ବିଜେପିର କାର୍ଯ୍ୟକାରିଣୀ ବୈଠକରେ ରାଜ୍ୟ ପ୍ରଭାରୀ ଡି ପୁରନ୍ଦେଶ୍ବରୀ ଓ ରାଜ୍ୟ ସଭାପତି ମନମୋହନ ସାମଲଙ୍କ ସମେତ ବରିଷ୍ଠ କର୍ମକର୍ତ୍ତା ଉପସ୍ଥିତ ଥିଲେ ।
କଳାହାଣ୍ଡିରେ ବିକାଶର ବିଗୁଲ ଫୁଙ୍କିଲେ ୫-ଟି ସଚିବ
- ୫-ଟି ସଚିବଙ୍କ କଳାହାଣ୍ଡି ଗସ୍ତର ଦ୍ବିତୀୟ ଦିନ
- ପିପଳ ନଳା ଜଳସେଚନ ପ୍ରକଳ୍ପର ଉନ୍ନତି ଓ ପର୍ଯ୍ୟଟନର ବିକାଶ ପାଇଁ ଏକ ମାସ ମଧ୍ୟରେ ଡିପିଆର
- ମା ଇନ୍ଦ୍ରାବତୀ ମନ୍ଦିର ଓ ମ୍ୟୁଜିଅମ କମ୍ଫଲେକ୍‌ସ ପାଇଁ ଆଉ ୧୪ କୋଟି
- ମା ମାଣିକେଶ୍ବରୀଙ୍କ ମନ୍ଦିରର ପୁନର୍ବିକାଶ ପାଇଁ ଏକ ସପ୍ତାହ ମଧ୍ୟରେ ଖର୍ଚ୍ଚ ଆକଳନ କରି ରିପୋର୍ଟ ଦେବାକୁ ନିର୍ଦ୍ଦେଶ
- ଥୁଆମୁଳ-ରାମପୁରରେ ହେବ ଯୁକ୍ତ ୩ ଡିଗ୍ରୀ କଲେଜ ।
ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ୫-ଟି ସଚିବ ଶ୍ରୀ ଭି.କେ. ପାଣ୍ଡିଆନ ଆଜି କଳାହାଣ୍ଡି ଗସ୍ତର ଦ୍ବିତୀୟ ଦିନରେ ଅନେକ ପ୍ରକଳ୍ପ ପରିଦର୍ଶନ କରି ତାର ଉନ୍ନତିକରଣ ପାଇଁ ପଦକ୍ଷେପ ନେଇଛନ୍ତି । ପ୍ରଥମେ ସେ ପିପଳ ନଳା କ୍ଷୁଦ୍ର ଜଳସେଚନ ପ୍ରକଳ୍ପ ଅଞ୍ଚଳ ଗସ୍ତ କରି ସେଠାରେ ଏହାର ଉନ୍ନତି ପାଇଁ ସ୍ଥାନୀୟ ଲୋକ ଓ ବିଭାଗୀୟ ଇଂଜିନିଅର ମାନଙ୍କ ସହ ଆଲୋଚନା କରିଥିଲେ । ପିପଳ ନଳାର ଜଳସେଚନ କ୍ଷମତାର ବୃଦ୍ଧି ତଥା ଏଠାରେ ଏକ ପର୍ଯ୍ୟଟନ ବିକାଶ କାର୍ଯ୍ୟକ୍ରମ ହାତକୁ ନେବା ପାଇଁ ସେ ନିଷ୍ପତ୍ତି ନେଇଥିଲେ । ଏହାର ବିସ୍ତୃତ ପ୍ରକଳ୍ପ ରିପୋର୍ଟ ଏକ ମାସ ମଧ୍ୟରେ ପ୍ରସ୍ତୁତ କରି ପ୍ରଦାନ କରିବାକୁ ସେ ପରାମର୍ଶ ଦେଇଛନ୍ତି ।

ଏହାପରେ ସେ ଥୁଆମୁଳ-ରାମପୁର ଯାଇ ସେଠାରେ ସାଧାରଣ ଲୋକ ଓ ଛାତ୍ରଛାତ୍ରୀ ମାନଙ୍କ ସହିତ ଆଲୋଚନା କରି ସେଠାରେ ଏକ ଯୁକ୍ତ-୩ ଡିଗ୍ରୀ କଲେଜ ସ୍ଥାପନ କରାଯିବ ବୋଲି ଘୋଷଣା କରିଥିଲେ । ଏହାଦ୍ବାରା ସ୍ଥାନୀୟ ଛାତ୍ରଛାତ୍ରୀ ମାନଙ୍କର ଶିକ୍ଷାର ବିକାଶ ହେବ ବୋଲି ସେ ଆଶାପ୍ରକାଶ କରିଥିଲେ । ଭଟଙ୍ଗପଦର ହାଇସ୍କୁଲ ପଡିଆରେ ସେ ସ୍ଥାନୀୟ ଛାତ୍ରଛାତ୍ରୀ ଓ ମିଶନ ଶକ୍ତି ଗୋଷ୍ଠୀର ସଦସ୍ୟ ମାନଙ୍କ ସହିତ ଆଲୋଚନା କରି ସେମାନଙ୍କର ସୁବିଧା ଅସୁବିଧା ସଂପର୍କରେ ବୁଝିଥିଲେ ଏବଂ ଏହାର ସମାଧାନ ପାଇଁ ସ୍ଥାନୀୟ ଅଧିକାରୀଙ୍କୁ ପରାମର୍ଶ ଦେଇଥିଲେ ।

କଳାହାଣ୍ଡିର ଥୁଆମୁଳ-ରାମପୁର ଠାରେ ପ୍ରସିଦ୍ଧ ମା ମାଣିକେଶ୍ବରୀ ମନ୍ଦିର ପରିଦର୍ଶନ କରି ସେ ମା’ଙ୍କ ପୂଜାର୍ଚ୍ଚନା କରିଥିଲେ । ଏହାପରେ ସ୍ଥାନୀୟ ଜନସାଧାରଣ ଓ ମନ୍ଦିର କମିଟି ସଦସ୍ୟ ମାନଙ୍କ ସହିତ ଆଲୋଚନା କରି ଏହାର ପୁନର୍ବିକାଶ ଉପରେ ଗୁରୁତ୍ବ ଆରୋପ କରିଥିଲେ । ଏଥିପାଇଁ ଖର୍ଚ୍ଚ ଏକ ଆକଳନ କରି ଏକ ସପ୍ତାହ ମଧ୍ୟରେ ରିପୋର୍ଟ ପ୍ରଦାନ କରିବାକୁ ଶ୍ରୀ ପାଣ୍ଡିଆନ ନିର୍ଦ୍ଦେଶ ଦେଇଥିଲେ ।

କଲମପୁର ମିନି ଷ୍ଟାଡିଅମ ଠାରେ ସ୍ଥାନୀୟ ଲୋକଙ୍କ ସହ ଆଲୋଚନା କରି ଷ୍ଟାଡିଅମର ଅଧିକ ଉନ୍ନତି ପାଇଁ ବିଭାଗୀୟ ଅଧିକାରୀ ମାନଙ୍କୁ ପରାମର୍ଶ ଦେଇଥିଲେ ।

ଏହାପରେ ଶ୍ରୀ ପାଣ୍ଡିଆନ ମଙ୍ଗଳପୁର ବ୍ୟାରେଜ ଠାରେ ଇନ୍ଦ୍ରାବତୀ ପାର୍କ ଓ ମ୍ୟୁଜିଅମ ପରିଦର୍ଶନ କରିଥିଲେ । ସେଠାରେ ମା ଇନ୍ଦ୍ରାବତୀଙ୍କ ମନ୍ଦିରର ନିର୍ମାଣ କାର୍ଯ୍ୟ ମଧ୍ୟ ଦେଖିଥିଲେ। ଏହି ମନ୍ଦିର ଓ ମ୍ୟୁଜିଅମ ପାଇଁ ଆହୁରି ଅତିରିକ୍ତ ୧୪ କୋଟି ଟଙ୍କା ଯୋଗାଇ ଦିଆଯିବ ବୋଲି ସେ ସୂଚନା ଦେଇଥିଲେ ଥିଲେ । ଏହାପରେ ସେ ଇନ୍ଦ୍ରାବତୀ ଦକ୍ଷିଣ କେନାଲର ଲାଇନିଂ କାମ ବୁଲି ଦେଖିଥିଲେ। ଏହି କାମ ଠିକ୍‌ ସମୟରେ ଶେଷ କରିବାକୁ ସେ ବିଭାଗୀୟ ଇଂଜିନିଅର ମାନଙ୍କୁ ପରାମର୍ଶ ଦେଇଥିଲେ ।

ଆମପାଣି ଠାରେ ପ୍ରସିଦ୍ଧ ବୁଢାରାଜା ମନ୍ଦିର ପରିଦର୍ଶନ କରି ଶ୍ରୀ ପାଣ୍ଡିଆନ ପୂର୍ଜାର୍ଚ୍ଚନା କରିଥିଲେ ଏବଂ ମନ୍ଦିରର ଉନ୍ନତି ଓ ସୌନ୍ଦର୍ଯ୍ୟକରଣ ପାଇଁ 15 ଦିନ ମଧ୍ୟରେ ଡିପିଆର ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ । ଡୋକ୍ରିଚାଞ୍ଚରା ଓ ଗୁଡହାଣ୍ଡି ଠାରେ ସ୍ଥାନୀୟ ଲୋକ ଓ ବନ କମିଟି ସଦସ୍ୟ ମାନଙ୍କ ସହ ଆଲୋଚନା କରି ସ୍ଥାନୀୟ ଲୋକଙ୍କ ସୁବିଧା ପାଇଁ ପଦକ୍ଷପ ନେବାକୁ ଡିଏଫଓଙ୍କୁ ପରାମର୍ଶ ଦେଇଥିଲେ। ଏଥିପାଇଁ ଏକ ମାସ ମଧ୍ୟରେ DPR ପ୍ରସ୍ତୁତ କରିବା ପାଇଁ ପରାମର୍ଶ ଦେଇଥିଲେ ।

ଧରମଗଡରେ ମା ଭଣ୍ଡାରଘରଣୀ ମନ୍ଦିର ପରିଦର୍ଶନ କରି ପୂଜାର୍ଚ୍ଚନା କରିଥିଲେ ଏବଂ ଏହା ଅଧିକ ଉନ୍ନତି ପାଇଁ ପ୍ରସ୍ତାବ ଆହ୍ଵାନ ଦେଇଥିଲେ। ଗମ୍ଭାରୀଗୁଡା ଠାରେ ଯଶୋଦା ଅନନ୍ତ ଆଶ୍ରମ ପରିଦର୍ଶନ କରି ସେଠାରେ ଅନ୍ତେବାସୀଙ୍କ ସହ ଆଲୋଚନା କରି ଆଶ୍ରମର ଉନ୍ନତି ପାଇଁ ପଦକ୍ଷେପ ନେବାକୁ ସ୍ଥାନୀୟ ଅଧିକାରୀଙ୍କୁ ପରାମର୍ଶ ଦେଇଥିଲେ । ଯଶୋଦା ଆଶ୍ରମ ରେ Dinning hall, computer room, library ,ଓ ପାର୍କ ର ବିକାଶ କରାଯିବ ବୋଲି ଶ୍ରୀ ପାଣ୍ଡିଆନ୍ କହିଥିଲେ । ଏହାପରେ 5T ସଚିବ ଯଶୋଦା ଆଶ୍ରମ ଅନ୍ତେବାସୀଙ୍କ ସହିତ ମଧ୍ୟାହ୍ନ ଭୋଜନ ମଧ୍ୟ କରିଥିଲେ ।

ଏହାପରେ ସେ ଧରମଗଡ ବିଜୁ ପଟ୍ଟନାୟକ ଇଣ୍ଡୋର ଷ୍ଟାଡିଅମ, ପଞ୍ଚାୟତ କଲେଜ, କଲ୍ୟାଣ ମଣ୍ଡପ ଆଦି ପରିଦର୍ଶନ କରି ସ୍ଥାନୀୟ ଲୋକ, ମିଶନ ଶକ୍ତି ସଦସ୍ୟା ଓ ଛାତ୍ରଛାତ୍ରୀ ମାନଙ୍କ ସହ ଆଲୋଚନା କରି ସେ ସବୁ ସ୍ଥାନର ଅଧିକ ବିକାଶ ପାଇଁ ସେମାନଙ୍କ ଠାରୁ ମତାମତ ଗ୍ରହଣ କରିଥିଲେ ।
ଆଗେଇ ଚାଲିଛି ମହାପ୍ରଭୁଙ୍କ ରଥ ନିର୍ମାଣ କାର୍ଯ୍ୟ

ମହାପ୍ରଭୁଙ୍କ ରଥଯାତ୍ରା ପାଇଁ ତିନି ରଥ ନିର୍ମାଣ ବେଶ୍ ଆଗେଇ ଚାଲିଛି । ସମୟ ଅନୁଯାୟୀ ସଠିକ୍ ସମୟରେ ସବୁ କାର୍ଯ୍ୟ କରାଯାଉଛି । ତେବେ ତିନି ରଥର ସମ୍ପୂର୍ଣ ଅଖ ଚକ ସଂଯୋଗ ହୋଇ ସାରିଛି । ଭୋଇ ସେବକ ମାନେ ଏହି କାର୍ଯ୍ୟ ସମ୍ପାଦନ କରିଥଲେ । ତେବେ ରଥ ଖଳାରେ ଚାରି ନାହାକା ଓ ଗର ଗରା କାର୍ଯ୍ୟ ଚାଲୁ ରହିଛି । ତିନି ରଥର ଦୁଇଟି ଲେଖାଁଏ ୨୦ ଫୁଟିଆ ଆଗଆଣି, ପଛଆଣି “ଦଣ୍ଡା ମୁହାଁଟି”ର ଅନୁକୂଳ ପୂଜା ପରେ ବିନ୍ଧ କାମ ଆରମ୍ଭ ହୋଇ ଶେଷ ହୋଇଛି । ଏହି ଦଣ୍ଡାମୁହାଁଟି ତିନି ରଥର ପାଞ୍ଚ ଦଣ୍ଡାରେ ଆଗ ଏବଂ ପଛ ଭାଗରେ ସଂଯୋଗ ହେବ, ପ୍ରତି ଦଣ୍ଡା ମୁହାଁଟିରେ ପାଞ୍ଚୋଟି ଲେଖାଁଏ ବିନ୍ଧ କରାଯାଇଛି । ତିନି ରଥର ୧୨ଟି ଲେଖାଁଏ ଭୂଇଁ ଚଉତାର ବିନ୍ଧ ଅନୁକୂଳ ପୂଜା ମୁଖ୍ୟ ମହାରଣାଙ୍କ ଦ୍ୱାରା ସମ୍ପନ୍ନ ପରେ ତିନି ରଥର ମହାରଣା ମାନେ ପ୍ରତି ଚଉତାର ଦୁଇ ପାର୍ଶ୍ଵରେ ଦୁଇଟି ଲେଖାଁଏ ବିନ୍ଧ କାର୍ଯ୍ୟ ଶେଷ କରିଛନ୍ତି ।

ତିନି ରଥ ଚାଳିକୁ ପ୍ରଥମ ପର୍ଯ୍ୟାୟରେ ଯୋଗାଇ ଦିଆ ଯାଇଥିବା ୨୦ ଫୁଟିଆ ୮ଟି ଲେଖାଁଏ “୧୪ ନାହାକା” କାଠରେ ତିନି ରଥ ମହାରଣା ମାନେ ସେଥିରେ ଆଠ ଅଂଶୀ କୋଣ ବିଶିଷ୍ଟ ନାହାକା ନିର୍ମାଣ ଶେଷ କରିଛନ୍ତି । ତିନି ରଥର ଚାରି ନାହାକା ନିର୍ମାଣ ପାଇଁ ତିନି ରଥ ଚାଳିକୁ ରଥ ଆମୀନ ପ୍ରଥମ ପର୍ଯ୍ୟାୟରେ ଭୋଇ ସେବକଙ୍କ ମାଧ୍ୟମରେ ଦୁଇଟି ଲେଖାଁଏ ୨୦ ଫୁଟିଆ ଧଉରା କାଠ ଯୋଗାଇ ଦେଇଥିଲେ । ଚାରି ନାହାକାର ଚଉପଟ କାଯ୍ୟ ତିନି ରଥର ମହାରଣା ମାନେ ଆରମ୍ଭ କରିଛନ୍ତି । “ଗରଗରା” ନିର୍ମାଣ ପାଇଁ ତିନି ରଥର ଚାଳିକୁ ରଥ ଆମୀନ ଭୋଇ ସେବକଙ୍କ ମାଧ୍ୟମରେ ଦୁଇଟି ଲେଖାଁଏ ୨୦ ଫୁଟିଆ ଧଉରା କାଠ ଯୋଗାଇ ଦେଇଥିଲେ । କରତି ସେବକ ସେଗୁଡିକର ମୁଣ୍ଡ କରତି କଲାପରେ ତିନି ରଥର ମହାରଣା ମାନେ ଗରଗରାର ଚଉପଟ କାଯ୍ୟ ଆରମ୍ଭ କରିଛନ୍ତି।

ଆଜି କରତି ସେବକ ମାନେ ନନ୍ଦିଘୋଷ ରଥର ୪୦ ଫୁଟିଆ ପୋଲ ଗୟଳର ଦୁଇପାର୍ଶ୍ଵ ଚିତା କାର୍ଯ୍ୟ ଶେଷ କରି ଚିରଟ ପାଇଁ ମାପ ଚିହ୍ନ ଦେଇଛନ୍ତି । ତିନି ରଥର ରୂପକାର ସେବକ ମାନେ ରଥର ଗୁଜ ଗୁଡିଜାରେ ରୂପ ଖୋଦେଇ ସହ ରୂପରେ ଅଳଙ୍କାର ତଥା ରୁପାର ପଲିସ କାର୍ଯ୍ୟ ଜାରୀ ରଖିଛନ୍ତି । ଦୋଳବେଦୀ କମାର ଶାଳରେ ଓଝା ସେବକ ମାନେ ତିନି ରଥର ଦଣ୍ଡା ପାଇଁ ଦଣ୍ଡା କଣ୍ଟା ନିର୍ମାଣ ଜାରୀ ରଖିଛନ୍ତି । ତାଳଧ୍ୱଜ ରଥର ଓଝା ସେବକ ମାନେ ତାଳଧ୍ୱଜ ରଥର ଦଣ୍ଡା ପାଇଁ ‘ଅଗପାତେଳି’ରୁ ୪୨ଟି ଏବଂ ‘ଚଉରସ’ କଣ୍ଟାରୁ ୩୫ଟି, ମୋଟ ୭୭ଟି କଣ୍ଟା ନିର୍ମାଣ କରୁଥିବା ବେଳେ ଦର୍ପଦଳନ ରଥର ଓଝା ସେବକ ମାନେ ‘ଅଗ ପାତେଳି’ରୁ ୩୬ ଗୋଟି ଏବଂ ‘ଚଉରସ’ କଣ୍ଟାରୁ ୩୦ଟି ମୋଟ ୬୬ ଗୋଟି ଏବଂ ନନ୍ଦିଘୋଷ ରଥ ଦଣ୍ଡା ପାଇଁ ଓଝା ସେବକ ମାନେ ‘ଅଗପାତେଳି’ରୁ ୪୮ ଟି ଏବଂ ‘ଚଉରସ’ କଣ୍ଟାରୁ ୪୦ଟି ମିଶାଇ ମୋଟ ୮୮ ଗୋଟି କଣ୍ଟା ଆବଶ୍ୟକ ଅନୁଯାୟୀ ନିର୍ମାଣରେ ଲାଗିଛନ୍ତି ।
ସାବଧାନ…ଆସୁଛି କାଳବୈଶାଖୀ, ମାରିବ ବିଜୁଳି…ପଡିବ ଘଡଘଡି

A rotating supercell thunderstorm moves across northeast Colorado. The dynamics, microphysics, and societal impacts of severe thunderstorms are one of the key research areas at the National Center for Atmospheric Research.

ପ୍ରଚଣ୍ଡ ଗୁଳୁଗୁଳିରେ ସାରା ରାଜ୍ୟ ସନ୍ତୁଳି ହେଉଛି । କିନ୍ତୁ ଏହାରି ଭିତରେ ଆଶ୍ୱସ୍ତିକର ଖବର ଆସିଛି । ଆସନ୍ତା କାଲି ଅର୍ଥାତ ୨୪ ଘଣ୍ଟା ମଧ୍ୟରେ ରାଜ୍ୟର ପ୍ରାୟ ସମସ୍ତ ଜିଲ୍ଲାରେ କାଳ ବୈଶାଖୀ ପ୍ରଭାବରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଫଳରେ ତାପମାତ୍ରା କମିବ ।

ସମୁଦ୍ର ପତନ ଠାରୁ ୦.୯ କିଲୋମିଟର ଉଚ୍ଚତାରେ ଛତିଶଗଡ଼ ଉପର ଦେଇ ପଶ୍ଚିମ ବିହାରରୁ ଉତ୍ତର ତେଲେଙ୍ଗାନା ପର୍ଯ୍ୟନ୍ତ ଏକ ଲଘୁଚାପ ଲାଇନ ସୃଷ୍ଟି ହୋଇଛି । ଏହାର ପ୍ରଭାବରେ ଆସନ୍ତା ୨୪ ଘଣ୍ଟା ମଧ୍ୟରେ, ଅର୍ଥାତ୍‌ ୨୧ ତାରିଖ ରବିବାର ମଧ୍ୟାହ୍ନ ସୁଦ୍ଧା ଉତ୍ତର, ଦକ୍ଷିଣ, ଆଭ୍ୟନ୍ତର, ଉପକୂଳ ଓ କେନ୍ଦ୍ରୀୟ ଓଡ଼ିଶାର ପ୍ରାୟ ସବୁ ଜିଲ୍ଲାରେ ଘଣ୍ଟା ପ୍ରତି ୩୦-୪୦ରୁ ଆରମ୍ଭ ହୋଇ ୪୦ରୁ ୫୦ କିଲୋମିଟର ବେଗରେ ପବନ ବହିବ । ଏଥିସହ ବଜ୍ରପାତ, ଘଡ଼ଘଡ଼ି ସହ ଘୂର୍ଣ୍ଣିଝଡ଼ ବା କାଳବୈଶାଖୀ ହେବାର ସମ୍ଭାବନା ରହିଛି ବୋଲି ଭାରତୀୟ ପାଣିପାଗ ବିଭାଗର ଭୁବନେଶ୍ୱରସ୍ଥିତ ଆଞ୍ଚଳିକ କେନ୍ଦ୍ର ପକ୍ଷରୁ ଏକ ସତର୍କ ସୂଚନା ଜାରି କରାଯାଇଛି ।
ଯୁକ୍ରେନ ଯୁଦ୍ଧ ସମାପ୍ତ ପାଇଁ ଚୀନ, ରୁଷ ଉପରେ ଚାପ ପକାଇବାକୁ ଜି-୭ ଦେଶ ସମୂହ ଆହ୍ବାନ କରିଛି

President of the European Council Charles Michel, Italy’s Prime Minister Giorgia Meloni, Canada’s Prime Minister Justin Trudeau, France’s President Emmanuel Macron, Japan’s Prime Minister Fumio Kishida, U.S. President Joe Biden, Germany’s Chancellor Olaf Scholz, Britain’s Prime Minister Rishi Sunak and European Commission President Ursula von der Leyen participate in a family photo with G7 leaders before their working lunch meeting on economic security during the G7 summit, at the Grand Prince Hotel in Hiroshima, Japan, May 20, 2023. REUTERS/Jonathan Ernst/Pool

ଆଜିକାଲି ଜାପାନରେ ଜି-୭ ଶିଖର ସମ୍ମିଳନୀ ଅନୁଷ୍ଠିତ ହେଉଛି, ଯେଉଁଥିରେ ଶନିବାରରେ ସାତଟି ଧନୀ ଗଣତାନ୍ତ୍ରିକ ରାଷ୍ଟ୍ରର ପ୍ରତିନିଧି ୟୁକ୍ରେନ ବିରୁଦ୍ଧରେ ଯୁଦ୍ଧ ବନ୍ଦ କରିବାକୁ ଚୀନକୁ ରୁଷ ଉପରେ ଚାପ ପକାଇବା ପାଇଁ ଅନୁରୋଧ କରିଛନ୍ତି ।

ଶନିବାର ଦିନ ମିଳିତ ବିବୃତ୍ତିରେ ଜି-୭ ନେତାମାନେ କହିଛନ୍ତି ଯେ, ସେମାନେ ଚୀନ୍‌ର କ୍ଷତି ଚାହୁଁ ନାହାଁନ୍ତି, କିନ୍ତୁ ବେଜିଂ ସହିତ ଏକ ଗଠନମୂଳକ ଏବଂ ସ୍ଥିର ସମ୍ପର୍କ ଚାହୁଁଛନ୍ତି । ଏହି ଗୋଷ୍ଠୀ କହିଛନ୍ତି ଯେ, ଆମେ ସାମରିକ ଆକ୍ରୋଶକୁ ରୋକିବା ପାଇଁ ରୁଷ ଉପରେ ଚାପ ପ୍ରୟୋଗ କରିବାକୁ ଏବଂ ତୁରନ୍ତ ସମସ୍ତ ସୈନ୍ୟଙ୍କୁ ୟୁକ୍ରେନରୁ ସମ୍ପୂର୍ଣ୍ଣ ଏବଂ ବିନା ସର୍ତ୍ତରେ ପ୍ରତ୍ୟାହାର କରିବାକୁ ଚୀନ୍‌କୁ ଆହ୍ବାନ କରୁଛୁ ।

ଜି-୭ ଗୋଷ୍ଠୀ ବିବୃତ୍ତିରେ କହିଛନ୍ତି ଯେ, ୟୁକ୍ରେନ ସହିତ ପ୍ରତ୍ୟକ୍ଷ ଆଲୋଚନା ସହିତ ଆଞ୍ଚଳିକ ଅଖଣ୍ଡତା ଏବଂ ମିଳିତ ଜାତିସଂଘ ଚାର୍ଟରର ସିଦ୍ଧାନ୍ତ ଏବଂ ଉଦ୍ଦେଶ୍ୟକୁ ଆଧାର କରି ଏକ ବ୍ୟାପକ, ନ୍ୟାୟସଙ୍ଗତ ଏବଂ ସ୍ଥାୟୀ ଶାନ୍ତିକୁ ସମର୍ଥନ ପାଇଁ ଆମେ ଚୀନକୁ ପ୍ରୋତ୍ସାହିତ କରିଛୁ । ଜଳବାୟୁ ପରିବର୍ତ୍ତନ, ଜୈବ ବିବିଧତା, ଦୁର୍ବଳ ଦେଶର ଋଣ ଏବଂ ଆର୍ଥିକ ଆବଶ୍ୟକତା, ବୈଶ୍ବୟିକ ସ୍ୱାସ୍ଥ୍ୟ ଚିନ୍ତା ଏବଂ ଅର୍ଥନୈତିକ ସ୍ଥିରତା ଭଳି ଆହ୍ବାନ ଉପରେ ମିଳିତ ଭାବରେ କାର୍ଯ୍ୟ କରିବାକୁ ଆହ୍ବାନ ଦେଇଛୁ । ଜି-୭ ଗୋଷ୍ଠୀ କହିଛନ୍ତି ଯେ, ଚୀନ ବୈଶ୍ବୟୀକ ଭୂମିକା ଏବଂ ଅର୍ଥନୈତିକ ଆକାରକୁ ଦୃଷ୍ଟିରେ ରଖି ତାକୁ ସହଯୋଗ କରାଯିବା ଆବଶ୍ୟକ ।

ନେତାମାନେ ପୂର୍ବ ଏବଂ ଦକ୍ଷିଣ ଚୀନ୍ ସାଗରରେ ପରିସ୍ଥିତିକୁ ନେଇ ଗଭୀର ଚିନ୍ତା ପ୍ରକଟ କରିଛନ୍ତି, ଯେଉଁଠାରେ ବେଜିଂ ନିଜର ସାମରିକ ଉପସ୍ଥିତି ବଢାଉଛି ଏବଂ ସ୍ୱୟଂଶାସିତ ତାଇୱାନ ଉପରେ ନିୟନ୍ତ୍ରଣ ରଖିବା ପାଇଁ ବଳ ପ୍ରୟୋଗ କରିବ ବୋଲି ଧମକ ଦେଇଛି । ତେଣୁ ଏହିସବୁର ଶାନ୍ତିପୂର୍ଣ୍ଣ ସମାଧାନ ପାଇଁ ଜି-୭ ଗୋଷ୍ଠୀର ନେତାମାନେ ଚୀନକୁ ଆହ୍ବାନ କରିଛନ୍ତି ।
ହାଇ ଡେଫିସିଟ ଡ୍ରୋନ କ୍ୟାମେରାରେ ରହିବ ରାଜଧାନୀ

ସାବଧାନ! ରାଜଧାନୀ ଉପରେ ରହିବ ପୋଲିସର ଆଖି। କମିଶନରେଟ ପୋଲିସ, ରାଜଧାନୀକୁ ଅପରାଧ ମୁକ୍ତ କରିବାକୁ ତଥା ରାସ୍ତାକୁ ନିୟନ୍ତ୍ରିତ କରିବା ଲକ୍ଷ୍ୟରେ ଆକାଶ ମାର୍ଗରୁ ଡ୍ରୋନ ଜରିଆରେ ରଖିବ ନଜର। ଏନେଇ ସୂଚନା ଦେଇଛନ୍ତି ଭୁବନେଶ୍ୱର ଡିସିପି ପ୍ରତୀକ ସିଂହ।

ଭୁବନେଶ୍ୱର ଡିସିପି କହିଛନ୍ତି କି, ରାଜ୍ୟ ରାଜଧାନୀର ଗଳି କନ୍ଦିରେ ବୁଲୁଥିବା ସନ୍ଦିଗ୍ଧ ଗାଡି ଓ ବ୍ୟକ୍ତିଙ୍କ ଉପରେ ନଜର ରଖିବାକୁ ଏପରି ବ୍ୟବସ୍ଥା ହେବାକୁ ଯାଉଛି। ଏହା ଡ୍ରୋନ ଦ୍ୱାରା ପାଟ୍ରୋଲିଂ ହେବ। ଆକାଶରେ ଏହି ଡ୍ରୋନ ୫ଶହ ମିଟର ଉଚ୍ଚରେ ରହି ମାଟି ଉପରେ ନଜର ରଖିବ। ଆଗକୁ ନିୟୋଜିତ କରିବାକୁ ଥିବା ଡ୍ରୋନ ହାଇ ଡେଫିନେସନ କ୍ୟାମେରା ଖଚିତ ହେବା ସହ ଏହା ୫ କିମି ପରିଧି ଭିତରେ ହେଉଥିବା ହରକତକୁ କ୍ୟାପଚର କରିବା ମୁଖ୍ୟତଃ ରାଜଧାନୀରେ ବିଭିନ୍ନ ପର୍ବ ପର୍ବାଣୀ, ଆନ୍ଦୋଳନ, ରାଲି ପରି ବିଭିନ୍ନ ଜନ ଗହଳି ସୃଷ୍ଟିକାରୀ ଘଟଣାକ୍ରମରେ ପୋଲିକୁ ସହାୟକ ହେବ ବୋଲି ପ୍ରତୀକ ସିଂହ କହିଛନ୍ତି।

ସେ ଆହୁରି କହିଛନ୍ତି କି, ବର୍ତ୍ତମାନ କମିଶନରେଟ ପୁଲିସ ପାଖରେ ଗୋଟିଏ ଡ୍ରୋନ ରହିଛି। ଆବଶ୍ୟକ ପଡ଼ିଲେ ଆହୁରି ଡ୍ରୋନ ଅଣାଯାଇ ବ୍ୟବହାର କରିବାର ବ୍ୟବସ୍ଥା କରାଯିବ। ଏଥିପାଇଁ କର୍ମଚାରୀଙ୍କୁ ଟ୍ରେନିଂ ଦିଆଯାଉଛି। ରାଜଧାନୀରେ ହକି ଓ ଫୁଟବଲ ଇଭେଣ୍ଟ ଡ୍ରୋନକୁ ବ୍ୟବହାର କରାଯାଇପାରିବ। କଣ୍ଟ୍ରୋଲ ରୁମ୍‌ରେ ବସି ଇଭେଣ୍ଟ ଉପରେ ନଜର ରଖାଯାଇପାରିବ। ୨୦୨୪ ନିର୍ବାଚନ ସମୟରେ ଡ୍ରୋନ କ୍ୟାମେରା ବ୍ୟବହାର କରାଯିବ ବୋଲି ଡିସିପି ସୂଚନା ଦେଇଛନ୍ତି।

ଏପରି ହେଲେ ଭୁବନେଶ୍ୱରର ରାସ୍ତା ଘାଟ ଓ ଗଳି କନ୍ଦିରେ କୌଣସି ଘଟଣା ଘଟିଲେ ଡ୍ରୋନ ଉପରେ ନଜର ରଖିଥିବା କଣ୍ଟ୍ରୋଲ ରୁମକୁ ତୁରନ୍ତ ସୂଚନା ମିଳିବ ଓ ସଠିକ ସମୟରେ ସନ୍ଦିଗ୍ଧ ବ୍ୟକ୍ତିକୁ କାବୁ କରିବାରେ ପୋଲିସ ସଫଳ ହୋଇପାରିବ ବା ବଡ ଧରଣର ଅଘଟଣକୁ ଏଡାଇ ପାରିବ ବୋଲି ଆଶା କରାଯାଉଛି।
ଆସନ୍ତା କାଲି ବିଭିନ୍ନ ଜିଲ୍ଲାକୁ କାଳବୈଶାଖୀ ସମ୍ଭାବନା

ରାଜ୍ୟକୁ କାଳ ବୈଶାଖୀ ସହ ବଜ୍ରପାତ ସମ୍ଭାବନା। ରବିବାର ମଧ୍ୟାହ୍ନ ସୁଦ୍ଧା ରାଜ୍ୟର ବହୁ ଜିଲ୍ଲାରେ ଘଡଘଡି ସହ ବର୍ଷା ଓ ଘୂର୍ଣ୍ଣିଝଡ ହେବା ନେଇ ସୂଚନା ଦେଇଥି ପାଣିପାଗ ବିଭାଗ। ସୂଚନା ମୁତାବକ, ଛତିଶଗଡ଼ ଉପର ଦେଇ ପଶ୍ଚିମ ବିହାରରୁ ଉତ୍ତର ତେଲେଙ୍ଗାନା ପର୍ଯ୍ୟନ୍ତ ସମୁଦ୍ର ପତନଠାରୁ ୦.୯ କିଲୋମିଟର ଉଚ୍ଚତାରେ ଏକ ଲଘୁଚାପ ବଳୟ ସୃଷ୍ଟି ହୋଇଛି। ଏହାର ପ୍ରଭାବରେ ଆସନ୍ତା କାଲି (ରବିବାର) ମଧ୍ୟାହ୍ନ ସୁଦ୍ଧା ଉତ୍ତର, ଦକ୍ଷିଣ, ଆଭ୍ୟନ୍ତର, ଉପକୂଳ ଓ କେନ୍ଦ୍ରୀୟ ଓଡ଼ିଶାର ପ୍ରାୟ ସବୁ ଜିଲ୍ଲାରେ ଘଣ୍ଟା ପ୍ରତି ୩୦- ୫୦ କିଲୋମିଟର ବେଗରେ ପବନ ବହିବ।

ଏଥିସହ ଏହି ସମୟରେ ବଜ୍ରପାତ, ଘଡ଼ଘଡ଼ି ସହ କାଳବୈଶାଖୀ ହେବାର ସମ୍ଭାବନା ରହିଥିବା ଭୁବନେଶ୍ୱରସ୍ଥିତ ଆଞ୍ଚଳିକ କେନ୍ଦ୍ର ପକ୍ଷରୁ ସୂଚନା ଜାରି କରାଯାଇଛି। ଓଡ଼ିଶାର ଅନ୍ୟ ଜିଲ୍ଲାରେ ମଧ୍ୟ ବଜ୍ରପାତ ସହ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ। ରାଜ୍ୟର ବିଭିନ୍ନ ସ୍ଥାନରେ ବଜ୍ରପାତ ସମ୍ଭାବନା ଥିବାରୁ, ଲୋକଙ୍କୁ ସତର୍କ ରହିବା ସହ ପାଣିପାଗ ଉପରେ ନଜର ରଖିବାକୁ ପରାମର୍ଶ ଦିଆଯାଇଛି। ଆହୁରି ଘଡଘଡି ଓ ବିଜୁଳି ସମୟରେ ଗଛ ଓ ଖାଲି ଜାଗାରେ ନ ରହି କୌଣସି ସୁରକ୍ଷିତ ସ୍ଥାନରେ ଆଶ୍ରୟ ନେବାକୁ ପରାମର୍ଶ ଦିଆଯାଇଛି।

ସେହିପରି ଓଡ଼ିଶାର ଜିଲ୍ଲାଗୁଡ଼ିକରେ ଆସନ୍ତା ୫ ଦିନ ଭିତରେ ଦିନର ସର୍ବୋଚ୍ଚ ତାପମାତ୍ରାରେ କୌଣସି ବଡ଼ ପରିବର୍ତ୍ତନ ହେବ ନାହିଁ। ଆସନ୍ତା ୨୪ ଘଣ୍ଟା ଭିତରେ ଗୋଟିଏ କିମ୍ବା ଦୁଇଟି ସ୍ଥାନରେ ସର୍ବାଧିକ ତାପମାତ୍ରା ୪୨ ଡିଗ୍ରି କିମ୍ବା ତା’ଠାରୁ ଅଧିକ ହେବାର ସମ୍ଭାବନା ଦେଖାଦେଇଛି। ପରବର୍ତ୍ତୀ ସମୟରେ ସୁନ୍ଦରଗଡ଼, ସମ୍ବଲପୁର, ଅନୁଗୁଳ, ବୌଦ୍ଧ, ସୋନପୁର, ବରଗଡ଼, ବଲାଙ୍ଗୀର, କଳାହାଣ୍ଡି ଓ ଝାରସୁଗୁଡ଼ା ପରି ରାଜ୍ୟର ଆଭ୍ୟନ୍ତରୀଣ କେତେକ ଜିଲ୍ଲାର କିଛି ସ୍ଥାନରେ ତାପମାତ୍ରା ବୃଦ୍ଧି ପାଇବ।

ତେଣୁ, ଏହି ସବୁ ଜିଲ୍ଲାରେ ଲୋକମାନଙ୍କୁ ଦିନ ୧୧ଟାରୁ ଅପରାହ୍ନ ୩ଟା ଭିତରେ ଘରୁ ନ ବାହାରିବାକୁ କୁହାଯାଇଛି। ଯଦି ନିହାତି ଦରକାର, ବାହାରକୁ ଗଲେ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି।
କର୍ଣ୍ଣାଟକ ନାଟକ ଶେଷ, ମୁଖ୍ୟମନ୍ତ୍ରୀ ଭାବେ ଶପଥ ନେଲେ ସିଦ୍ଧରମୈୟା

ସମସ୍ତ କଳ୍ପନା ଜଳ୍ପନାର ଅନ୍ତ ଘଟିଛି । କର୍ଣ୍ଣାଟକର ଜନସାଧାରଣ ପାଇଛନ୍ତି ତାଙ୍କର ନୂଆ ମୁଖ୍ୟମନ୍ତ୍ରୀ । ଆଜି ଦ୍ବିତୀୟ ଥର ଲାଗି ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ସିଦ୍ଧରମୈୟା । ସେହିପରି ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ଡି.କେ ଶିବକୁମାର । ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀଙ୍କ ସମେତ ଆହୁରି ୮ ଜଣ ମନ୍ତ୍ରୀ ମଧ୍ୟ ଶପଥ ନେଇଛନ୍ତି ।

କଂଗ୍ରେସର ଦୁଇଜଣ ଟାଣୁଆ ନେତା ହେଉଛନ୍ତି ଡିକେ ଶିବକୁମାର ଏବଂ ସିଦ୍ଧରମୈୟା । ଦୁହିଙ୍କୁ ମଧ୍ୟରେ ମୁଖ୍ୟମନ୍ତ୍ରୀ ପଦକୁ ନେଇ ଚାଲିଥିବା ଟଣାଓଟରା ଶେଷ ହୋଇଛି । ଦୁଇ ଜଣ ହେଭିଓ୍ବେଟଙ୍କ ମଧ୍ୟରେ ସମନ୍ବୟ ରକ୍ଷା କରି ମନ୍ତ୍ରିମଣ୍ଡଳ ଗଠନ ହୋପାରିଛି । ଏସସି ବର୍ଗରୁ ଜି. ପରମେଶ୍ବର ଓ କେଏଚ ମୁନିୟାପ୍ପାଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯାଇଥିବା ବେଳେ ସଂଖ୍ୟାଲଘୁ ଖ୍ରୀଷ୍ଟିଆନ ବର୍ଗର କେଜେ ଜର୍ଜ, ଲିଙ୍ଗାୟତ ସମ୍ପ୍ରଦାୟର ଏମବି ପାଟିଲ ମନ୍ତ୍ରିମଣ୍ଡଳରେ ସାମିଲ ହୋଇଛନ୍ତି । ସେହିପରି ଏସଟି ବାଲ୍ମିକୀ ବର୍ଗର ସତୀଶ ଜାର୍କିଖୋଲି, ଏସସି ବର୍ଗର ତଥା ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେଙ୍କ ପୁଅ ପ୍ରିୟଙ୍କ ଖଡ଼ଗେ, ରେଡ୍ଡୀ ବର୍ଗର ରାମଲିଙ୍ଗା ରେଡ୍ଡୀ, ସଂଖ୍ୟାଲଘୁ ମୁସଲିମ ବର୍ଗର ବିଜେ ଜମିର ଅହମ୍ମଦ ଖାନ ମଧ୍ୟ ଶପଥ ନେଇଛନ୍ତି ।

ଏହି ଭବ୍ୟ ଶପଥଗ୍ରହଣ ଉତ୍ସବରେ ସାମିଲ ହୋଇଥିଲେ କଂଗ୍ରେସ ନେତା ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରା, ଏଆଇସିସି ସଭାପତି ମଲ୍ଲିକାର୍ଜୁନ ଖଡ଼ଗେ, ବିହାର ମୁଖ୍ୟମନ୍ତ୍ରୀ ନୀତିଶ କୁମାର, ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ, ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସୁଖୁ, ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲ, ଏନସିପି ନେତା ଶରଦ ପାଓ୍ବାର ପ୍ରମୁଖ । ଏହି ଶପଥଗ୍ରହଣକୁ ଉତ୍ସକୁ ନେଇ ସେପଟେ ବିଜେପି କଟାକ୍ଷ କରିଛି ।
ଖରା ଦିନେ ଥଣ୍ଡା ପାଣି ପିଇଲେ କଣ ହେବ ?

ଗ୍ରୀଷ୍ମଋତୁରେ ଅଧିକ ଥଣ୍ଡା ପାଣି ପିଇବାକୁ ଭଲ ଲାଗିଥାଏ । ଏଥିପାଇଁ ଅଧିକାଂଶ ଲୋକେ ବରଫ ମିଶା ପାଣି ପିଇଥାନ୍ତି । ହେଲେ ଏହା ଅନେକ ପ୍ରକାର ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିପାରେ । ବରଫ ପାଣି କିମ୍ବା ଅତ୍ୟଧିକ ଥଣ୍ଡା ପାଣି କେବଳ ଜ୍ୱର-ଥଣ୍ଡା ବ୍ୟତୀତ ହଜମ, ହୃଦୟ ଏବଂ ଅନ୍ୟାନ୍ୟ ଅଙ୍ଗରେ ରୋଗ କିମ୍ବା ସମସ୍ୟା ସୃଷ୍ଟି କରିପାରେ ।କେବଳ ଏତିକି ନୁହେଁ, ଏହି ପାଣି ପିଇବା ଦ୍ୱାରା ଶରୀରର ରୋଗ ପ୍ରତିରୋଧକ ଶକ୍ତି ମଧ୍ୟ ହ୍ରାସ ପାଇଥାଏ ।

ଏନେଇ ସ୍ୱାସ୍ଥ୍ୟ ବିଶେଷଜ୍ଞ କଣ କହନ୍ତି, ଜାଣନ୍ତୁ….

ଆଲୋପାଥି ହେଉ ଅବା ଆୟୁର୍ବେଦ କିମ୍ବା ନାଚ୍ୟୁରୋପାଥି, ସମସ୍ତ ଚିକିତ୍ସା ପଦ୍ଧତିରେ ଏହି ପରାମର୍ଶ ଦିଆଯାଏ ଯେ, ପାଣି ସର୍ବଦା ରୁମ୍ ତାପମାତ୍ରା କିମ୍ବା ସାଧାରଣ ତାପମାତ୍ରାରେ ପିଇବା ଉଚିତ୍ । ଏନେଇ ଉତ୍ତରପ୍ରଦେଶର ଜଣେ ଡ଼ାକ୍ତର ରାମେଶ୍ୱର ଶର୍ମା କହିଛନ୍ତି ଯେ, ଆୟୁର୍ବେଦରେ ପାନୀୟ ଜଳ ପାଇଁ ଅନେକ ନିୟମ ରହିଛି । ଉଦାହରଣ ସ୍ୱରୂପ, ବସିବା ସମୟରେ ସର୍ବଦା ପାଣି ପିଅନ୍ତୁ, ସର୍ବଦା ରୁମ୍ ତାପମାତ୍ରାର ପାଣି ପିଅନ୍ତୁ, ଭୋଜନ ସମୟରେ ଥଣ୍ଡା ପାଣି ପିଅନ୍ତୁ ନାହିଁ, ଖାଇବା ପରେ କେବଳ ଉଷୁମ ପାଣି ପିଅନ୍ତୁ ଇତ୍ୟାଦି ।

ଥଣ୍ଡା ପାଣି ପିଇଲେ କେଉଁ ସମସ୍ୟା ଦେଖାଦେଇଥାଏ…

ଆୟୁର୍ବେଦରେ କୋଷ୍ଠକାଠିନ୍ୟ ପ୍ରାୟ ସମସ୍ତ ପ୍ରକାରର ରୋଗର ମୂଳ ବୋଲି କୁହାଯାଏ। ଏଭଳି ପରିସ୍ଥିତିରେ ବରଫ ସହିତ ଥଣ୍ଡା ପାଣି ପିଇବା ଦ୍ୱାରା କୋଷ୍ଠକାଠିନ୍ୟ ବ୍ୟତୀତ ଅନ୍ୟାନ୍ୟ ସ୍ୱାସ୍ଥ୍ୟ ସମସ୍ୟା ବଢିଯାଏ। ଯେପରିକି ଭୋକ କମିବା, କାର୍ଯ୍ୟ କରିବା ପାଇଁ ଆବଶ୍ୟକ ଶକ୍ତିର ଅଭାବ, ଶରୀରରେ ରକ୍ତ ପ୍ରବାହରେ ବାଧା , ଶରୀରର ଖାଦ୍ୟରୁ ପୁଷ୍ଟିକର ଖାଦ୍ୟ ଗ୍ରହଣ କରିବାର କ୍ଷମତା ହ୍ରାସ, ରୋଗ ପ୍ରତିରୋଧକ ଶକ୍ତି ମଧ୍ୟ ହ୍ରାସ ହୋଇପାରେ । ଏହା ବ୍ୟତୀତ ଅତ୍ୟଧିକ ଥଣ୍ଡା କିମ୍ବା ବରଫ ପାଣି ପିଇବା ମଧ୍ୟ ଶରୀରରେ ଫ୍ଲେଗମର ପ୍ରଭାବ ବଢାଇଥାଏ। ଯେଉଁ କାରଣରୁ ଥଣ୍ଡା, ଛିଙ୍କ ଭଳି ସମସ୍ୟା ଲାଗି ରହିଥାଏ । ସଂକ୍ରାମକ ରୋଗ ହେବାର ସମ୍ଭାବନା ମଧ୍ୟ ଅଧିକ ଦେଖାଦିଏ।