Month: May 2023

ପ୍ରଧାନମନ୍ତ୍ରୀ ନୁହେଁ ରାଷ୍ଟ୍ରପତି ନୂଆ ସଂସଦ ଭବନକୁ ଉଦଘାଟନ କରିବା ଉଚିତ: ରାହୁଲ ଗାନ୍ଧୀ

ନୂଆ ସଂସଦ ଭବନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ବାରା ଉଦଘାଟନକୁ କଂଗ୍ରେସ ନେତା ରାହୁଲ ଗାନ୍ଧୀ ଭୁଲ ଦର୍ଶାଇଛନ୍ତି । କଂଗ୍ରେସ ନେତା କହିଛନ୍ତି ଯେ, ସଂସଦ ଭବନକୁ ରାଷ୍ଟ୍ରପତି ହିଁ ଉଦଘାଟନ କରିବା ଉଚିତ୍, ପ୍ରଧାନମନ୍ତ୍ରୀଙ୍କୁ ନୁହେଁ । ଏଠାରେ କହୁରଖୁଛୁ, ମେ ୨୮ ତାରିଖରେ ନୂତନ ଭାବେ ନିର୍ମିତ ସଂସଦ ପ୍ରଧାନମନ୍ତ୍ରୀଙ୍କ ଦ୍ୱାରା ଉଦଘାଟନ ହେବାର କାର୍ଯ୍ୟକ୍ରମ ରହିଛି । ସଂସଦ ଗୃହ ନିର୍ମାଣ କାର୍ଯ୍ୟ ଶେଷ ହେବା ପରେ ଲୋକସଭା ବାଚସ୍ପତି ଓମ୍ ବିର୍ଲା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟି ଏହାକୁ ଉଦଘାଟନ କରିବାକୁ ଅନୁରୋଧ କରିଥିଲେ । ଲୋକସଭା ସଚିବାଳୟ ମେ ୧୮ ତାରିଖରେ ଏହି ସୂଚନା ଦେଇଛନ୍ତି ।

ରାହୁଲ ଗାନ୍ଧୀଙ୍କ ବିବୃତ୍ତିରେ ବିଜେପିର ବରିଷ୍ଠ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ରବି ଶଙ୍କର ପ୍ରସାଦ ପାଲଟା ଜବାବ ଦେଇଛନ୍ତି । ସେ କହିଛନ୍ତି ଯେ, ସଂସଦ ଗୃହ ନିର୍ମାଣ କରିବାର ସମସ୍ତ ପ୍ରୟାସ ନରେନ୍ଦ୍ର ମୋଦୀ କରିଛନ୍ତି । ରାହୁଲ ଗାନ୍ଧୀ, ନରେନ୍ଦ୍ର ମୋଦୀଙ୍କ କୌଣସି ଭଲ କାମ ଦେଖିପାରୁ ନାହାନ୍ତି ।

ଏହାପୂର୍ବରୁ ସଂସଦ ଗୃହର ଉଦଘାଟନର ତାରିଖ ସାମ୍ନାକୁ ଆସିବା ପରେ କଂଗ୍ରେସ ପ୍ରଶ୍ନ ଉଠାଇଥିଲା । ବାସ୍ତବରେ କଥା ହେଉଛି, ମେ ୨୮ ତାରିଖ ହେଉଛି ବିନାୟକ ଦାମୋଦର ସାବରକରଙ୍କ ଜନ୍ମଦିନ । ଏଭଳି ପରିସ୍ଥିତିରେ ଏହି ଦିନ ସଂସଦ ଭବନର ଉଦଘାଟନ କରିବାକୁ ବିରୋଧି କଂଗ୍ରେସ କହିଛି ଏହା ସଂଯୋଗ ନା ପ୍ରଯୋଗ ।

ପ୍ରଧାନମନ୍ତ୍ରୀ ମୋଦୀଙ୍କ ‘ବ୍ୟକ୍ତିଗତ ମହତ୍ବାକାଙକ୍ଷା ପ୍ରକଳ୍ପ’ ବୋଲି ବର୍ଣ୍ଣନା କରି ନୂତନ ସଂସଦ ଭବନର ଆବଶ୍ୟକତା ଉପରେ କଂଗ୍ରେସ ପ୍ରଶ୍ନ କରିଛି । କଂଗ୍ରେସ କହିଛି ଯେ, ଏଭଳି ଅଟ୍ଟାଳିକାର ଆବଶ୍ୟକତା କଣ ରହିଛି ଯେତେବେଳେ ବିରୋଧୀଙ୍କ ସ୍ୱରକୁ ଚୁପ କରିଦିଆଯାଇଛି ।

ନୂତନ ସଂସଦର ଲୋକସଭାରେ ୮୮୮ ସଦସ୍ୟ ଏବଂ ରାଜ୍ୟସଭାରେ ୩୮୪ ଜଣ ସଦସ୍ୟ ବସିବା ପାଇଁ ବ୍ୟବସ୍ଥା କରାଯାଇଛି । ବର୍ତ୍ତମାନର ସଂସଦ ଗୃହରେ ଲୋକସଭାରେ ୫୫୦ ସଦସ୍ୟ ଥିବା ବେଳେ ରାଜ୍ୟସଭାରେ ୨୫୦ ଜଣ ବସିବାର ବ୍ୟବସ୍ଥା ରହିଛି ।

ନୂତନ ସଂସଦ ଭବନ କେନ୍ଦ୍ରୀୟ ଭିସ୍ତା ପ୍ରକଳ୍ପର ଏକ ଅଂଶ, ଯାହା ଅଧୀନରେ ନୂଆଦିଲ୍ଲୀ ସ୍ଥିତ ଦେଶର ଶକ୍ତି କେନ୍ଦ୍ରକୁ ନବୀକରଣ କରାଯାଉଛି । ଏହା ଅଧୀନରେ କେନ୍ଦ୍ରୀୟ ଲେକନିର୍ମାଣ ବିଭାଗ ରାଷ୍ଟ୍ରପତି ଭବନ ଠାରୁ ଇଣ୍ଡିଆ ଗେଟ ପର୍ଯ୍ୟନ୍ତ ତିନି କିଲୋମିଟର ରାସ୍ତାକୁ ନବୀକରଣ, ଏକ ସାଧାରଣ କେନ୍ଦ୍ରୀୟ ସଚିବାଳୟ ନିର୍ମାଣ, ପ୍ରଧାନମନ୍ତ୍ରୀଙ୍କ ନୂତନ କାର୍ଯ୍ୟାଳୟ ଏବଂ ବାସଭବନ ଏବଂ ଏକ ନୂତନ ଉପରାଷ୍ଟ୍ରପତି ଏନକ୍ଲେଭ ନିର୍ମାଣ କରାଯାଉଛି ।
ଓପିଏସ୍‌ସି ଦୁର୍ନୀତିର ଗନ୍ତାଘର ଏବଂ ବିଜେଡି ସରକାର ଏହାର ରିଙ୍ଗ୍ ମାଷ୍ଟର୍‌: ଇରାସିସ୍

ରାଜ୍ୟର ଶିକ୍ଷିତ ବେକାର ଯୁବକ ଯୁବତୀମାନଙ୍କ ଭବିଷ୍ୟତ ପାଇଁ ଆଦୈା ଚିନ୍ତିତ ନୁହଁନ୍ତି ବିଜେଡି ସରକାର । ରାଜ୍ୟ ସରକାରଙ୍କ ବିଭିନ୍ନ ବିଭାଗରେ ନିଯୁକ୍ତିକୁ ନେଇ ବହୁ ଦୁର୍ନୀତି ଓ ଅନିୟମିତତା ପଦାକୁ ଆସିଛି । ଅତୀତରେ ଆରଆଇ ଓ ଅମିନ ପରୀକ୍ଷାରେ ଦୁର୍ନୀତି ହୋଇଥିଲା। ରାଜ୍ୟରେ ଜାଲ୍ ସାର୍ଟିଫିକେଟ, ଶିକ୍ଷକ ନିଯୁକ୍ତିରେ ବ୍ୟାପକ ଦୁର୍ନୀତି ହୋଇଛି । ବିଜେଡି ସରକାରର ପ୍ରତ୍ୟକ୍ଷ ପ୍ରୋତ୍ସାହନରେ ସରକାରୀ ନିଯୁକ୍ତିରେ ଚଂଚକତା କରାଯାଇ ଯୁବକ ଯୁବତୀଙ୍କ ଭବିଷ୍ୟତକୁ ଅନ୍ଧକାରମୟ କରାଯାଉଥିବାବେଳେ ବର୍ତମାନ ଏଏସଓ ନିଯୁକ୍ତିରେ ଘୋଟାଲା ଛାତ୍ରଛାତ୍ରୀ ଓ ଯୁବକଯୁବତୀଙ୍କ ଭିତରେ ନିରାଶା ଓ ହତାସର ବାତାବରଣ ସୃଷ୍ଟି କରିଦେଇଛି । ଓଡ଼ିଶାର ଯୁବକଙ୍କ ଭବିଷ୍ୟତକୁ ନଷ୍ଟ କରିବାର ଅଧିକାର ରାଜ୍ୟ ସରକାରଙ୍କୁ କିଏ ଦେଲା ବୋଲି ଯୁବମୋର୍ଚ୍ଚା ରାଜ୍ୟ ସଭାପତି ଇରାସିସ୍ ଆଚାର୍ଯ୍ୟ ପ୍ରଶ୍ନ କରିଛନ୍ତି ।

ସାମ୍ବାଦିକ ସମ୍ମିଳନୀ କରି ଆଚାର୍ଯ୍ୟ କହିଛନ୍ତି ଯେ, ଓପିଏସସି ଦ୍ୱାରା ଏଏସଓ ପରୀକ୍ଷା ସମ୍ପୂର୍ଣ୍ଣ ଅନୈତିକ । ୨୦୨୧-୨୨ରେ ଓଡ଼ିଶା ଲୋକସେବା ଆୟୋଗ ପକ୍ଷରୁ ୭୯୬ଟି ଆସିଷ୍ଟାଂଟ ସେକ୍ସନ ଅଫିସର (ଏଏସଓ) ପଦ ପାଇଁ ବିଜ୍ଞପ୍ତି ପ୍ରକାଶ ପାଇଥିଲା ଓ ଦେଢ଼ଲକ୍ଷ ପରୀକ୍ଷାର୍ଥୀ ପରୀକ୍ଷା ଦେଇଥିଲେ । ମୂଳରୁ ବିବାଦ ଘେରରେ ଥିବା ଏହି ପରୀକ୍ଷାରେ ୧୧୦୪ଜଣଙ୍କ ମେରିଟଲିଷ୍ଟରେ ନାଁ ପ୍ରକାଶିତ ହୋଇଥିଲା । ଏହା ପରେ ପ୍ରକାଶ ପାଇଥିବା ଚୂଡାନ୍ତ ତାଲିକାଟି ସଂପୂର୍ଣ୍ଣ ଅନୈତିକ ଭାବେ ପ୍ରସ୍ତୁତ ହେବାକୁ ନେଇ ମାନ୍ୟବର ହାଇକୋର୍ଟ କ୍ଷୋଭ ପ୍ରକାଶ କରି ପ୍ରକାଶିତ ମେଧା ତାଲିକାକୁ ରଦ୍ଦ କରିବା ସହିତ କଡା ଭାଷାରେ ଓପିଏସିକୁ ମଧ୍ୟ ତାଗିଦ୍ କରିଛନ୍ତି । ଏଥି ସହ ଆଉ ଥରେ ନୂତନ ମେରିଟ୍ ଲିଷ୍ଟ ପ୍ରକାଶ କରିବାକୁ ମାନ୍ୟବର ହାଇକୋର୍ଟ ଓପିଏସସିକୁ ନିର୍ଦ୍ଦେଶ ଦେଇଛନ୍ତି । ଏଏସଓ ପଦବୀ ପାଇଁ ପରୀକ୍ଷା ଦେଇଥିବା ଯୁବକଯୁବତୀଙ୍କ ଭବିଷ୍ୟତ କଣ ହେବ ? କେବଳ ସେତିକି ନୁହେଁ ଯେଉଁ ପରୀକ୍ଷାର୍ଥୀମାନେ ଉତୀର୍ଣ୍ଣ ହୋଇଛନ୍ତି ତାଙ୍କୁ ମଧ୍ୟ ପ୍ରତାରଣା କରିଛି ରାଜ୍ୟ ସରକାର । କାରଣ ତାଙ୍କ ପରିବାର ଏବଂ ସେମାନେ ମଧ୍ୟ ଓପିଏସ୍‌ସିର ଭୁଲ ପଦ୍ଧତି, ସରକାରଙ୍କ ଖାମଖିଆଲ ମନୋଭାବ ଓ ଦୁର୍ନୀତି ଯୋଗୁଁ ତାଙ୍କ ଭବିଷ୍ୟତକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଶାସକ ବିଜେଡିର ଇଙ୍ଗିତରେ ଓପିଏସସି ବର୍ତମାନ ଦୁର୍ନୀତିର ଗନ୍ତାଘର ସାଜିଛି ଏବଂ ରାଜ୍ୟ ସରକାର ଏହାର ରିଙ୍ଗ୍ ମାଷ୍ଟର ସାଜିଛନ୍ତି ବୋଲି ଆଚାର୍ଯ୍ୟ କହିଛନ୍ତି ।

ମୁଖ୍ୟମନ୍ତ୍ରୀ ନବୀନ ବାବୁ ବିଶ୍ୱଦରବାରରେ ୧ନଂ ବୋଲି ତାଙ୍କ ଦଳର ନେତା, ମନ୍ତ୍ରୀମାନେ ଡିଣ୍ଡିମ ପିଟୁଛନ୍ତି କିନ୍ତୁ ରାଜ୍ୟ ସରକାର ଓଡିଶାର ଲକ୍ଷ ଲକ୍ଷ ମେଧାବୀ, ଶିକ୍ଷିତ ଯୁବକଯୁବତୀଙ୍କୁ ଭବିଷ୍ୟତକୁ ନେଇ ଖେଳୁଛନ୍ତି । ଏ କ’ଣ ମୁଖ୍ୟମନ୍ତ୍ରୀ ନବୀନ ବାବୁଙ୍କ ଗୁଡ ଗଭର୍ଣ୍ଣେନ୍ସର ମଡେଲରେ କି? ଏହା ୫ଟି ସରକାରର କେଉଁ ପ୍ରକାର ଟ୍ରାନ୍ସପରେନ୍ସି ? ରାଜ୍ୟ ସରକାରଙ୍କ ‘କଥା ନୁହେଁ କଠିନ ପରିଶ୍ରମର’ ମଡେଲ କି ବୋଲି ରାଜ୍ୟ ସରକାର ସ୍ପଷ୍ଟୀକରଣ ଦେବା ଉଚିତ୍ ବୋଲି ଆଚାର୍ଯ୍ୟ ଦାବୀ କରିଛନ୍ତି ।

ଓଡ଼ିଶା ରାଜ୍ୟରେ ୮ଲକ୍ଷ ୮୦ହଜାର ୧୭୫ଜଣ ଏମ୍ପେ୍ଲଏମେଂଟ ଏକ୍ସଚେଞ୍ଜରେ ରେଜିଷ୍ଟେସନ କରିଛନ୍ତି । ରାଜ୍ୟ ସରକାର ବାରମ୍ବାର ଯୁବକମାନଙ୍କୁ ପ୍ରତାରଣା କରୁଛନ୍ତି । ୨୦୧୯ରେ ଓଡିଶା ପୋଲିସ ରିକ୍ର‌୍ୟୁଟମେଂଟ ବୋର୍ଡ (ଓପିଆରବି) ପରୀକ୍ଷାରେ ମଧ୍ୟ ବ୍ୟାପକ ଅନୀୟମିତତା କାରଣରୁ ଯୁବକଯୁବତୀମାନେ ଡିଜି ଅଫିସ ସମ୍ମୁଖରେ ଧାରଣାରେ ବସିଥିଲେ । ଓଏସଏସସି ବୋର୍ଡ ଚେୟାରମ୍ୟାନଙ୍କ ଘରୁ କୋଟି କୋଟି ଟଙ୍କା ସମ୍ପତି ଧରାପଡିଥିଲା । ଏନେଇ ଥାନାରେ ମାମଲା ରୁଜୁ ହୋଇଥିଲା । କିନ୍ତୁ ଏହି କେସ୍ ତଦନ୍ତ ହେଲା କି ନାହିଁ ଓ କେଉଁ ଅଫିସର ଏଭଳି ଦୁର୍ନୀତିରେ ଲିପ୍ତ ଥିଲେ ତାହା ମଧ୍ୟ ପ୍ରକାଶ ପାଇଲା ନାହିଁ । ଓଡିଶାର ଶିକ୍ଷିତ ଯୁବକ ଯୁବତୀଙ୍କ ନିଯୁକ୍ତି କ୍ଷେତ୍ରରେ ହେଉଥିବା ଦୁର୍ନୀତି ଓ ଘୋଟାଲାର ତଦନ୍ତ ହେବ କି? ଯଦି ହେବ କେବେ ହେବ? ଦୋଷୀଙ୍କୁ ଦଣ୍ଡ ମିଳିବ ତ? ନିଯୁକ୍ତି ଦୁର୍ନୀତିର ଯେଉଁମାନେ ଲିପ୍ତ ଅଛନ୍ତି ସେମାନଙ୍କୁ ରାଜ୍ୟ ସରକାର ତୁରନ୍ତ ଦୃଷ୍ଟାନ୍ତମୂଳକ ଦଣ୍ଡ ଦିଅନ୍ତୁ ବୋଲି ଆଚାର୍ଯ୍ୟ ଦାବୀ କରିଛନ୍ତି ।
କାହାକୁ ମିଳିବ ମନ୍ତ୍ରୀ ପଦ, ନବୀନଙ୍କ ଘୋଷଣାକୁ ଅପେକ୍ଷା

ଆସନ୍ତାକାଲି ରାଜ୍ୟ ନୂଆ ମନ୍ତ୍ରୀଙ୍କ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ । ଲୋକସେବା ଭବନ ସମ୍ମିଳନୀ କକ୍ଷରେ ସକାଳ ୯ଟା ୫୦ ମିନିଟରେ ଶପଥ ନେବେ ନୂଆ ମନ୍ତ୍ରୀ । ଏ ନେଇ ସୂଚନା ଜାରି କରିଛନ୍ତି ମୁଖ୍ୟ ଶାସନ ସଚିବ ପ୍ରଦୀପ ଜେନା । ତେବେ, କେଉଁ ମନ୍ତ୍ରୀଙ୍କ ନାଁ ରହିଛି ସେ ନେଇ କୌଣସି ସୂଚନା ଦିଆଯାଇନି ।

୪ ନୂଆ ମନ୍ତ୍ରୀଙ୍କ ଶପଥ ଗ୍ରହଣ ସମ୍ଭାବନା ରହିଛି । ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ହତ୍ୟା ପରେ ମନ୍ତ୍ରୀପଦ ଖାଲି ରହିଛି । ଅନ୍ୟ ୨ ଜଣ ମନ୍ତ୍ରୀ ସମୀର ରଞ୍ଜନ ଦାଶ ଓ ଶ୍ରୀକାନ୍ତ ସାହୁଙ୍କ ଇସ୍ତଫା ଦେଇଛନ୍ତି । ଅନ୍ୟ ଜଣେ ମନ୍ତ୍ରୀ ଇସ୍ତଫା ଦେବା ଦେଇପାରନ୍ତି ଏଭଳି ସୂଚନା ମିଳୁଛି । ତେଣୁ ୪ ଜଣ ମନ୍ତ୍ରୀଭାବେ ଆସନ୍ତାକାଲି ଶପଥ ନେଇପାରନ୍ତି ।

ବାଚସ୍ପତି ବିକ୍ରମ କେଶରୀ ଆରୁଖ ଇସ୍ତଫା ଦେଇଥିବାରୁ ତାଙ୍କୁ ମନ୍ତ୍ରିମଣ୍ଡଳରେ ସ୍ଥାନ ମିଳିବା ନେଇ ଚର୍ଚ୍ଚା ହେଉଛି । ସମ୍ଭାବ୍ୟ ମନ୍ତ୍ରୀ ତାଲିକାରେ ଜଗତସିଂହପୁର ବିଧାୟକ ପ୍ରଶାନ୍ତ ମୁଦୁଲି ଅଛନ୍ତି । ଅନ୍ୟମାନଙ୍କ ମଧ୍ୟରେ ନବନିର୍ବାଚିତା ଝାରସୁଗୁଡ଼ା ବିଧାୟିକା ଦୀପାଳି ଦାସଙ୍କ ନାଁ ମଧ୍ୟ ଚର୍ଚ୍ଚାକୁ ଆସୁଛି । ରାଉରକେଲା ବିଧାୟକ ସାରଦା ନାୟକ,ସତ୍ୟବାଦୀ ବିଧାୟକ ଉମାକାନ୍ତ ସାମନ୍ତରାୟ,ଅତାବିରା ବିଧାୟିକା ସ୍ନେହାଙ୍ଗିନୀ ଛୁରିଆ ମଧ୍ୟ ମନ୍ତ୍ରୀ ରେସରେ ଅଛନ୍ତି ।

ଅନ୍ୟପଟେ, ଖାଲିଥିବା ବାଚସ୍ପତି ପଦ କାହାକୁ ଦିଆଯିବ ସେ ନେଇ ସସପେନ୍ସ ଲାଗି ରହିଛି । ତେବେ ବିଧାୟକ ପ୍ରଫୁଲ୍ଲ ସାମଲ, ଦେବୀପ୍ରସାଦ ମିଶ୍ର, ଅମରପ୍ରସାଦ ଶତପଥୀଙ୍କ ନାଁ ଚର୍ଚ୍ଚାକୁ ଆସୁଛି । ଏବେ ଅପେକ୍ଷା ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାହାଁ ନାଁରେ ମୋହର ମାରୁଛନ୍ତି ।
ଏକ କିଲୋରୁ ଅଧିକ ଧଳାଜହର ଜବତ କଲା ଏସଟିଏଫ

ରାଜଧାନୀରେ ଧଳା ଜହର। ଧଳା ଜହର ସହ ସ୍ପେସାଲ ଟାସ୍କ ଫୋର୍ସ ହାତରେ ବେପାରୀ। ଶନିବାର ସଂଧ୍ୟା ସମୟରେ ଭୁବନେଶ୍ୱରର ୟୁନିଟ ୮ ଅଞ୍ଚଳରେ ନିଶା କାରବାର ଚାଲିଥିବା ସୂଚନା ପାଇ ଏସଟିଏଫ କମିଶନରେଟ ପୋଲିସ ସହଯୋଗରେ ବିପୁଳ ପରିମାଣର ନିଷିଦ୍ଧ ଡ୍ରଗ୍ସ ଜବତ କରିବା ସହ ଜଣକୁ ଗିରଫ କରିଛି। ଗିରଫ ଅଭିଯୁକ୍ତ ଚିତ୍ତରଞ୍ଜନ ସାହୁ ୟୁନିଟ ୮ରେ ରହୁଥିବା ବେଳେ ତାର ଘର ଢେଙ୍କାନାଳ।

ସୂଚନା ଅନୁଯାୟୀ, ରାଜଧାନୀର ୟୁନିଟ-୮ରେ ବିପୁଳ ଡ୍ରଗ୍ସ କାରବାର ଚାଲିଥିବା ସୂଚନା ମିଳିଥିଲା ଏସଟିଏଫକୁ। ସୂଚନା ଆଧାରରେ ଏସଟିଏଫ ଓ କମିଶନରେଟ ପୋଲିସର ମିଳିତ ଟିମ ଚଢାଉ କରି ୧କେଜି ୧୦୭ ଗ୍ରାମର ବ୍ରାଉନ ସୁଗାର ଜବତ କରିଥିଲା ଚିତ୍ତରଞ୍ଜନ ସାହୁଠାରୁ। ଏତେ ପରିମାଣର ନିଷିଦ୍ଧ ଡ୍ରଗ୍ସକୁ ନେଇ ପୋଲିସ ବିଭିନ୍ନ ପ୍ରଶ୍ନ କରିଥିବା ବେଳେ ଅଭିଯୁକ୍ତ ତାର କୌଣସି ସନ୍ତୋଷଜନକ ଉତ୍ତର ଦେଇପାରିନଥିଲା। ତେଣୁ ପୋଲିସ ତାକୁ ଗିରଫ କରିଥିଲା। ଏସଟିଏଫ ଏନଡିପିଏସ ଆକ୍ଟ ୧୯୮୫ରେ ଏକ ମାମଲା ରୁଜୁ କରିଛି ଓ ଅଭିଯୁକ୍ତକୁ କୋର୍ଟରେ ହାଜର କରିଛି।

ଏସଟିଏଫ ପକ୍ଷରୁ ନିଶା କାରବାର ଉପରେ ନିୟନ୍ତ୍ରଣ ପାଇଁ ଏକ ସ୍ପେସାଲ ଅଭିଯାନ ଜାରି ରହିଛି। ଏହି ଅଭିଯାନ ଅନ୍ତର୍ଗତ ୨୦୨୦ରୁ ବର୍ତ୍ତମାନ ମଧ୍ୟରେ ଏସଟିଏଫ ୬୯ କେଜି ବ୍ରାଉନ ସୁଗାର/ହେରୋଇନ, ୨୦୨ ଗ୍ରାମ କୋକିନ ଓ ୧୧୩ କ୍ୟୁଣ୍ଟାଲ ଗଞ୍ଜେଇ, ୭୫୦ ଗ୍ରାମର ଅଫିମ ଜବତ କରିଛି। ଏଥିସହ ନିଷିଦ୍ଧ ନିଶା କାରବାର ମାମଲାରେ ୧୬୮ରୁ ଅଧିକ ଡ୍ରଗ୍ସ ବେପାରୀଙ୍କୁ ଗିରଫ କରିବାରେ ସଫଳ ହେଲାଣି।
ଘଟିଲା ବିରଳ ଘଟଣା, ମଣିଷର ଛାଇ ହେଲା ଉଭାନ

ସାଧାରଣତଃ ଖରାରେ ବାହାରକୁ ଗଲେ କିମ୍ୱା କେଉଠି ଠିଆ ହୋଇଥିଲେ ଆମ ସହ ଆମର ଛାଇ ମଧ୍ୟ ଦେଖାଯାଏ । କିନ୍ତୁ ଭାବନ୍ତୁ ଯେ ଆପଣଙ୍କୁ ଆପଣଙ୍କ ଛାଇ ଦେଖାଯିବନାହିଁ । ତେବେ ଆପଣ ଏହାକୁ ବିଜ୍ଞାନ କି ଅନ୍ଯ କୌଣସି କାରଣ ବୋଲି ଭାବିବେ ।କଣ ଏଭଳି ହେବ ସମ୍ଭବ ? ଆଜି ଭୁବନେଶ୍ୱରରେ ମଧ୍ଯ ଏଭଳି କିଛି ଦୃଶ୍ୟ ଦେଖିବାକୁ ମିଳିବ । ଯଦିଓ ଏହା ଏକ କୌତୁହଳପୂର୍ଣ୍ଣ ଓ ଅନନ୍ୟ ଘଟଣା କିନ୍ତୁ ଏହା ବାସ କିଛି ସମୟ ପାଇଁ କିଛି ଅଂଶରେ ଘଟିବ। ଯାହା ସୂଚନା ମିଳିଛି ଏହାର ପ୍ରଭାବ ପ୍ରାୟ ଦେଢ଼ ମିନିଟ୍ ପର୍ଯ୍ୟନ୍ତ ଚାଲିବ।

ମେ ୨୧ ତାରିଖ ଅର୍ଥାତ ଆଜି ରାଜଧାନୀ ଭୁବନେଶ୍ୱର ଓ ମେ ୨୨ରେ କଟକର ଲୋକମାନେ ‘ଶୂନ୍ୟ ଛାୟା ଦିବସ’କୁ ଅନୁଭବ କରିପାରିବେ । ଏହି ଦିବସରେ କାହାର ଛାଇ ଦେଖାଯିବନି । ମଧ୍ୟାହ୍ନ ୧୧.୪୩ ସମୟରେ ସମସ୍ତେ ଏହି ଶୂନ୍ୟ ଛାୟାକୁ ଦେଖିପାରିବେ । ବର୍ଷର ୩୬୫ ଦିନ ମଧ୍ୟରୁ କେବଳ ଦୁଇ ଦିନ ସୂର୍ଯ୍ୟ ଠିକ୍ ପୂର୍ବ ଦିଗରେ ଉଦୟ ହୋଇ ଠିକ୍ ପଶ୍ଚିମ ଦିଗରେ ଅସ୍ତ ଯାଆନ୍ତି । ଫଳରେ ସେହିଦିନ ମଧ୍ୟାହ୍ନରେ ସୂର୍ଯ୍ୟ ଠିକ୍ ଆମର ମୁଣ୍ଡ ଉପରେ ରହିଥାନ୍ତି । ତେଣୁ ସେହି ସମୟରେ ଆମେ ଆମର ଛାଇକୁ ଦେଇପାରି ନଥାଉ । ତେବେ ଆସନ୍ତା ଜୁନ ମାସ ୨୨ ତାରିଖରେ ରାଜ୍ୟର ବାରିପଦାରେ ଏହି ଦୃଶ୍ୟ ମଧ୍ୟ ଦେଖିବାକୁ ମିଳିବ ।

ଏ ବାବଦରେ ସବିଶେଷ ତଥ୍ୟ ପ୍ରଦାନ କରିଛନ୍ତି ଭୁବନେଶ୍ୱର ସ୍ଥିତ ପଠାଣି ସାମନ୍ତ ପ୍ଲାନେଟରିୟମର ଡେପୁଟି ଡାଇରେକ୍ଟର ଶୁଭେନ୍ଦୁ ପଟ୍ଟନାୟକ । ଶ୍ରୀ ପଟ୍ଟନାୟକ କହିଛନ୍ତି, ଦିନ ବିତିବା ସହିତ ସମୟାନୁସାରେ ଅକ୍ଷାଂଶ ଧୀରେଧୀରେ ବଢ଼ିବାକୁ ଲାଗିଥାଏ । ଉତ୍ତରାୟନ ଓ ଦକ୍ଷିଣାୟନ ପାଇଁ ବର୍ଷକୁ ଆମେ ଦୁଇଥର ଶୂନ୍ୟ ଛାୟା ଦିବସ ପାଳନ କରିଥାଉ । ଏହା ଗୋଟିଏ ଅଞ୍ଚଳରେ ଏକା ଥରକେ ଦେଖାନଯାଇ ଅଲଗା ଅଲଗା ଅଞ୍ଚଳରେ ଭିନ୍ନ ଭିନ୍ନ ସମୟରେ ଦେଖାଯାଇଥାଏ ।
ଲାଞ୍ଚ ନେଇ ଭିଜିଲାନ୍ସ ଜାଲରେ ବୀରମହରାଜପୁର ମୁଖ୍ୟ ପ୍ରାଣୀ ଚିକିତ୍ସାଳୟର କିରାଣି

ସୁବର୍ଣ୍ଣପୁର ଜିଲ୍ଲା ବୀରମହରାଜପୁର ମୁଖ୍ୟ ପ୍ରାଣୀ ଚିକିତ୍ସାଳୟର କିରାଣି ଲାଞ୍ଚ ନେଉଥିବା ବେଳେ ଧରିଲା ଭିଜିଲାନ୍ସ। କିରାଣି ଗୋଲକ ବିହାରୀ ପୋଢ୧୫ ହଜାର ଟଙ୍କା ଲାଞ୍ଚ ନେବା ବେଳେ ଭିଜିଲାନ୍ସ ହାତରେ ଧରାପଡ଼ିଛନ୍ତି । ଏରିଅର ବିଲ୍ କରାଇ ଦେବାକୁ ୧୫ ହଜାର ଟଙ୍କା ଲାଞ୍ଚ ଦାବି କରିବା ସହ ନେଉଥିବା ବେଳେ ଭିଜିଲାନ୍ସ ମାଡିବସିଛି।

ସୂଚନା ମୁତାବକ, ବୀରମହାରାଜପୁର ଏସଡିଭିଓ କାର୍ଯ୍ୟାଳୟର ଜୁନିୟର ଆସିଷ୍ଟାଣ୍ଟ ତଥା ସିଡିଭିଓ କାର୍ଯ୍ୟାଳୟରେ କିରାଣି ଭାବେ କାର୍ଯ୍ୟ କରୁଛନ୍ତି ଗୋଲକ ବିହାରୀ ପୋଢ଼। ଉଲୁଣ୍ଡା ବ୍ଲକ ସିଣ୍ଢଲ ପ୍ରାଣୀଧନ ନିରୀକ୍ଷକ ନାରାୟଣ ମେହେରଙ୍କ ଏରିଅର ଟଙ୍କା ପଡିରହିଥିଲା। ଏହି ଟଙ୍କା ରିଲିଜ କରିବାକୁ ସେ ଗୋଲକ ବିହାରୀଙ୍କ ନିକଟକୁ ବାରମ୍ବାର ଧାଇଁଥିଲେ। ବକେୟା ଟଙ୍କା ରିଲିଜ କରିବାକୁ ଗୋଲକ ବିହାରୀ ପୂର୍ବରୁ ମେହେରଙ୍କଠାରୁ ୨୦ହଜାର ଟଙ୍କା ନେଇଥିଲେ। କିନ୍ତୁ କାମ କରିନଥିଲେ। ପରେ ପୁଣି ସେ ମେହେରଙ୍କୁ ଆଉ ୧୫ ହଜାର ଟଙ୍କା ଲାଞ୍ଚ ମାଗିଥିଲେ।

ଏହାକୁ ନେଇ ମେହେର ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଏନେଇ ଭିଜିଲାନ୍ସ ଏକ ଏଫଆଇଆର ଦାୟର କରିବା ସହ ତାଙ୍କୁ ଧରିବାକୁ ଜାଲ ବିଛାଇଥିଲା। ଆଜି ସିଡିଭିଓ କାର୍ଯ୍ୟାଳୟ ପରିସରରେ ଥିବା ସରକାରୀ କ୍ୱାର୍ଟରରେ ଅଭିଯୋଗକାରୀ ପହଞ୍ଚି ଗୋଲକ ବିହାରୀଙ୍କୁ ୧୫ ହଜାର ଟଙ୍କା ଲାଞ୍ଚ ଦେଇଥିଲେ। ଏହି ସମୟରେ ସେଠାରେ ଜଗି ରହିଥିବା ଭିଜିଲାନ୍ସ ଟିମ ଗୋଲକଙ୍କ ଘରେ ଅତର୍କିତ ଚଢ଼ାଉ କରି ଲାଞ୍ଚ ଟଙ୍କା ଜବତ କରିବା ସହ ଗୋଲକ ବିହାରୀଙ୍କୁ ଗିରଫ କରିଛି। ଭିଜିଲାନ୍ସ ପକ୍ଷରୁ ଗୋଲକ ବିହାରୀଙ୍କ ଘର ଓ ଅଫିସରେ ପହଞ୍ଚି ଖୋଳତାଡ କରିଛି। ସମ୍ୱଲପୁର ଭିଜିଲାନ୍ସ ଘଟଣାରେ ମାମଲା ରୁଜୁ କରି ତଦନ୍ତ ଚଳାଇଛି।

ସିଡିଭିଓ କାର୍ଯ୍ୟାଳୟରେ ଗୋଲକ ଡେପୁଟେସନରେ କାର୍ଯ୍ୟ କରୁଛନ୍ତି। ତାଙ୍କଠାରୁ ୧୫ ହଜାର ଟଙ୍କା ଜବତ କରାଯାଇଛି। ଏହାଛଡ଼ା ଦୁଇଟି ସ୍ଥାନରେ ଭିଜିଲାନ୍ସ ପକ୍ଷରୁ ଚଢାଉ ଚାଲିଛି।
ଜାପାନ ଫର୍ମୁଲାରେ କମ୍ ହେଉଛି ଛାଡପତ୍ର, ତେବେ ଜାଣନ୍ତୁ କଣ ଏହି ଫର୍ମୁଲା ?

ଆଜିକାଲି ବିବାହ ବିଚ୍ଛେଦ ଗୋଟିଏ ସାଧାରଣ କଥା ହୋଇଗଲାଣି । ଯାହା ପୂର୍ବରୁ କେବଳ ୟୁରୋପୀୟ ରାଷ୍ଟ୍ର ଗୁଡ଼ିକରେ ଦେଖିବାକୁ ମିଳୁଥିଲା, କିନ୍ତୁ ବର୍ତ୍ତମାନ ଏହା ସାରା ବିଶ୍ୱରେ ଦେଖିବାକୁ ମିଳୁଛି । ଅନେକ କ୍ଷେତ୍ରରେ ବିବାହର ୨ ବର୍ଷ ନପୁରୁଣୁ ସ୍ବାମୀ ସ୍ତ୍ରୀଙ୍କ ମଧ୍ୟରେ ଆରମ୍ଭ ହୋଇଯାଉଛି ପାରିବାରିକ କଳହ ଓ ଯାହାର ଶେଷ ପରିଣତି ହେଉଛି ବିବାହ ବିଚ୍ଛେଦ । କିନ୍ତୁ ଏସବୁରୁ ଚିକିଏ ଅଲଗା ହେଉଛି ଜାପାନ, ଯେଉଁଠି ରହିଛି ଖୁବ୍ ସୁନ୍ଦର ନିୟମ ।

ଜାପାନରେ ପରିବାରକୁ ଖୁବ୍ ଗୁରୁତ୍ଵ ଦିଆଯାଇଥାଏ । ଅନ୍ୟ ଗୋଟିଏ କାରଣ ହେଲା ଏଠାକାର ଅନେକ ଲୋକ ବୌଦ୍ଧ ଧର୍ମାବଲମ୍ବୀ ଅଟନ୍ତି ନଚେତ୍ ନାସ୍ତିକ ଅଟନ୍ତି । ତେଣୁ ବିବାହ ପରେ ଧର୍ମକୁ ନେଇ ଖୁବ୍ କମ୍ ଝଗଡ଼ା ଦେଖାଦେଇଥାଏ । ଏହାଛଡା ଜାପାନୀ ବିବାହରେ, ସ୍ବାମୀ-ସ୍ତ୍ରୀ ଉଭୟଙ୍କୁ ଖୁବ୍ ଅଧିକ ସ୍ପେସ ଦେବାରେ ବିଶ୍ୱାସ ରଖନ୍ତି ।

ପାଖାପାଖି ୨୦ ବର୍ଷ ପୂର୍ବରେ ଜାପାନୀ ଲେଖିକା ୟୁମିକୋ ଗୋଟିଏ ପୁସ୍ତକ ଲେଖିଥିଲେ । ଏଥିରେ ଲେଖିକା ବିଶେଷ ଭାବରେ ଦର୍ଶାଇ ଥିଲେ ଯେ, ଯଦି ବିନା ବିବାହ ବିଚ୍ଛେଦରେ ସ୍ବାମୀ ସ୍ତ୍ରୀ ଅଲଗା ରହିବେ ଓ ନିଜ ନିଜର ସ୍ଵାଧୀନତାରେ ରହିବେ ତେବେ କେତେ ଭଲ ହୋଇପାରିବ । ଏହି ପୁସ୍ତକକୁ ନେଇ ସେତେବେଳେ ବିବାଦ ଦେଖା ଦେଇଥିଲା, କିନ୍ତୁ ବର୍ତ୍ତମାନ ଏହି ନିୟମ ଜାପାନରେ ଲାଗୁ ହୋଇଯାଇଛି । ବିଶେଷ ଭାବରେ ଜାପାନରେ ସାମାଜିକ ବ୍ୟବସ୍ଥା ଦୀର୍ଘ ସମୟ ପର୍ଯ୍ୟନ୍ତ ଏଭଳି ଥିଲା, ଯେଉଁଠି ପୁରୁଷ ରୋଜଗାର କରିଥିଲେ ଓ ମହିଳା ମାନେ ଘର ସମ୍ଭାଳି ରହୁଥିଲେ । କିନ୍ତୁ, ମହିଳା ମାନେ ଧୀରେ ଧୀରେ କର୍ମଜୀବୀ ହେଲେ, ଯେଉଁ କାରଣରୁ ସେମାନଙ୍କ ଉପରେ ଅନେକ କାମର ଚାପ ରହିଲା ।

ୱିକେଣ୍ଡ ମ୍ୟରେଜ୍ କଣ ? :-
ୱିକେଣ୍ଡ୍ ମ୍ୟାରେଜ ଗୋଟିଏ ଏଭଳି ବ୍ୟବସ୍ଥା ଅଟେ, ଯେଉଁଥିରେ ସ୍ବାମୀ-ସ୍ତ୍ରୀ ବିବାହିତ ହୋଇ ମଧ୍ୟ ଅଲଗା ଅଲଗା ରହିଥାଆନ୍ତି । ଏହା ଏଥିପାଇଁ ହୋଇଥାଏ, କାହିଁକି ନା ଉଭୟ ସ୍ଵାଧୀନ ଭାବରେ ରହିପାରିବେ । ଦମ୍ପତି ଅଲଗା ଅଲଗା ସହରରେ ଘର ନେଇ ରୁହନ୍ତୁ କିମ୍ବା ଗୋଟିଏ ସହରରେ ରୁହନ୍ତୁ ସେଥିରେ କିଛି ଫରକ୍ ପଡ଼ି ନଥାଏ ।
ସାଧାରଣ ସ୍ବାମୀ-ସ୍ତ୍ରୀଙ୍କ ଭଳି ଏମାନଙ୍କ ମଧ୍ୟରେ ମଧ୍ୟ ଇମୋସନାଲ ବଣ୍ଡିଂ ରହିଥାଏ, ଏମାନେ ନିଜ ନିଜର ସୁଖ ଦୁଃଖ ମଧ୍ୟ ବାଣ୍ଟିଥାଆନ୍ତି, କିନ୍ତୁ ତାହା କେବଳ ସପ୍ତାରହ ଶେଷ ବା ୱିକେଣ୍ଡରେ ହୋଇଥାଏ । ଏହାକୁ ମଧ୍ୟ ସେପାରେସନ୍ ମ୍ୟାରେଜ କୁହାଯାଇଥାଏ । ଏଭଳି ମଧ୍ୟ ହୋଇଥାଏ ଯେ, ଉଭୟ ୨-୪ ଦିନ ଏକାଠି ମଧ୍ୟ ରହିଥାଆନ୍ତି । ଏହି ସମୟରେ ଉଭୟଙ୍କ ମଧ୍ୟରେ ସେହି ସମସ୍ତ କଥା ଆଲୋଚନା ହୋଇଥାଏ ଯାହା ସାଧାରଣ ଦମ୍ପତିଙ୍କ ମଧ୍ୟରେ ହୋଇଥାଏ । ପିଲାମାନଙ୍କର ଶିକ୍ଷା ଠାରୁ ନେଇ ବିବାହ ପର୍ଯ୍ୟନ୍ତ । ନଚେତ୍ ଯଦି କୌଣସି ଏମର୍ଜେନ୍ସି ହୋଇଥାଏ ତେବେ ସ୍ବାମୀ ସ୍ତ୍ରୀ ଏକାଠି ହୋଇଥାଆନ୍ତି । ଏହାକୁ ନେଇ ଜାପାନରେ କୌଣସି ଲିଗାଲ୍ ଟର୍ମ ମଧ୍ୟ ନାହିଁ ।
ଗୋରୁ ବୋଝେଇ ମିନି ଟ୍ରକ୍ ଜବତ, ୨୨ ଗୋରୁ ଉଦ୍ଧାର

କେନ୍ଦୁଝର ଜିଲ୍ଲାରେ ଗୋରୁ ଚାଲାଣ ବଢ଼ିବାରେ ଲାଗିଛି । ଏଥିରେ ରୋକ୍ ଲଗାଇବା ପାଇଁ କୌଣସି ଉଦ୍ୟମ ହେଉନାହିଁ । ସ୍ଥାନୀୟ ଲୋକେ ଏ ଦିଗରେ ପଦକ୍ଷେପ ନେଉଥିବା ବେଳେ ପୋଲିସର କାର୍ଯ୍ୟଦକ୍ଷତା ନେଇ ପ୍ରଶ୍ନ ଉଠିଛି ।

ତୁରୁମୁଙ୍ଗା ଥାନା ଜାତୀୟ ରାଜପଥ ୪୯ ନମ୍ବର, ଖିରେଇଟାଙ୍ଗିରି ନିକଟରୁ ଗୋରୁ ବୋଝେଇ ମିନି ଟ୍ରକ୍ ଜବତ ହୋଇଛି । ଗାଡ଼ିରୁ ୨୨ ଗୋରୁ ଉଦ୍ଧାର କରାଯାଇଛି । ୨ଟି ଗୋରୁ ଗୁରୁତର ଆହତ ହୋଇଛନ୍ତି । ଗୋଟିଏ ଗାଡ଼ି ଜବତ ହୋଇଥିବା ବେଳେ ଘଟଣାସ୍ଥଳରେ ଅନ୍ୟ ୩ଟି ଟ୍ରକ୍ ପଳାଇବାରେ ସକ୍ଷମ ହୋଇଛି । ୩ ଜଣଙ୍କୁ ଅଟକ ରଖି ପୋଲିସ ପଚରାଉଚୁରା କରୁଛି ।

ଗୋରୁ ଚାଲାଣ ନେଇ ପୂର୍ବରୁ ସୂଚନା ପାଇଥିଲା ଖିରେଇଟାଙ୍ଗିରୀ ନିକଟରେ ଥିବା ତୁରୁମୁଙ୍ଗା ଥାନା ପୋଲିସ । ଗୋଟିଏ ଗାଡ଼ି ଜବତ ହୋଇଥିବା ବେଳେ ଅନ୍ୟ ଗାଡ଼ି ଫେରାର୍ ହେବା ନେଇ ପ୍ରଶ୍ନ ଉଠିଛି । ପୂର୍ବରୁ ଅନେକ ଥର ଏପରି ଗୋରୁ ଚାଲାଣ ଘଟଣା ସାମ୍ନାକୁ ଆସିଛି । ତେବେ ପୋଲିସର ଅବହେଳା ଏଥିପାଇଁ ଦାୟୀ । ଗୋରୁ ଦଲାଲମାନଙ୍କ ସହ ପୋଲିସର ଭିତିରି ସମ୍ପର୍କ ରହିଛି । ପୋଲିସକୁ କିଛି ଆର୍ଥିକ ଫାଇଦା ମିଳୁଥିବାରୁ ସ୍ଥାନୀୟ ଅଞ୍ଚଳରେ ଗୋରୁ ଚାଲାଣ ବଢ଼ିବାରେ ଲାଗିଛି । ଏଭଳି ଅଭିଯୋଗ କରିବା ସହ ଗୋରୁ ଚାଲାଣ ବନ୍ଦ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି ।
ନବଜାତ ଶିଶୁର ମୃତଦେହ କୁକୁର କାମୁଡି ଖାଉଥିବା ବେଳେ ଉଦ୍ଧାର

ନବଜାତକକୁ ଝୁଣି ଖାଇଲେ କୁକୁର। ଖଣ୍ଡିଆ ଖାବରା ଅବସ୍ଥାରେ ଶିଶୁର ମୃତଦେହ ଉଦ୍ଧାର। ଏମିତି ଏକ ସ୍ପର୍ଶକାତର ଓ ହୃଦୟ ବିଦାରକ ଦୃଶ୍ୟ ରବିବାର ଦିନ ଦେଖିବାକୁ ମିଳିଛି ରାଇରଙ୍ଗପୁର ଟାଉନ ଥାନା ଅଧୀନରେ। ଲୋକେ ଶିଶୁଟିର ମୃତଦେହ କୁକୁର ମୁହଁରୁ ଉଦ୍ଧାର କରି ପୋଲିସକୁ ହସ୍ତାନ୍ତର କରିଥିବା ବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।

ସୂଚନା ମୁତାବକ, ରବିବାର ସକାଳୁ ସକାଳୁ ଇଚିଣ୍ଡା ଗ୍ରାମରେ ଥିବା ଗିରିଶ କବାଡି ଦୋକାନ ନିକଟରେ ଥିବା ବିଲ ଭିତରେ ଏକ ନବଜାତ ଶିଶୁର ମୃତଦେହକୁ ୩ଟି କୁକୁର ଝୁଣି ଖାଉଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ତୁରନ୍ତ କୁକୁର ସବୁଙ୍କୁ ସେଠାରୁ ଘଉଡାଇ ଖଣ୍ଡିଆ ଖାବରା ମୃତଦେହ ଉଦ୍ଧାର କରିଥିଲେ ଓ ପୋଲିସକୁ ଗ୍ରାମବାସୀ ଖବର ଦେଇଥିଲେ। ସେପଟେ ଏକ ନବଜାତକର ମୃତଦେହ କୁକୁର ଖାଉଥିବା ଖବର ପ୍ରଘଟ ହେବାରୁ ସେଠାକୁ ଲୋକଙ୍କ ସୁଅ ଛୁଟିଥିଲା। ପୋଲିସ ସେଠାରେ ପହଞ୍ଚି ମୃତଦେହ ଗ୍ରାମବାସୀଙ୍କ ଠାରୁ ଉଦ୍ଧାର କରି ଆରମ୍ଭ କରିଛି ତଦନ୍ତ।

ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ଅନେକ ଛୁଆଟିଏ ନ ପାଇ ଡହଳ ବିକଳ ହେଉଛନ୍ତି। କିନ୍ତୁ ଭଗବାନ ଛୁଆଟିଏ ଦେଇଥିବା ବେଳେ କେମିତି ଜଣେ ନିଜ ଜନ୍ମିତ ସନ୍ତାନକୁ ଏଭଳି ପକାଇପାରୁଛି? ଛୁଆଟି କେଉଁଠୁ ଆସିଲା, କିଏ ଆଣିଥିଲା, ଶିଶୁଟିର ମାତାପିତା କିଏ? ନା ଶିଶୁଟି କୌଣସି ଅବଞ୍ଛିତ ସନ୍ତାନ ଥିଲା, ତାକୁ ନେଇ ଅଞ୍ଚଳରେ ଚର୍ଚ୍ଚା ଜୋର ଧରିଛି। ପୋଲିସ ଘଟଣାର ସଠିକ ତଦନ୍ତ କରି ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଗ୍ରାମବାସୀ ଦାବି କରିଛନ୍ତି ।
ଭାରତ-ଅଷ୍ଟ୍ରେଲିଆ WTC ଫାଇନାଲ୍: ରିକି ପଣ୍ଟିଂଙ୍କ ଭବିଷ୍ୟବାଣୀ

IPL ଏବେ ଶେଷ ପର୍ଯ୍ୟାୟରେ । ମେ’୨୮ ତାରିଖରେ ଟାଇଟଲ୍ ଲଢ଼େଇ । ଦେଶୀ ବିଦେଶୀ ଖେଳାଳିମାନେ ଏଥିରେ ଅଂଶଗ୍ରହଣ କରିଛନ୍ତି । ନିଜର ଶତ ପ୍ରତିଶତ ପରଫରମାନ୍ସ ଦେଇଛନ୍ତି । କେହି କେହି ଚମତ୍କାର ପ୍ରଦର୍ଶନ ସହ ଟିମକୁ କମବ୍ୟାକ୍ କରିଛନ୍ତି । IPL ପରେ ପରେ ଟିମ୍ ଇଣ୍ଡିଆ ଖେଳିବ ବିଶ୍ୱ ଟେଷ୍ଟ ଚାମ୍ପିଅନସିପର ଫାଇନାଲ୍ ମ୍ୟାଚ୍ । ଏଥିପାଇଁ ଜୋରଦାର ପ୍ରସ୍ତୁତି ଚାଲିଛି । ଏଭଳି ସ୍ଥିତିରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ରିକି ପଣ୍ଟିଂ ଭବିଷ୍ୟବାଣୀ ଚର୍ଚ୍ଚାକୁ ଆସିଛି ।

ଜୁନ୍ ୭ରୁ ଜୁନ୍ ୧୧ ଯାଏ ଖେଳାଯିବ ବିଶ୍ୱ ଟେଷ୍ଟ ଚାମ୍ପିଅନସିପ୍ । ଲଣ୍ଡନର ଓଭାଲ ମୈଦାନରେ ମୁହାଁମୁହିଁ ହେବେ ଗତଥରର ଉପବିଜେତା ଟିମ୍ ଇଣ୍ଡିଆ ଏବଂ ଟିମ୍ ଅଷ୍ଟ୍ରେଲିଆ India vs Aus। ଗତଥର ନ୍ୟୁଜିଲାଣ୍ଡ ଠାରୁ ପରାସ୍ତ ହୋଇ ରନର୍ସଅପରେ ସନ୍ତୁଷ୍ଟ ହୋଇଥିଲା ଭାରତ । ଏଥର କିନ୍ତୁ ଟ୍ରଫି ହାସଲ ପାଇଁ ସମସ୍ତ ଉଦ୍ୟମ କରିବ ଦଳ । ସେଥିପାଇଁ ଟପ୍ ପ୍ଲେୟାରମାନଙ୍କୁ ନେଇ ଟିମ୍ ସିଲେକ୍ସନ ହୋଇଛି ।

ଟିମ୍ ଇଣ୍ଡିଆ ଏବଂ ଟିମ୍ ଅଷ୍ଟ୍ରେଲିଆ ମଧ୍ୟରେ ଜୋରଦାର ଲଢ଼େଇ ହେବ । ଟାଇଟଲ୍ ହାସଲ କରିବାକୁ ଟପ୍ ପରଫରମାନ୍ସ ଦେବେ ଖେଳାଳି । ହେଲେ ବର୍ତ୍ତମାନ ଭାରତୀୟ ଖେଳାଳିଙ୍କ ପ୍ରଦର୍ଶନ ବେଶ୍ ପ୍ରଶଂସନୀୟ । ତେଣୁ ଓଭାଲ ପିଚରେ ଅଷ୍ଟ୍ରେଲିଆ ବିରୋଧରେ ଟିମ୍ ଇଣ୍ଡିଆ ଭଲ ପ୍ରଦର୍ଶନ କରିବ । ଟାଇଟଲ୍ ହାସଲ କରିବାରେ କଙ୍ଗାରୁ ଟିମ୍ ଅପେକ୍ଷା ଟିମ୍ ଇଣ୍ଡିଆ ଅଧିକ ଫେବୋରାଇଟ୍ସ ବୋଲି କହିଛନ୍ତି ରିକି ପଣ୍ଟିଂ ।

ପାଣିପାଗ ଏବଂ ପିଚ୍ କଣ୍ଡିସନ୍ ଅଷ୍ଟ୍ରେଲିଆ ଖେଳାଳିଙ୍କୁ ବେଶ୍ ସୁହାଇବ ତଥାପି ବିଶ୍ୱ ଟେଷ୍ଟ ଚାମ୍ପିଅନସିପରେ ଟିମ୍ ଇଣ୍ଡିଆର ପ୍ରଦର୍ଶନ ଭଲ ରହିବ । ଇଂଲଣ୍ଡ ପରି ହାର୍ଡ ଏବଂ ବାଉନ୍ସ ପିଚରେ କଙ୍ଗାରୁ ଦଳ ଭଲ ପ୍ରଦର୍ଶନ କରିପାରେ ମାତ୍ର ଭାରତ ଏହାଠାରୁ ବହୁତ ଭଲ ବୋଲି ପ୍ରେଡିକ୍ସନ କରିଛନ୍ତି ରିକି । ଯଦି ଭାରତୀୟ ପିଚରେ ଏହି ମୁକାବିଲା ହୋଇଥାନ୍ତା ତେବେ ମ୍ୟାଚ୍ ଜିତିବା ଅଷ୍ଟ୍ରେଲିଆ ପାଇଁ ଏକପ୍ରକାର ସ୍ୱପ୍ନ ହୋଇଥାନ୍ତା ବୋଲି ସେ ନିଜର ମତ ରଖିଛନ୍ତି । ନ୍ୟୁଟ୍ରାଲ୍ ଭେନ୍ୟୁ ଇଂଲଣ୍ଡରେ ମ୍ୟାଚ୍ ଖେଳାଯାଉଥିବାରୁ ଏହା ବେଶ୍ ରୋମାଞ୍ଚକ ହେବ ଏବଂ ଶେଷରେ ଟିମ୍ ଇଣ୍ଡିଆ ବାଜି ମାରିବାର ସମ୍ଭାବନା ଅଧିକ ଥିବା କହିଛନ୍ତି ରିକି ।

ଗତ କିଛି ବର୍ଷ ଧରି ବିଦେଶରେ ନିଜର ଦବାଦବା ବଜାୟ ରଖିଛି ଟିମ୍ ଇଣ୍ଡିଆ । ୨୦୨୦-୨୧ ବୋର୍ଡର-ଗାଭାସ୍କର ସିରିଜ୍ ହେଉ ଅବା ୨୦୨୧-୨୨ ପଟୌଦି ଟ୍ରଫ୍ ସବୁଥିରେ ଭଲ ପ୍ରଦର୍ଶନ କରିଛି ଦଳ । ବର୍ତ୍ତମାନ ମଧ୍ୟ ବଛାବଛା ଖେଳାଳିଙ୍କୁ ନେଇ ମୈଦାନକୁ ଓହ୍ଲାଇବ ଭାରତ । ତେଣୁ ଟିମ୍ ଅଷ୍ଟ୍ରେଲିଆ ପାଇଁ ସେମାନେ ଘାତକ ସାଜିପାରନ୍ତି ବୋଲି ପଣ୍ଟିଂ ଆଗରୁ ସତର୍କବାଣୀ ଶୁଣାଇଛନ୍ତି ।

୧୯୯୦ରୁ ୨୦୦୦ ଏବଂ ୨୦୦୦ ପରଠାରୁ ବର୍ତ୍ତମାନର ଟିମ୍ ବେଶ୍ ଶକ୍ତିଶାଳୀ । ଯେକୌଣସି ଟିମକୁ ଯେକୌଣସି ପରିସ୍ଥିତିରେ ପରାସ୍ତ କରିବାର କ୍ଷମତା ରଖିଛି ଟିମ୍ ଇଣ୍ଡିଆ । ଗତ ୧୦ରୁ ୧୫ ବର୍ଷ ମଧ୍ୟରେ ବ୍ୟାଟିଂ ଏବଂ ବୋଲିଂରେ ବହୁତ ଉନ୍ନତି କରିଛି ଭାରତ । ଟିମ୍ ଇଣ୍ଡିଆରେ ଅନେକ ବିସ୍ଫୋରକ ବ୍ୟାଟସମ୍ୟାନ, ରନ୍ ମେସିନ, ମ୍ୟାଚ୍ ୱିନର, ଟପ୍ ଫାଷ୍ଟ ବୋଲର ସୃଷ୍ଟି ହୋଇଛନ୍ତି ଯେଉଁମାନେ ଏକାକୀ ଦଳକୁ ବିଜୟୀ କରାଇପାରନ୍ତି ବୋଲି ରିକି ପଣ୍ଟିଂ କହିଛନ୍ତି ।

ସିନିୟର ପ୍ଲେୟାର ଚେତେଶ୍ୱର ପୂଜାରା ଏବେ ଇଂଲଣ୍ଡରେ କାଉଣ୍ଟିଂ ମ୍ୟାଚ୍ ଖେଳୁଛନ୍ତି । ପୁରାପୁରି ଫର୍ମରେ ଥିବାରୁ ଅଷ୍ଟ୍ରେଲିଆ ପାଇଁ ଟେନସନର କାରଣ ବଢ଼ିଛି । ଅଷ୍ଟ୍ରେଲିଆ ବିରୋଧରେ ତାଙ୍କର ଭଲ ରେକର୍ଡ ରହିଛି । ତେଣୁ ଫାଇନାଲ୍ ମ୍ୟାଚ୍ ରୋମାଞ୍ଚକ ହେବ, କେହି କାହାରିକୁ ଛାଡ଼ିବେ ନାହିଁ । ଶେଷରେ କିନ୍ତୁ ଭାରତ ଫରରେ ମ୍ୟାଚ୍ ଯାଇପାରେ ବୋଲି ଦିଲ୍ଲୀ ମୁଖ୍ୟ କୋଚ୍ ସୂଚନା ଦେଇଛନ୍ତି । IPL ପରେ ପରେ ବିଶ୍ୱ ଟେଷ୍ଟ ଚାମ୍ପିଅନସିପ୍ ଆରମ୍ଭ ହେବ । ତେଣୁ ଫିଟ୍ ଏବଂ ଇନଫର୍ମ ଖେଳାଳିଙ୍କୁ ନେଇ ଅଷ୍ଟ୍ରେଲିଆ ବିରୋଧରେ ଲଢ଼ିବାକୁ ଟିମ୍ ଇଣ୍ଡିଆ ଲକ୍ଷ୍ୟ ରଖିଛି ।