କଟକ ମୁଣ୍ଡୁଳୀ ଗେଟ ଠାରେ ଗେଟ କର୍ମଚାରୀ ଓ ଛତିଶଗଡ ପର୍ଯ୍ୟଟକଙ୍କ ଭିତରେ ଧସ୍ତାଧସ୍ତି । ଟୁରିଷ୍ଟ ବସରେ ଥିବା ଯାତ୍ରୀ ମାନେ ମୁହାଁମୁହିଁ ହୋଇଥିଲେ । ବସରେ ଥିବା ଛତିଶଗଡର ଟୁରିଷ୍ଟ ମାନେ ସ୍ଥାନୀୟ ଥାନାରେ ଏକ ଏତଲା ଦେଇଥିବା ବେଳେ ସେପଟେ ମୁଣ୍ଡୁଳୀ ଗେଟ୍ କର୍ତ୍ତୃପକ୍ଷ ମଧ୍ୟ ଏକ ଏତଲା ଦେଇଛନ୍ତି । ଏହି ଏତଲା ଆଧାରରେ ଆଠଗଡ଼ ଥାନାରେ ୪ ଜଣ ଗେଟ କର୍ମଚାରୀଙ୍କୁ ଅଟକ ରଖି ପଚରାଉଚରା କରୁଛି ପୋଲିସ। ଗତକାଲି ରାତିରୁ ଛତିଶଗଡର ଟୁରିଷ୍ଟ ମାନଙ୍କୁ ଆଠଗଡ଼ ପ୍ରଶାସନ ପକ୍ଷରୁ ଶୁଖିଲା ଖାଦ୍ୟ ଦିଆଯିବା ସହ ଆଠଗଡ଼ ବିଜୁ ପଟ୍ଟନାୟକ କଲ୍ୟାଣ ମଣ୍ଡପ ଠାରେ ରହିବାର ସମସ୍ତ ବନ୍ଦୋବସ୍ତ କରାଯାଇଛି ।
ସୂଚନା ମୁତାବକ, ଛତିଶଗଡରୁ ୨ଟି ବସରେ କିଛି ପର୍ଯ୍ୟଟକ ଓଡିଶାର ବିଭିନ୍ନ ସ୍ଥାନ ପରିଭ୍ରମଣ କରୁଥିଲେ । ଏହି ସମୟରେ ସେମାନେ ଗେଟରେ ପାର ହେବା ପାଇଁ ଦିଆଯାଉଥିବା ଟଙ୍କାକୁ ନେଇ ଉଭୟଙ୍କ ଭିତରେ ଯୁକ୍ତିତର୍କ, ମାଡପିଟ୍ ସହିତ ବସ ଭଙ୍ଗାରୁଜା ହୋଇଥିଲା । ଏହି ଗଣ୍ଡୋଗଳରେ ବସରେ ଥିବା ୧୧ ଜଣ ଯାତ୍ରୀଙ୍କ ସମେତ ଗେଟର ୩ ଜଣ କର୍ମଚାରୀ ଆହତ ହୋଇଛନ୍ତି । ସେମାନେ ଆଠଗଡ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ଗେଟରେ ଥିବା ଜଣେ କର୍ମଚାରୀଙ୍କୁ ଗୁରୁତର ଅବସ୍ଥାରେ କଟକ ସ୍ଥାନାନ୍ତର କରାଯାଇଛି । ଗେଟର ଥିବା କର୍ମଚାରୀ ଅଧିକ ଟଙ୍କା ମାଗିବାରୁ ପ୍ରତିବାଦ କରିଥିଲେ ବସର ଡ୍ରାଇଭର । ଯେଉଁଥି ପାଇଁ ଉଭୟଙ୍କ ଭିତରେ ବଚସା ଆରମ୍ଭ ହୋଇ ତୁମୁଳକାଣ୍ଡର ରୂପ ନେଇଥିଲା ।
