ଯୁକ୍ତ ଦୁଇ ପରୀକ୍ଷାରେ କମ୍ ନମ୍ବର ରହିବାରୁ ଛାତ୍ରୀ ଏମିତି କିଛି ନିଷ୍ପତ୍ତି ନେଲେ ଯାହା ସମସ୍ତଙ୍କୁ ଚିନ୍ତାରେ ପକାଇଲା । ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହେବାର ଥିଲା କିନ୍ତୁ ଦ୍ୱିତୀୟ ଶ୍ରେଣୀରେ ପାସ୍ କଲେ ବିଜ୍ଞାନ ଛାତ୍ରୀ ।
ନୀଳଗିରି ଏନଏସି ଅଧୀନ ସିମୁଳିଆ ଗାଁର ଲକ୍ଷ୍ମଣ ମହଲଙ୍କ ଝିଅ ଇତିଶ୍ରୀ ମହଲ । ସେ ନୀଳଗିରି ମହାବିଦ୍ୟାଳୟର ବିଜ୍ଞାନ ଛାତ୍ରୀ । ପ୍ରଥମ ଶ୍ରେଣୀରେ ପାସ୍ କରିବାକୁ ଆଶା ରଖିଥିଲେ । କିନ୍ତୁ ଦ୍ବିତୀୟ ଶ୍ରେଣୀରେ ପାସ୍ କରିଛନ୍ତି । ଆଜି ରେଜଲ୍ଚ ଆସିବା ପରେ ଗଭୀର ଭାବେ ମାନସିକ ଆଘାତ ପାଇଥିଲେ । ଶେଷରେ ଛାତ୍ରୀ ଜଣକ ଛାତରୁ ଡେଇଁ ପଡ଼ିଥିଲେ । ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇଥିଲା । ବର୍ତ୍ତମାନ ସେ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି ।
ଆଜି ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଦ୍ବାରା ପରିଚାଳିତ ଦ୍ବାଦଶ ଶ୍ରେଣୀ ବିଜ୍ଞାନ,ବାଣିଜ୍ୟ ପରୀକ୍ଷା ଫଳ ପ୍ରକାଶ ପାଇଥିଲା । ଚଳିତଥର ବିଜ୍ଞାନରେ ପାସ୍ ହାର ୮୪.୯୩ ପ୍ରତିଶତ ଥିବାବେଳେ ବାଣିଜ୍ୟରେ ପାସ୍ ହାର ରହିଛି ୮୧.୧୨ ପ୍ରତିଶତ । ବିଜ୍ଞାନରେ ପରୀକ୍ଷା ଦେଇଥିଲେ ୯୩ ହଜାର ୭୩୪ ପରୀକ୍ଷାର୍ଥୀ । ସେମାନଙ୍କ ମଧ୍ୟରୁ ୭୮ ହଜାର ୯୩୮ଜଣ ପାସ୍ କରିଛନ୍ତି । ପ୍ରଥମ ଶ୍ରେଣୀରେ ୩୯ ହଜାର ୫୭୩ ପରୀକ୍ଷାର୍ଥୀ ଉତ୍ତୀର୍ଣ୍ଣ ହୋଇଥିବା ବେଳେ ଦ୍ୱିତୀୟ ଶ୍ରେଣୀରେ ପାସ୍ କରିଛନ୍ତି ୨୪ ହଜାର ୨୫୭ ଛାତ୍ରଛାତ୍ରୀ । ସେହିପରି ନୟାଗଡ଼ରେ ସର୍ବାଧିକ ପାସ୍ ହାର ୯୬.୪୧ ପ୍ରତିଶତ ଥିବାବେଳେ ଗଜପତିରେ ସର୍ବନିମ୍ନ ପାସ୍ ହାର ୬୧.୫୫ ପ୍ରତିଶତ ରହିଛି ।
