ବାପାମାଆଙ୍କ ଭୁଲ ପାଇଁ ଆଜୀବନ ଜେଲ ଦଣ୍ଡ ପାଇଛି ୨ ବର୍ଷର ଶିଶୁ କନ୍ୟା। ଏମିତି ଏକ ଅଜବ ଦଣ୍ଡାଦେଶ ଦେଖିବାକୁ ମିଳିଛି ଉତ୍ତର କୋରିଆରେ। ଆଉ ବାପା ମା ଙ୍କର ଭୁଲ ଏତିକି ଥିଲା କି, ସେମାନେ ପାଖରେ ବାଇବେଲ ରଖିଥିଲେ। ଏହା ଜଣାପଡିବା ପରେ କୁନି ଝିଅକୁ ହୋଇଛି ଆଜୀବନ ଜେଲରେ ସଢିବାକୁ ନିର୍ଦ୍ଦେଶ। ଆମେରିକାର ବୈଦେଶିକ ବିଭାଗ ପକ୍ଷରୁ ଏହି ତଥ୍ୟ ସାର୍ବଜନୀନ କରାଯାଇଛି। କୋରିଆ ଫ୍ୟୁଚର୍’ ନାମରେ ଏକ ସଂଗଠନର ରିପୋର୍ଟରୁ ତଥ୍ୟ ସଂଗ୍ରହ କରି ଆମେରିକାର ବୈଦେଶିକ ବ୍ୟାପାର ମନ୍ତ୍ରାଳୟ ଉକ୍ତ ରିପୋର୍ଟ ପ୍ରସ୍ତୁତ କରିଛି।
ଆମେରିକା ବୈଦେଶିକ ବ୍ୟାପାର ବିଭାଗ ପକ୍ଷରୁ ପ୍ରସ୍ତୁତ ୨୦୨୨ ‘ଆନ୍ତର୍ଜାତିକ ଧାର୍ମିକ ସ୍ବାଧୀନତା ରିପୋର୍ଟ’ରେ ଉଲ୍ଳେଖ ରହିଛି କି, ଉତ୍ତର କୋରିଆରେ ଅନ୍ୟ ଧର୍ମାବଲମ୍ବୀଙ୍କ ସହ ପ୍ରାୟ ୭୦,୦୦୦ ଖ୍ରୀଷ୍ଟିଆନ ଜେଲ ଦଣ୍ଡରେ ଦଣ୍ଡିତ ହୋଇଛନ୍ତି। ସେହିପରି, ଉତ୍ତର କୋରିଆରେ କୌଣସି ବ୍ୟକ୍ତି ‘ବାଇବେଲ୍’ ରଖିଥିବା କଥା ଜଣାପଡ଼ିଲେ ତାଙ୍କୁ ମୃତ୍ୟୁଦଣ୍ଡ ମିଳବା ସହିତ, ସନ୍ତାନସନ୍ତତିଙ୍କ ସମେତ ସେମାନଙ୍କ ପରିବାରବର୍ଗଙ୍କୁ ଜେଲରେ ଭରିବାକୁ ପଛାଉନାହିଁ ସେଠାକାର ସରକାର।
ରିପୋର୍ଟରୁ ଜଣାପଡିଛି କି, ଉତ୍ତର କୋରିଆରେ ରହୁଥିବା ଏକ ପରିବାର ‘ବାଇବେଲ୍’ ରଖିବା ସହଉପାସନା କରୁଥିଲେ। ଏହା ଜଣାପଡିବା ପରେ ଉକ୍ତ ପରିବାରର ଦମ୍ପତିଙ୍କ ସହ ସେମାନଙ୍କ ୨ ବର୍ଷର ଝିଅକୁ ୨୦୦୯ରେ ରାଜନୈତିକ କାରାଗାର ଶିବିରରେ ଆଜୀବନ କାରାଦଣ୍ଡ ଦିଆଯାଇଥିଲା। ଆହୁରି ରିପୋର୍ଟରେ ଦର୍ଶାଯାଇଛି କି, ଏହି ସବୁ ଶିବିରରେ କଏଦୀ ଥିବା ଖ୍ରୀଷ୍ଟିଆନ୍ମାନଙ୍କ ପ୍ରତି ଅତି ନିର୍ମମ ବ୍ୟବହାର କରାଯାଇଥାଏ। ଆବଶ୍ୟକ ମୁତାବକ ଖାଦ୍ୟ ଦିଆଯାଇ ନ ଥାଏ ଓ ସେମାନଙ୍କୁ ସେଠାରେ ନାନା ପ୍ରକାର ଶାରୀରିକ ନିର୍ଯାତନା ଭୋଗିବାକୁ ହୋଇଥାଏ।
କୋରିଆ ଫ୍ୟୁଚର୍ ସଂଗଠନ ପକ୍ଷରୁ ହୋଇଥିବା ରିପୋର୍ଟରେ କୁହାଯାଇଛି କି, ପୂଜାଉପାସନା କରୁଥିବା, ଧାର୍ମିକ ସାମଗ୍ରୀ ରଖିଥିବା, ଧାର୍ମିକ ବ୍ୟକ୍ତିବିଶେଷଙ୍କ ସହିତ ଯୋଗସୂତ୍ର ରଖିଥିବା ଅଥବା ଧର୍ମ ସମ୍ବନ୍ଧିତ କୌଣସି ପ୍ରଚାର କରୁଥିବା ଲୋକଙ୍କୁ ଉତ୍ତର କୋରିଆ ସରକାର ଭୀଷଣ ନିର୍ଯାତନା ଦେଉଛନ୍ତି। ସେମାନଙ୍କୁ ଗିରଫ କରାଯାଇ ନାନା ନିର୍ଯାତନା ଦିଆଯାଉଛି। ସେଠାରେ ସେମାନଙ୍କୁ ନିରପେକ୍ଷ ବିଚାର ମିଳୁନାହିଁ, ଯୌନ-ହିଂସାର ଶିକାର ହେବାକୁ ହେଉଛି। ମୌଳିକ ଅଧିକାରରୁ ସେମାନଙ୍କୁ ବଞ୍ଚିତ କରାଯାଉଥିବା ରିପୋର୍ଟରେ ଉଲ୍ଲେଖ କରାଯାଉଛି।