ମୟୂରଭଞ୍ଜ ଜିଲ୍ଲା ବଡ଼ସାହି ଥାନା ଅଞ୍ଚଳରେ ଅଭାବନୀୟ ଘଟଣା। ମଶାଣିରେ ଦରପୋଡା ମୃତଦେହ ଖାଇଯାଇଛନ୍ତି ଦୁଇ ଭାଇ। ଏହି ଘଟଣାକୁ ନେଇ ଦୁଇ ଭାଇଙ୍କୁ ପୋଲିସ ଥାନାରେ ଅଟକ ରଖିଛି।
ସୋମବାର ବଡ଼ସାହି ଥାନା ଅଧୀନ ବୀରେଶ୍ୱରପୁର ପଞ୍ଚାୟତ ଦାନ୍ତୁଣି ଗାଁର ଟୁନି ସିଂ ନାମକ ଯୁବତୀଙ୍କର ବଡ଼ସାହି ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ମଙ୍ଗଳବାର ଅପରାହ୍ନରେ ଗାଁ ମୁଣ୍ଡ ଶ୍ମଶାନରେ ଶବ ସତ୍କାର କରାଯାଇଥିଲା। ଶବ ପୋଡା ଚାଲିଥିଲା, ସୁନ୍ଦର ମୋହନ ସିଂ ଓ ନରେନ୍ଦ୍ର ସିଂ ଶବ ପୋଡିବା ଦାୟିତ୍ବ ନେଇଥିଲେ ଓ ଶବ ପୋଡ଼ୁଛି ନା ନାହିଁ ତଦାରଖ କରୁଥିଲେ। ମୃତଦେହ ପ୍ରାୟତଃ ପୋଡିଯାଇଥିଲା, ଅଳ୍ପ କିଛି ବାକି ଥିଲା। ଏହି ସମୟରେ ଉଭୟ ସୁନ୍ଦର ମୋହନ ସିଂ ଓ ନରେନ୍ଦ୍ର ସିଂ ଜୁଇରୁ ଅବଶିଷ୍ଟାଂଶ ବାହାର କରି ନେଇ ଯାଇଥିଲେ।
ଏହା ଦେଖି ମୃତ ଯୁବତୀଙ୍କ ଦାଦା ଲୋବୋ ସିଂ ସେମାନଙ୍କୁ କାହିଁ ମାଂସ ନେଉଛ ପଚାରିବାରୁ ସେମାନେ ଫିଙ୍ଗିଦେବେ କହିଥିଲେ। କିନ୍ତୁ କିଛି ସମୟ ପରେ ଉଭୟ ସେହି ମାଂସକୁ ଖାଇବା ଆରମ୍ଭ କରିଥିଲେ। ଉଭୟଙ୍କୁ ପୋଡା ମାଂସ ଖାଉଥିବା କିଛି ଲୋକ ଦେଖିବାକୁ ପାଇଥିଲେ। ଏହା ପରେ ଗ୍ରାମବାସୀଙ୍କ ଭିତରେ ଉତ୍ତେଜନା ଦେଖାଦେଇଥିଲା। ଏପରି ଅମାନବୀୟ କାଣ୍ଡକୁ ନେଇ ଲୋକେ ଉଭୟଙ୍କୁ ଧରି ନିସ୍ତୁକ ପିଟିଥିଲେ।
ଏହା ପରେ ଲୋକା ସୁନ୍ଦର ମୋହନ ଓ ନରେନ୍ଦ୍ରଙ୍କୁ ବଡ଼ସାହି ଥାନା ପୁଲିସ ଜିମାରେ ଦେଇଥିଲେ। ପୁଲିସ୍ ସେମାନଙ୍କୁ ଥାନାରେ ଅଟକ ରଖି ପଚରାଉଚରା କରୁଛି। ମୃତ ଯୁବତୀଙ୍କ ବାପା ଏ ଘଟଣା ନେଇ ସୁନ୍ଦର ମୋହନ ଓ ନରେନ୍ଦ୍ରଙ୍କ ବିରୋଧରେ ଥାନାରେ ଏତଲା ଦେବେ ବୋଲି ଗଣମାଧ୍ୟମକୁ କହିଛନ୍ତି।