ଅଙ୍ଗନବାଡିରେ ତିନି ମାସକୁ ଦିଆଯାଉଛି ୧୨ଟି ଅଣ୍ଡା । କେତେବେଳେ କେମିତି ଗୋଟିଏ ଗୋଟିଏ ଛତୁଆ ପ୍ୟାକେଟ ଦିଆଯାଉଛି । ଏଥିସହ ପ୍ରସୂତୀଙ୍କୁ ମଧ୍ୟ ମିଳୁନି ସରକାରୀ ଯୋଜନାର ଫାଇଦା । ଏମିତି ଏକ ଅଭିଯୋଗ ଆସିଛି ରାୟଗଡ଼ା ଜିଲ୍ଲା କାଶୀପୁର ବ୍ଲକ ମାଇକଞ୍ଚ ପଞ୍ଚାୟତରେ ଥିବା କଞ୍ଚଗୁମା ଗ୍ରାମରୁ । ସ୍ଥାନୀୟ ବାସିନ୍ଦାଙ୍କ ଅଭିଯୋଗ ଅନୁଯାୟୀ, ଗାଁରେ ଅଙ୍ଗନବାଡି କେନ୍ଦ୍ରଟି ଅନେକ ଦୂରରେ ଥିବାରୁ ମାତ୍ର ୫, ୬ ଜଣ ପିଲା ଅଙ୍ଗନବାଡି ଯାଇପାରୁଛନ୍ତି ।
ଏବିଷୟରେ ଅଙ୍ଗନବାଡି ଦିଦିଙ୍କୁ ପଚାରିବାରୁ ସେ ଉତ୍ତର ନଦେଇ ରାଗି ଯାଉଛନ୍ତି । ଯାହାକୁ ଗ୍ରାମବାସୀଙ୍କ ମଧ୍ୟରେ ତିବ୍ର ଅସନ୍ତୋଷ ଦେଖିବାକୁ ମିଳିଛି । ଏହାକୁ ନେଇ ଅନେକ ଥର ଗ୍ରାମବାସୀ ଅଭିଯୋଗ କରିଆସୁଥିଲେ ସୁଦ୍ଧା ବିଭାଗୀୟ ଅଧିକାରୀ ଏଥିପ୍ରତି କର୍ଣ୍ଣପାତ କରୁନାହାନ୍ତି । କଞ୍ଚଗୁମା ଗ୍ରାମରେ ଥିବା ଅଙ୍ଗନବାଡୀ କେନ୍ଦ୍ରଟି ଅବହେଳିତ ଅବସ୍ଥାରେ ପଡିରହିଛି । ସେଠାରେ କାର୍ଯ୍ୟରତ ଅଙ୍ଗନବାଡୀ ଦିଦି ମୋହେନାବତୀ ଝୋଡ଼ିଆଙ୍କ ନାଁରେ ମଧ୍ୟ ଗ୍ରାମବାସୀ ମାନେ ଅନେକ ଅଭିଯୋଗ କରିଛନ୍ତି । କେନ୍ଦରେ ଦିଦି ଠିକ ଭାବେ କାର୍ଯ୍ୟ ତୁଲାଉନାହାନ୍ତି, ଇଚ୍ଛା ହେଲେ ଆସୁଛନ୍ତି ଇଚ୍ଛା ନହେଲେ ଆସୁନାହାନ୍ତି । କିଛି ପିଲାଙ୍କୁ ରନ୍ଦା ଖାଦ୍ୟ ଦିଆଯାଉଥିବା ବେଳେ କିଛି ପିଲାଙ୍କୁ ମଧ୍ୟାହ୍ନ ଭୋଜନ ଦିଆଯାଉନି ।
ଏପରି ସଙ୍ଗୀନ ଅଭିଯୋଗ ବାବଦରେ ଦିଦିଙ୍କୁ ପଚାରିଲେ କହୁଛନ୍ତି, ଉପରୁ ଯାହା ଅର୍ଡର ଆସୁଛି ତାର ପାଳନ କରୁଛି । ମାସକୁ ମାସ ଛତୁଆ ଅଣ୍ଡା ଦିଆଯାଉଛି । ଜଣେ ହରିଜନ ହେଲପର ଥିବାରୁ ଅନେକ ଅଭିଭାକ ତାଙ୍କ ପିଲାଙ୍କୁ ଅଙ୍ଗନବାଡିରେ ଖାଇବାକୁ ବାରଣ କରିଛନ୍ତି । ତେଣୁ, ଅଙ୍ଗନବାଡିରେ ଜାତିପ୍ରଥା ଭଳି ସମସ୍ୟା ରହିଛି ।
ତେବେ ଏନେଇ ଅଙ୍ଗନବାଡି ସୁପର ବାଇଜରଙ୍କୁ ଯୋଗାଯୋଗ କରିବାରୁ କଥାକୁ ଏଡାଇ ଯାଇଥଲେ । ଶିଶୁଙ୍କ ତଥା ଗର୍ଭବାତୀଙ୍କ ପାଇଁ ଆସୁଥିବା ସରକାରୀ ଯୋଜନା କାହିଁକି ହିତାଧିକାରୀଙ୍କ ପାଖେ ପହଞ୍ଚି ପାରୁନି ତାକୁ ମେଇ ଅନେକ ପ୍ରଶ୍ନ ଠିଆ ହୋଇଛି ।