ସୂଚନା ଅଧିକାର କର୍ମୀ କହି ଠକେଇ ମାମଲା, ରାକେଟର ମାଷ୍ଟରମାଇଣ୍ଡ କାହ୍ନୁ ଚରଣ ପ୍ରଧାନ ଗିରଫ। ଅଭିଯୁକ୍ତକୁ ବାନ୍ଧିଲା କ୍ରାଇମବ୍ରାଞ୍ଚ ଏସଟିଏଫ୍। ପୂର୍ବରୁ ଏହି ମାମଲାରେ ଏସଟିଏଫ୍ ନକଲି ସରକାରୀ RTI ଅଧିକାରୀ କିଶୋର ମିଶ୍ରକୁ ଗିରଫ କରିଥିଲା।
ମୁଖ୍ୟ ଅଭିଯୁକ୍ତ କାହ୍ନୁ ଚରଣ ପ୍ରଧାନ ଖୋର୍ଦ୍ଧା ଜିଲ୍ଲା ଟାଙ୍ଗୀର ବାସିନ୍ଦା, କିନ୍ତୁ ଭୁବନେଶ୍ୱରରେ ରୁହେ। ପେସାରେ ମଦ ବେପାରୀ। କାହ୍ନୁ ର ଏକ ବିଦେଶୀ ମଦ ଦୋକାନ ରହିଛି । ସେ ଏହାର ମାଲିକ। ଏହା ସହ କାହ୍ନୁ ଏକ ଗ୍ରାଜୁଏଟ୍ । କାହ୍ନୁ ଚରଣ ପ୍ରଧାନ ନାମରେ ପ୍ରଥମେ ଏକ ମାମଲା କୋରାପୁଟରେ ଅଛି। ପରେ ଏସଟିଏଫକୁ ଏହାର ତଦନ୍ତ ଦାୟିତ୍ବ ଦିଆଯାଇଥିଲା। ଅତୀତରେ କାହ୍ନୁ ଚରଣ ବିରୋଧରେ ଅନେକ ମାମଲା ବି ରହିଛି। ସେ ଅତି କମରେ ଚାରିଟି ଠକେଇ ମାମଲାରେ ଜଡ଼ିତ ଥିବା ଜଣା ପଡିଛି। ଅନେକ ସାଧାରଣ ଲୋକ କାହ୍ନୁର ନାଁକୁ ସଚିବ / ଅତିରିକ୍ତ ସଚିବ ଇତ୍ୟାଦି ଭାବରେ ନିଜ ମୋବାଇଲରେ ଷ୍ଟୋର୍ କରିଥିବା ଜଣାଯାଇଛି।
ଅଭିଯୁକ୍ତ କାହ୍ନୁ ଚରଣ ପ୍ରଧାନଠାରୁ ଦାମି ମୋବାଇଲ୍ ଫୋନ୍, ଜାଲ୍ ସରକାରୀ ବିଜ୍ଞପ୍ତି / ଅର୍ଡର ଆଦି ଅପରାଧିକ ଦଲିଲ ଜବତ କରାଯାଇଛି। କିଛି ଖବରକାଗଜରେ କିଛି ନକଲି ଚାକିରି ବିଜ୍ଞାପନ ପ୍ରକାଶ କରି ସେ ଠକୁଥିଲା। ସେପଟେ କାହ୍ନୁର ସହଯୋଗୀ କିଶୋର ମିଶ୍ର ନିଜକୁ ଜଣେ ସୂଚନା ଅଧିକାର କର୍ମୀର ପରିଚୟ ଦେଇ ତାର ବରିଷ୍ଠ ଅଧିକାରୀଙ୍କ ସହିତ ଘନିଷ୍ଠତା ଅଛି କହି କ୍ରସର ଲାଇସେନ୍ସ, ମଦ ଲାଇସେନ୍ସ, ସ୍ଥାନାନ୍ତର / ପୋଷ୍ଟିଂ ଆଦି ମାମଲାରେ କୋଟିକୋଟି ଟଙ୍କା ଠକେଇ କରିଥିବା ଜଣାଯାଇଛି। ତାର ଆକାଉଣ୍ଟରୁ କୋଟି କୋଟି ଟଙ୍କାର ନେଣଦେଣ ହୋଇଥିବା ଜଣାଯାଇଛି। ସେ ଥାଇଲ୍ୟାଣ୍ଡକୁ ପଳାଇ ଯାଇଥିଲା। ନିକଟରେ ଓଡ଼ିଶା ଫେରିଥିଲା। ଏହା ପରେ ପୋଲିସ ଉଭୟଙ୍କୁ ଗିରଫ କରିଛି। ଏହା ସହ ଗତ ଚାରି ବର୍ଷ ମଧ୍ୟରେ ଉଭୟଙ୍କ ବ୍ୟାଙ୍କ ଆକାଉଣ୍ଟରେ କେତେ ଟଙ୍କା ନେଣଦେଣ ହୋଇଛି ତାହା ଜାଣିବା ପାଇଁ RBI କୁ ଚିଠି ଲେଖିଛି STF।