ମହାନଦୀର ବାଙ୍କୀ ଜାତମୁଣ୍ଡିଆ ବ୍ରିଜ ଉପରୁ ଡେଇଁ ଆତ୍ମହତ୍ୟା କରିଥିବା ବ୍ୟକ୍ତିଙ୍କ ପରିଚୟ ମିଳିଛି । ଗୁରୁବାର ସଂଧ୍ୟାରେ ନଦୀକୁ ଡେଇଁପଡିଥିବା ବ୍ୟକ୍ତି ତିଗିରିଆ ଥାନା ପାଞ୍ଚ ଗାଁର ବିରଜା ପ୍ରସାଦ ଦାସ । ଅଗ୍ନିଶମ ବିଭାଗ ବହୁ ଖୋଜାଖୋଜି କରିବା ପରେ ଶୁକ୍ରବାର ସଂଧ୍ୟାରେ ମୃତଦେହକୁ ଉଦ୍ଧାର କରିଥିଲା । ଘଟଣାସ୍ଥଳରୁ ଏକ ହାତଲେଖା ଚିଠି ମିଳିଥିଲା । ଯେଉଁଥିରେ ତାଙ୍କ ମୃତ୍ୟୁ ପାଇଁ କେହି ଦାୟୀ ନୁହନ୍ତି ବୋଲି ଲେଖାଯାଇଛି ।
କିଛିଦିନ ତଳେ କେନ୍ଦ୍ର ଗୃହମନ୍ତ୍ରୀ ସାହାରା ପୋର୍ଟାଲର ଉଦଘାଟନ କରିଛନ୍ତି । ଏଥିରେ ପଞ୍ଜିକରଣ କରି ଜମାକାରୀ ସେମାନଙ୍କ ଟଙ୍କା ଫେରିପାଇବେ । ଆଜିଯାଏଁ ଏହି ପୋର୍ଟାଲରେ ୧୮ ଲକ୍ଷରୁ ଅଧିକ ଜମାକାରୀ ପଞ୍ଜିକରଣ କରିସାରିଲେଣି । ଗତକାଲି ପ୍ରଥମ କିସ୍ତିରେ ୧୧୨ ଜଣ ଜମାକାରୀ ୧୦ ହଜାର ଟଙ୍କା ଲେଖାଏଁ ଫେରସ୍ତ ପାଇଛନ୍ତି । ତଥାପି କାହିଁକି ବିରଜା ଆତ୍ମହତ୍ୟା କଲେ ତାହା ସନ୍ଦେହ ବଢାଉଛି । ବର୍ଷବର୍ଷ ଧରି ଟଙ୍କା ଫେରସ୍ତ ପାଇଁ ଅପେକ୍ଷା କରିଥିବା ସାହାରା ଜମାକାରୀଙ୍କୁ ଟଙ୍କା ଫେରସ୍ତ ପ୍ରକ୍ରିୟା ଆରମ୍ଭ ହୋଇଥିବାବେଳେ, ବିରଜା କାହିଁକି ନଦୀକୁ ଡେଇଁ ଆତ୍ମହତ୍ୟା କଲେ ତାହା ମଧ୍ୟ ଏକ ବଡ ପ୍ରଶ୍ନ ।
ସବୁଠାରୁ ବଡ ପ୍ରଶ୍ନ ହେଉଛି, ଏମିତି କଣ ହେଲା ଯେ, ନଦୀରୁ ଡେଇଁ ଆତ୍ମହତ୍ୟା କଲେ ବିରଜା । ଏନେଇ ସାଂଘାତିକ ଅଭିଯୋଗ ଆଣିଛନ୍ତି ବିରଜାଙ୍କ ସଂପର୍କୀୟ ଭାଇ । ବିରଜା ସ୍ଥାନୀୟ ଅଞ୍ଚଳରେ ଜଣେ ସାହାରା ଏଜେଣ୍ଟ ଭାବେ କାମ କରୁଥିଲେ । ସାହାରା ଟଙ୍କା ଫେରସ୍ତ ନେଇ ଗଣମାଧ୍ୟମରେ ବିଭିନ୍ନ ଖବର ପରେ ଜମାକାରୀଙ୍କ ମନରେ ଦ୍ୱନ୍ଦ୍ୱ ସୃଷ୍ଟି ହୋଇଥିଲା । ପଇସା ବୁଡିଯିବା ଆଶଙ୍କା କରି ସେମାନେ ବିରଜାଙ୍କ ଘରେ ପହଞ୍ଚି ଗାଳିଗୁଲଜ କରୁଥିଲେ ବୋଲି ଅଭିଯୋଗ ହୋଇଛି । ବିରଜାଙ୍କ ପୁଅ ମଧ୍ୟ ବାପା, ସାହାରା ଇଣ୍ଡିଆର ଜଣେ ଏଜେଣ୍ଟ ଭାବେ କାମ କରୁଥିଲେ ବୋଲି କହିଛନ୍ତି ।