ସମବାୟ ସମିତିରେ ଋଣ ଦୁର୍ନୀତି ଅଭିଯୋଗ । ଚାଷୀଙ୍କ ନାଁରେ ଦୁଇ କୋଟି ଟଙ୍କା ଚଳୁ ହୋଇଥିବା ଅଭିଯୋଗ। ଗଞ୍ଜାମ ଜିଲ୍ଲା ବେଲଗୁଣ୍ଠା ବ୍ଲକ୍ ଅନ୍ତର୍ଗତ ଇଙ୍ଗିନାଠୀ ସମବାୟ ସମିତିରେ ଦୁର୍ନୀତି ହୋଇଥିବା ଅଭିଯୋଗ ଆଣିଲେ ସ୍ଥାନୀୟ ଚାଷୀ। ପୂର୍ବତନ ସମବାୟ ସମିତି ସଭାପତି ସୂର୍ଯ୍ୟକାନ୍ତ ନାୟକ ଓ ସମ୍ପାଦକ ବିଘ୍ନେଶ୍ୱର ଗୌଡ଼ ମିଶି ଚାଷୀଙ୍କ କୋଟି କୋଟି ଟଙ୍କା ଚଳୁ କରିଥିବା ହେଉଛି ଅଭିଯୋଗ । ଯାହାର ପର୍ଯ୍ୟାପ୍ତ ତଥ୍ୟ ପ୍ରମାଣ ମଧ୍ୟ ରହିଛି। ଟିକେ ନଜର ପକାନ୍ତୁ ଏହି ଦସ୍ତାବିଜ୍ ଉପରେ। ଆର୍ଥିକ ବର୍ଷ ୨୦୧୬-୨୩ ପର୍ଯ୍ୟନ୍ତ ଅଞ୍ଚଳର ପ୍ରାୟ ୧୬୦ ରୁ ଅଧିକ ଚାଷୀଙ୍କ ନାମରେ ହୋଇଛି ଋଣ ହେଲେ ଚାଷୀ ହାତକୁ ଆସିନି ଟଙ୍କା।
କାଳିଆ ବଳିଆ ଯୋଜନାରେ ଟଙ୍କା ଆସିବ କହି ସେମାନଙ୍କଠାରୁ ଆଧାର କାର୍ଡ ସହ ବିଭିନ୍ନ କାଗଜପତ୍ର ନେଇ ଠକିନେଇଛନ୍ତି କୋଟି କୋଟି ଟଙ୍କା । ଏବେ ସଭାପତି ଓ ସମ୍ପାଦକଙ୍କ ବଦଳି ପରେ ଟଙ୍କା ହଡ଼ପ ଘଟଣା ସାମ୍ନାକୁ ଆସିଛି। ଏହାକୁ ନେଇ ସ୍ଥାନୀୟ ଉପ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଛନ୍ତି ଇଙ୍ଗିନାଠି ଗ୍ରାମର ଶହ ଶହ ଚାଷୀ ।
ପୂର୍ବତନ ସମବାୟ ସମିତି ସଭାପତି ଓ ସମ୍ପାଦକଙ୍କ ଠାରୁ କୌଣସି ପ୍ରତିକ୍ରିୟା ମିଳିପାରିନାହିଁ। ତେଣେ ଚାଷୀ ହାତକୁ ଟଙ୍କା ଆସିନଥିବାରୁ ଋଣ ଛାଡ଼ କରିବାକୁ ଦାବି କରୁଛନ୍ତି ଚାଷୀ। ଗଞ୍ଜାମ ଜିଲ୍ଲାପାଳଙ୍କ ଉଦ୍ଧେଶ୍ୟରେ ଉପଜିଲ୍ଲାପାଳ ଦିବ୍ୟଶଙ୍କର ରାୟଙ୍କୁ ଦିଆଯାଇଛି ଦାବିପତ୍ର।