ବହୁ ବର୍ଷ ପରେ ପୂରଣ ହେଲା ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସ୍ଵପ୍ନ। ଦିଲ୍ଲୀ ବିଶ୍ୱବିଦ୍ୟାଳୟରେ ଓଡ଼ିଆ ପଢ଼ିବେ ଛାତ୍ରଛାତ୍ରୀ । ମାତୃଭାଷା ସହ ଗୌରବମୟ ଇତିହାସ ଜାଣିବାର ମିଳିବ ସୁଯୋଗ ।
ଦିଲ୍ଲୀ ବିଶ୍ୱବିଦ୍ୟାଳୟରେ ଓଡ଼ିଆ ଭାଷା ଓ ସଂସ୍କୃତିର ଅଧ୍ୟୟନ ପାଇଁ ସ୍ଥାପିତ ହେବାକୁ ଯାଉଛି ‘ସେଣ୍ଟର ଫର୍ ଓଡ଼ିଆ ଷ୍ଟଡିଜ୍’। ରାଜ୍ୟ ବାହାରେ କୌଣସି କେନ୍ଦ୍ରୀୟ ବିଶ୍ୱବିଦ୍ୟାଳୟରେ ପ୍ରଥମଥର ପାଇଁ ଓଡ଼ିଆ ଭାଷାକୁ ନେଇ ଏଭଳି ସ୍ୱତନ୍ତ୍ର କେନ୍ଦ୍ର ପ୍ରତିଷ୍ଠା ହେଉଥିବାରୁ ଏହାକୁ ଏକ ଐତିହାସିକ ପଦକ୍ଷେପ ଭାବେ ଦେଖାଯାଉଛି।
ଏହି କେନ୍ଦ୍ର ପ୍ରତିଷ୍ଠା ପଛରେ ମୁଖ୍ୟ ଭୂମିକା ନିଭାଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ତାଙ୍କ ଉଦ୍ୟମ ଫଳରେ ପୂର୍ବରୁ ଦିଲ୍ଲୀ ବିଶ୍ୱବିଦ୍ୟାଳୟରେ ‘ଭୀମ ଭୋଇ ଚେୟାର’ ପ୍ରତିଷ୍ଠା ହୋଇଥିବାବେଳେ, ଏବେ ସେଣ୍ଟର ଫର୍ ଓଡ଼ିଆ ଷ୍ଟଡିଜ୍ ସ୍ଥାପନର ସ୍ୱପ୍ନ ସାକାର ହେବାକୁ ଯାଉଛି।
ଦିଲ୍ଲୀ ବିଶ୍ୱବିଦ୍ୟାଳୟର ଡିନ ତଥା ଓଡ଼ିଆ ଷ୍ଟଡିଜ୍ ସେଣ୍ଟରର ଚେୟାରମ୍ୟାନ ପ୍ରଫେସର ବଳରାମ ପାଣି କହିଛନ୍ତି ଯେ, ଓଡ଼ିଆ ଭାଷା ଓ ଓଡିଶାର ଗୌରବମୟ ଇତିହାସକୁ ଜାତୀୟ ସ୍ତରରେ ପରିଚିତ କରାଇବା ଦିଗରେ ଏହା ଏକ ମାଇଲସ୍ଟୋନ୍ ହେବ। ବିଶ୍ୱବିଦ୍ୟାଳୟର ସର୍ବୋଚ୍ଚ ସ୍ତରରେ ନିର୍ଣ୍ଣୟ ନେଇ କାମ ଆରମ୍ଭ ହୋଇଥିବା ସେ କହିଛନ୍ତି।
ଏହି କେନ୍ଦ୍ରରେ ଓଡ଼ିଆ ଭାଷା ସହିତ ଓଡ଼ିଶାର ଇତିହାସ, କଳା, ସଂସ୍କୃତି, ଲୋକପରମ୍ପରା, ଆଦିବାସୀ ଅସ୍ମିତା, ଜଗନ୍ନାଥ ସଂସ୍କୃତି, ସନ୍ଥ କବି ଭୀମ ଭୋଇ ଓ ପଣ୍ଡିତ ଗୋପବନ୍ଧୁ ଦାସଙ୍କ ଅବଦାନ ଉପରେ ଗଭୀର ଅଧ୍ୟୟନ ଓ ଗବେଷଣା କରାଯିବ।
ତାଳପତ୍ର ପୋଥି ଓ ପୁରାତନ ଦଲିଲରେ ଲୁକାଇଥିବା ଓଡ଼ିଶାର ଅମୂଲ୍ୟ ଐତିହ୍ୟକୁ ସଂଗ୍ରହ, ସଂରକ୍ଷଣ ଓ ଲୋକଲୋଚନକୁ ଆଣିବା ମଧ୍ୟ ଏହି କେନ୍ଦ୍ରର ମୁଖ୍ୟ ଲକ୍ଷ୍ୟ ହେବ।
ଏଠାରେ ପ୍ରାୟ ୩୦ଟି ସିଟ୍ରେ ଓଡ଼ିଆରେ ପିଜି ପାଠପଢ଼ା ସହ ଗବେଷଣା ସୁବିଧା ରହିବ। ଦେଶର ଅଗ୍ରଣୀ ଶିକ୍ଷା ପ୍ରତିଷ୍ଠାନରେ ଓଡ଼ିଆ ଭାଷା ପାଠ୍ୟକ୍ରମ ଆରମ୍ଭ ହେବା ଓଡ଼ିଆ ଭାଷା, ସଂସ୍କୃତି ଓ ଓଡ଼ିଶା ପାଇଁ ଗର୍ବର ବିଷୟ।