ମଣିପୁର ଘଟଣାକୁ ନେଇ ରାଇରଙ୍ଗପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଝାଡ଼ଖଣ୍ଡ ମୁକ୍ତିମୋର୍ଚା ତରଫରୁ ଏକ ପ୍ରତିବାଦ ସଭା ଅନୁଷ୍ଠିତ ହୋଇଯାଇଛି । ଗତ ୩ ମାସ ଧରି ମଣିପୁରର ସ୍ଥିତି ଅଶାନ୍ତ ରହିଛି । ସେଠାରେ ନିରିହ ମହିଳାଙ୍କ ଉପରେ ଵର୍ଵୋଚିତ ଆକ୍ରମଣ, ହିଂସା ଆଉ ବ୍ୟଭିଚାର କରାଯାଉଛି । ସେଠାକାର ସରକାର ସୁରକ୍ଷା ବ୍ୟବସ୍ଥାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି । ଭାରତର ମହାମହିମ ରାଷ୍ଟ୍ରପତି ହେଉଛନ୍ତି ଆଦିବାସୀ ବର୍ଗର ମହିଳା । ମଣିପୁରରେ ଆଦିବାସୀ ମହିଳାଙ୍କ ପ୍ରତି ଅନ୍ୟାୟ ଓ ବ୍ୟଭିଚାର ମାମଲାରେ ରାଷ୍ଟ୍ରପତିଙ୍କ ନିରବତା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ତାଙ୍କ ପାଖରେ ସମ୍ବିଧାନର ଅଖଣ୍ଡ କ୍ଷମତା ରହିଛି ଯାହାକୁ ସେ ବ୍ୟବହାର କରି ପାରନ୍ତେ ବୋଲି ଝାଡ଼ଖଣ୍ଡ ମୁକ୍ତିମୋର୍ଚା ତରଫର କୁହାଯାଇଛି ।
ଉପଜିଲ୍ଲାପାଳଙ୍କ ଜରିଆରେ ରାଷ୍ଟ୍ରପତିଙ୍କ ଉଦେଶ଼୍ଯରେ ଏକ ଲିଖିତ ଦାବିପତ୍ର ପ୍ରଦାନ କରାଯାଇଛି । ରାଷ୍ଟପତି ମଣିପୁର ମାମଲାରେ ତୁରନ୍ତ ହସ୍ତକ୍ଷେପ ସହ ଶାନ୍ତି ଫେରାଇ ଆଣିବା ପାଇଁ ଦାବି କରାଯାଇଛି । ଆଗାମି ୭ ଦିନ ମଧ୍ୟରେ କିଛି ପଦକ୍ଷେପ ନନେଲେ ଝାମୁମୋ ଆନ୍ଦୋଳନ ପାଇଁ ରାଜରାସ୍ତାକୁ ଓହ୍ଲାଇବେ ଏବଂ ସେଥିପାଇଁ ପ୍ରଶାସନ ଦାୟୀ ରହିବେ ବୋଲି କହିଥିଲେ ଝାମୁମୋ ପ୍ରବକ୍ତା ସୁନିଲ ମାଝୀ ।