ବିଜୁ ଜନତା ଦଳରେ ବଡ଼ ରାଜନୈତିକ ହଲଚଲ ଦେଖିବାକୁ ମିଳିଛି | ଅରବିନ୍ଦ ମହାପାତ୍ର ଓ ସନାତନ ମହାକୁଡ଼ଙ୍କୁ ହଠାତ୍ ଦଳରୁ ନିଲମ୍ବନ କରାଯାଇଥିବାବେଳେ, ପରେ ଦଳ ଭିତରେ ଅସନ୍ତୋଷ ତେଜିଉଠିଛି | ଏହି ପରିସ୍ଥିତି ମଧ୍ୟରେ ବରିଷ୍ଠ ବିଜେଡି ନେତ୍ରୀ ପ୍ରମିଳା ମଲ୍ଲିକଙ୍କ ସହ ଯାଜପୁରର ବରିଷ୍ଠ ନେତାମାନଙ୍କର ଭୁବନେଶ୍ୱର ବାସଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା, ଯାହା ରାଜ୍ୟ ରାଜନୀତିକୁ ଅଧିକ ଉତ୍ତେଜିତ କରିଛି |
ଏହି ବୈଠକରେ ପ୍ରଣବ ପ୍ରକାଶ ଦାସ, ପ୍ରଣବ ବଳବନ୍ତରାୟ, ପ୍ରୀତିରଞ୍ଜନ ଘଡ଼େଇ, ରାଜନାରାୟଣ ମହାପାତ୍ର, ବିଧାୟକ ବିଶ୍ୱରଞ୍ଜନ ମଲ୍ଲିକ ଓ ସୁଜାତା ସାହୁ ସାମିଲ ହୋଇଥିଲେ| ବୈଠକ ଚାଲିଥିବା ସମୟରେ ହିଁ ଅଚାନକ ନବୀନ ନିବାସରୁ ବରିଷ୍ଠ ନେତାମାନଙ୍କୁ ଡାକରା ଆସିଥିଲା | ଏହା ପରେ ପ୍ରମିଳା ମଲ୍ଲିକ, ସଞ୍ଜୟ ଦାସବର୍ମା ଓ ପ୍ରତାପ ଜେନା ନବୀନ ନିବାସରେ ପହଞ୍ଚିଥିଲେ |
ବୈଠକ ପରେ ବିଜେଡି ନେତା ପ୍ରୀତିରଞ୍ଜନ ଘଡ଼େଇ ଦଳ ଭିତରେ ଅସନ୍ତୋଷକୁ ସ୍ପଷ୍ଟ କରି ଏକ ବଡ଼ ବୟାନ ଦେଇଛନ୍ତି | ସେ କହିଛନ୍ତି ଯେ ଦଳରେ ଏବେ ନୂଆ ନେତୃତ୍ୱର ଆବଶ୍ୟକତା ରହିଛି | ପୂର୍ବରୁ ନିଜକୁ ‘ବାଘ’ ବୋଲି କହୁଥିବା କିଛି ନେତା ଆଜି ‘କାଗଜ ବାଘ’ ବୋଲି ପ୍ରମାଣିତ ହୋଇଛନ୍ତି ବୋଲି ସେ କଟାକ୍ଷ କରିଛନ୍ତି | ଯେତେ ଜଲଦି ଦଳ ରେ ନୂଆ ନେତୃତ୍ୱ ଆସିବ ନାହିଁ, ତେବେ ତାହାର ସିଧାସଳଖ ପ୍ରଭାବ ଆଗାମୀ ପଞ୍ଚାୟତ ନିର୍ବାଚନ ଉପରେ ପଡ଼ିବ ବୋଲି ସେ ଚେତାବନୀ ଦେଇଛନ୍ତି |
ଏହା ସହ ପ୍ରମିଳା ମଲ୍ଲିକ ମଧ୍ୟ ବିଜୟ ମହାପାତ୍ରଙ୍କୁ ନିଶାନା କରି କଠୋର ବୟାନ ଦେଇଛନ୍ତି | ସେ କହିଛନ୍ତି, ବିଜୟ ମହାପାତ୍ର ପୂର୍ବରୁ ବିଜୁ ବାବୁଙ୍କୁ ହରାଇବା ପାଇଁ ଚେଷ୍ଟା କରିଥିଲେ ଓ ପରେ ନବୀନ ପଟ୍ଟନାୟକଙ୍କ ବିରୋଧରେ ଚକ୍ରାନ୍ତ କରିଥିଲେ | ଏବେ ପୁଣି ବିଜେଡିକୁ ଦୁର୍ବଳ କରିବା ପାଇଁ ଚେଷ୍ଟା ଚାଲିଛି ବୋଲି ସେ ଅଭିଯୋଗ କରିଛନ୍ତି |
‘ବାପାଠୁ ପୁଅ ଅଲଗା କି?’ ବୋଲି ପ୍ରଶ୍ନ ଉଠାଇ ପ୍ରମିଳା ପରୋକ୍ଷ ଭାବେ କହିଛନ୍ତି ଯେ ବିଜୟ ମହାପାତ୍ରଙ୍କ ପାଇଁ ହିଁ ତାଙ୍କ ପୁଅ ଅରବିନ୍ଦ ମହାପାତ୍ରଙ୍କୁ ଦଳରୁ ନିଲମ୍ବନ କରାଯାଇଛି | ତେବେ ଏହି ସମସ୍ତ ଅଭିଯୋଗ ନେଇ ଅରବିନ୍ଦ କିମ୍ବା ବିଜୟ ମହାପାତ୍ରଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ମିଳିପାରିନି|
ସମଗ୍ର ଘଟଣାକ୍ରମ ବିଜେଡି ଭିତରେ ଗଭୀର ଅସନ୍ତୋଷ ଓ ନେତୃତ୍ୱ ସଂକଟର ସ୍ପଷ୍ଟ ଇଙ୍ଗିତ ଦେଉଥିବାବେଳେ, ଆଗାମୀ ଦିନରେ ଦଳ କେଉଁ ମୁହାଁ ହେବ , ସେଥିପାଇଁ ସବୁଙ୍କ ନଜର ନବୀନ ନିବାସ ଉପରେ ରହିଛି |