ଭୁବନେଶ୍ୱରରେ “ବିଜୁ ଲିଗାସି” କାର୍ଯ୍ୟକ୍ରମକୁ ନେଇ ରାଜନୀତିକ ମହଳରେ ଏବେ ଚର୍ଚ୍ଚା ଜୋର ଧରିଛି। ୧୭ ତାରିଖରେ ଓୟୁଏଟି ସମ୍ମିଳନୀ କକ୍ଷରେ ହେବାକୁ ଥିବା ଏହି ସମାବେଶକୁ କେବଳ ଏକ ସୃତି ସଭା ଭାବେ ଦେଖାଯାଉନାହିଁ । ବରଂ ଆଗାମୀ ରାଜନୀତିକ ଚିତ୍ରକୁ ଗଢ଼ିବାର ଏକ ମଞ୍ଚ ଭାବେ ଦେଖାଯାଉଛି । ବିଜୁବାବୁଙ୍କୁନେଇ କେବେଳ ରାଜ୍ୟର ନୁହେଁ ବରଂ କେନ୍ଦ୍ର ରାଜନୀତି ମଧ୍ୟ ବେସ ସରଗରମ ହୁଏ । କିନ୍ତୁ ଏଥର ବିଜୁ ଲିଗାସିକୁ ନେଇ ସେମିତି କିଛି ଚର୍ଚ୍ଚା ରାଜ୍ୟ ରାଜନୀତିରେ ଏକ ଭୂମୀକମ୍ପ ସୃଷ୍ଟିକରିପାରେ । କାରଣ ସମାବେଶ ପୂର୍ବରୁ ହୋଇଥିବା ଏକ ଗୁରୁତ୍ବପୂର୍ଣ୍ଣ ବୈଠକ କେବଳ ବିଜେଡିରେ କମ୍ପନ ସୃଷ୍ଟିକରିବ ତା ନୁହେଁ ବରଂ ଉଭୟ ସରକାରୀ ଦଳ ବିଜେପି ଏବଂ ବିରୋଧି କଂଗ୍ରେସ ପାଇଁ ମୁଣ୍ଡବିନ୍ଧାର କାରଣ ହୋଇପାରେ, ଏଥିରେ କୌଣସି ଦ୍ବିମତ ନାହିଁ ।
ସୁପ୍ରିମକୋର୍ଟର ପୂର୍ବତନ ବିଚାରପତି ଅନଙ୍ଗ କୁମାର ପଟ୍ଟନାୟକଙ୍କ ଉପସ୍ଥିତି ଏହି ବୈଠକକୁ ଆହୁରି ଗୁରୁତ୍ବର କରିଛି । ସମାବେଶରେ ବିଜୁପଟ୍ଟନାୟକଙ୍କ ଅବଦାନକୁ ନେଇ ଆଲୋଚନା ହେବାକୁ ଥିବାବେଳେ, ଏହା ପଛରେ ରାଜନୀତିକ ମେସେଜ୍ ରହିଥିବାକୁ ନେଇ ଅନେକ ଆକଳନ କରିଛନ୍ତି । ବିଶେଷକରି ଯୁବପିଢି ଓ ବିଜୁ ପ୍ରେମୀମାନଙ୍କୁ ଏକ ପ୍ଲାଟଫର୍ମରେ ଆଣିବାର ପ୍ରୟାସ ବୋଲି କୁହାଯାଉଛି । ଏହି ମଞ୍ଚ ମାଧ୍ୟମରେ ଏକ ନୂଆ ରାଜନୀତିକ ବିକଳ୍ପ କିମ୍ବା ଚିନ୍ତାଧାରା ଆସିପାରେ ବୋଲି କିଛି ବିଶ୍ଳେଷକ ମନେ ମତ ରଖିବା ଆରମ୍ଭ କରିସାରିଲେଣି ।
ଅନ୍ୟପଟେ ବିଜୁଜନତା ଦଳ ପାଇଁ ଏହା ଚ୍ୟାଲେଞ୍ଜ ହୋଇପାରେ ବୋଲି ମଧ୍ୟ ଆଲୋଚନା ଚାଲିଛି। ବିଜୁ ବାବୁଙ୍କ ନାମ ଓ ଲେଗାସିକୁ ନେଇ ଯଦି ନୂଆ ଭାବେ ରାଜନୀତିକ ଚର୍ଚ୍ଚା ଆରମ୍ଭ ହୁଏ, ତେବେ ଏହା ବର୍ତ୍ତମାନର ରାଜନୀତିକ ସମୀକରଣକୁ ପ୍ରଭାବିତ କରିପାରେ। ବିଶେଷକରି “ଭାରତରତ୍ନ” ଦାବି ପୁଣିଥରେ ଆଗକୁ ଆସିଲେ, ଏହା ଭାବନାତ୍ମକ ଓ ରାଜନୀତିକ ଦୁହିଁ ପକ୍ଷରେ ପ୍ରଭାବ ପକାଇ ପାରେବୋଲି କହିପାରିବା ।
“ବିଜୁ ଲିଗାସି” କାର୍ଯ୍ୟକ୍ରମ କେବଳ ସୃତିକୁ ଉଜାଗର କରିବା ନୁହେଁ, ଆଗାମୀ ରାଜନୀତି ପାଇଁ ଏକ ସଙ୍କେତ ଭାବେ ମଧ୍ୟ ଦେଖାଯାଉଛି । ଏହାର ପ୍ରଭାବ କେତେ ଦୂର ଯିବ ଓ ରାଜ୍ୟର ରାଜନୀତିକ ଦିଗକୁ କେତେ ଦୂର ପରିବର୍ତ୍ତନ କରିପାରିବ ତାହା ରଉପରେ ରହିଛି ଏବେ ସମସ୍ତଙ୍କ ନଜର ।